• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الاثنين، 5 مايو، 2008

العيد الصغير يسبق العيد الكبير


هكذا قالتها الحكيمة أم عبير
العيد الصغير يسبق العيد الكبير
والفرحة النهاردة بالكحك والفطير
وبكرة نفرح بالشوي والتحمير
قدر مكتوب بأمر العليم الخبير
---------------------------------
منذ دخول الهانم الصغيرة سنة اولي ثانوي وابتدت المشاكل مع ماما .... كنت انا اتخرجت من الجامعة في كلية الزراعة .... المشكلة بدأت لما ماما فوجئت بإن طنط ماجدة جارتنا اللي في الدور اللي تحتينا عزمت نفسها علي الشاي عندنا بدون مناسبة حيث اننا من ساعة ما سكنا واحنا بابنا مقفول علينا ولا حد يعرف عننا حاجة لحد ما كبرت الهانم .. لانها كانت علي عكسي انا وماما .
كانت اجتماعية زيادة عن اللزوم بتوزع السلامات والابتسامات علي الناس بدون حساب وكل العمارة بل والشارع كله بقي بيعلمنا بيها دي اخت نهي ودي ام نهي .
المهم جارتنا طنط ماجدة كان سبب زيارتها واللي خلي ماما تستغرب ومن يومها ابتدت حسابتها تتلخبط ... هو إن ابنها رامي المقبول في الكلية الحربية مؤخرا عايز يخطب نهي هانم .
ماما طبعا كانت مشاعرها ساعتها متلخبطة مابين انها تفرح لان بنتها اللي لسه مطلعتش من البيضة جالها عريس ولا تزعل لان بنتها الكبيرة لسه محدش دق بابها ولا تستغرب ولا ترد ع الست ازاي وتعتذر بايه .

المهم الوقت اللي جت فيه جارتنا كان قبل ميعاد رجوع نهي من المدرسة وانا اللي كنت ف البيت وبعد مانزلت جارتنا طنط ماجدة ماما جت تحكيلي ع الحوار اللي حصل بينهم وقالتلي ازاي ان الاستاذ مشروع الضابط ده كل خميس من اول الشهر كان بيجي ببدلة الفسحة ويحاول يكلم الهانم وهي راجعة من الدرس وهي مكنتش بترضي وقالتله لو مبطلتش هروح اقول لماما وده اللي خلاه متعلق بيها . وبعدين الاستاذ اقترح انهم يتخطبو بس لغاية ما هو يخلص الكلية بعد كمان سنتين و تكون هيه خلصت ثانوية عامة وتكمل كليتها براحتها وهي ف بيته .

ماما قالتلي اوعي يا سوسن تقولى لاختك نهى علشان ما نشغلهاش عن دراستها... بس انا اقنعت ماما إن احنا لازم نقولها لتجنب اية محاولات من مشروع الضابط اياه انه يكلمها بعد كدا تقوم هي تخبي علينا ... وماما بعد مناقشة طويلة إقتنعت ... وكان اللي طالع عليها إزاي عيلة ف السن دي ممكن الست دي تفكر انها تبقى زوجة وتتحمل مسئولية بيت .
وانا برده اقنعت ماما
إن نهي فعلا جميلة وشئ متوقع إن يحصل ده.
ماما بقي قعدت تقولي ربنا يكملك بعقلك طب ما انتي اهو مفيش ف جمالك اتنين و و و ..........
انا رديت عليها بكلمة واحدة مش عارفة ساعتها انا جيبتها منين ولا جت علي بالي ازاي ...
يا ماما كل فولة ولها كيال

الغريب بقي لما انا قلت لنهي علي الموضوع ده لقيت منها رد فعل غريب بجد ويدل علي إن البت دي بجد سابقة سنها وعارفة قدراتها كويس
ردها كان ايه بقي ؟!

يا شيخة مش الواد اللي فرحان بالبدلة بتاعة الحربية ده سيبك منه ده عيل ... في الطلعة والنازلة يحاول يكلمني وانا اصلا منفضاله ع الاخر .

ومرت الايام وفعلا مكنش يعدي شهرين تلاتة ويجي لنهي عريس من بعد ما اخدت الثانوية العامة ... اللي شافها ف عيد ميلاد صاحبتها واللي شافها ف فرح واحدة من ولاد خالتوهاتنا .... إن جيتو للصراحة البنت كان سوقها ماشي وعليها الطلب .. اللهم لا قر ولا حسد .. وكل ما يجيلها عريس ماما كانت تبقي واقعة ف حيرة لدرجة إنها كانت بتحاول ساعات تخبي علية عشان خايفة علي مشاعري . بس كانت في النهاية بتضطر تقولي لأن ماما اصلا ملهاش صحاب غيري أو بمعني اصح ملهاش حد غيري .

كل ده وانا لسه محدش دق بابي .. وكانت نهي رغم إن احنا من عالمين مختلفين تماما انا عالم منقطع الاتصال بالاخرين وهي عالم متصل بكل اللي حواليه الا انها كانت بتحكيلي دايما عن تفاصيل حياتها برة البيت وكنت بعرف بسهولة منها ان في حد جديد معجب بيها ... ببساطة لما كنت ارجع من الشغل والاقيها مشغلة الكاسيت ومعلياه ع الاخر وهاتك يا رقص ......... حلم الطفولة طبعا مانسيتهوش واتعلمته سيلف ستادي والبركة فى التليفزيون.

اخيرا اتخرجت واخر عريس جالها كان بعد ما اتخرجت مباشرة من كلية التجارة كان معاها ف الجامعة بس هو من حقوق واتخرج واتعين في النيابة
وهنا بدأت مشكلة ماما الحقيقية كل عريس من السابقين نهي مكنش ليها رغبة فيه وكانت بتطلع فيه القطط الفاطسة او هو يكون عنده عيب قائم بذاته زي انه مش جاهز مثلا
لكن المشكلة بقي وكيل النائب العام واضح إن الهانم معجبة بيه وهي وصلتلي الاحساس ده
بس ماما معارضة بحجة ان نهي لسة صغيرة
وعنها والبيت ولع .....نهي عايزة العريس وماما مش موافقة
والسر ؟!
ان ازاي اللي عندها 30 سنة تقعد واللي لسه متمتش 22 تتجوز
وانا بين الاتنين محتارة ... بس ذنب نهي ايه ده نصيب

وفي مرة وانا بفتح باب الشقة كانت المناقشة ومحاولات الاقناع لماما علي اخرها من والدة سيادة النائب ودخلت من غير ما يحسو بيه وطنط أم عبير والدة سمير البيه العريس بتقول لماما ياستي ده العيد الصغير بيجي قبل العيد الكبير وبعدين مش ذنب نهي إن اختها الكبيرة ماتجوزتش لدلوقتي
ماما : لا عندك بقي يا ام عبير ليه انا بنتي عانس ولاهي بايرة .. ده انا بنتي لو قالت ياجواز مش هتلاحق على العرسان .. غيرش هي اللي حاطه دماغها ف مستقبلها .

طنط أم عبير : ياستي بعد الشر عليها من البوران اديكي قولتيها هي اللي مش حاطه دماغها ف الجواز يبقي ايه ذنب نهي بقي ?!
وبدون ما أشعر دخلت بسرعة ومن غير ما أسلم حتي علي طنط أم عبير وانا الكلام بييطلع من عروقي مش من لساني و مش عارفة الكلام جاي منين ولا ازاي .. قولتيلها .....
طنط شوفي ايه الميعاد المناسب اللي نعلن فيه الخطوبة ..
ماما : (وكأن مفاجئة وجودي عقدت لسانها )..... انتي ....انتي
لحقتها بسرعة وانا لسة مش مسيطرة علي اعصابي ويمكن عنية كانت بتلمع وقتها مش عارفة دي دموع فرحة و اللا حسرة و اللا انفعال

يا ماما ده العيد الصغير بيجي قبل الكبير !!

79 التعليقات:

ken kemp يقول...
أزال المؤلف هذا التعليق.
عاشقة القمر يقول...

ميس سوساااااااا أنا جيييييت .. بجد زي ما قولتلك عندي في البلوج ان البلوج بتاعتك جامدة آخر حاجة من حيث شكلها .. ده كان هناك .. لكن اما جيت هنا وقريت اول موضوع اللي هو ده .. فبجد جامدة جدااااااا .. وعجبتني اوي وأكيد أكيد هبقى من روادها الدائمين بإذن الله ..

هكذا قالتها الحكيمة أم عبير
العيد الصغير يسبق العيد الكبير

أمي قالت كده ؟.. - أصل انتي ما تعرفيش انا كمان عبير تبقى أمي ام عبير - بس الفرق جااااامد انا أمي مابتكرهش في حياتها اد الجملة دي .. العيد الصغير بييجي قبل العيد الكبير .. أصلها بتتقال عندنا كتير D:
عشان عندي برضو الهانم الصغيرة اللي داخله على خطوبة واختها ولا في دماغها - ده انا اللي ولا في دماغي دي _ D:
رغاية رغاية رغاية .. ماببطلش معلش بقى استحمليني مادام هاجي هنا كتير .. انا بس حبيت اقولك انك عسوله جدا وبلوجك من اجمد الجامدين ..

أبو نور يقول...

اللهم ياعلى يا قدير أرزق عبير بعريس عظيم مقامه عالى حبيب و غالى ** قطعتى قلبى و لو بأيدى أكون عريسك لكن فى عبى فيران كتير

ammola يقول...

طبعا قبل ما أعلق هنا أخدت جولة تفقدية فى المدونة..بجد حلوة اوى وواضح ان أنتى أحلى
بجد آخر جملة خلتنى أنا كمان عينيا تلمع مش عارفة من الفرح واللا الحسرة واللا الانفعال معاكى..ولو انى شايفة أنه لامجال للحسرة اطلاقا بالنسبة لبنوتة لذيذة ومتصالحة مع نفسها والدنيا زيك
سعيدة بالتعرف عليكى من خلال مدونتك..وأسعدتنى جدا زيارتك ليا

*سمر* يقول...

لا مبأش موضوع الكبيرة قبل الصغيرة ده يفرق...
هو حد لاقى جواز اصلا..
وبعدين انا كل اقاربى تقريبا جوزوا البنت الصغيرة قبل البنت الكبيرة...عادى جدا ...

وزى ما انتى قلتى..كل فولة ولها كيال..
وان شاء الله نصيبك خير جدا ..وربنا شايلك حد يستهالك :)

ربنا يكرمك

الفارس الملثم يقول...

هي الحكاية كلها مسالة نصيب ,وملهاش علاقه بمعايير الجمال او الذكاء او الثقافه , يعني في في جيرانا بنات مكملوش العشرين واتجوزوا وخلفوا , وفي اكبر مني وعلي قدر معقول من الجمال والثقافه اضافة للاخلاق العاليه ومتجوزوش ..

بس بجد اسلوبك جميل اوي , ومستنين التكمله ..

تحياتي
محمد

كوكي يقول...

شوقتينا .. كملي
وعموما مبقتش غريبة جواز الصغيرة قبل الكبيرة
المهم عندي ان الكبيرة تتجوز هي كمان

Eldebug يقول...

بصى ساعات الانسان بيبقى عاوز يتكلم بس مش بيلاقى كلام يوصف مشاعره ... وساعات تانية مش بيبقى حاسس باى مشاعر ومع ذلك بيقول كلام بيوصل المشاعر اللى هيه اصلا مش عنده ... وساعات تالتة بيقدر يوصل الكلام اللى هوه عاوز يقوله بكلام ملوش دعوة باللى عاوز يقوله ... وساعات اخيرة بيبقى مراية للى ادامه يشوف فيها اللى هوه عاوز يسمعه ... لو قريتى اللى فوق ووصلتى للكلام ده يبقى انتى هتسمعى اللى انتى عاوزانى اقوله وسلام بقى علشان انا تهت...

الربان يقول...

تحياتي

موضوع جاد لكن خفة دمك خففت علينا.

كل شيء قسمة و نصيب...و من لم يتزوج
الان ان شاء الله سيصيبه الدور و ما تدري نفس ما اخفي لهم من قرة أعين....

ان شاء الله نبارك لك عن قريب بخطوبة اختك...و بعدها الفين مبروك للعيد الثاني......
ربنا يفرح قلبك و قلوب الجميع و ييسر لكم الاسباب و يفتح لكم الابواب و يرزقكم بغير حساب.

تحياتي و تقديري

Doba يقول...

دمك خفيف قوى وكتاباتك لذيذة قوى
الجواز نصيب وقسمة ومكتوب وله وقته وآوانه

دماغك عجبانى
اسمحيلى اجى من وقت للتانى
او هاجى تطفل وغلاسة

تحياتى للدماغ العالية
وسلامى للوالدة
هبة

مفقوعة مرارتي من حماتــــــــــــي يقول...

أنا حاسة بيكي
ولو اني في مكان الصغيرة اللي اتجوزت قبل الكبيرة ... مش عشان انا احلي ولا حاجة ... عارفةالفرق بيني وبينها أيه ؟؟؟؟
الإبتسامة إللي علي شفايفي حتي لو لحد مابأعرفوش
وعشان السلام اللي ماشية أرميه ... مش عيب ان الواحد يقول السلام عليكم لجيرانه
دي نصيحتي لأي واحدة عاوزة الحالة تتعدل
وربنا يرزقك انتي واخواتي بالعريس اللي يستاهل
تحياتي

appy يقول...

ههههههه هى قسم ونصيب مش مسأله اعياد
يعنى عادى جدا
بس بجد يا ميس انتى هايله والله فى المواضيه مش بتخلينى املل من القرايه

رئـــــيسـة حزب الأحلام يقول...

حقا العيد الصغير بيجى قبل لعيد الكبير واحنا فى عيلتنا تقريبا كلها حصل كة يعنى اانا لى اختين اكبر منى الصغيرة اتجوزت قبل الكبيرة وهى الصراحة حاجة بتاثر على نفسية الواحد بس هنعمل اية
طب اضحكى على تخيلى واحدة فى الشغل عايزة تشغلنى خاطبة لابنها بتقولى اية انتى عندك كام سنة فقلت لها 26 قالت ياخسارة انا ابنى عندة 24 راحت قالت لى طب مادوريلى على واحدة دكتورة قلت لها لما اجوز اما واخواتى الاول ماهو مش معقول فاقد الشئ هيعطية
ومعلش ياحبيبت انا حاسة بيكى اوى

الطائر الحزين يقول...

محدش عارف الخير فين

shayma يقول...

ايه حكايه العيد الصغير والكبير دى
:)))
انا كمان نفس الوضع
والموضوع ده منتشر جدا وعادى
بجد موضوع ابن لذينه
بكتينى فى اخر مشهد
ربنا يكرمك يا جميل
وحاسه بيكى اوى

سلامى
:))

أنا حر يقول...

مش عارف ليه لسا موجود موضوع الصغيرة والكبيرة
نا كنت فاكر ان الموضوع ده انتهى من زمان بس واضح ان لسا شوية
طريقتك في الكتابة ممتازة والبوست جميل قوي
تحياتي

يوميات فنانه مفروسه جداا يقول...

يا أرحم الراحمين اللهم ارزقها وارزقنا بزوج صالح ..تقي ..هني ..عاشقا لله ورسوله .. ناجح في حياته .تكون قرة عينه وقلبه ويكون قرة عينيها وقلبها " اللهم يا جامع الناس ليوم لا ريب فيه اجمع بينها وبين زوجها اللي يكون غني بدينه واخلاقه وماله ويهنينيها ويسعدهاويفرح قلبها يا من أمره بين الكاف والنون وإذا أراد شيئاً قال له كن فيكون لا إله إلا أنت سبحانك إنى كنت من الظالمين
اللهم وارزقنا الزوج الذي يخافك ولا يعذبنا برحمتك ياارحم الراحمين
اللهم وزوج جميع بنات المسلمين
اللهم صلي على خير الأنام-------اللهم امين اللهم امين اللهم امين
ربنا يوفقنا ويوفقك يا سوسا
موضوعك وطريقتك بجد هايله
تحياتي

انين الحزن يقول...

سوسا

اسلوبك في الكلام عشره علي عشرة

قشطااااات مش قشطه واحده


ربنا يوفقك ياقمر


سلاموووووووووز
وزة

soso يقول...

ميس سوسه
يارب أقدر أنقلك مشاعرى عبر كلماتى البسيطه
بجد مش عارفه أقولك أيه؟؟؟
غير أن كلماتك هذه أخذت تمزق قلبى
لانى أعانى الان من هذا الموقف
لاول مرة أقف عاجزة أمام نفسى فى المرأه
نعم!!!
أظل أنظر لنفسى فى المرأه ثم أنهمر فى البكاء
أنا عيشت هذا الموقف من شهرين فقط
أختى الاصغر منى ب5 سنوات
فجأه و بدون أى مقدمات
شىء كان بعيد عن عقلى وتصورى تمام البعد
يمكن أنتى ربنا نبهك أو عملك مقدمات
ولكن أنا أتصدمت فجأه
وممكن أحكيلك الموضوع بالتفصيل بس مش عايزة أطول عليكى بتفاصيل عشتيها
أنهاااااااااارت قواى
نعم أنهارت
لم أستطع أن أتمالك أعصابى
شعرت أنى صفعت
أعلم أن هذا نصيب وقدر المولى سبحانه وتعالى
ولكن الموقف!!!!!
الموقف كان شديد
أختى الصغيرة تتزوج!!
كيف ؟؟
ديه لسه عندها 20 سنه
أزااااااااى
ديه أنا بحس أنها بنتى!!!
وجاء العريس وتم الاتفاق على كل التجهيزات
وأنا لا يعلم بى الا الله
كانوا متجمعين فى الصالون وأنا على سجاده الصلاه أدعوا الله أن يضبرنى على هذا الابتلاء
وأن يجعلنى أتماسك
أشعر بأهانه
نظرات الناس تمزقتى
أشعر بالنقص
كمان كل بنات العيله أتخطبوا وأتجوزوا الا أنا وابنه عمتى تكبرنى ب4 أعوام
وأعلم أن لا ذنب لى فى كل هذا
فانا الحمد لله على قدر كبير من الجمال والثقافه والشخصيه التى يحسدنى عليها كل من حولى
ولا ذنب أبى الذى واااااااافق دون تردد ودون تفكير ولو للحظه أن هذا الشىء يمكن أن يجرحنى
ولا أمى التى أستأزنتنى فى زواج أختى
أاااااااااااااااااه
تعبت أوى أوى أوى
أختى
أشعر بكل حرف وكل كلمه قولتيها
وبقولك أن أنا عارفه أن ربنا كاتبلنا خير من ذلك
ولكن هذه طبيعتنا
لاننظر الا تحت أقدامنا
أشعر بأحساس يتكلمنى
أنى نفسى أشوفك وأقعد معاكى وأحضنك أوى أوى أوى

أسفه أوى على الاطاله

صباح الخير يا مصر يقول...

Miss Sosa
***********
الواضح انك شخصية لها اتجاهيين الاتجاه الجدي اوى مع غيير المقربيين و الاتجاه الحبوب... واللى جواه بيطلع برا ه مع المقربيين اوي و دى مشكله كبيره
لان عشان حد يعرفك كويس لازم يعرف اللي جواكى و انتى رافضه تشيلى الستاره اللى حاجباكى عن الناس يمكن لعدم ثقه فى الناس او خوف منهم و تسمح لى اقول ان ده عامل زى الجوهرة اللى فوقها تراب و الناس مش شايفاها فنصيحتى :حبى نفسك بشكل ايجابى ها تلاقى كل شئ حولك بيتغير بشكل ايجابى وافضل(وهو ده اللى عملته اختك بشكل تلقائى..حبت نفسها بشكل ايجابى لان الشكل السلبى لحب النفس هو الانانيه و استخدمت المباشره فى التعامل مع الناس بالسلام و التحيه و الابتسامه وعدم الخوف و الحذر منهم فوصلت للناس بسرعه اى انها ازالت الغبار الذى يعلو الجوهره فعرف الناس انها شئ ثمين.
نصيحتى حبى نفسك اكتر من كده و خصوصا انك داخلك حبوبه ولذيذه و ده اللى بتقوله كتاباتك
آسف للاطاله
مع وافر تحياتى
و تمنياتى ان تقابلى الجواهرجى فى اقرب وقت ...انشاء الله

في حب مصر يقول...

أسلوبك جميل في الكتابة

ربنا يرزق البنات كلها بعرسان تستحقها

تقبلي مروري

shirry يقول...

بصي يا جميل الموضوع اكثر من صعب بس انتي تناولتيه من زاوية تانية خليتي له شكل تاني

وعلي فكرة الجدية والانقطاع عن العالم مش مطلوبة اوي
زي برضو الانفتاح الزيادة مش مطلوب اوي

بس مش فيها حاجة لو اتعرفتي علي الناس جيرانك
رميتي السلام وانتي ماشية
متكشريش
جاملي الناس روحي مناسبات وافراح واعياد ميلاد مش علشان حاجة او انك توقعي عريس ولا كدة

علشان نفسك لازم يبقي ليكي علاقات كتير ووقت الزنقة تلاقي ناس جنبك
ومين عارف يمكن يجي النصيب بسبب حاجة من دي

بالتوفيق ان شاء الله

FaceMoon يقول...

بجد انا سعيدة جدا انى دخلت المدونة دى لانها عجبانى اوى واسلوبك جميل جدا وكلامك انا حاساة جدا جدا لانه تقريبا بيحصل فى كل بيت مشكلة الجواز الازلية سواء كبيرة بقى ولا صغيرة المهم اى حد فيهم يتجوز وخلاص دة نصيب مكتوب عند ربنا ومحدش عارف اية اللى حيحصل بعد كدة مش حتكون اخر زيارة ان شاء الله
تحياتى وتقديرى

ra7eel يقول...

هههههههه

طيب ونهى اجوزت ولا لسه

اختى الصغيره شايله الهم قوى وخايفه تعقد من غير جواز بسببى على فكره هى لسه فى تالته اعدادى وانا مخلصه كليه بقالى 3 سنين تخيلى
وبتفكر ازاىِ

هههههههههههههه
انا عن نفسى اول لما يجيلها عريس هخليها تتجوز بلا نيله

cenotaph يقول...

مش عارف أضحك ولا أبكي على نهاية الجزأ دي بس بجد أحساسك واصل من الكلام

أحمد كمال يقول...

بصراحة الموضوعات و الأسلوب بيقولوا إن ده أصيل فيكي مافيهوش أي افتعال ، و بيقولوا كمان إن لسة يا ما في الجراب ..

نحن في انتظار العيد الكبير :)

كيكى يقول...

ازيك ياسوسو ايييييييييييية ياستى الموضوع دةيعنى لما اجى اعلق اعلق على دةبصى من الاخر كدةمضايقيش نفسك وانا عايزة البوست الجاى اموت من الضحك اة صحيح نستينى شكرا على تعليقك فى المدونة ويارب تكونى ضحكتى بجد من قلبك وهستنكى فى البوست الجاى عندى ولو فضلتى مضايقة كدة هجبلك برعى وتفيدة ومش هيحصل طيب وبجد هحاول اعمل البوست جديد على طولوالله علشان خاطرك علشان تضحكى شوية.........وافتكرى دايما مادام فى بكرة اكيد فى بعد بكرة مش محتاجة ذكاء.....باىىى

أبو نور يقول...

من الحلاووووووووووووووووووة قريتها تانىىىىىىىىىىىىىىىى---- ياريت بسرعة تكمليها و لحد بكرة قاعد أراقب و فكرى سارح فى يوم جوازك هيبقى بكرة ردى ياسوسة 0 ومن العنوسة تخلص حكايتك و تبدأيها في بيت عريسك يلا يا سوسسسسسسسسسسسسسسسسسة

mayada يقول...

بجد جميله انت عسوله خالص
بس ابقي عرفي الست
ان العيد الصغير بيسبق العيد الكبير
بس الاتنين عيد من دم واحد
وكمان ان ربنا هو اللي منظمها
نصيب ان العيد الصغير يسبق العيد
الكبير
تخياتي ياقمر

NilE_QueeN يقول...

هو اه العيد الصغير قبل العيد الكبير

بس انا شايفه ان العيد الكبير احلى

ياأبت...إني رأيت يقول...

مدونتك دمها خفيف

walaa يقول...

ربنا يرزقها بعريس يارب
كل شىء اسمه ونصيب
مرسى ليك على الزياره
ويارب يكون فى بينا تواصل
تحياتى ولاء

cenotaph يقول...

ممكن طلب صغيور؟ أكتبي حاجه بخفة دمك عن غلو الأسعار

شهد الكلمات يقول...

يعني يا سوسو ده احساس نبيل منك جدا انك تعملي كدة و تدبسي مامتك بالموافقة , ثم انتي سنك مش كبير خالص عشان اللي قالت العيد الصغير ولا الكبير هو نصيب و ربنا شايلك الحلو ان شاء الله
طبعا اسلوبك رائع و كوميدي و انا متابعاه من اول بوست
استمري و احسنتي

Samar El Menoufi يقول...

bygd...damk 7'afef moooooooooot!!
3ndk keda tary2a te7'aleny 3ayza akml 2eraya...

مجداوية يقول...

السلام عليكم

أحيانا يتفوه الناس بحقائق فى غير موضعها فتصبح قنابل مسيلة للدموع
صحيح ان العيد الصغير ياتى قبل العيد الكبير لكن مراعاة مشاعر الآخرين أولى من استعراض فصاحة جارحة ,,أرأيت فقد عالجت شدة الألم بنبل وبفرحة وهكذا يفعل الخيرين ,,أشكرك على زيارتك رغم ان تعليقك التبس على لكن أعتقد اننى فهمته الآن
وفى انتظار بقية الطريق

تحياتى وتقديرى

بنت مصريه يقول...

ربنا يكرمك يا عبير يا رب ويرزقك باللى فيه الخير ليكى
اكيد ربنا عايزلك الاحسن
ومخليهولك لما ييجى معاده عارفه ليه
لانك طيبه قوى وجميله قوى
بوست جميل زيك يا قمر
وربنا يوفقك

سمراء يقول...

اولا اشكرك على زيارة مدونتى
وسعيدة جدا انى جيت هنا
أسلوبك مميز فى الكتابة وروحك الحلوه بترفرف على كل حرف كتباه
شوفى يا ميس سوسه واضح انك شخصية خجولة وعالمك محدود بس ده مش سبب لأنك وصلتى ل30 سنة من غير زواج لان كله قسمة ونصيب
قولى الحمد لله على كل شىء انا شخصيا افضل انى اوصل لسن ال30 من غير جواز ولا انى اخد لقب مطلقة
حالك حال بنات كتير
وامك زى امهات كتير
انا بحس بأحساسك بس بتجاوز الاحساس ده بسرعة عارفة ليه لأنى حاسه أنى جوهرة وان ربنا هيبعتلى اللى يستاهلنى كمان انتى نفس الشىء
بقولك ايه انا هدورلنا على عريس احنا الاتنين ونقسمه سوا

انا فى انتظار البوست الجاى

monaliza يقول...

سبحان الله فعلا كل شئ نصيب
والمستفز فى الموضوع ان عرسان كتير دلؤتى يحبوا يرتبطوا ببنات الجامعة اللى لسه مخلصوش يعنى اللى اتخرجت من كام سنة ومالحقتش يبقى عليه العوض
بجد تفكير غريب
وفى الاخر ده مكتوب ونصيب ومحدش عارف الخير فين
دمتى بكل خير

دكتور بهــدوء يقول...

ههههههههههههههه
حلوه العيد الصغير قبل العيد الكبير
بس
بعد العيد ماينفتلش كحك
ولا ايه


ربنا يوفق نهي
ويكرمك وتفضلي تكتبيلنا

omaima يقول...

أول مرة أسمع الكلمة العيد الصغير ييجى قبل العيد الكبير

عموما ترتيب العيد لا أظن انه له علاقة بالموقف دا

الزواج رزق سيأتى رزق كل انسان فى ميقاته الذى كتبه الله عز وجل

مدونتك جميلة وأسعدتينى بزياتك وانا اضفتها عندى على reader لأتابعك باستمرار دمت بكل خير

maha miho يقول...

هما عملوا المثل ده امتى؟ اول مرة اسمعه بس كوميدي موت
ميس سووووووووو،، انتي سوووووووو فاني تحفة تحفة يعني

tamer.sala7 يقول...

اسلوبك دمه خفيف وفي ناحية من الشياكة تمنياتي بالتوفيق

نهر الحب يقول...

اولا اسلوبك حلو اوى
وطريقتك تشد

اما عن العيد الصغير فاستى كل الاعياد بتجى الظاهر قبل العيد الكبير

تباين افكار واختيارات الاسر

كل الاحترام

موجه يقول...

هههههههههههههههههههه
مدونتك لزيزه ودمها خفيف بجد
بالتوفيق

يوميات مواطن مصرى يقول...

انا اسف مصر لن تشعر بالاعياد بعد الان
مبارك لغى الاعياد من مصر

Mahitab يقول...

بجد طريقتك حلوه جيدا:)
معجبه كمان بطريقه تعاملك مى اختك:)good luck

norahaty يقول...

السلام عليكم ورحمة الله وبركاته
miss sosa
وكأنك تصفين واقع بيتنا الجميل ,فالصغيرة هى التى تزوجت والكبيرة مازالت فى الانتظار
ولكنها للاسف ليست مثلك(مكبرة دماغها )لأ عاملها مشكلة حياتها وحياتنا كمان
شرفتنى زيارتك لى وادعوك حين تسمح الفرصة لك ان انت تشرفينى مرة تانيه وتقرأى بوست لى بعنوان" سرد واقعى وحى"فيه ما تقولين وزيادة لما حتتجوز نهى ايه اللى حيحصل..
ومرة تانيه شكرآ للزيارة وارجو التكرار وان كان علىّ انا مش حامشى من هنا بس انت جيبى لنا كرسى ولا حاجه علشان ما نتعبش ويبقى ذنبنا فى رقابتك (وياريت كباية ميه وسندوتشين شاورمة فراخ...انا مش طماعة)
وتسلمى من كل شر
norahaty

حزلووووقه يقول...

كده حرام عليكي
انا اللي عيني رغرت من الدموع



ربنا يكرمك ياسوسا يارب ويصلح حالك

سلامي ليكي

اختك حزلووووقه

أم سليم يقول...

بصي...كنت هناك...وبقيت هنا...
رحت عند عدد ثلاتة وتلاتين...
لما أسأل نفسي الآن...
ياترى فين الهنا...
صدقيني...ومن غير مواربة...وزوغان...
الهنا عندنا...
جوه في قلبنا...
مهما يكون وضعنا...
عجبني جدا الكلام...
وعجبني كمان...
إن فعلا لازم نناقش وضعنا...
إحنا فين...ولمين..وعشان...
نصدق في القولان...
لازم أبوابنا...
نفتحها..لتغير الزمان...

"ويتبعه حوار...إن شاء الله"...

محي الجويدي يقول...

ياريته العيد الصغير ييجي قبل الكبير
ياعيني علينا وعلى حالنا شباب ولا بنات
شكله ولا عيد صغير هييجي ولا حتى كبير
وربنا يعوض

rovy يقول...

السلام عليكم
ما شاء الله ايه المدونه الجامده دى كانت غايبه عنى فين ..
العيد الصغير بيجى قبل العيد الكبير
انا لسه فاكره الكلمه دى وماما وخالاتى بيقولوها لبابا الله يرحموا علشان يقنعوه يجوزنى وانا لسه مفعوصه عندى 17 سنه تخيلى انا دلوقت لما بأفكر بسأل نفسى ده حصل ازاى بس انا اختى الاكبر كانت اكبر منى ب 3 سنين بس وكانت وقتها لسه فى الجامعه ومهمهاش
بالعكس كانت مبسوطه لان معندناش اخ وشكرتنى علشان جبته لها . بعد الثانوى مباشرة اتجوزت وكملت بمساعدة ماما لان ده كان شرط بابا الله يرحمه علشان اتجوز . فى النهايه كل شىء قسمه ونصيب.

تحياتى

rovy

حاسوباتيه يقول...

جدعه خلي عندك روح رياضيه كده ولا تتاثري خالص كلنا اصلا معاكي شله كبيره اهو لسه مستنيين يعني

كالعاده بوست رائع وجميل جدا

رفقة عمر يقول...

مدونتك جميله قووووووى عجبتنى جدا ودمها شربات وموضوع زواج الاخت الاصغر دة حصل كتييييير قوى
بس بجد الاخت الاكبر دايما هى اللى بتفوز فى الاخر
وبكره تقولى رفقه قالتلى
ربنا يفرحك ويسعدك اللهم امين

جيفارا المصري يقول...

لما يكون مجتمعنا بيحكم و بيتعامل بمعايير متخلفة و معيبة مش لازم نمشي وراه و لا نأذي مشاعرنا بأحكامه الغلط
كل الحكاية ومافيها ان النصيب لسه شوية عليه
اصبري و احتسبي عندربنا
و اكير ربنا هيوفقك

ghoneem يقول...

اهلاً بيكي

يافندم تعجز عباراتي عن وصف ما وجدته في مدونة حضرتك من تميز وأناقة واسلوب كتابي ساخر أحييكي عليه
يجعلك في مصاف أهم كتاب الكوميديا في بلدنا

أشكر ليكي تشريفك وكلامك وانك خلتيني أعرف المدونة الراااااااااااائعة دي

اللهم ارزق بنات المسلمين عفاف وطهارة السيدة مريم
وارزقهم زوجاً صالحاً جديراً .....
وأن يصبح الطريق للكوشة مفروشاً بالورود وبداية السعادةان شاء الله

آمين آمين آمين

تحياتي

بالتوفيق.........

maha zein يقول...

اولا احب استئذن اني انشر التعليق ده في مدونتك وجزاكم الله خير
عوزة اعرف الناس ان الفكرة الي كنا نزلناها بتاعت مدونة الفضفضةوالي فكرتها بتدور حوالين
الي عنده مشكله ...اي مشكلة تعباه ومحيراه ومزهقاه.
يبعت لنا علي ميل
fadfad.here@yahoo.com
باى اسلوب يحبه
نروح احنا نشرين المشكلة فى مدونة اقلع همومك
http://moha-sagi.blogspot.com/
ونخلي الناس تدخل تشارك في حل المشكلة
وبنستعين باراء متخصصين إذا لزم الامر
*************
يبقه الميزة بقه انك لو عندك مشكلة تشارك...معندكش مشكلة تشارك بردو بانك تحاول ايدجاد حل لواحد بيلجالك
يمكن يكون في حلك الشفا ليه وتخفف عنه كربتة
**********
حبيت ابلغكم بان اول

مشكلة نزلت في المدونة
وصاحبها محتاج حد يقوله يعمل ايه
محتاج نساعده ونخفف من ضيقته
ادخلوا ساهموا في ايجاد حل
جزاكم الله خير
وجزا صاحب المدونة الي عرضت عليهاالخبر ده الف خير

أم سليم يقول...

هدية لمس سوسة
"ستجديها الآن على مدونتي"



بعد التلاتين بزمان...
كنت هناك...أنا...
دلوقت بقيت هنا...
بَصِلي بحنان...
ومعاه كانت البساطة والروقان...
خدني من إيدي وعَدِينا...
في زورق الأمان...
....
لما أسأل نفسي الآن...
ياترى على أنهو ضفة ...الهنا...؟؟؟
من غير مواربة...وزوغان...
الهنا عندنا...
جوه في قلبنا...
مش مهم على أنهو ناحية خطونا...
بس نفسي الناس تسيبنا لوحدنا...
هنعرف إزاي نقبل وضعنا...
وهنلاقي السعادة بنفسنا...
وعشان...
نُصدق في القولان...
لازم أبوابنا...
نفتحها..ونآمن...
بتغير الزمان...

Reem يقول...

مدونتك حلوة اوي و كلامك جميل

بس اخر وحدة بجد بتوجع اوي

Reem يقول...

مدونتك حلوة اوي و كلامك جميل

بس اخر وحدة بجد بتوجع اوي

امل يقول...

على فكرة بتحصل كتير ان البنت الاصغر لما بتتخطب اختها بتتخطب بعدهاعلى طول
بس صدقيني ان شاء الله ربنا هيرزقك بانسان جميل زيك وكريم يعوضك بيه خير
وتقبلي تحياتي

Mahitab يقول...
أزال المؤلف هذا التعليق.
DEW يقول...

تمام ولله
مهو حق كل بنت!!

hamdool يقول...

موضوع ممتع

thanks alot

د / احمد فارما يقول...

طبيعي ان كتير بيحصل ان البنت الصغيره تتخطب او تتجوز قبل الكبيره .. يريت نكون مؤمين ان دا نصيب مش اكتر ...

اشكرك علي طرحك للموضوع بشكل شيق..
( ملحوظه..تم اضافه مدونتك الي مدونتي
http://halitro7.blogspot.com/

اللهو الخفى يقول...

الف مبروك للزئرده الصغيره
بجد انا قرات اغلب موضيعك و الله و لكني لا املك الوقت الكافي للتعليق فيها
لقد اعجبني الكثير و خصوصا عم عبده اللي طفش
و فيفي سكول

shemo يقول...

عثوله خالص ياسوسه

مدونه بتاعتك جمييله وموضيعك اجمل

فى تميز دايم ونجاح مستمر

klmat يقول...

تدوينه هايله واقعيه ومكتوبه باسلوب
جميل وخفه دم وكمان عقل ةاتزان وحب الخير
عارفه كان لى صديقه جميله جدا وكانت لها
اخت اكبر بفارق وجميله لكن الصغرى كل يوم عريس المهم الام صممت ان الكبيره الأول وفعلا تمت خطوبه الكبرى وبعد شهر تقدم عريس
للصغرى فى كل المواصفات وطلب ان يكتب كتابه وحدث بعد شويه الاخت الكبرى قررت فسخ خطوبتها وتزوجت الصغرى واللهى زى مابقولك كده بعد شهو تمت خطوبه الكبرى لشخص ممتاز ومركزه مرموق هو نصيب رغم
تصميم الام على ان الكبيره الاول اراده
الله فوق كل شىءهى نصيب وانتى ست العاقلين وربنا يوعدك بماتتمنيه
شخصيتك جميله واسلوبك رائع
خالص تحياتى

حسبي الله ونعم الوكيل يقول...

الموضوع دة حصل معايا والحمد لله انا اخر تمام
ولا يهمك كلنا لها

f four a يقول...

انتي تصرفتي بحكمه...تسمحيلي احيكي

ولازم والدتك تعرف ان اللي يجيلو نصيب ماينفعش يستنى

وبعدين البنت خلصت

عقبالك وعقبالي

ماتنسينيش

سلام

nor يقول...

الحمد لله ..معنديش عيد صغير .زاقصد اخت اصغر و لا اكبر

bastokka طهقانة يقول...

ربنا يكملك بعقلك
و يسعد قلبك
و يزيدك خفة دم و اسلوب شيق
اوروفوار

.:.-=- ELGaZaLy-=-.:. يقول...

ههههههههههههههه


جميل اوى البلوج بتاعك والموضوع دمة خفيف اوى....

ربنا يكرمك بابن الحلال المهم يكون ابن حلال

ويا ستنى عيد كبير صغير المهم تسقو الشربات

كيكى يقول...

يووووووووووووو...انتى اسة مكتبتيش حاجة جديدة..يلا بقى انا سبقتك

جيهان علي يقول...

السلام عليكم ورحمة الله وبركاته


بجد نهى طلعت جدعة أوي لأنها في مرحلة المراهقة كانت عارفة هي عايزة ايه بالضبط ومش جريت ورا بدلة
وفعلا نهى ملهاش ذنب أبدًا طالما اتقدم لها المناسب واللى في قبول عليه
وجميل أن الاخت الكبيرة تكون متفهمة ده كويس وحتى لو جواها أحاسيس غصب عنها ان دي اختها الصغيرة إلا انها متقفش في طريقها


تحياتي

Salma Amer يقول...

اسلوبك ساخر جميل بجد
اعتقد ان الموضوع مش مرتبط باعياد ولا حاجة كله باوان ومكتوب
دة اللي بقولة لنفسي ومقتنعة بيه
تحياتي

amal يقول...

انا مره اتقالتلى متخافيش يا امل العيد الكبير مبيجيش قبل العيد الصغير .. بالمقلوب يعنى .. بس على موضوع تانى خالص غير الجواز .. ومش فاكره الحقيقه ايه اللى انا كنت خايفه منه

المهم .. انا مش مقتنعه بحدوتة رمى السلام دى
لانى اعرف بنتين اخوات توأم من اللى يتقال عليهم فوله واتقسمت نصين .. الشبه متعرفيش تفرقى بينهم
واللى متجوزتش فيهم اللى هى منفتحه اكتر من اللى اتجوزت
اللى اتجوزت بقى انطوائيه وطول عمرها فى حالها ولو شافت حد تعرفه حتى تدور وشها ولا تسلم على حد
والتانيه اجتماعيه جدا وطبعا مش هنقول يمكن التانيه احلى لانهم شبه بعض بالملى

دى مسألة نصيب وبس

وطبعا فى كل حاله ربنا بيسبب الاسباب بس مش معنى كدا اننا نعمل كل سبب قاعده
مره عشان اللى اتجوزت احلى .. مش شرط .. بيحصل العكس والوحشه بتتجوز الاول .. وشفت بنفسى
ومره عشان اللى اتجوزت منفتحه .. بيحصل العكس وانا بأكد وشفت بنفسى برضه

سلموا امركوا لله .. محدش بياخد غير نصيبه ومتفكروش فى الاسباب عشان لو عملتوا ايه ملوش لازمه

اما رمى السلام فده لله .. مش عشان الجواز

ادم المصرى يقول...

هههههههههههههههههههههه

لزيزه مووووووت ربنا يوفئك ياريت تزورينى مدونتى

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘