• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

السبت، 26 أبريل، 2008

زئـردة هانـم وعـم عبـده


انا بنت زي أي بنت .. علي راي الست دوللي شاهين
ليه اخت واحدة .. بس ان جيتوا للصراحة بميه
وانا والهانم اختي .. اه نسيت اقولكم ان هية الصغيرة .. المهم انا وهي حاجتين ملهومش دعوة ببعض خالص .. وأنا اكبر منها ب 8 سنين


احكيلكوا بقي عن الهانم اختي .. والشهاده لله هي هانم فعلا .. احنا مجرد أشياء اتخلقت ف الدنيا عشان تخدمها وبس

يعني من صغرنا انا ادربت علي اني اكون ست بيت وهي ادربت علي انها تكون ست البيت
طبعا هية لما كانت زئرده مش باينه م الارض انا كنت دخلت المدرسة وماما عودتني منذ ذلك التاريخ علي ان البنت لازم تتحمل مسؤلية البيت...... ايوه امال ؟
فكنت ف الصيف اخضع لتدريبات تنظيف الشقه والتي كانت لطفله بريئه مثلي عباره عن اشغال شاقة
وكان اجباري عليه اقعد اتفرج علي ماما ف المطبخ وهي بتطبخ بقي يا عالم ده اسمو كلام
بدل ما اشوف توم وجيري ولا بوجي وطمطم أو حتي اقرا المغامرين الخمسة والاخ تختخ اتفرج علي امي وهي بتطبخ
وطبعا اياميها مكنتش اسمع عن وثيقة حقوق الطفل
آآآآه لو كنت اعرف مكنتش امي هتفلت من تحت ايدي
المهم انا كنت بخضع لتدريبات الصاعقة دي والزئرده التانية بتكون ملهيه ف لعبة او امي عشان تتخلص منها رمياها قدام التليفزيون وايامها مكنش فيه دش عشان تتفرج علي سبيس تون
اللي بقي كان بيزيد ويغطي إن انا كنت اروق السراير وتيجي زئرده تشد ملايات السرير..

حسبي الله ونعم الوكيل !!
بس الشهادة لله برده كانت من يومها عيله تفرح فبالاضافه لانها وش اذية ومتسيبش حاجه علي حالها ولا ف حالها حتي ان امي كان عندها قط بلغ من العمر ارذله اسمه عم عبده بالذمه والنبي شايفين
امي مسميه القط عم عبده محسساني انها كانت مربية بواب مش قطة
المهم عم عبده ده يا اسيادنا كان احول ومبيشفش وده لتقدم السن وكان لا بيهش ولا بينش لدرجه ان احنا استوطن ف بيتنا عيلة فيران ف الصندرة كانو بيلعبوا حواليه النطه وهو ولا هو هنا
المهم لما اختي كبرت واتنبهت لعم عبده اصبح يا عيني سلوتها
بقي مبيتهناش علي نومه ولا علي قعده كانت بتمسح بيه بلاط الشقة .
كانت تشده من ديله وراسها والف سيف تحميه وعم عبده ياعيني يقنفد اديه ورجليه ويحاول يقاوم ويفضل يقول آآآآآآو أآآآآآآآو وديه باللغة القططي الفصحوي ..

النجدة .. الغوث ! !
المهم ف الاخر عارفين من زهقه عمل ايه
انتحر ..........!!
ايوه والله .. انتحر !! هرب من البيت.... قط بقاله 13 سنه مكنون وف حاله جت الزئرده دي وخلته يطفش وده بمثابه انتحار لانه اصلا مبيشفش وانتو عارفيين بقي قط زي ده ف الشارع ممكن يجراله ايه مع الوعي العالي ف بلدنا للرفق بالحيوان .


نيـآآآآآآآآآآآآوم نيـآآآآآآآآآآآآآآآوم
وديه باللغة القططى الفصحوى تصبحوا علير خير واكملكم بعديــــن

38 التعليقات:

حاسوباتيه يقول...

اول مره ازورك وانتي لسه اهو بتقولي بسم الله في المدونه بس باين عليها هتكون جااامده موت وربنا يوفقك ومستنيه جديدك وتقبلي مروري وتحياتي

محي الجويدي يقول...

ممتاز بصراحة
والى الأمام دائما
أنا بيعجبني في مدوناتك إنك بتهتمي بكل حاجة بالتصميم والصور وكل حاجة
وفي إنتظار بقية إسطورة مس سوسة

بس هو مفيش طريقة تخلي الإضافات الجديدة تبفى اسفل القديم علشان يبقى فيه ترتيب للأفكار؟

رئـــــيسـة حزب الأحلام يقول...

عقبالى يارب الاقى القط ابن الحلال زى اللى فى الصورة دى ولولوى
اتمخترى ياحلوة يازينة يامبعتة الورد جوة جنينة زغرتولى ياناس

رئـــــيسـة حزب الأحلام يقول...

اية التشويق دة عاوزين نعرف الحكاية عشان نعمل زيها ولولولوى ىىىى

الفارس الملثم يقول...

مين دول , دول بداية الحكاية ولا نهايتها ممممممممممم

منتظرين نعرف ؟؟؟؟؟؟؟؟؟

هاجر يقول...

اسلوبك حلو و جريء و يشد و في انتظار الجديد و ان شاء الله مدونتك بقت عندي في الفيفوريت
بالتوفيق

كوارث يقول...

مستنظر

ra7eel يقول...

هههههههههههههههههههه

عسل بجد دمك شربات

تعرفى بقى انى عندى العكس تماما وتقريبا فرق السنه بينى ويبنى اختى الصغيره كده برده

بس انا اللى مدلعه جدا وهى بصراحه طالع عينها بجد

تخيلى لما تكون هى 3 اعدادى وهى اللى بتعرف تطبخ
ربنا معاكى ويخليلك الزئرده الصغيره

soso يقول...

ههههههههههههههه
قط يسيب البيت ويمشى بعد المده ديه كلها
يا بنتى ديه مش ممكن تحصل الا أذا كاتن تعرض لضغط نفسى وتعذيب بدنى فظيع
ههههههههه
بس بجد أسلوبك شيق جدا
بس متغيبيش علينا أنا عايزة أعرف بقيت الحكايه
أختك فى السنجله سوسو

رئـــــيسـة حزب الأحلام يقول...

حلوة الزغرودة اوى بس فين الطريق الى الكوشة دة

s@gi يقول...

لأ سوسه ..سوسه يعنى
ومش أى سوسه
مالك ومال البت ما تسيبيها تعيش سنها
ولا صعبان عليكى عمن عبده
أوووو .. أووو
وده باللغه القططى الفصحوى
حقد .. غيره

الفارس الملثم يقول...

انا لما رديت المرة اللي فاتت البوست ده مكنش موجود , هو مفروض نرد وبعدين تحطي الوست مممممممم

بس بجد اسلوبك جميل اوي ودمه خفيف

تحياتي

حسبي الله ونعم الوكيل يقول...

انتي ناوية تقضي علي العنوسة بجد
ابقي افتكريني معاكي

Whispers just for a Night يقول...

قُلْ بِفَضْلِ اللّهِ وَبِرَحْمَتِهِ فَبِذَلِكَ فَلْيَفْرَحُواْ هُوَ خَيْرٌ مِّمَّا يَجْمَعُونَ [يونس : 58]

بتوفيق من الله وفضل تم تحويل طلب الحملة التي تقودها المدونة بشأن سن قوانين للحد من التجديف على الإسلام خاصة والأديان عامة إلى المسئولين في هولندا
http://kawlansadida.blogspot.com/2008/04/blog-post_28.html

ساهم بتوقيعك في مطالبة الحكومة الهولندية بسن قوانين من شأنها حماية المسلمين من العبث بمقدساتهم الدينية خاصة ومن التجديف على الأديان عامة على الرابط التاليhttp://kawlansadida.blogspot.com/2008/04/blog-post_21.html
وجزاكم الله عن إسلامكم خيراً"

جيهان علي يقول...

السلام عليكم ورحمة الله وبركاته

اسلوبك دمه خفيييييييييف بجد وجميل جدا ما شاء الله

وصعب عليا اوي القط عم عبده حقيقي تحسي انه مش يستحق البهدلة دي كلها وفي الأخر يطلع للشوارع كدة ويبقى قط شوارع

مدونة جميلة وأسلوب جميل

تحياتي

مفقوعة مرارتي من حماتــــــــــــي يقول...

ربنا يرحم عم عبده
تلاقيها سمته وتاوت جثته \

هو قيه قطط بتطفش
دي القطط لازقة بغرائ وابقي اسألي قط حماتي

سبهللة عالآخر يقول...

دمك شربات ومشروع روايئة عظيمة
تحياتى وبالتوفيق
واشكرك على مرورك عندى

Desert cat يقول...

هههههههههههههههه
والله انتى زى العسل
بس انا حبيت زئردة اوى اصلى كنت لا اقل عنها فى الشقاوة وكنت على طول قاعدة اتفرج على توم وجيرى وماما واخاوتى بيعملوا لى اللى عايزاه مش اخر العنقود بقى
ربنا يخليكو لبعض

الطائر الحزين يقول...

ما هى الدنيا كدة ناس فى ساكته وناس فى هرية وناكتة


هو انتى فكرك انك عجباها

تسمحى انط فى كرشك تسمح لى اسيح دمك

قصدى دم أختك


على جنب كدة

اختك ده هو النوع اللى واخد حقة

(لى مواقف مشابهة على اللبس وتوضيب السرير اللى بنام عليه انا واخواتى)

هو كل الكبير كدة و ايه


لوزة نوسة تختخ عاطف محب

مكنتش بقراهم
كان رجل المستحيل

تحياتى

محي الجويدي يقول...

لا فين الكوشة بقى
علشان بصراحة كده ازعل
ماهو ياجماعة مش البنات بس اللي مستنية الكوشة فيه رجالة عنست برده ورجالة هتعنس
وحسبي الله ونعم الوكيل في اللي كان السبب

هاجر يقول...

انتي حتة سكرة اتحطت في الموقع كله دمك خفيف و اسلوبك جميل جدا
اما بقي بالنسبة لعم عبده فده كان عايز القطة توتة قطة صحبتي كانت مشيبة العرسان اللي بيجولها (ياحسرة القطط بيجلهم و احنا قاعدين نأزئز لب )و لو كانت قابلته كان العما ده راح و قام و اتحرك و راح علي الخنكة طوااااااااااالي

تحياتي ليكي و في انتظار المزيد

Eldebug يقول...

عسل ياخواتى واللهى
مش انتى طبعا انا اقصد زئردة ...
خلاص ياستى متزعليش وانتى كمان ... بس انا زعلان من حاجة واحدة ... انا فهمت من كلامك كده انك تقصدى ان سبيس توون دى قناة اطفال...ارجوكى وضحى موقفك

فرنسا هانم يقول...

تحيه لكى فى اول زياره
ومبروك على المدونه
والظاهر كده اننا هنبقى اصحاب لانكى كوميديه مثلى تماما

صحفية روشة يقول...

الحمد لله مش عندى اخوات بنات
بس عندى اخين ربنا ما يرويكى
بيطلبو كوبايه الميه وهما نايمين على السرير واحيانا بنجيب التواليت لحد عندهم
كسل مفيش بعد كدة
____________________________
للى عاوز يزور لوحه شرف يدخل مدونتى وهتلاقو لينك لوحة شرف فيها
لوحة شرف هى لوحه شرف لكل من دون فابدع وينشر بها افضل بوستات كتبها البلوجرية
____________________________
ميفوتكش البوست الجديد (شيوخ على ما تفرج)

la3lahakhier يقول...

اول زيارة يا ساسو
بس عجبتينى اوىىىىىىىىىىىى
بس يا ساسو البلد مش ناقصة احزاب الا نفسك تكبر علينا ولا حاجة
انا فى انتظار الباقى

طارق الغنام يقول...

السلام عليكم
سعيد اننى اول مرة ازور مدونتك
ووجد فيها اسلوب رائع وخفة دم
تقبلى تحياتى
ومتعك الله بالحب والسعادة
ودمتى متألقة
ولى عودة مرات عديدة
@@@@@@@@@@@@@@@@@@@@
يرافق ابنتة الى النوادى والملاهى وغيرها وهى كاسية عارية مائلة مميلة تمشى مشية خليعة تظهر الصدر والارداف وترسل الشعور .. يفرح بأنة تزوج وانجب جمالا يخطف الابصار ولايبالى بعين ترمقها وقدم تتبعها ونظرة تتفحصها وانف تشم رائحتها
الباقى بمدونتى ادعوكم لقرائتة
مع اجمل امنياتى وشكرى

maiosha يقول...

تصدقى بالله يا سوسة
أنا حاسة إنى بقرا حكايتى مع أختى الصغيرة بالضبط .. والله نفس الحكاية بنفس التفاصيل .. بس مكنش عندنا قط علشان تطفشة للأسف .. علشان كده هى قررت إنها تطفشنى أنا شخصيا من البيت .. ومش هترتاح إلا ما تعملها
خلى بالك منها .. هم الصغيرين كلهم كده

رونى المصرى يقول...

اول زياره ليا



مدونه اكثر من رائعه

بخصوص البوست جميل


ياريت نكون على تواصل

ROONEY

ansana يقول...

هههههههههههههههههههه

تحفة جدا والله

ربنا يخلي رئردة هانم ليكي ويخليكم لبعض

ويرحم عم عبده

الاستايل بتاع المدونة تحفة جدا

ومحتوي المدونة جامد جدا ماشاء الله

Soooo يقول...

اسلوب ساخر حلو قوي الحقيقه

ولودعبستي في مواضيعي القديمه هتلاقي موضوع اسمه (سوووو وتسع قطط)
وعلى فكره
عالم القطط ده عالم واقعي بجد




سلاموووووووووووووز

f four a يقول...

اسلوبك رائع جدا

وربنا يعينك على زئرده ..ويعني أنا كمان على الزئرده التانيه اللي عندي...

Sister Of The Moon يقول...

ههههههههههههه
هايل!!
الله يستر على عم عبده
طريقتك في السرد جميلة جدا
ربنا يوعدنا! هههه

كراكيب يقول...

يلا بقىىىى وانا مالي وانا مالي عايزة اعرف الباااقييييييييي
سووو... اول مرة ادخل البلوج بتاعتك وبجد هايلة مووووت... يلا بقى كملي قصة زئردة هانم وضحاياها
ماتتأخريش علينا...
ميرو

أمل فتحى عزت يقول...

الاخت اللطيفةميس سوسو
شكراًعلى مرورك بمدونتى واشكرك أكثر على انك وضعتى جزء مما يحدث فى بيوتنا المصرية تحت الميكروسكوب بأسلوب فكاهى هادف وأنى لأشكر مخترع المدونات التى أظهرت نوابغ كالجواهر كانت تحتاج الى الصقل والترتيب وعرضها فى مكان يسطيع المشاهد ان يراها من كل الزوايا هكذا فعلت المدونات بأصحابها
تمنياتى لك بالتوفيق والاستمرار

ســمـــر احمد يقول...

ولو ان البوست مفروض انه درامى لانه بيحكى عن النهاية الرهيبة لعم عبده بس ما قدرتش امنع ابتسامة
سوسة انت بجد سكرة
ارق امنياتى

عاشقة القمر يقول...

هههههههههههههه ..
تحفة جدا على فكره .. تصدقي ان انا كمان اول ما قريت العنوان بتاع البوست افتكرت عم عبده ده البواب بتاعكم D:
يلا مش مشكله اهو هرب يا عيني واصبح يلاقي مصيره في الشوارع .. ده اذا كان لسه موجود اساسا بالمواصفات اللي انتي قولتيها دي هتلاقي اخر حاجة عملها اساسا هي محاولة لتعدية الشارع بتاعكم ..
سوساااااا .. هتلاقيني هنا كتير إن شاء الله بس اوعي تزهقي ..

amal يقول...

حسيت انى شبهك اوى على فكره

انا كمان اتربيت على انى اكون ست بيت

وذيك مكنتش اعرف عن وثيقة حقوق الطفل

طفوله ضايعه ضايعه يعنى

يلا مش مشكله انا اصلا محبتهاش طفولتى

واللى عايزه اعيشه مش فى الطفوله

والحمد لله لسه الوقت ادامى

جو المدونه عندك جميل بجد ما شاء الله عليكى

عجبتنى فعلا

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘