• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الخميس، 1 مايو، 2008

طنــط فيفي سكـــوول للاطفال الكوول


لكل الاطفال الكوول .. سارعووا بالانضمام الى طنط فيفي سكوول

رقص ودانس ودق طبوول .. معانا مستقبلكم مش معقوول

اما اذا كنت من اصحاب العقوول .. فابقى قابلني إن فلحت يا كشكول
------------------------------
ومرت الايام وزئردة إجتازت الفترة العصيبة بتاعة الحضانة بعد ما طفشت كل اصحابها منها وأخيرا بقت في أولي ابتدائي .
طبعا ايامها انا كنت في الاعدادية وبدأت احلامي الوردية إن ماما هتبدأ تتعامل معاها زي ما عملت معايا وهتبتدي تخليها تشيل شغل البيت
في يوم من ذوات الايام كنت قاعدة وماسكة كتاب العلوم وقاعدة بذاكر وعنها ولقيت صوت جاي م الصالة ... صوت ماما وهي بتزعق
.....
خرجت لقيت زئردة قاعدة ف منتهي الهدوء وماما بتتشال وتتحط قدامها ...في ايه يا ماما ؟

ماما : تعالي اتفرجي يا ستي ....وتبص لزئردة وهي بتقول اقول لاختك يا هانم انتي عايزة ايه
وزئردة هانم ما عليها الا انها تضحك
..... : مالها ياماما
ماما : انا كنت قاعدة اذاكرلها واجب الحساب والهانم طبعا مش مركزة .. وبعدين قالتلي ماما انا عايزة شيبسي قمت ناديت حسني البقال يبعتلنا الشيبسي و بعدين رجعت اشوف الاكل اللي ع النار وقلتيلها حاولي تحلي الواجب على بال ما ارجع
لاقيتها داخلة عليـَة المطبخ وبتقولي ..... خلصت يا ماما
ابص ف الكراسة ملاقيش حاجه .....ايه ده يا بنتي
انا خلاص خلصت .. خلصتي ايه فين اللي حلتيه

قالتلي .... لا محلتشي حاجه اصلي مش هروح المدرسة دي بعد كده
ماما : ليه بقي إن شاء الله
زئردة : هروح المدرسة بتاعة طنط فيفي
ماما : ايه مدرسة مين ؟
زئردة : مدرسة طنط فيفي يا ماما
ماما : مين اللي قالكك كده يا بت
زئردة : المذيعة في التليفزيون قالت ان طنط فيفي عبدة عندها مدرسة خاصة حلوة خالص خالص , اليونيفورم بتاعهم بودي هاف ستوميك بينك وشورت ريد ,
ولا تحية العلم ياي يا ماما ياي يهوس , بيغنوا وفى ايدهم الصاجات
يا مصر يا حلوة يا مقمعة يا مهد الرقص والطرقعة .
نسيت اقولكم ان البنت من صغرها كانت لهلوبة ف الانجليزي عقبال عيالكوا اصلها دخلت تخريبي لغات ماما : امشي يابت ......... ده اون ماي ديد بودي .
زئردة: ايه ده يا ماما انت عندك ريد بودي .. غريبة عمرك ما لبستيه.
وهنا تصرخ ماما يا سووووووووووسن شيلى البت ديه من ادامى هتموتني هتفرسنى .. مش هتستريح الا لما تجبلي انهيار عصبي .
---------
فاشد نهى من ايدها واسحبها لاوضتنا في محاولة لفض الموضوع الا ان الفكرة كانت مسيطرة عليها وواكلة دماغها لكن وصلنا لصفقة مرضية – اصل نهي م الاخر بتاعة مصلحتها – اننا نجيب لها واك مان على انها تشيل فكرة مدرسة طنط فيفي ديه من دماغها مؤقتا
------
وياريتنا ما جبناه .. من يوميها والهانم ليل ونهار ماشية والواك مان فى ودانها حتى وهي بتمسح الشقة .. وده مش بيحصل الا مرة كل سنه.. ولما تكون عايزة حاجة من ماما ..
كانت الهانم تمسك الممسحة وترقص علي سيراميك الشقة رايح جاي على انغام اغنية أي ام باربي جيرل إن باربي ورلد .. كمون باربي .. كمون باربي .. اووه واا اووه .. فانتساستك والله فانتاستك .. هي دي النضافة ولا بلاش ..


الله يرحمك يا تيتا نحمدو كان بردو ليها طقوسها الخاصة في المسح ماكنتش تمسح الشقة الا وهي لابسة يونيفورم النكد جلابية سودا وقامطة كوحلي وتقعد وهي راحة وهي جاية تقول انا اللي استاهل كل اللي يجرالي .. الله يخربيتك يا أم فوزية ... كان يوم ......
طبعا ام فوزية دي كانت الخاطبة اللي جوزتها لجدو ...يكونش ده التطور اللي كان بيحكي عنه

الاسطي داروين ؟!


كله ده كوووم والتلفزيون والفيديو كوووم تانى .. كانت تحفظ اسامي الممثلين تقولش ولاد عمها ولا تفوفتش فيلم ولا اغنية لدرجة ان ليلة امتحان الجبر بتاعها لاقتها سايبة المذاكرة وقاعدة ادام التلفزيون
سوسن : بتعملي ايه يا نهي مش وراكي امتحان بكرة
نهى وهي بتقزقز اللب الي قدامها وبتشوح بايديها : خلصت خلصت
سوسن : يابنتي قومي الهي يهديك الماس غلس
نهي : يا بنتي كبري تتدبري ...... هش بقي عايزة اتفرج ده فيلم لكاميرون دياز يا بنتي
طبعا انا لا كنت اعرف مين كاميرون ولا مين دياز فوقفت زي الهابلة ابصلها
نهى : يالهوي يا بنتي متعرفيهاش .... ده جهل ... دي امية
إن جيتو للحق اتكسفت من نفسي في حد ميعرفش الكاميرون ؟
-------
وبعد جهد مضنى في زق نهى في التعليم بالعافية دخلت الكلية وكانت مصاريفها لوحدها ميزانية اشي شرايط ريكي مارتن علي حسن الاسمر علي عمرو دياب واشي بوسترات ولا ضوافرينها وشعرها .......مقلوكوش
والغريب إن ماما كانت بتبقي فرحانة قوي وهي شايفة الهانم ماسكة المبرد وبتساوي ضوافرها واحنا في المطبخ انا علي الغسالة وماما بتغسل المواعين
-------
هييييه اقول ايه ولا ايه انا طولت عليكوا النهاردة ..
بس استنوا صبروكو علية
هقولكو ا اللي عايزين تعرفوه ف الحلقة الجايه

64 التعليقات:

رئـــــيسـة حزب الأحلام يقول...

هههههههههههههههههههههههههههه
تحفة وبجد مدرسة الرقص دى فين اساليلى اختك عليها عاوزة اشترك وشاكلك جامدة اوى طريقتك تحفة

رئـــــيسـة حزب الأحلام يقول...

ولا طريقة المسح الجديدة دى تخبل ايوة كدة حبة نعنشة

di el2mr يقول...

حلوه قوى البلوج بتاعتك
بجد جميله
واضح ان اختك مغلباكى
فكرتينى بيا انا واختى
هههههههههههههههههه
اظاهر الكبار دايما هما العاقلين وبتوع المسئوليه
والصغيرين هما الهوااااااااااانم

هاجر يقول...

حلوة بس انتي شايلة من اختك اوي كدة لية
هي عارفة انك بتكتبي عنها؟؟؟؟؟؟

امل يقول...

تصدقي اختك فعلا ناصحة
وعندها بعد نظر
وعارفه ازاي تخطط للمستقبل
بوست دمه خفييييييييييييف

مفقوعة مرارتي من حماتــــــــــــي يقول...

يا مصر يا حلوة يا مقمعة يا مهد الرقص والطرقعة

مش بزمتك نشيد وطني يهوس
انا هااعمل مدرسة وهاستلفه منك

soso يقول...

والله يا ميس سوسه
أختك ديه تفقع المرارة السليمه
وبعدين أنا نفسى أفهم أزاى تكونى على الغساله وهيه بتظبط ضوافر حضرتها
فييين المساواه؟
فييييييين الدم الاحمر؟
فييييييييين شخصيتك يا أوختى؟؟
لالالالااااااا يا سوسو
لازم تنتقمى
ههههههههه

بس يا سوسه عشان خاطرى
ولا أقولك عشان خاطر نهى ححلفك بالغاليه
متغيبيش علينا فى الكتابه
أنا بكون متشوقه أوى أعرف ايه اللى حصل بعد كده
أوعدينى متغيبيش
لانى عايزة أعرف كل حااااااااجه
فاهمه ؟؟؟
كل حااااااااااجه

انين الحزن يقول...

المدونه جميله جدا

واسلوبك حلو اوي بيجذب


مرسي لكلامك الجميل في مدونتي ونورتيني

واتمني التواصل اوكيتو

سلامووووووووووز

وزة

انين الحزن يقول...
أزال أحد مشرفي المدونة هذا التعليق.
انين الحزن يقول...
أزال أحد مشرفي المدونة هذا التعليق.
عاشقه الفردوس يقول...

هههههههههههههههههههههه
ايه ده

ده انا اتشليت من زئرده دي


دي لو اختي
كان هيجيلي عصبي
كويس اني بنت وحيده


مستنيه بوستاتك الجديده


حلوة اوي مدونتك

la3lahakhier يقول...

ههههههههههههه
دى مدرسة ايه دى
زئردة بدات كدا تعلقنا ودا مش حلو هه
وبعدين ايه حكاية الاخوات الكبار مابقاش لهم خلق ليه بس
مستنية اوهو
كل التحية

Soooo يقول...

من كام يوم قاعد باقلب في الموبيل بتاع اخويا باشوف اي حاجه جديده .. كليبات ولا اغاني ولا بتاع

الاقيلك بنات اخويا واللي اكبرهم عندها 11 سنه .. عاملين لنفسهم كليب رقص طبعا طفولي ومسخره .. وهم اللي مصورينه ومخرجينه ومدخلين عليه اغنية بتاعة سعد الصغير ومهيسين قوي


بجد بجد .. ماكناش عيال



ملحوظه
هو انتي حاقده على اختك ومش عايزاها تتفرج على كاميرون دياز ليه .. طب ده حتى ممثل حلو قوي .. هو مش ممثل تركي برضك؟؟؟؟




سلامووووووووووووووز

يوميات فنانه مفروسه جداا يقول...

sosa
****
والله مبطلت ضحك الله يحظك يا شيخه والله
ايه ده دمك خفيف جدا والله
وبعدين ماله الرقص ده حتي بيعمل احلي دماغ ههههههههههههههههه
انا قريت البلوج بتاعك كله والله خطير
صعبان عليا اوي عم عبده والله هههههههههههههههههههههههه
يلا كملي نتتاخريش علينا في الكتايه
وانا عازماكي تاخدي القهوه عندي تاني بلوج علي ايدك الشمال
مستنياكي
تحياتي ليكي

Eldebug يقول...

هههههههههههههههه
على فكرة بقى انتوا وقفتوا فى طريق مستقبلها ... دى كان زمانها بتقبض بالدولار دلوقتى .... واسمها على كل لسان ..اقصد مشهورة طبعا

بس اطمنى خلاص معدناش محتاجين مدارس رقص دلوقتى ...ربنا يخليلنا قناة الاوو تى فى كانت بتشغل حلقات تعليم رقص

وعلى راى عادل امام ... لو كل واحد عزل علشان ساكن تحته رقاصة ... البلد كلها هتعزل ... ههههههههههههههههههه

karim يقول...

هم دوول اللى ينفعوا اليومين دوول كان جدى مرة قالى اللى ينفع فى البلد دية الرقاصة ولاعب الكرة. اشكرك لمرورك واعدك بالمتابعة

بنت مصريه يقول...

هههههههههههههههههه
دا انتى عسل واختك كمان تفطس من الضحك وزوقها حلو قوى ف الاغانى
دى بتسمع اكوا يا بنتى
بتفكرنى بيا لما كنت قدها
وعلى فكره لو تلاحظى اى اختين كده
واحده تبقى عايقه ومتضايقه
والتانيه تبقى
زاهده الحياه هههههههههههههه
احييكى عالمدونه الجميله واتمنى تنورينى

الفارس الملثم يقول...

هههههههههههههههههه

مش عارف بجد هي زئردة اللي حكايتها حكاية ولا انتي اللي اسلوبك دمه خفيف اوي وملوش حل , بجد اسلوبك جميل جدا

بس انتي عارفه مدرسه فيفي عبده دي هي اللي ليها مستقبل , لان اغلب خريجين الجامعه بيقشروا بصل والراقضات هما مستقبل البلد في جلب العمله الصعبه هههههههههه

بس مين كاميرون دياز ,ده كان مقرر علينا في التاريخ مممممممممم

تحياتي
محمد

أميرة الاحزان يقول...

هههههههههههههههههه
بجد البلوج بتاعتك دى حلوووووووووووووووة اوووووووووووى ...

bar2ash يقول...

مش عارف اقول ايه
بصراحه بوست جنان واسلوبك اجن واختك اجن واجن

بصراحه انا معجب بيها وياريت تسلميلي عليها عرفتي هتقوليلها ايه

قوليلها برقش بيسلم عليكي هههههه
بعيدا عن الهزار بقي بجد البلوج جميل جدا وصاحبته اجمل ربنا يوفقك

انا برقش دي اول زياره وان شاء الله متكونش الاخيره

اتمني تشرفيني

bar2ash

canary يقول...

هو بعد كدة فاضل حاجه تانى تقوليها؟
دة كدة حلو اوى
عموما البنت الكبيرة هى اللى بتبقى شايله البيت على دماغها
انا عندى اختى الصغيرة كدة برضه
ايه هانم
متصحاش من النوم غير على الاكل ومتخرجش الشارع الا لو هتشترى طقم جديد ليها
فكرتينى ليه بالمضروبه دى . هييييه دنيا .
تحياتى على المدونه الجميله

maiosha يقول...

مش ممكن يا سوسة لتانى مرة مش عارفة أقولك إيه
والله العظيم إنتى بتحكى عن أختى الصغيرة نهى .. طب بجد بجد إنتى متعرفيهاش

أصل حتى إنتى لو بتتكلمى عن أختك بشوية مبالغة فده اللى بيحصل معايا بالظبط

كل حاجة حتى كلمة خلصت

قلبى عندك يا حبيبتى أنا أكتر واحده حاسة بيكى بجد

ربنا يخرجنا من تحت إيديهم وإحنا لسه بعقلنا

Butterfly يقول...

لووووووووووووووووووووووووووووووووول
بجد مبطلتش ضحك
شكرا جدا

ra7eel يقول...

ههههههههههههه

لا بجد ربنا يكون فى عونك
وبعدين البنت شكلها موهوبه من صغرها

لا لا لا ازاى تحروموها من مواهبها دى
هههههه

يخرب عقلها بجد

مستنيه اشوف اللى حصل تانى مناها

يــوم جــديد يقول...

ما هو دا اللي بينفع دلوقتي
غسيل ايه ومواعين ايه يا سوسا
الحاجات دي بقت خلاص موضة قديمة أوي
وبعدين ازاي تحرمي أختك البنت الرقيقة الهادية النسمة دي من مدرسة الرقص ؟؟
دا تسيب ..دا استهتار
جبر ايه وماس ايه اللي عايزاها تتعلمه
الكلام ده كان زمااااااااااان
احنا في زمان طنط فيفي وأبلة باربي وكاميرون .... هو كان اسمه كاميرون ايه ؟

بصراحة أسلوبك رائع
بوست في الجون جدا

f four a يقول...

هههه ( صبركوا عليا )* دي لينا احنا ولا لزئرده هانم..

الرقص .. ياسلام..وفي أحسن من كده..ان شاء الله من بعد مساباقات استار أكادمي ومسابقات الرقص...ووسائل التعليم الحديثه...كل الجيل الجديد هايكونوا مشاهير وراقصين وراقصات

ماتيلا بينا نرقص...ياسلام ياسوسه...انتي مالك نكديه كده..خليكي في المطبخ بتاعك..

آآآآآآآآآه ياقلبي

سلام بقه

keep In Toutch

جيهان علي يقول...

السلام عليكم ورحمة الله وبركاته

طب والله أختك دي عسل
ماهي النوع اللي ماشي اليومين دول
بجد اللى مكبرين دماغهم وعايشين حياتهم كدة بروقان
لا ضغط
ولا عصبي
ولا أي أمراض بتاعة حرقة الدم دي


تحياتي

shirry يقول...

حلوة اوي البوست دا
هي اول زيارة صحيح بس مش الاخيرة ان شاء الله
بجد اسولبك حلو اوي
وعايزة اقولك ان مش انتي لوحدك اللي كدة والله انا عندي اختوات ويعتبروا من نفس العينة بس هما لسة صغيريين
ربنا يستر

بالتوفيق

وابقي تعالي بقي
انا مستنية زيارتك في ندونتي المتواضعة

Sister Of The Moon يقول...

هههههههههههههههههههههههههههههه
رائعععع جداااااا
جمييلة جدا القصص اللي بتحكيها
واسلوبك هايل
استمري في القصص دي
احنا مستنينها

cenotaph يقول...

يا خرابي عليكي انتي جامده بجد دمك زي العسل بجد أكتبي تاني انا هستنه اللي هتنزليه

whisper TaNgOoO يقول...

انا قاعده بضحك ضحك هستيرى من اول البوست
رغم انى مكتئبه عل اخرى
ربنا يهديلك زئرده

تــــــــــ(حـنة)ـــــــر يقول...

انا لسه أول زيارة ليا هنا
بس صدقينى جو البلوج عندك حلو قوى
وخلاص بقى يا ستى مستنيه الباقيه
تحياتى و بالتوفيق إن شاء الله فى الجاى
و اتمنى التواصل

إيمان بلاعو يقول...

أشكرك miss sosa على التعليق الذي تركتيه لي على مدونتي، كم كنت سعيده به ،لإنه ثاني تعليق وصلني ،كم كانت كلماتك رقيقة ومشجعة،أما بالنسبة لمدونتك (الطريق إلى الكوشة) أسمها دمه خفيف جداً،وأسلوبك فيه شقاوة،والصورة بجد فكرتها رائعة، أما عن رأيي فيما دونتيه،أنصح الأخت الكبرى بأن تكون مزيجاً بين شخصيتها الجادة المسؤلة وبين شخصية إختها لأن كلاهما مطلوب،وصحيح في جانب منه، وقد أضحكتيني بالجملة التي كتبيها عن تحية العلم(يا مصر يا حلوة يا مقمعة يا مهد الرقص والطرقعة)،، دائماً أنتظر تعليقاتك فيما أكتبه من سطور بمدونتي... إيمان بلاعو ... سطوراً أعجبتني

دكتور بهــدوء يقول...

واااااااااااااااو
ما شاء الله
بجد هايله
ونهي
ياعيني عليت ماكنتش طفل دا كان الواحد اخره بالونه العيد
وبرنامج عروستي
مش مدرسه فيفي وكاميرون دياز

nor يقول...

اهلا بيكي سوسه
بس عايزة اعرف فين الطريق ...وازاي؟؟
للكوشه؟؟

appy يقول...

بصى يا حبى ابن اختى ولد وبيحب الرقص احنا شعب على زمبلك هههههههههه كله

وبعدين دى اختك كووووووول مستقله خالص ههههههههههه سبيها ربنا يخليها

Salwa يقول...

جميييييييييييييييييل

دمك زي العسل والله

زئرده دي مكبره مكبره

في انتظار الحلقه القادمه

تحيااااااااااتي

Randa elhamamsy يقول...

سعدت بزيارتك لى أمس وتعليقك وتشجيعك لى فلك منى كل الشكر-أما بالنسبة لمدونتك وكلماتك وحكاياتك فهى فعلاً رائعة وحقيقى دمك خفيف جداً ولطيفه جداً فى تعبيراتك-ازحت همومى عنى عندما قرأت سطورك وحكاياتك-مبروك عليكى مدونتك وحقيقى حلوة كتير وبكرة تلاقى زوّار بالملايين.
تحياتى لك وتمنياتى لك بكل الخير
راندا

صفا يقول...

والله انتى عسوله اوى وبلوجك ظريف جدا
وشكرا على مرورك عندى فى المدونه
متتاخريش علينا بئه
مستنيه بوستاتك بفارغ الصبر
ولازم تطالبى بالمساواه
انا جايه اهدى النفوس بس مش اكتر
ههههههه

mohmed ismil aly يقول...

أولا أشكرك على التعليق على طواحين البنفسج .وبجد انا سعبد جدا لأنى اتعرفت على أديبه على مستوى عالى من الكتابه ,أتا شخصيا أستمتعت بكل كلمه .حقيفى بدون مبالغه انتى اديبه ممتازة .
محمد اسماعيل على

novana يقول...

ميرسي علي ذوقك وكلامك الجميل بجد ده البلوج بتاعك هو اللي فعلا خطير ربنا يكرمك ان شاء الله ودمك خفيف جداااااااااااا

Amy يقول...

شوفي يا سوسا يا ينتي. دايما البنت الكبيرة متمرمطه كدا في العيلة و دايما الصغيرة متهننه. انا من رأيي تعملي مظاهرة و تقدمي احتجاج رسمي و تضربي عن الغسيل لحد ما يبتدوا يساووا بينكم.

Ema يقول...

شكرا على تعليقك على مدونتي .
أسلوبك سلس وجميل ربنا يوفقك وتقدري تحاربي العنوسه .
متنسيش تكرري الزياره

maha miho يقول...

بقولك ايه؟ انتي ما تطوليش بين الحلقة والحلقة عشان انا عايزة اعرف بقيتها انتي فاهمه ولا لأ؟ ايه رأيك في ذوقي العالي في الطلبات؟ ههههههههه
لا بجد والله بسرعة بسرعة

حسين بكري يقول...

انا قلت انهم خلصوا
يعني أحمد رجب، ويوسف عوف، ومحمود السعدني ويوسف معاطي
بس الله عاطي
جاب لنا سوسو

nanooo2100 يقول...

اولا يا قمرايه ميرسي خااالص على حاجتين
اولها انك علقتي عندي في البلوج
والتانيه ان بتعليقك عندي خليتيني اشوف البلوج بتاعك الجميل اووووي ده
بجد تسلمي على اسلوبك الجميل والشيق

ياأبت...إني رأيت يقول...

مدونتك جميلة جدا , انا اول مرة ازورها , تتميز انها موضوعاتها خفيفة علي الروح والقلب ولا تشعري بملل

إيمان بلاعو يقول...

Miss Sosa ... حقيقي سطورك ظريفة،وأسلوبك خفيف الظل،هذا ما لاحظته بعدما قرأت الرسالة اللي بعنوان (زئردة هانم وعم عبده)،(محكمة)،،،والصورة اللي في (زئردة هانم وعم عبده)متفصلة على الرسالة... أستمري،، وعقبال مانبارك لك على أول كتاب ،والذي يحمل نفس أسم مدونتك (الطريق إلى الكوشة)،واللي أكيد حيحقك مبيعات عالية،ولكن في ذلك الحين تذكري كلامي... إيمان بلاعو ... سطوراً أعجبتني...

dina يقول...

هههههههههههههههههههه
طب و الله العظيم انتى و اختك زى العسل...استضيفونى عندكم فى البيت شوية و النبى عشان انا شايلة و معبية من الثانوية
هههههههههه
بجد بجد جو المدونة يجنن و مستنيين جديدك

mostafarayan يقول...

في انتظار القادم
ربنا يعينك

حسبي الله ونعم الوكيل يقول...

اسلوبك تحفة فنية

NilE_QueeN يقول...

هو كل الاخوات الكبار كده

مانا مجربه

يظلموا اخواتهم ويتخيلوا انهم صح

يعيني عليا وعليكي يا نهي مظاليم والله


بس كلامك لزيز هستحمل الظلم دا عشان كده بس

rain man يقول...

العنوان وحده .. عبارة عن فيلم كوميدي بطولة مشتركة ( جيم كاري و احمد حلمي ) .. عايزة ايه بقى ؟
:D

دكتور حر يقول...

طريقه ممتعه ومميزة في الحكاء





متابع

Tamer Nabil يقول...

ايوة هو دة التتطور

بدل البيسى خليهاا كوكولا

فى انتظار جديدك

تحياتى

shayma يقول...

بتفكرينى بيا انا واختى
بس اسلوبك بجد تحفه ودمك زى العسل

وحلو تحيه العلم الجديده تصدقى اليق


سلامى يا مس سوسه

shaimaa samir يقول...

ههههههههههههههههههههههههههههه

يا مصر يا حلوة يا مقمعة يا مهد الرقص والطرقعة

تحفففففففففففففففففففففففة

بجد راااائعة
مستنيةالباقىىىىىىى

cenotaph يقول...

merciiiiiiiiii على تعلايأك دمك زي العسل

david santos يقول...

Excellent post.
Have a nice week.

عاشقة القمر يقول...

تحفه جدا .. ودمك زي السكر وطريقة سردك واسلوبك مالهومش حل .. ده انا شكلي مش همشي من هنا ..

متضامنون للأبد يقول...

تحية نحن فريق كامل حضرنا زعلانين من مكتوب

متضامنون للأبد يقول...

نجدد علاقاتنا بكم وشكرا لكل من شرفنا

د / احمد فارما يقول...

ههههههه مدرسه ابله فيفي..

بجد فكره الموضوع جميله اووووي لا والانجليزي اللي في النص كمان ... هههه

شكرا علي الموضوع وتقبل تواجدي في مدونتك ..

تم اضافه مدونتك الي مدونتي

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘