• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الأحد، 8 يونيو، 2008

زيارة مسعود بن هنية .. غطوني وصوتوا عليه

كنت راجعة من الشغل تعبانة ..... وكان حلم عمري وقتها يتلخص في اني اكل اي حاجة إنشالله اكل بعضي
المهم قبل الاكل قررت اعمل الهوم ورك بتاعي الاول وهو اني انشر الغسيل لماما لانها كانت خلصت الغسيل قبل ما اوصل البيت بدقايق ....تقولش ظابطة تايمر الغسالة عليَـه !!!
المهم ما صدقت الاكل وصل لمعدتي اللي كانت فيها حداية بتصوت مش عصافير ....علي طول شديت نفسي علي اوضتي طمعانة اناملي ساعتين قبل ما اقوم ابدأ اذاكر
ومفيش 10 دقايق ..... اصلا المخدة ملحقتش ياعيني تفرح بيه
الموبايل رن وانا بعيد عنكو اصلا نغمة موبايلي تصحي الميت
: ازيك يا ساااوسن .....هي هي هي هي
انا ف عقل بالي ... اه هو انت ...اصلا مفيش حد بيضحك زي العرسة اللي بتولد كده الا هو .....
الطرف التاني امهم .. المهم اني في السكة جايلكوا اهو ...اني ف عبود ...هركب الميترو ... واتقفل الخط ف وشي من غير مع السلامة ...اصل البعيد بيتحاسب بالثانية ....مشترك ف نظام كدمات
طبعا مفيهاش نوم كده
خرجت لماما لاقيتها قاعدة ماسكة التليفون
: ماما ....مسعور ... قصدي مسعود بن هنيه عمتي جاي
ماما وهي بتنهي مكالمة التليفون : طيب يا قلبي لا اله الا الله يا نهي
: ايوه يا سوسن ماهي عمتك اتصلت وقالت إن ابنها مسعود جاي عشان يقدم لاخوه في كلية الشرطة
مفيش 10 دقايق كمان ولاقينا مسعود بن هنية بيطل علينا بوشه السمح ... وهو لابس اللي ع الحبل كله ماهو جاي القاهرة بقي
بعد الترحيب والذي منه مسعود اتغدا ومعتقدتش إن دي كانت المرة الاولي اللي بيتغدا فيها النهاردة
ومش عارفة- ليه كنت غرقانة ف تأمل تقاطيعه وهو بيعذب الاكل ...قصدي بيتغدا ...ونط ف دماغي ذكرياتي عنه واحنا صغيرين – وانا بتفرج عليه وهو بياكل برده
كان وهو ف سن السادسة عبارة عن بطيخه وفوقها شمامة صغيرة واذكر فيما اذكر انه كان دايما يلبس جلابية مقلمة بالطول
بس كان منظره بيبقي تحفه وهو بيمارس هوايته المفضلة ف اكل قوالح الدرة النية (الذرة قبل ما تتشوي بيسموها كده ف بلدنا)
وبينما هو كان منهمك في اكل الذرة انا بصراحة كنت ببصله بتأمل وكل مرة يقطم قطمة ابقي متوقعة صرخة تخرج من حلقه اللي محشور فيه حبات الذرة لانه تقريبا كان بيدخل نص كفه ف بقه وهو بياكل فمن الطبيعي انه يعضه
وبعدين طبعا كف مسعود مش زي كف بكار ابو كف رقيق وصغير
المهم فجأه جوز عمتي عم عبد الله الله يرحمه اخد باله مني وانا مبحلقه في وش مسعود ... راح خابطه علي قفاه كفاه علي وشه
: ايه ياد مالك بتحش ف الدرة كده زي العجل الزرايبي وجع في بنطنك يابن هنية
وطبعا بعدها المنظر كان اسطوري ومسعود قايم وبيعيط وبيدور علي كوز الدرة وبقايا الدرة لسة ف بقه وهو نازل مضغ وعياط في نفس واحد
مفوقتش الا علي صوت مسعود
: مش جولتيلكي يا سااااااوسن بقي انا جاي مصر ليه
أنا : لا عمتي قالت يا مسعود عشان محسن يقدم ف الشرطة ... الا صحيح هو مجاش معاك ليه
مسعود : لا انا اجولكي بجا هو موش ايجا اعذينه لسه التجديم موش بدا اني جيت اشتري الدوسيه بس ... اّي كدي
مش عارفة طبعا إذا كنتم محتاجين ترجمة لكلامه ولا لا
وبصراحة فيه غرض تاني
ومع اخر كلماتته كانت ماما بتصبله رابع كباية عصير ....
اصلا مسعود ما شاء الله عليه سفنجة ...
عمتي هنية كانت بتقول- وهو طفل مع اني لو مكنتش شوفته بعيني مكنتش اصدق ابدا ان ده كان طفل – انه كان ممكن يشرب قسط لبن لوحده ... القسط في بلدنا هو الاسطوانة المعدنية اللي بيحطوا فيها اللبن وهو لسه جاي من الجاموسة عدل
مسعود مع اخر شفطة : فوتكي ف الكلام يا خالتي .. اني بجا جيت ليه مصر .. اني كنت جاعد مرة ع السخام ديه الاسمو ايه ..البتاع دي اللي اسمه النت ...
انا باستغراب : ايد ده يا مسعود ماشاء الله
مسعود : ايوه الله ... أي كدي ..كنت ايه بتصفح جريدة خوربيت اليومية
انا : ايه !!
مسعود : اجولكي اني... اصل العيال ف البلد عملو كي صفحة ع السخام ديه اللي اسمه النت سموها جريدة بلدنا .. وبم ان بلدنا اسمها خوربيت اني جولتلهم يغيرو الاسم ... أي كده
المهم يا ستي مش اطول عليكي لتنامي مني .... الا فين يا الحلو يا خالتي
ماما : حالا يا حبيب خالتك
أنا : هه ايوة يا مسعود كمل
مسعود : لجيت اعلان عن طلب مؤلفين اغاني بعيت لهم ردوا علية وجاي اتفاج معاهم
انا : الله الله الله ده انت فنان بقي يا مسعود
مسعود : لا هو اني شوية ولا شوية .. دي اني جاني فكر اقدر املك بيه زمام الاغنية .... قالها وهو بيعدل كرافتته بكل ثقة
الا ايه رأيك في الجرافتة دي الواد محسن اخويا الاهبل بيجولي عاملة زي سلبة البهيمة الشاردة
أنا : ... اسمو كلام دي شيك جدا دي تحفة يا مسعود ... بس هي كان اصلها ايه
مسعود : ايه !!
أنا : ما علينا قولي يا مسعود بقي ايه زمام الاغنية اللي انت امتلكته
ماما دخلت علينا وهي شايلة طبقين مهلبية ومحدش عقله يوزه ويفكر إن فيه واحد منهم لية .. ده ربط كلام بالنسبة لمسعود بس
مسعود وهو بيشفط المهلبية من فوق المعلقة والمهلبية يا عيني عاملة زي ما تكون عربية سيات فراملها سابت ف مزلقان
: اجولكي علي عنوان الاغنية لاول ... هتتهبلي اكتر ماانتي والله
الحقيقة مسعود كلامه بينقط شهد زي ما انتو شايفين
مسعود وهو بيشفط اخر نفس في طبق المهلبية اللي نفسه اتقطع من الجري والزحلقة ف مزلقان زوره
: عارفك الفضول هيجتلكي ..... اهي اهي اهي اهي
يا ستي العنوان بيجول
-------
بحب الكوسة يا بغل
-------
اسمعي يا ستي
اسكت بطل رغي ... مبحبش الخيار بحب الكوسة يا بغل
وهجولك ...
--------
انا مقاطعة : لا عظيم عظيم كويس خالص
مسعود وهو ف حالة نشوي مش جولتلكي امال لما اكمل
اصل يابنتي الغنا دلوقتي للحمار وللخضار اني جمعت الاتنين
:..... والله فكر برده يا مسعود
ماما : كل كل يا مسعود بالهنا يا حبيبي والنبي ليك واحشة
مسعود : الا جوليلي يا سااااوسن انتي لسة زي ما انتي ..... إهي إهي إهي
قالها وهو بيضحك مش عارفة علي ايه وصوت ضحكته كان عامل زي تزيقة الباب القديم وهو فيه عادة لما يضحك كرشو الصغنطوط يترجرج في حركة لولبية ... وملامح وشه تنكمش كلها زي ملاية السرير اللي لسة متكوتش
أصل أمي بتسأل عليكي علي طول وبتدعيلك يفوك بوارك
يا بنتي الحجي نفسك ده الجاموسة الي متعشرش وهي صغيرة خيرها بيجل
مسعود قالها وهو علي سجيته من غير أي تعديل ....جبهالي علي بلاطة ........ انا بقيت بايرة
متعرفوش كلمات مسعود اللي زي الرصاص اللي خرجت منه بعفوية دي عملت فيه ايه ..........

49 التعليقات:

Eldebug يقول...

اصطاد يا جدع .. اول تعليييييق

راجع اهوه

dr-dina يقول...

بجد يا سوسن انتي سكره...متعرفيش انا كنت هموت ازاي عشان تنزلي البوست الجديد..

وبعدين ولا يهمك من مسعور... مش هو بس اللي مسعور..الناس كلها بتتسعر علي اللي متتجوزش كأنهم ما صدقوا عضمه ادامهم..مانا بعاني من اللي بتعاني منه بس ولا يهمنا...

والله بكره ربنا هيكرمك اخر كرم...وعم المسعور هتاخدي التطعيم ضده وبعدين نعدمه ونخلص..

بمووووووووووت فيكي يا حبيبتي..ومتتأخريش علينا

Eldebug يقول...

دايما كده يا سوسة ... من ابداعك مش بنعرف اذا كنا نضحك ولا نعيط ... مع كل ابتسامة بنلاقى نظرة حزن ...
انتى قلبتى الموازين يا سوسة واللهى ... بعد ماخليتينى اعيط من كتر الضحك ... خليتينى ابتسم ... ابتسامة حزن واسى ...

عارفة من وانا صغير امتى بلاقى الحاجة اللى ضايعة منى ..... لما بفقد الامل انى الاقيها

hager يقول...

جميل طبعاا يا سوسا
بس مش عارفه ليه جالي احساس غريب
بان مسعود ده مش لطيف
اصلي مبحبش الناس اللي بتحدف الكلام زي الطوب
بس طبعاا اسلوب عرض راائع كالعاده
شكراا ليكي

mohamed يقول...

على أد ما ضحكت بس أديأتلك بجد سوسا مش كلام الأنسان ده هوه اللي هيديأك أكيد أرميه ورا ضهرك

Unique يقول...

ولا يهمكيا سوسو .. انتي هتاخدي على كلام

الاخ مسعور ده ...

سيبك ..

تحياتي

mohra يقول...

و لا يهمك ...اكيد مش اول مره و لا هاتكون الاخيره...يا جبل ما يهزك ريح

ٍSOU يقول...

مابقاش غير مسعور كلام .. هى الناس دى لية مش ناوية تبلع لسانها .زجتهم الاقرف.. الاول هى البت مش هاتتجوز , واول لما تتجوز هى لسة ماحملتش ولو طولت من غير حمل اتفرجى على مصمصة الشفايف و الاشفاق كان الواحدة جالها سرطان فى المخ و العياذ بالله .. ناس عايزة الحرق
سيبك منهم الرزق دة فى ايد ربنا بس المشكلة ان المجتمع المتخلف دة مش بيعترف للبنت بحاجة الا الجواز .. مش مهم الشغل و التعليم .. ممكن تبقى متجوزة و بهيمة عادى يعنى و فى الاخر يقولك انتى متخلفة و مش هاعرف تربى العيال .. والله دة مجتمع عنده ازدواجية مش عارف هو عايز اية و لا اية
المهم انك عندك هدف و بتحاولى توصلى ليه و ناجحة فى كدة..ربنا يوفقك يا سااااااوسن :))

بنوته مصرية يقول...

ههههههههههههههه

ايه ده اغنية لو نزلت هتكسر الدنيا ههههههههههههههههههه

طيب انا فعلا بحب الكوسة بس مين البغل بقي هههههههههههههه


كلامه فعلا زي الدبش

تسلمي يا قمر

طائر حزين يقول...

أوم إيه الواد مسعود ده آى والله عاوز الإعدام.
انا هقولك حاجة انا أعرف واحدة كويس أوى بسبب كلام الناس ضحت بحاجات كتير من أحلامها واتنازلت كتير عن مواصفات كانت بتتمنى تكون فى شريك عمرها وقلبت حياتها 360درجة لما بقت على النقيض دة كله بسبب كلام الناس انت انسانة متعلمة وفاهمة كويس أوى ان الناس وكلامها مبيجيش من وراه غير الغلب
البنت لسة متجوزتش كل ما يشوفوها يسألوها مفيش حاجة كدة ولا كدة؟! لما تتخطب ايه دة هى دى الشبكة بلا نيلة، يوم فرحها هو الفرح ماله عامل كدة ليه؟! دة فستان دة ولا دة منظر دى فى الأيام العادية بتبقى أحلى من كدة، اتجوزت البنت تانى يوم على طول مفيش بيبى جاى فى السكة؟! يلا يا حبيبتى استنى اسبوع كدة وروحى اكشفى وخليه يكشف لازم تسرعوا بالعلاج وهكذاااا

دايما الناس بتعكنن على بعضها وخاصة أمثال عتوه قصدى مسعود

واحدة مفروسة يقول...

إييييه ده فيه بوستات بتنزل من ورايه
البتاع الريدر ده بايظ ...مش بيقولى على الاخبار على طووول

ههههههههههههههه
ههههههههههههه
البوسن فظيع يهلم من الضحك و خصوصا مسعور

انت دمك شربات
و يا بنتى انتي و لا بايره و لا حاجه طلعي كلام مسعور ده من مخك
ههههههههههههههههههه

ياااااااااااالهوييييي لو اتقدملك يا ساااوسن....حتقولي انا كده احسن
هههههههههههههه

صحفية روشة يقول...

النهاردة عيد ميلادى تعالو على مدونتى وسمعونى احلى هابى بيرث داى تو يووووووووو

كوكي يقول...

متزعليش يا سوسن أصل الولا مسعود ده باين عليه أهبل و الكلام بينط يفط من بقه من غير ما يدري

ينكد عليك عمرك يا مسعود يابن هنية
مش تحاسب علي كلامك اللي قاعد يدلدق منك كدة
هايل هايل يا سوسن أسلوبك رائع
متغيبيش علينا أوي كدة

NoHeal يقول...

شكرا لكي علي رسم البسمة وعلي صبرك علي سي مسعود
تحياتي

Ellithy يقول...

برجاء الربط لدليل مدونات العرب
تمت اضافة مدونتك للدليل
http://ab-dir.blogspot.com/

shayma يقول...

يا خراااااااابى
ده مسعور فعلا
مكنش شفط المعلقه وقفت فى زوره عشان ينقطنا بسكاته

بقولك ايه يا سوسه بلا بايرة بلا عانس بلا الكلام الى يجيب المراره ده

طلعى كلامه من دماغك مين ده كمان الى هتاخدى على كلامه ده بيغنى للبغل يا سوسه
:))))))))))))))

بصى يا ستى من منطلق خبرتى اعرف ناس كتيير سنهم معدى التلاتين بكتييييييييير ولسه بيتجوزوا
يعنى اكيد مش عانس ولا بايرة ومتسمعيش الكلام ده ومتصدقيهوش

بس انتى كاتبه الحكايه اييييييه
تحفه بجد
سلامى يا قمر
:))

karim يقول...

اولا احب ابدى اعجابى بموهبه مسعود الشعريه الفذه
ثانيا انا لو منك كنت عملت عليه شوربه اليوم ده اصلا ده بنى ادم غريب جدا بصرف النظر انو قريبك يعنى معلش



تحياتى ليكى زى كل مره على خفه دمك الفظيعه..

عروسة ننوسة يقول...

تحفة البوست تحفة ايه يا بنتى خفة الدم دى يخرب بيت عقلك بس بقولك ايه سيبك من ابن عمتك ده وكلامه اللى زى الدبش النصيب لما بيجى مبيستناش...ابقى زورينى وبطلى بخل

maiosha يقول...

هههههههههههههههههههههههه

يخرب بيت كده .. هى الكائنات دى لسه منقرضتش

معلشى يا سوسة هو إبن عمتك على عينى وعلى راسى .. بس والله أنا لو مكانك كنت حميته بطبق المهلبية التانى

بس سيبك إنتى بوست يجنن بجد يجنن .. وابن عمتك ده حكاية ومؤلف أغانى كمان ماشاء الله .. عيلتكم فيها فنانين

ربنا يخرجك من الزيارة دى على خير

الجدة فصيحة يقول...

السلام عليكم ورحمة الله وبركاته


واحد كاتب أغنية عن الحمار والخضار مع بعض
ممكن يزعل منه والا يتاخد على كلامه اصلا ؟؟

أكيد الكلام جارح لكن بلاش تخليه يسيطر عليكي كتير

تحياتي

هوة فى أيه؟؟soso يقول...

ههههههههه
الله يسامحك يا مسعود
أيه التشبيه البليغ ده
جموسه؟؟؟ وتعشر كمااااان؟؟
الله يسامحجك مطرح ما أنت قاعد
كلامك يا مسعود عامل زى فحل البصل الاحمر اللى يتحط على الحرج يولعه
منك لله يا شيخ نكدت على البنيه وأصحاب البنيه

وأنتى يا سوسا ولا يهمك
ده العادى بتاعنا
بس العيار المرة ديه كان تقييييييل شويه
لأ شويتين تلاته
بس عاااااادى ولا يهمك
خلى عندك ثقه فى نفسك
أهىء أهىء أهىء
عاااااااااااااا

أميمة كامل يقول...

لغتى هويتى.. الى كل عربى يتحدث بحرف الضاد، الى كل مسلم غيور على لغته وهويته الاسلامية ،الى كل من يريد العز والفخر لأمته وهويته الى من يبتغون النصرة ان شاء الله، الى من يسعون الى الصلاح والاصلاح ...ندعوكم جميعا اخوانى وأخواتى الافاضل الى المشاركة معنا فى هذه الحملة والتى شعارها (لغتى هويتى )وندعوا فيها الى أحياء اللغة العربية فى كل كتابتنا بجميع المدونات والمواقع والمنتديات وموقع الفيس بوك هذا الاسبوع بأسلوب سهل بسيط لا ندعوا الى أستخدام غريب الالفاظ أوالالفاظ الفخمه ولكن ندعواللبعد عن الالفاظ البذيئة والعامية المتدنيه ، لنثبت لانفسنا اننا أمة مسلمة عربية ، نثبت لانفسنا اننا نحب لغتنا ونعتز بها اكثر من اى لغة اخرى، هذا هو هدفنا.... يدك بيدنا ننشر الامر بكل المواقع والمنتديات والمدونات والايميلات- لله عز وجل فقط نفعلها ، لحفظ ماء وجوهنا أما أنفسنا نفعلها ، ليذكر فى التاريخ اننا ما زلنا عرب نفعلها ،لتأتى يوم القيامة امام الله وتقول يارب عملت على نشر لغة كتابك وإحياءها لا اندثارها ...هذه الحملة هى حملتك انت ليست ملك لاحد انت المسؤل عنها امام الله فأنظر ماذا ستفعل!!!!!!!!!! لمزيد من التفاصيل بمدونة (ادم ويحيى) www.sunlightatnight.blogspot.com التصميمات الخاصة بالحملة موجوده بالمدونة فلنرى الله من انفسنا خيرا ونتوكل على الله ونبدأ الان بسم الله ــــــــــــــــــــ

rovy يقول...

ازيك يا قمر كده برضه انشغل عنك شويه ما تسأليش عليه .
وحشتينى بجد ووحشتنى بوستاتك الهايله
انا جيت اجرى خفت تكونى اتجوزتى من غير ما تعزمينى .. الاقيكى معزوم عندك اسمه ايه ده مسعود .. الله يكون فى العون .
دمت بخير وسعاده
تحياتى
rovy

NilE_QueeN يقول...

بقي حد يزعل من مسعود يا ساااوسن

maha miho يقول...

mسوسة
إيه المصطلحات دي؟ يا نهار ابيض هههههههههههههه معلش معلش لازم اضحك بيقول كلام غريب أوي يا مس سوسة
الجاموسة الي متعشرش وهي صغيرة خيرها بيجل؟؟؟
يختيييييييييييي
سوسة سيبك منه قومي فطي نطي من ادامه يا بنتي

سوسة النوسة كوانوسه ،، برضه هتفضلي سكرررررر

كراكيب يقول...

هههههههههههههههههه انا عايزة مسعووووووود وانا مالي وانا مالي
اشوفه وهو بيتكلم بس يعني مش عايزاه علطول
الا جوليلي يل سااااوسن بـجى يبجى في حد عنده ابن خاله كدي ويداييييق ده كوميديااااني خاااالييص إهييييي

عسل يا سوسا عااااسااال

د/أبويحيى وادم يقول...

السلام عليكم ورحمه الله وبركاته
آختى الكريمة
لما أراك لم تشاركى معنا فى حملتك إلى الآن ؟
أختى الكريمة : هي حملتك هي لغتك ولغتي أذا لم نحافظ عليها نحن ونعمل على نشرها فمن يفعل ذلك ؟؟
أنا لا ادعوا إلى المثالية فى استخدام اللغة والأمر مفصل بالموضوع بالمدونة
وهى ليست دعوا لفرض قيود على كيفية التعبير عن الرأي فلك مطلق الحرية في هذا
أختي الفاضلة أن مشاركتك في هذه الحملة سوف يكون احد أسباب نجاحها ونشر لغتك
ندعوا الى الاعتزاز بلغتنا ..أعلم انك تعتز بها ولكنى أدعوك الآن إلى نشر الأمر بين كل من تعرف وكل زوار مدونتك التي تدون بها وكل المنتديات التي تشارك بها
إلا أذا كنت غير مقتنع بالفكرة والحملة فلك مطلق الحرية في هذا واعتذر أذا كنت أطالت عليك
والسلام عليكم

أمل فتحى عزت يقول...

لقد كتب التاريخ أسمك فى دايرة الحارة يلا وتعالى معانا الى الحلقة الثالثة فى حارة عمى رمزى مع خالص تحياتى
وشكرا

صوت من مصر يقول...

كوسه
كده لااااااااااااااااااااااااااااااااا
بكرهاااااا ان كانت اكل او حياه

كيكى يقول...

عهههههههههههههههه ولا يهمك...انتى زى العسل

المـــفـــــــقــــــــوعـــــة مــرارتـهــا يقول...

وحد ياخد علي كلام مسعود برضه

appy يقول...

مسعود هى فيها مسعود ههههههههههه
ايه يا بنتى الغيبه دى كده طويله نورتى تانى

ميرو يقول...

والله مسعور شكله جاي عشان يخطبك واللي زيه شايف انه هيكسب فيكي ثواب لما يجوزك والمفروض يغمى عليكي من الفرحة ربنا معاكي يا اختي

aldesoki113 يقول...

سوسن ... بجد مش عارف أقولك أيه ولا أيه على شوية الضحك إللي تحكتهم ، روحي ربنا يفرج كربتك ،،،،،،ا
بجد أنتي ساحرة في لغتك الطبيعية بدون أي مساحيق ...فلاحة بنت فلاح أصيل ...

اللهم فرجها على سوسن بنت آدم ياااااااااااارب

كوني بخير ، تحياتي

aldesoki113 يقول...

سوسن ... بجد مش عارف أقولك أيه ولا أيه على شوية الضحك إللي تحكتهم ، روحي ربنا يفرج كربتك ،،،،،،ا
بجد أنتي ساحرة في لغتك الطبيعية بدون أي مساحيق ...فلاحة بنت فلاح أصيل ...

اللهم فرجها على سوسن بنت آدم ياااااااااااارب

كوني بخير ، تحياتي

الفارس الملثم يقول...

ههههههههههههه

بجد الكلام ده حصل ولا انتي بتكتبيه باسلوبك الساخر اللي كل شويه اقولك ملهوش حل ..

لو كان مسعود بالطريقه الكاريكتوريه ديه تبقي غلطانه لو زعلتي منه , بس الواد ده شكله ايكسر الدنيا باغانيه الفظيعه دي , لا تقولي شعبولا ولا سعد الصغير ..

تحياتي

mohamed يقول...

سوسا صحيح انتي مألتيش الشنطه كان جواها ايه؟

عاشقة القمر يقول...

ههههههه .. انا اللي مش قادرة اقولك انتي ضحكتيني اد ايه طول ما انا قاعدة اقرا البوست .. بس ايه ظروف اللغة :)
يارب يابنتي محسن يدخل شرطة من برا برا عشان مسعود ما يكررش الزيارة تاني .. واوعي تاخدي على كلامه ياحبي .. وهو اللي انتي حكيتيه ده حد ياخد على كلامه .. ده مسعود

شهد الكلمات يقول...

اذكر في مرة يجي من تلات اربع سنين كدة اول مرة نسافر البلد عند ماما و هي بلد ناحية البحيرة مش عارفة اسمها اية المهم استضفونا ناس المفروض ان هما قرايب تيتة الله يرحمها من بعيد
و شفت عيل حلو كدة لابس جلابية مقلمة بالمناسبة كان عمال بيزربح في الدوار و شايل عيل يجي سنتين فا بقله اخوك الصغير ده لقيته بصلي كدة بصة استنكار و قالي ده ابني ........يا نهار اسود الواد شكلة كبيره 18 سنه و عنده عيال و شوية و لاقيت مراته اصغر منه قولوا بسنتين كمان بتقولي و انتي يا حبيبتي ماتجوزتيش لحد دلوقتي لية هو ماحدش بيعبركم في مصر
بصيت لها انا المرة دي بستنكار انا لسة في الجامعة بدرس
بصيتلي هي كمان بستنكار ( كان يوم الاستكار العالمي )و قالتلي يا بنتي ( يا بنتي و انا اكبر منها اصلا ) بلا تعليم بلا نيلة روحي شوفيلك عريس كدة و افرحي بعيالك و دعتلي من كل قلبها اني اتجوز و ماعنسش بعد ما عرفت ان انا عندي عشرين سنة

خلاصة الكلام ده كله ان من مجتمع لمجتمع التفكير بيتغير و مش معني الكلام اللي هو قاله ده انك عنستي او ان انا عنست و اروح اتنيل علي راي الزئردة اللي قاللتلي كدة

كبري و عيشي حياتك انتي لسة صغيرة و ربنا شايلك الخير

تحياتي

funckydoctor يقول...

ههههههههه
طريقة جامدة بس واد طحش قوى
معندوش أى حاجة من ريحته
ماتضايقيش نفضيله

غير معرف يقول...

الله ينور يا باشا علي البوست الجميل ده بس علي فكره أنتوا بتظلموا الرجاله . وخدي بالك الي بيتعمل في البنات من الرجاله والله العظيم بيحصل في الرجالة من البنات ، يعني من الأخر زي ما في الوحش فيه الحلو ، ومش كل البنات ملائمكة زي مش كل الرجاله ملائكة ، وأنا عايز اشكرك علشان انتي نورتي المدونة بتعتي ، وعلي فكرة انا مش كئيب زي ما انتي متخيله ، بس انا ضحية بنت من البنات ، وياما في الحبس مظاليم
اخوكي
ماازن

شفقة هانم واحسان بك يقول...

كل مره ادخل الاقيك لسه معملتيش حاجة جديدة ايه انتى كسلانه لا بقى انا بتابعك علطول وعايزة اقرا يلا مستنياكى....ولو انك بخيله ما ردتيش الزيارة

حبيبـــــــة القمـــــر يقول...

منطتيش في كرشه ليييييييييييييييييييه
انا جايه تاني

بنت مصريه يقول...

يا حبيبتى يا سوسو
كل بتوع الارياف كده صدقينى مدبين ف الكلام ومش بيعرفوا يميزوا خالص
دا انا مره كنت ف البلد وواحدق قالتلى انتى لسه متخطبتيش قولتلها اه ايه يعنى قالتلى يا همى يا كبدى ياختى
والله يا بنتى ناس معندهاش اى سينس
ولا يهمك يا قمر حد يسمع كلام واحد
فاتح زوره مزلقان
وبيغنى ويقول يا بغل ههههههههههههههه
اضحكى اضحكى يا شيخا محدش واخد منها حاجه

blue-wave يقول...

مش عارف اقولك غير انى اول مرة من فترة اضحك كدا
اسلوبك زى العسل ابقى فوتى عليا فى مدونتى هاتلاقى اغانى تنفع لمسعود:)
تحياتى

ansana يقول...

ههههههههههههه وصفك لمسعووووووووور

تحفة كان الله في عون اللي معاشرينه

حضرتك المفروض مش تتضايقي لان الانسان

لازم يكون عنده نظر قبل ما يرمي غيره

بكلام يبص لنفسه ويتاكد انه سليم

وكامل مع ان الكمال لله وحده

وحضرتك لسه النصيب مجاش

ارمي ورا ضهرك اي كلمة من الكلام دا

ربنا يوفقك وأكيد ربنا له حكمة في ذلك

Miso soup يقول...

و لا يهمك من كلامه ... الست مش جاموسة الست كائن له كيانه ... المهم يبقي ليكي هدف في الحياة تعيشي علشانه

maryooom يقول...

بجد زعلت جداً من كلامه ده

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘