• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

السبت، 24 مايو، 2008

تخاريف وهلوسة حمص وترمسة

فانتوماس يا فانتوماس
أكلتـَك فتـة قلقاس .. وسقيتك شوربة نسناس
ارحل ارحل يا خنـَاس
اكسر قلة واشرب كاس .. وافتح بابنا من الترباس
لاجل يجينا ابن الناس .. فيهادينا ياقوت و ماس
ويغدينا لحمة راس .. ويعشينا فروت أناناس
----------------
ما بين ابونا حمص والشيخة ترمسة بدأت ماما وخالتو سهير رحلة البحث عن حل للقضية
كل يومين ماما و خالتو سهير مع بعض بيعملوا ايه ....... بيحاولوا يفكو العمل
طبعا انا ماحدش يجرؤ يقولي تعالي معايا نروح ف حته لاني عاهدت نفسي متورطش ف الكلام الفارغ ده
بس المشكلة الاكبر ان أي تعليمات ترجع بيها ماما البيت علي ان انا انفذها والا ضغطها هيعلي ومقلوكوش بقي ...........
خدي البتاعة دي حطيها في هدومك.............. ايه دي ياماما ......دي شبكة صياد هي اللي للعريس تصطاد
وده حجاب تحطيه ف الهدوم حجاب قبول هو اللي هيجيب العريس علي طول
ويا سلام بقي لما ماما تصحيني بالليل الساعة 4 الفجر
أقوم مفزوعة ... ايه يا ماما ... النحل بتاع المعمل مات
ماما : نحل ايه وبتاع ايه .... نحلة لما تقرصك يا شيخة ... انا محضرالك الحمام عشان تستحمي
..... : يا ماما استحما الساعة 4 هو حد اشتكالك ان انا معفنه .. هى ريحتى وصلت للجيران .. الصبح ... الصبح ياماما أتاوب وانا بحاول ارجع للنوم
ماما تقعد تطبطب علي ضهري بحنية كدة وتقولي يالا ياقمر قومي يا حبيبتي ... ولما تزهق .. تقولي هتقومي ولا اروح اموت النحل بتاعك بإيدي
وانتوا عارفين كله الا النحل دي سلالة نادرة بعمل عليها الرساله
اقوم وانا بفرك ف عنية
ماما تبصلي يا عيني بحسرة وتقول ..... والنبي قمر ده انتي وانتي قايمة م النوم حتي شبه فاتن حمامة
ابصلها وانا بهرش ف راسي مستغربة لاني بصراحة مش شايفة الشبه اللي بيني وبين فاتن حمامة .... بس اقولكو يمكن عشان انا مكسورة الجناح
المهم اقوم للحمام ف عز البرد وانا رجليه مأفأفة ................
وماما تديني الوصايا العشر قبل ما ادخل الحمام
تغسلي جسمك تلات مرات بالميه دي وساعة الادان تحطي الكيس اللي هدهولك ده ف المية وتغسلي شعرك لغاية الفروة .....
ياماما فروة ايه بس انتي مربية خروف
طب يا ماما ايه اللي ف الورقة ده انا شعري مش ناقص هو بيقع لوحده .....
: يا بنتي ده عرق حلاوة وبذر رجله ....
: يا ماما حرام عليك ده علف كتاكيت يا ماما
.... وماما علي كلمه واحده هتستحمي بيه يعني هتستحمي بيه
بيني وبينكو كنت بدخل من وراها ادلق الميه ع الارض واخرج وانا غاسله شعري
ويا سلام بقي مقلوكوش عن طقوس يوم الجمعه
تصحيني من الفجر عشان نبتدي الطقوس وساعة الصلاة تبدا بحرق اشياء غريبه
الاقيها بتحرق توم ف المبخرة
ايه يا ماما ده..... متردش علية والاقيها بتلف حوالين راسي بالمبخرة وهي بتمتم من غير ما ترد عليه
الناس بتسحر لي كل يوم ... وانا بفك سحري بقشر التوم
نخلص من التوم تكون محضره ف ايدها الملح
يا ملح يا مليح ياللي ع النار تطقطق وف الميه تسيح ارزقها بالعريس المليح .

.... : هو انا هتجوز طباخ يا ماما
نخلص من ده كله تبتدي تخليني اعدي ع المبخرة سبع مرات وهي بتحرق ف المبخرة صور قسايم الجواز اللي معرفش جابتها منين
ولازم يوم الجمعة تأكلني الاكل بالليـًة ياماما البتاعة دي انا بقرف منها
يا بنتي قالولي ان معمولك عمل علي حتة ليه
: يا ماما ومين الخروف ده اللي ممكن يكون عمله
وفجأه وبغير سابق إنذار لقيت ماما ف مرة بتفتح الباب وبتقول اتفضل يا سيدنا الشيخ .....
-------------
يآآآآآآآآآوه كفاية كدا لحسن النوم كبس عليه ..
واذا حضر النوم لازم من البلوج تجري وتقوم.

68 التعليقات:

أميرة الاحزان يقول...

ههههههههههههه
اسلوبك حلوووووووووو اووووووووى يا سوسه ...
تسلم ايدك ...

امل يقول...

ايه ده فين البقية
لما جه الشيخ حصل ايه

صاحب المضيفة يقول...

هههههههههههههههههه

رايقة بجد


ربنا يرزقك العريس من غير ده كله علشان تكون حياتك كلها طاعة وجمال يارب



تحياتي

واحد من البلد دى يقول...

أول زيارة ليا..يجعلها دخلة هنية
على كل البلوجرية..اللى كلوا اللية..
هههههههههههه
أسلوبك عجبنى جدا ..يا ريت بعد العمل ما يتفك ما تسيبيناش..
و الله انا خايف لوالدة حضرتك تييجى فى يوم و تقولك إن العمل معمولك على النت...
دى تبقى مصيبة بجد..
دمتى بخير..

رئـــــيسـة حزب الأحلام يقول...

هى حصلت للشيخ
ربنا يستر
بس بوست عسل
مستنين الشيخ

عاشقة القمر يقول...

لالالا خالص ماكانش ينفع ييجي النوم دلوقتي خالص .. انا عاية الباقي وعندي امتحانات اتابع ازاي انا طيب .. عسل يا سوسا بس ما تتأخريش بقى في التكملة ..

أميمة كامل يقول...

حين أدرك شهرزاد النعاس

سكتت عن الكلام المباح
كأنى أسمع ألف ليلة وليلة

ربنا يعينك

لو الكلام دا بيحصل لك بجد

تبقى كارثة

soso يقول...

سوسو يا قمر
أيه يا بنتى ده
الموضوع أستفحل خاااالص
هيه وصلت لبذر الرجله لالالالا ديه بهوقت أوى أوى
هههههههه
ووحشانى جدا جدا
وبفرح أوى أوى لما بلاقيكى كاتبه بوست جديد
بس أبقى قبل ما تكتبى وتدونى
أشربى فنجان قهوة عشان اللى حصل المرة ديه ميتكررش
أحنا مش حنسمح بالتسيب ده تانى
سااااااااااااااااامعه

shayma يقول...

ههههههههههههه
جامده
البوست تحفه يا سوسه

هيا حصلت لعلف الكتاكيت
وكمان اتزنقتى وجابولك الشيخ لغايه عندك
ربنا يكون فى عونك
ومستنيه الباقى بسرعه

سلامى يا جميل
:))

ra7eel يقول...

ههههههه
ياخبر ياسوسه ومستحمله وشايله فى قلبك كل ده
ههههههههههه

لا يابنتى والله ربنا معاكى بجد
انتى زى العسل والله
اوعى تصدقى فى الكلام دهوالحوارت دى
ربنا يكرمك
ويخليلك النحل بتاعك

Reem يقول...

هههههههه

اسلوبك ماشاء الله رائع

ومدونتك حلوة اوي

انا بقيت بستنى البوستات بتاعتك

بفارغ الصبر ما تحرميناش منك كتير

Sally يقول...

بجد انتى زى العسل
ربنا يكرمك
ويسترها معاكٍ شكل مامتك مش هتجيبها لبر

متنسيش التاج يا قمر

دمتى بخير

قلب صغير يقول...

هههههههههههههههه
بس مليش فيه
عاوزه اعرف الشيخ عمل ايه

اصحي من النوم وقولي
واشمعني طنط بتصاحيكي عشان تخدي حمام بتقومي
يعني الحمام احسن مننا

mohra يقول...

و الله انت دماغ عاليه بجد

rovy يقول...

sory 7aslt moshkala fi alboard
awl ma aslha harg3 tany ya amr
wahshany keteer
by now
rovy

amal يقول...

عارفه ياسوسن انتى بتتكلمى بلسانى كمان كام سنه
انا قريت كل البوستات اللى فاتت وبجد فاتنى انى اقراها فى وقتها
وانتى بتتكلمى عن فرح اختك وبتوصفى انا بكيييييييييييت كتيير جدا
فوق ما تتخيلى بجد
بستعد بقى ليوم كتب كتاب اختى
لانى بالظبط حاسه انى بمر بنفس قصتك
اختى الاصغر اتخطبت بس يوم الخطوبه عدى عليا عادى وكنت فرحانالها جدا
وخصوصا ان الفارق بينى وبين اختى سنه ونص بس
بس فجاه لاقيت الاحداث بتجرى جدا
بحس ان الدنيا كلها بتجرى حواليا وانا الوحيده اللى واقفه فى مكانى
حسيت انى عايزه اصرخ اشمعنى الناس كلها حياتها ماشيه وانا حياتى وقفت على كدا خلاص ؟
معدش فيه الا انى مع كل يوم بيعدى بيزيد يوم على عمرى !!
اختى كتب كتابها فى شهر سته اللى جاى ده
لما ماما بتقولى عقبالك يا امل يابنتى يارب انتى بقى الفرحه اللى بجد
اختك دى انا مش حاسه باى فرحه عشانك
نفسى انتى تتجوزى قبلها
انا كمان بحس بخنجر مسموم فى قلبى وانا المسئوله عن اطفاء فرحتهم باختى
يعنى هو ايه ذنبى بالظبط
انى الكبيره والا ان نصيبى يمكن يكون انى مش هتجوز اساسا !!
بصراحه انا بحاول معلقش نفسى بحكاية نصيبك هيجيلك لسه دى
مهو ممكن نصيبى يكون انى متجوزش اساسا
ومش هبقى اول واحده فى الدنيا متتجوزش
وبجد بجد بكره جدا كلمة عقبالك
لان الناس بتقولهالى وهى مشفقه عليا
وذى ما يكون انا فعلا فى ازمه
مع ان ازمتى الحقيقيه هى الكلام اللى بيوجع ونظرات السهام الجارحه
سمعت واحده قريبتى بتقول امل المفروض تلحق نفسها بقى !!
الكلمه جننتنى
الحق نفسى اعمل ايه ؟!
على فكره انا عندى 24 سنه
بس خلاص دخلت فى منطقة الخطر اللى الناس حددوهالى
وبينى وبينك انا بقيت مقتنعه تماما انى فعلا خلاص كدا عنست
بس وايه المشكله اذا كان ده نصيبى
منكرش انى ذى اى بنت نفسى افرح بس كمان مش ناقصه كلام يحزن الواحد على نفسه اكتر
مش عارفه اتكلم فى المشكله اكتر
بس هو نصيب
بس انا دلوقتى بدات اشيل هم يوم فرح اختى
خايفه دموعى تفضحنى ومقدرش اخبيها
وخصوصا ان ذى ما انتى فاهمه الناس ممكن تفسرها غلط
ربنا يستر ويعدى اليوم ده على خير معايا

ليلـــــــــــــــــــــــــــــى يقول...

ازيك يا قمر عاملة ايه؟ بصى الدعاء ده جميل قوى. اقرأيه دايماو ان شاء الله ربنا يكرمك و كل الينات الحلوين :)
*******************

يقول الشيخ فرحات المنجي احد علماء الازهر الشريف انني لاقول ان هذا الدعاء يفعل فعل السحر ولكن بعد اسبوع واحد من قراتي لهذا الدعاء في التلفزيون دعاني بعض النساء والرجال لحضور حفلات زواجهم وقالوا لي اننا قرانا هذا الدعاء فاكرمنا الله بالزواج ويضيف : اخبرتهم ان هذه قد تكون مصادفة ، فردوا اننا كنا نتوضا ونقرا هذا الدعاء اثناء الوضوء ،وموقنون بالاجابة والحمدلله سهل لنا الزواج بعد ان واجهنا صعوبات كبيرة طوال السنوات الماضية .
وان نفع فانة لايضر وانه في النهاية دعاء واتمني ان تقروه علي اساس انه دعاء والله سبحانة وتعالي يحقق لكم امنياتكم


نص الدعاء


" اللهم اني اسالك باني اشهد انك انت الذي لااله الاانت .. الاحد الصمد الذي لم يلد ولم يولد ولم يكن له كفوا احد اقضي حاجتي .. انسي وحدتي .. فرج كربتي..اجعل لي رفيقا صالحا كي نسبحك كثيراونذكرك كثيرافانت بي بصير .يامجيب المضطر اذا دعاك..احلل عقدتي ..امن روعتي ..ياالهي من لي الجا اليه اذا لم الجا الي الركن الشديد الذي اذا دعا اجاب .هب لي من لدنك زوجا صالحا ..اجعل بيننا المودة والرحمة والسكن..فانت علي كل شي قدير .يامن قلت لشي كن فيكون..ربنا اتنا في الدنيا حسنة وفي الاخرة حسنة ..وقنا عذاب النا وصلي اللهم علي سيدنا محمد وعلي اله وصحبه وسلم.

وعن اصل دعاء التيسير هذا يقول الشيخ المنجي: انه دعاء ماثور عن بعض الصالحين عندما كان هناك رجل صالح في ضيافة رجل عنده سبع بنات ولم تتزوج منهن واحدة، فقال له: انا ادلك علي بعض كلمات سمعتها من الصالحين وطرفا منها لبعض الصحابة والتابعين وعلمه الدعاء ثم يقول والد البنات السبع عن نفسه : والله لبركه هذا الدعاء مامر العام الا وبناتي جميعهن في بيوت ازواجهن.

ارجوا الدعاء لي والي والدي اطال الله في عمرهما والي جميع المسلمين

NilE_QueeN يقول...

سيدنا محمد قال من اتى كاهنا او عرفا فصدقه فقد كفر بما انزل علي

وبعيدا عن رئي الدين فى اللى بتعمله مامتك ف العقل والمنطق يرفضوه

مش الشيخ فلان والحاجه علانه وقشر التوم والملح هما اللى هيغيروا قدرك ويجيبولك العريس

الجواز دا رزق ورزقنا متحدد من قبل ما نيجي الدنيا

الجواز سنة الحياه مش فرض انا بنت زيك وعارفه اد ايه الجواز مهم بالنسبه للبنت

اشغلى نفسك قدر الامكان بحاجات مفيده
ونصيبك هتاخديه ف وقته ومش هيروح لحد تانى

اتمنالك السعاده

Butterfly يقول...

لأ بجد أنا معتش لاقيا كلام أقوله
انتى فظيعه يابنتى وعليكى خفه دم متتوصفش

maha miho يقول...

الدرمندوخ الدرمندوخ
كنا شباب وبقينا شيوخ

هههههههههههههههههههه
دي تبقى كارثة لو ده بيحصل يختيييييييييي،، قلبي معاكي يا بنتي

الجدة فصيحة يقول...

السلام عليكم ورحمة الله وبركاته

جميل جدا تناولك لمشكلة زي دي بشكل ساخر ودمه خفيف
بتوصلي الأحسيس بأسلوب السهل الممتنع من غير عقد ولا حاجة


منتظرين نعرف الشيخ عمل ايه معاكِ
أو أنتِ عملتِ أيه معاه


تحياتي

شهد الكلمات يقول...

خفة دمك و اسلوبك الجميل مش جديد عليكي
بوركتي و استمري بالتوفيق

تحياتي

بنت مصريه يقول...

اذا حضر النوم لازم من البلوج تجرى وتقوم
انتى اتعديتى ولا ايه يا سوسو
انا قولتلك اه ان السحر موجود
بس مش للدرجه دى يا بنتى
اسلوب حابس كابس قالع لابس ده مش هينفع
ههههههههههه
الله يكون ف عونك يا سوسن
يقطع الجواز وسنينه
يا بنتى والله مش امله زى مانتو فاكرين
بوست جمييل
اتمنى تنورينى

بنت مصريه يقول...
أزال أحد مشرفي المدونة هذا التعليق.
maiosha يقول...

لا لا لا بجد يا سوسة بتهزرى

إيه اللى حصل لما الشيخ جه.. بلاش التعليق ده الله يخليكى .. أنا واحدة بمتحن ومش ناقصة شدة أعصاب

عاااااااااا.. إيه اللى حصل؟؟؟

أبو نور يقول...

برافو حلو

Sherif يقول...

مش ممكن السكر ده .. ابتديت اقتنع ان الرجالة نظرها ضعف فعلا ..

لأ .. وبعدين تسيبنا على غفلة يا شهرزاد ماينفعش .. مين الشيخ ده ؟

norahaty يقول...

السلام عليكم ورحمة الله وبركاته
Miss Sosa
ما تجربى ياجميل كده
وتسمعى كلام ماما
ولو مره
مش حنخسر
حاجة
ولو الموضوع
صدق يبقى
احنا الكسبانين
ايه رأيك؟؟
ولكى تحياتى على خفة دمك الشربات.

الربان يقول...

تحياتي

عندي سؤال محيرني من اول زيارة لمدونة
حضرتك الجميلة...الناقدة الساخرة..

حين يتأخر سن زواج الرجل....هل يقاسي
او يعاني مما تعانيه الفتاه...؟

هل يلجأ الي شمهورش و عفرتوش و عفركوش
لصنع حجاب المحبة....؟

فكرت و بصرت ...و احترت...و قررت
ان اتوجه بالسؤال اليك لعلي اجد
اجابته..........

تحياتي و تقديري

د / احمد فارما يقول...

هههههه بجد اسلوب جميل اوووي ....تسلم ايدك ..

ارجو منك ان تشرفيني

كوكي يقول...

بتعلقينا و تجري وتسيبينا
كل مرة أقول قربنا نوصل للنصايح الغالية بتاعت أبلة سوسة ألاقي الطريق لسة طويل
وعلي العموم البوست ده عوض العياط اللي عيطته قبل كدة والمرة دي ضحكت لدرجة اني بقيت خايفة حد يسمعني يقولو عليا جري لعقلي حاجة
الحقيقة أسلوب رائع

ايوية يقول...

لا بجد مش ممكن
مش قادرة عايزة اعرف الشيخ عمل اية متتاخريش

Soooo يقول...

متابع باستمتااااااع

اسلوبك ساخر وجميل بجد



ربنا يسعدك ويكرمك ويوفقك دنيا وآخره يارب




سلاموووووووووز

مدحت محمد يقول...

ههههههههههههههههههه

اسلوبك جميل فى الكتابة الحقيقة ويشد جدا
بقلك ابقى خليها تعملك عروسة من ورق وتقعد تشكشك فيها ههههههههه


تحياتى ليكى

شهرزاد يقول...

ايه اسلوب التشويق الجميل ده
لازم تكتبي على البوست ..
للبوست بقية

أنا مستنية الحلقة التانية
ما تتأخريش

أسلوبك جميل وخفة دمك ملهاش حدود
تحياتي لكي يا قمر

hager يقول...

هههههههههههههه
التوبيك ده جااامد بجد
كله والتوم ده حكايه.. ههههههه
مستنين البوست الجااااي
متتاخريش علينا بقي
سلااام

lyssandra يقول...

حلو قوي بجد

كله كوم وعلف الكتاكيت ده كوم تاني

بجد أسلوبك جامد جدا

تحياتي لكي

lyssandra

كيكى يقول...

ههههههههههههههههههه ملعوبة

الفارس الملثم يقول...

ههههههههههههه

ايه يا بنتي ده كل ,هي اتحضر ملك الجن يفك العمل ..

بس بجد اسلوبك ملوش حل في خفة الدم , واحنا مستنين التكمله بسرعه

تحياتي
محمد

kochia يقول...

الاخت العزيزة
انا سعيدة جدا بمرورك عندي .. وسعيدة اني اتعرفت علي مدونتك النهاردة
دمها خفيف جداوصادقة وواقعية جدا
وانا طبعا من العارفين بهذا جيدا
اسمحيلي اطلع عليها كاملة واسمحيلي اعلق علي موضوعات قديمة كمان ان شاء الله
اشكرك علي الشكر
واتمني لك التوفيق

mohamed يقول...

لالالالالالالالالا ده كده الحكاية زادت اوي و ليه صابره أولي لمامتك ده كلام فارغ

appy يقول...

ناقص يقولوك برقشنى يا برقشنى خلى الحنه تنقرشنى هههههههه ربنا يكون فى عونك بقى

غير معرف يقول...

دمك زى الشربات ياسوسو بس صدقينى انا بنتى لو كانت اتأخرت شويه كمان كنت حا اعمل كده واكتر 000 كفاية نظرات الشماته والمصمصه اياها اللى بنشوفها

kochia يقول...

عزيزتي سوسة
اولا اسم سوسة دلع حلو وينم عن الذكاء فعلا وده اللي انتي بتتمتعي بيه
ثانيا انامن امبارح للنهاردة قريت كل موضوعاتك واسلوبك ادبيا حلو وجذاب بدليل عدد المعلقين عندك اللي هم مش بيقرواوبس لكن عاوزين يعملوا معاكي حوار متصل .. وانا منهم دلوقتي طبعا
ثالثا انا متضامنة معاكي في موضوعك بس بعد ما قريت قررت اني اعلق علي الجديد منه رغم انه كل موضوعاتك تستحق تعليقات
اسمحيلي اكون من المتابعين المستمرين
ومدونتك من المدونات اللي خلتني سعيدة اني وصلت للموقع ده
سلام

Miss. Sosa يقول...


أخواتى واخوانى اسمحولى اتطفل عليكم في
مساحة تعليقاتكم رغم نيتي بعدم التدخل فيها الا ان سؤال اخونا الربان شدنى اني اجاوبه وبرضو انتم من حقكم تجاوبوه وترودوا عليه
وحاولت امنع نفسي من الاجابة علشان مش تقولوا فيه تفرقة عنصرية وتعملوا ثورة في المدونة ويطلع ابراهام لنكولن من وسطيكم ويحرق الشجر اللي زرعاه علي ضفاف المدونة فانا بستأذن ارد من غير زعل ولا ثورات .

حين يتأخر سن زواج الرجل....هل يقاسي
او يعاني مما تعانيه الفتاه...؟

اخى الفاضل لكى نجاوب علي هذا السؤال لابد ان نعرف مدى اهمية الزواج لدى الرجل اولا وهل هو الاهم ام نجاحه في عمله وحياته العملية ؟!
وجد علماء النفس والاجتماع ان سيكولوجية الرجل تختلف عن سيكولوجية المرأة
فالعمل عند الرجل هو محور حياته
في حين ان الزواج والامومة تحديدا هم محور حياة المرأة .
فالمرأة مهما وصلت من مناصب اجتماعية وثقافية ولم تنال حظها من الزواج والاطفال فيذهب كل ما جنته سدى كأن لم يكن ولا تستمتع بكل هذا قط وتصبح اتعس انسانه في الوجود .
في حين الرجل لو تزوج ورزق بالاطفال ولكن ليس لديه عمل او نجاح عملي فهذا كفيل بان يجعله ينتحر .
خلاصة القول
امرأة + عمل - زواج - اطفال = صفر
رجل + زواج + اطفال - عمل = صفر

ولكن لا انكر ان تأخر الزواج عند الرجل يسبب له بعض الضيق خصوصا لو تقدم لاكثر من فتاة ورفضوه لاسباب مادية او صحية ده بيألمه نفسيا
لكن تأخر الزواج لدى الفتاة ده بيدمرها نفسيا واعرف الكثير من الفتيات دراستهم العليا اتدمرت بسبب توتر حياتهم الخاصة

أرجو ان اكون اجبت عن استفساراتك

maiosha يقول...

كفيتى ووفيتى يا سوسة

مفيش حاجة زيادة تتقال بعد اللى إنتى قوليته ده

Sometimes يقول...

بجد انتى عسل
ماشاء الله عليكى
ربنا يخليكى يا قمر على البسمه اللى رسمتيها على وجوهنا
بس ماليش دعوة انا عايزة الباااااااااااااقى

حبيبـــــــة القمـــــر يقول...

مقدرتش افتح المدونه النهارده وممرش على كل بوست من تاني
بجد بتخلي الواحد يضحك من قلبه

بس فيه بوست خليتيني ابكي فيه بردو من قلبي

حقيقي ربنا يبارك في موهبتك الجميله
انتي سوووووسه بجد هههههههههههه


فضي نفسك بقى وكملىىىىىىىى

المـــفـــــــقــــــــوعـــــة مــرارتـهــا يقول...

ربنا يابنتي يرزقك بالعريس من غير فك عمل ولا شيوخ

نور احمد يقول...

السلام عليكم
كل ما اتصفح المدونات المصرية اشوف مدونت مس سوسة بس الصورة مش بتعجبني عكس المكتوب فيها خالص يمكن للفت الانظار والله اعلم ايه الي عجبك في الصورة المهم الي جوة
كل الكلام الي حكيتيه مر علي صحبيتي كأنها انتي ودلوقتي ايه بقت ام سارة بعد الثلاثين وكان بيجي ليها عرسان كتير متعديش
عايزة اقولك ان الحكاية قسمة ونصيب بس احنا نرضي و ربنا يرزوقنا
هاقولك حاجة تانية وحدة عمات زيك وعانت حتي اصبحت ال28
جلها عريس في يوم وليلة اتجوزتة
عشان ميقولوش عليها اللي انت حكيتيه دلوقتي محاكم الاسرة علشان تتطلق
ده نصيبها وديه قسمتها
كل حاجة عايزة تأني
و ان شاء الله سوف يرزقك الله بأنسان محترم يخاف الله

Eldebug يقول...

انا جايلك بعقد عمل طازة من عند الاسطى مرجان لتطفيش الجان ... بس للاسف العقد ده مش ليكى ده للست مامتك ... الراجل من ساعة ما قلتله على البوست وهوه اتجنن ...قاللى مش لاقى من زمان مساعدين فاهمين شغلهم كده

داخلك واللهى وانا فى معمعة الامتحانات ... ابقى قولى للشيخ بقى يدعيلى شوية

karim يقول...

جلا جلا
سوسا دكتوره اخر لعلعه
جلا جلا
ف فنجلها واحد اخر مرجله
جلا جلا
جى بعد نقطتين مش بعد سنه
جلا جلا
هينسيها الشقا و يديها الهنا

د/أبا يحيى وادم يقول...

السلام عليكم ورحمه الله وبركاته
ربنا يكرمك يارب على الموضوع الجميله ده
تعرفى أن اكثر من 90 من بيوتنا تؤمن تماما بهه الامور
اجمل ما قرات
يا بنتي ده عرق حلاوة وبذر رجله ....
: يا ماما حرام عليك ده علف كتاكيت يا ماما
روعه روعه روعه
وفقكم الله لما يحبة ويرضاه

دكتور بهــدوء يقول...

هههههههههههههههههههه
جميييل جدا
بجد جبت الارض م الضحك


والله رائعه

سنووايت يقول...

بجد فظيعة
ومدونتك جميلة بجد
انا عندي امتحان بكرة بس ما قدرتش ادخل المدونة وما اقراش المواضيع وما قدرتش اقرا وما اكتبش تعليق

مش عارفة ليه مش بيقتنعوا ان الموضوع مالوش علاقة بالاعمال وانه نصيييييييب او اختيار , المهم بقي مستنية الجزء التاني ما تتاخريش علينا

محمد مارو يقول...

هههههههههههههههه
و الله بوست عسل

و احلى ما فيه صراحتك فى موضوع محدش بيتكلم فيه

ربنا يعينك بقى على والدتك

بنت الاسلام يقول...

بجد تحفة

تحفة


بقرا البوست قدام امي

قالتلي

عندنا الليه


شكلها هتجرب فيا

سوررررررري

هحذف مدونتك من علي الجهاز


احسن تدخل تاخد الوصفة


هههههههههههههه


تحياتي

.:.-=- ELGaZaLy-=-.:. يقول...

ops
البتاع دة بعت حاجة باين وانا لسة مكتبتش حاجة اصلا....

المهم اسلوبك حلو اوى يا ساسو بس لسة معرفتش حصل اية؟؟


ويارب يكون خيال لانة لو حقيقى يبقى كارثة بجد

Jana يقول...

رائع يا سوسا.... ما شاء الله عليكى

خلى بالك الشيخ للّو يقولك العمل معمول على جناح نحلة من نحلاتك
ساعتها متهيألى حتطيرى رقبته قبل ما يطير هو نحلة واحدة
هههههههههههه

فى انتظار حبرشنات الشيخ للّو

تحياتى سوسا الجميلة

Eno يقول...

والله انتي عسسسسسسسسسسسسسسسسسسسسسل

كل ده كاتمه في قلبك وساكته
طيب يارب يارب يرزقك بطابور عرسان وتنقي علي راحتك بأه عشان قلب ماما يرتاح ويطمن عليكي ياااااااااااااااااااااااااااااارب

ربنا يرزقك بالزوج الصالح اللي يعوضك ياقمر يارب انتي وكل بنات المسلمين :)

monaliza يقول...

ده وقت نوم ياسوسة
كملى وبعدين نامى

rovy يقول...

ازيك يا سوسه وحشتينى
معلش المره اللى فاتت معرفتش اعلق علشان البورد الغلس هو اللى علق وراسه والف سيف ما يكتب الا انجليزى
على كل حال مستنين بقية الحكاية متتأخريش علينا .. وتسلم ايديك .
دمت بخير
تحياتى
rovy

أمل فتحى عزت يقول...

أدعوك لقرأة قصتى الجديدة
(بكل لغات العالم أحبك)
وشكراً

غير معرف يقول...

عن أبي هريرةرضي الله عنه عن النبي صلى الله علية وسلم قال : (اجتنبوا السبع الموبقات )

قالوا : يا رسول الله وما هن ؟

قال : (الشرك بالله ، والسحر ، وقتل النفس التي حرم الله إلا بالحق، وأكل الربا ، وأكل مال اليتيم ، والتولي يوم الزحف ، وقذف المحصنات الغافلات المؤمنات ).

وهذا حديث مهم ، حذر النبي صلى الله عليه وسلم فيه من الموبقات السبع ، والموبقات : المهلكات .

smraa alnil يقول...

بعيدا عن الموضوع

ياريت تشاركوني في موضوع علي مدونتي
وتنشره معانا
تحياتي

طائر حزين يقول...

السلام عليكم
انااتدبست وبعتلك تاج ياريت تمرى عندى تأخذيه ماشى يا سوسة

هيثم الدهشان يقول...

تسلم ايدك
اسلوبك رائع جدا وكوميدى جدا

تقبلى تحياتى

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘