• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الخميس، 29 مايو 2008

يا واد خلي بالك م الشنطة


حبة يمين ... حبة شمال ... عم الشيخ صالح شغال
عمال بيقرا علي شعر بقرة .. يطفي نور .. يحرق بخور
وبرده العمل مرضيش يغور
ما خلاص يا شيخنا اللبة بانت .. وعرفنا انك عمال بتحلب ياعم تور
------------
وصلنا الى عم الشيخ اللي طب بدون سابق انذار .. وده لان ماما واثقة انى مش ممكن اقبل ان حد يعمل الحاجات دي قدامي او اروح لحد فكانت بتستعمل معايا سياسه الامر الواقع فجابت اخينا ده لحد البيت ومن غير ما اعرف
دخلت الاوضة وقفلت الباب علية وما هي الا ثواني ولقيت ماما فوق راسي ف الاوضة .......تعالي عايزاكي بره شويه
كان بصراحة كل صبري نفذ قلتيلها ماما انا مش هقابل حد
يا بنتي ده راجل بركة ده مبيعملش حاجه غير انه بيقرا قرآن ....عشان خاطري والنبي يا بنتي متكسريش قلبي ....عيب الراجل ف بيتنا
وانا طبعا لازلت عند وعدي لنفسي اني متورطش ف أي حاجه زي دي
ولكن دموع ماما واخر حيلة استخدمتها معايا وهي بتقولي يعني يرضيكي اموت وانا مش مطمنه عليكي ؟
والله اخر مره وبعدها مش هطلب منك تعملي حاجه تاني وعد يا بنتي
دورت الموضوع ف دماغي وقلت وماله طالما حلفت انها المرة دي وبس ونخلص بقي م الوش ده ...قمت غيرت هدومي وخرجت
لقيت ف الصالون اتنين شاب صغير وراجل في اواخر الاربعينيات... لابس جلابية وطاقية بعمة شكلها غريب عاملة زي سلطانية الطرشي
المهم قعدنا وعم الشيخ اخد راحته ف القاعدة ورحرح ع الاخر وقلع البلغة اللي ف رجله والطاقية ... الصراحة بقي شبه المارشال زلطة ... اصله اقرع .... انما مين المارشال زلطة ده ....... ما علينا
المهم عمنا ده قعد علي كرسي الطقم وربع رجليه ولا كأنه قاعد ف كتاب الشيخ كفتة ...انا بصراحة كنت هتنقط اصلي لسة فارشة بياضات الطقم
كل شوية الراجل يقول للي معاه خلي بالك م الشنطه ...... ابص للشنطه الاقيها شنطه بلاستيك ..... ايه المهم اللي فيها دي .....ما علينا يمكن دي شنطة حمزة ... الا النصيبة متعرفوش مين حمزة !!!
المهم الراجل قعد يتكلم عن انجازاته وخيره اللي مغرق البلد ومعرفته بالناس المهمين وفضله عليهم وازاي انه بيعمل ده كله ف سبيل الله وعلي غفله يقطع كلامه و يضرب الشاب اللي معاه ...... يا واد خد بالك م الشنطه
وقعد يقولي طبعا يا دكتورة انتي مش مقتنعه بوجودي بس هقولك يا بنتي فيه ناس مؤذية وبيمرضوا الناس بالسحر واحنا بعون الله بنفك السحر ده وبعدين احنا علاجنا بالقرآن هو القرآن مش كلام ربنا ولا ايه ..........ويبص للي معاه بطرف عينه... ياواد الشنطة
ايوه يا سيدنا الشيخ..... بس ربنا قال وماهم بضارين به من احد الا بإذن الله ... ولا ايه مش معايا انت برده
ونعم بالله يا بنتي بس الرسول نفسه اتسحر واتفك سحره بالمعوذتين
يا سيدنا دي رواية مش مؤكده
طيب يا بنتي مش انتي بتقري قرآن .......ويقطع كلامه وهو بيبص للي معاه ...
يا واد خد بالك م الشنطة
الحمد لله يا سيدي
طيب فيها ايه لو انا اقرالك
المهم انا عشان أخلص مجادلتهوش كتير لانه اصلا مش علي علم
المهم طلب مني اقف قدامه مباشرة ... وبعد ما بدأ يقرا والشهاده لله كان كل اللي بيقراه من القرآن بس كان ساعات صوته يوطي بحيث مسمعش بيقول ايه المهم قال ...... لو فيها حاجة خليها تتحدف لورا وفجأة لاقتني بتحدف لورا زي ما يكون حد بيشدني وانا بقاوم
طيب لو هو مسلم خليها ترفع ايدها اليمين
وكأني فقدت السيطره علي دراعي اليمين اللي ابتدي يترفع لوحده وبشاور بيه زي تمثال ابراهيم باشا ابو اصبع يعني..... وانا بحاول امنعه لكن دون جدوي
بعد كده سكت شويه
وبعدها قالي شوفي يا بنتي انتي اخوكي التحتاني مانع ان حد يقربلك ولازم يخرج منك عشان تشوفي عدلك
انا كنت ببصله بنظرة ذهول وانا مش مصدقة
ازاي انا فقدت السيطره علي جسمي كده
بعدها طلب مني البس جلابية بيضا لبست وقعدت قدامه وبدأ يقرا من تاني وانا بصراحه استهوتني اللعبه عايزة اعرف ايه الاخر
لكن المرة دي اقعدت اردد ف سري
بسم الله الذي لا يضر مع اسمه شئ في السموات ولا في الارض وهو السميع العليم
انا قريت من هنا وهو ابتدأ يتلخبط ويعيد من الاول ويشكشك صباع رجلي الصغير بدبوس من تحجيبه ماما ...... ويبص للي معاه يا واد خد بالك م الشنطه اه يا بن .......
المهم بعد ما زهق قالي هو انتي بتقولي ايه ف سرك قولتله انت الاصول تبقي عارف انا كنت بقول ايه ..... ولا ايه
من غير ما يبصلي بص للي معاه تاني.... اللي معاه رد عليه ورحمه ابويا مخلي بالي من أم الشنطة
قالي ع العموم خلاص انتي دلوقتي مافكيش حاجه
احنا نجيناكي خلاص
ماما وشها تهللت اساريره .....خلاص بقي مشكلتي اتحلت
و انا رغم ان انا فقست اللعبة من بدري بس الا ان انا انتهزت الفرصة اقطع علي ماما الطريق ف السكة دي واتظاهر ان انا صدقت عشان انهي القصة دي بلا رجعة
: يعني خلاص يا سيدنا الشيخ انا بقيت كويسه
هو : ايوه يا بنتي
: يعني مفيش داعي اروح لحد تاني
هو : وهو غضبان قوي كأني شتمته ايه تروحي لحد تاني يعني ايه جربي تروحي للدجالين اللي يفسدو الدنيا عليكي ويتلفوكي احنا يا بنتي عالجناكي بما يرضي الله
انا وانا عنية بتزغرد لأني عارفة ان انا خلصت من الموال ده للابد
يعني خلاص يا سيدنا الشيخ مفيش داعي لاي حاجه تاني
قلتلك يا بنتي خلاص انتي ربنا هيكرمك من هنا ورايح هتتفتحلك الابواب
كل ده وماما بتقول ف نفسها ......... عشان تعرفي لما امك تقولك حاجه

وانصرف عمنا ده بعد ما عمل اللي عمله في سبيل الله واخد 200جنيه معرفش ف سبيل ايه
المشكله اللي كانت مموتاني ساعتها كان نفسي اعرف ايه اللي ف الشنطة ؟!

54 التعليقات:

ReEm يقول...

هههههههههه

بجد حلو الحوار ده بوست جميل اوي
المهم انك خلصتي من الموضوع بذكاء وقطعتي سكة الدجل دي نهائي و والدتك اقتنعت انك خفيتي خلاص ربنا يرزقك الزوج الصالح
بس بجد نفسي اعرف ايه اللي في الشنطة دي
يكون عفريت مثلا؟!

kochia يقول...

بس مش كنتي تعرفي الشنطة فيها ايه
طيب انا دلوقتي عاوزة اعرف
فلوس مثلا .. حاجات ناس مثلا هيشوف لهم
ولا حب يعمل واحد مهم جايب معاه واحد يشيل شنطة وراه
ولا يمكن عشان حس انك مش مقتنعة اوي اتلخبط وحب يستخبي فيها
المهم انا حصل لي موقف مشابه كدة في معظم التفاصيل بس من غير الشنطة ممكن ابقي احكيهالك مرة علي رواقة
سلام

Ahmed Kamal يقول...

محتويات الشنطة ممكن تكون :
- عرف ديك مات بالسكتة القلبية
- سحلية يتيمة
- عين هدهد أحول
- الحجاب اللي كان حايلف الحاجات دي فيه لو ماكنتيش خفيتي

المهم إن محتويات الشنطة دلوقت زادت كمان طقطوقة و شمعدان لفهم الواد الصغير و انتي بتتحدفي لورا و عامله فيها ابراهيم باشا .

بيني و بينك ماما تستاهل الغرامة ، بس كله يهون في سبيل الكوشة .

تحياتي :)

غير معرف يقول...

طب انا مفهمتش حاجة
يعنى هو كان بيسحرلك ولا ايه
مش بتقولى انك اتحدفتى لورا فعلا وان دراعك اليمين اترفع لوحده
ده معناه ايه برضه
انا مفهمتش حاجة

بس هى الشنطة كان فيها ايه
كنتى سالتى الراجل الشنطة دى فيها اييييييييه؟
فيل
فييييييل
فييييييييييييييييييل

سلام

Unknown يقول...

يا ستى تلقيه كان جيبلكو زياره بس هو خايف تتفتح الشنطه تنط ف وشكو و لا حاجه........تحياتى

رئـــــيسـة حزب الأحلام يقول...

ياترى اية اللى فى الشنطة
حاجة تحير ؟؟؟؟؟؟؟؟؟؟؟؟؟؟؟
انت عندك مقرة على التشويق جميلة اوى
تحيات وياريت تعرفلنا اية اللى فى الشنطة

بنوته مصرية يقول...

تصدقي اني اتعرضت للموقف ده وفعلا بليحاء بيخلوكي تعمل اللي هما عوزينه

بس السؤال هنا ايه اللي كان في الشنطة

انا لو منك كنت فتحتها وشوفت فيها ايه
هههههههه
واللي يحصل يحصل

لكي تحياتي

أميمة كامل يقول...

أهم حاجة انك عرفتى تقنعى الراجل انك

مقتنعة به وريحتى ماما علشان ما تقعش

ضحية ناس من دى تانى

كوكي يقول...

الحمد لله ماما اقتنعت ان العقدة اتفكت وسكة الدجل كدة تبفي اتقفلت
برضو الجواز قسمة ونصيب
بكرة ييجي العدل متقفليش باب الامل

شهد الكلمات يقول...

يمكن من جواكي خالص جدا كان نفسك مشكلتك تتحل عشان كدة اتحدفتي لورا و رفعتي دراعك

رحــــيـل يقول...

السلام عليكم
ازيك ياسوسا
بجد كويس انك فقتسى الراجل ده
وعلىا لعموم اهو كله جه فى مصلحتك انتى عشان ماما تبطل تزن عليكى
هههههههههههه
بس صحيح هى الشنط كان فيها ايه؟؟؟؟

الـجـدة فـصـيـحـة يقول...

السلام عليكم ورحمة الله وبركاته


اللى في الشنطة
سؤال محير كل الناس

بصي هو أنتِ ومامتك سبتوا الراجل ده مع المساعد بتاعه
وهو طلب منك تعدي أو تكوني قدامه بطريقة هو اللي حددها
وأكيد المكان اللي حدده

وفي الغالب الشنطة دي هايكون فيها عدة النصب بتاعته
وهو يبان انه مش بيعمل حاجة وبيقرا قرآن وبس
لكن مساعده هو بينفذ خطته من خلال الشنطة

لكن جميل انك من جواكي مقتنعه ان كل حاجة من عند ربنا وبإذنه

وربنا ييسر الأحوال


تحياتي

صاحب المضيفة يقول...

ههههههههههههههه


تعرفي


أحلى حاجه عمليتها انك قريتي القران في سرك وهو بيهجص الهجص ده


ربنا يثبتك على الحق والخير ويرزقك فوق ماتتمنين يارب



دمت بخير

Dr-Ahmed يقول...

ههههه هيكون في الشنطه ايه يعني غير.. اي حاجه هبل في هبل ههههههههههههه

بوست راااااائع

بحور الحنين يقول...

السلام عليكم
عسل ياسوسا كل ما ادخل عندك المدونه احس بجد انى قاعده فى بيوت كتيره مصريه بينعمل فيها زى اللى بتقولى عليه واكتر
انا سعيده اوى اوى بكتاباتك
ربنا يوفقك ويجعلك الفرح قريب

الفارس الملثم يقول...

هههههههههه

لا مينفعش الكلام ده , انا برده عاوز اعرف ايه اللي في الشنطه , ميكنش كان مخبي في عفريت صغير هههههههه

200 وفي سبيل الله ونعم التقوي , بس هو مادكمش فاتوره بالفلوس دي ولا دي اتعاب العفاريت ؟؟؟؟؟؟

تحياتي
محمد

غير معرف يقول...

تصدقى انا قلت انتى فى الاخر هتقولى ايه الى فى الشنطه
انا عايزة اعرف بقى ايه الى كان فى الشنطه.. مليش دعوة
:))

بس انتى بجد اتحدفتى لورا وايدك اترفعت لوحدها؟؟؟؟؟؟؟؟

هموت واعرف
اصلى الحقيقه مش مقتنعه بعم الشيخ ده ليكون هو الى سحرلك وانتى واقفه
:)))))))))))

بس حلقه مشوقه
سلامى
:))

funckydoctor يقول...

أكيد الشنطق فيها فيل
بوست مميز
تحياتى

دكتور بهــدوء يقول...

بجد ارفع القبعه احتراما لعقلك وذكائك
وعلاقتك بالله
فعلا انت هااايله ومدونتك كلها ولا اروع بصراحه

المـــفـــــــقــــــــوعـــــة مــرارتـهــا يقول...

هايكون فيه ايه
هاتلاقيها الفلووووس اللي بيلمها في سبيل الله
بس انا عاوزة اعرف خلاكي تتنطري لوري إزاي ؟
ورفعتي ايديكي غصب عنك إزاي
ده ممكن يكون هو اللي سحرلك

رئيس جمهوريه نفسى يقول...

احلى حاجه انك قفلتى الباب الى يجيلك منه الريح علشان اهل البيت كله يستريح

عاشقة القمر يقول...

لا ده انا كده اللي الفضول هيقتلني ونفسي اعرف شنطة عم الشيخ كان فيها ايه :)
بس الحمد لله ان طنط حلفت خلاص وارتحتي من الحاجات العجيبة دي .. وربنا يكرمك يا قمر ..

حبيبـــــــة القمـــــر يقول...

ايه الكروته دي بقى
انتي كده شوقتينا نعرف ايه اللي رجعك لورا ... ليكون سحرك يابنتي
طب ماتبعتي تجيبيه تاني بس المرة دي تتحري عن حكاية الشنطه

بس كويس انك قريتي في سرك بوظتي اللي كان بيعمله

دعاء مواجهات يقول...

يمكن فيها العفريت ولا حاجة

هههههههههههههههههههههه

بجد والله جدعة لانك رددتى الدعاء

ربنا يحميكى

وبعدين سيبك من اى حد متخلف بيبصلك نظرة مش بترضيكى

ربنا عاوز كدة

تحيااتى ليكى ياقمر

مستنياكى عندى

سلاام

سنووايت يقول...

ههههههههههههههه
حمدلله علي السلامة يعني كدة خلاص مفيش عفاريت تاني

غير معرف يقول...

انا اقول لك فى الشنطة ايه
حاجة بسيطة جدا اسمها
الانتباه
علشان يشتت انتباه الموجودين وعقلهمم يشتغل على معرفة ايه الى فيها وتوقع ايه الى هيخرج منها وما يركزوش معاه
منذر

غير معرف يقول...

لا للعنوسة

بس صديقني انا بقول نعم للعنوسة والف خيبة على الجواز

سعدت بمرورك وسعدت بمدونتك

لك الود

مريم العجيلي / هذياني مع اصدقائي بس ما عرفتش ادخل

RaRa يقول...

مساء الخير
بوست جميل انما الفضول هيموتنى وكان نفسى اعرف ايه اللى فى الشنطة ومستنيه اخر الحوار عشان اعرف لكن معرفتش ياترى كان فى ايه فيها

snohe يقول...

الموضوع مهم فعلا
بعض الناس حينما يشعر بمشكله لا يعرف لها حل علمى يتجهه الى المنهج الخرافى لحل مشكلاته
اختى العزيزه لاتستمعى الى مثل هؤلاء الدجالين
وانا اعتقد ان الخير قادم من عند الله

Unknown يقول...

هي الشنطه كان فيها ايه

مش كنتي فتحتيها و ريحتي نفسك و عرفتينا

الدجل و الشعوذه منتشرين اوي و للأسف كلو بأسم الدين

بس فكرتك كانت جميله و ذكيه اوي

تحياتي

هوة فى أيه؟؟soso يقول...

تصدقى وأنا كمان أموت وأعرف أيه اللى فى الشنطه
يمكن كيس لحمه ولاغ ب 50 قرش عيش مهى الحاجات ديه بقت كنز الزمان الجميل اللى احنا فيه
بس صحيح ايه اللى خلاكى ترجعى لورا وترفعى أيدك؟؟؟
على العموم متشوقه أعرف أيه اللى حصل بعد كده
متتأخرييييييييييش من فضلك
ووحشاااااااااااااااانى بجد والله

Butterfly يقول...

جامده جدا الحكايه دى
بس أنا بصراحه مش معاكى فى انك طويعطى مامتك
بس الحمد لله انك فقستى اللعبه
هههههههههه

Eldebug يقول...

يابنتى الشنطة دى كان فيها الحاجات اللى بتضايق الراجل وهوه بيشتغل فكان عاينها جوه لحد ما يخلص ... يعنى مثلا لو كنتى دورتى على دماغك ساعتها كنت هتلاقيها جوه بس انتى ماخدتيش بالك بس

mohamed يقول...

sosa plzzzzzzzzzzzzzzzzzzzzz nazly el post el gay bsor3a 2na nfy 23rf eh gwa el shanta:D:D:D:D:D

Mafrousa يقول...

هههههههههههه
ههههههههههههه
يا سوسه..والله قلبى عندك انا عارفه احساسك عامل إزاى..و مقدره مامتك برده شعورها ايه ..؟
بس انتى شاطرة انك قعدتى تقولى كده فى سرك..بوظتى عليه الليله ...كان زمانكو دلوقتى متأشطين من كله ....وكله جوه الشنطه
بس أنا بقى حموت و أعرف ...ايه اللى كان فى الشنطه؟؟؟؟

غير معرف يقول...

وانا كمان عايزة اعرف اللي في الشنطة هههههههههههه بس مامتك دي دماغ بجد
بس مين اللي كانوا مع سيدنا شمهورش ده؟ بودي جارد ولا بتوع الشنطة؟

ميس سوسة،، سكر

قوس قزح يقول...
أزال المؤلف هذا التعليق.
قوس قزح يقول...

الشنطة دى اكيد اكيد مليانة فلوسه

ماهى لو عدة الشغل مكنش خاف عليها اوى كده

دى اكيد فلوس احلام الناس و انخداعهم فيه

و على فكرة جربى كده تقفى شوية لوحدك فى وضع ثابت هتلاقى ان جسمك مع الوقت بيميل
هم بيعرفوا يستغلوا المعلومات العلمية للجسم زى بالظبط الساحر اللى بيظهر فى التليفزيون و بيستخدم الخدع البصرية

و يارب ماما تكتفى فعلا بهذا القدر

rtrcbh يقول...

السلام عليكم ورحمه الله وبركاته
جميل اوى حين قال لك
ايه تروحي لحد تاني يعني ايه جربي تروحي للدجالين اللي يفسدو الدنيا عليكي ويتلفوكي احنا يا بنتي عالجناكي بما يرضي الله
هههههههههههههههههههههههه
والدليل
الشنطه مش قلوله

عروسة ننوسة يقول...

هههههههههه...تعرفى انا بقى قريت البوست علشان اعرف ايه اللى فى الشنطة....انتى سكر ودمك خفيف موت

maiosha يقول...

الشنطة دى فيها إيه؟؟ فيها إيه؟؟

والله يا سوسة إنتى المفروض تعملى مسابقات زى بتاعة 0900.. واللى يقول الشنطة دى كان فيها إيه يكسب 5 جنيه .. يالا إنشاله ماحد حوش

واحد بيدور علي قلبه يقول...

علي فكره انا اول مره ادخل عندك المدونه شدتني من تعريفك لنفسك وحلو البوست دا قوي بفكر اعمل جمعية لا لعنوسة الشباب ما احنا برضه ممكن نعنس ولا ايه رايك بدل ما نلاقي نفسنا قاعدين عند الشيخ بندور علي فك العمل

ٍSOU يقول...

حمدالله على السلامة يارب يهدى المهمهات كلهم ... و لما هو خايف ع الشنطة كدة جبها معاه لية؟؟

*سمر* يقول...

بجد بجد بجد يا سوسن انتى وهمية...
انا حبيتك جدا جدا والله...

انا مكنتش متابعة الفترة اللى فاتت بسبب الامتحانات ..بس جيت وقريت كل البوستات ..كلهم حلوين اوى ..

حاولى تقدمى فى مدونات مصرية للجيب فى العدد اللى جاى ..انا واثقة ان شاء الله اكيد اكيد هيخدوا منك موضوعات...

ان شاء الله اتوقع انى الاقى سلسلة كتب بأسمك فى القريب العاجل :))

shahy يقول...

بصي ياسوسة انا قريت المدونة من الاول بس لسة ماخلصتش وماما زعقتلي وقالتلي انتي بقالك اربع ساعات قومي وكفاية كدة


حبيت بس اقولك اني هارجعلك تاني واعلق على موضوعك

تحياتي

بنت مصريه يقول...

ههههههههههههههههههههه
يا لهوى يا سوسن
دا انا اتخضيت عليكى قوى
والله اتفزعت
على فكره يا سوسو
لو مكنش الراجل ده اخد 200 جنيه كان يمكن اقولك عنده حق
بس يمكن مصنعيه وللا حاجه
والله يا سوسو مش عارفه بس انا اعرف ناس كده كتير
وف الجواز بالزات
بس تفسرى بأيه عدم السيطره على جسمك
مش عارفه
خلاص الميه تكدب الغطاس انتظرى عريس اليومين دول
بوست جمييل جدا
اتمنى تنورينى

حوار مع واحد مش فاهم يقول...

بما اني كده كده
واحد مش فاهم
فانا معرفش مين حمزه

Unknown يقول...

ازيك يا سوسو
وحشتينى جداا بجد والله
بصى بوستك هايل وانا قاعدة بضحك من اللى علمتيه فى الراجل هههههه
هو اللى عايز يحضر عفاريت عليك مش انتى اللى تخرجى عفاريتة هههه
طريقتك مش ممكن بجد هايلة
انتى ما حاولتيش تكتبى قصص او روايات قبل كدة؟؟
حاولى واكيد هتنجحى وانا اول قارئة ان شاء الله


بالتوفيق يارب دايماا
ولا تحرمينا من بوستاتك الهايلة
انتى بتقولى حاجات رهيبة

عًٍمًرٌٍوٍ آلنْوٍبٌَِى يقول...

هههههههههههههههههههههههههههههههه
بوست جميل جدا
والاجمل منو الزكاء الى ظهر عليكى علشان تتخلصى من الهبل ده
انما الشنطة دى بقا الظاهر كان فيها فيل زى فيلم طاقية الاخفا مهو كلو سحر فى سحر والظاهر ان المشكلة مش فيهم المشكلة فى الفيل
ههههههههههههههههههههههههههههه

تحياتى ليكى ياقمر وربنا يحميكى من كل شر

واتمنى انك تشرفى مدونتى المتواضعة

أحمد بكر يقول...

لا صحيح ايه اللى فى الشنطه
انتى بتقولى فقست اللعبه طب ازاى خلاكى تحركى ايدك
على العموم ربنا يرفع عننا البلاء و كل شئ اسمه و نصيب
تحياتى و تقبلى مرورى

aldesoki يقول...

سوسى ...

طبعا استمتعت بالحوار ولغتك الجميلة وموضوعية السرد ...يجنن ..؟

وضحكت كثيرا على بعض المواقف ،
وبرده كان نفسي أعرف أيه إللي في الشنطة دي ،يمكن كان فيها العفريت ..الله أعلم!!

المهم أنا دخلت مدونتك بالصدفة ، وكانت أجمل صدفه ، سأتابعك

تحياتي واحترامي

كوني بخير ، وعلى الله يكون جالك نصيبك.. وإلا ..؟

Eldebug يقول...

هوه انتى اللى اتاخرتى فى البوست الجديد ولا انا اللى حاسس كده علشان بدخل اششوف كل يوم .... لا يا سوسا اوعى تتاخرى علينا كده ... مستنيييين

walaa يقول...

هما الاهالى مش هيبطلو الاعتقاد فى الحاجات الخزعبليه دى
كل شىء بيد الله واللى ليه نصيب فى حاجه هشوفها
قل لو اجتمعت الامه على ان يضروك بشىء لن يضروك الا بشىء قد كتبه الله لك
ولو اجنمعوا على ان ينفعوك بشىء لن ينفعوك الا بشىء قد كتبه الله عليك رفعت الاقلام وجفت الصحف

تحياتى ولاء

Waleed Fareed يقول...

فعلا تتمتعين بخفة دم جميلة
ولكنك تناقشين قضية خطيرة وهي اي حد حصله حاجة يروح يقولك الجن
ويروح للراجل بتاع الشنطة"أظن الشنطة كان فيها الغلة"
بس بذمتك مزعلتيش علي المتيناية