• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الاثنين، 16 يونيو، 2008

آه لو تعرف

آه لو تعرف يا حبيب قلبي .. وانت معايا بحس بإيه ؟
خلي شوية لبكرة يا قلبي .. الحب ده ما أقدرش عليه
-----
بص ف قلبي يا عيون قلبي .. شوف كام حاجة بتتمناك
فرحة وشوق وأماني كبيرة .. وليالي حب بتستناك
---------
ياه يوم طويل بس محستش بيه رغم ان انا عملت حاجات كتيرة في اليوم الا انه يوم جميل ..... لا مش اليوم بس هو اللي جميل كل حاجة جميلة بجد .... بعد ما انتهي اليوم باني اخدت الشاور بتاعي و لبست البونيه بعد ما عملت حمام كريم لشعري قررت اختلي بنفسي ....عملت كوباية القرفة باللبن ودخلت البلكونة بعد ما شغلت الكمبيوتر علي باقة اغاني من اختياراتي ... نجاة ..اه لو تعرف .... فيروز .. سألتك حبيبي .... وردة .. مالي.... وعليت الاسبيكر ع الاخر علشان اسمع وانا قاعدة في البلكونة
الله نسمة الهوا جميلة قوي .... ومنظر الاضاءة الصفرا وهي منعكسة ع الاسفلت رومانسي جدا .... كل حاجة بجد كانت جميلة حتي الهوا اللي حاسة بيه بيتخلل شعري محسسني بانتعاش
حطيت ايدي علي خدي وسرحت وانا مستمتعة بمنظر الشارع الفاضي الا من الراجل اللي واقف ع الناصية بيبيع البطاطا وحواليه قطة بولادها عاملين يلعبوا شكلهم تحفة ....وعربية فاخرة وقفت قدام بتاع البطاطا لقيت ايد بتتمد من جواها وبترمي حاجة ... اتلمت عليها القطط الصغيرة بعد ما بصت لامها وكأنها بتستأذنها وهي ودت رقبتها الناحية التانية كأنها بتقولهم اعملو اللي انتوا عايزين
لا بجد كل شئ ف الليلة دي جميل لدرجة اني مش حاسة بارهاق اليوم
وصوت نجاة ف اغنية اه لو تعرف حسسني كأن فيه نسمه هوا داخلة تحت جلدي بتعملي تكيف داخلي خلت جسمي فيه بدغدغة كده جميلة خلتني احضن الخدادية اللي كنت باسند عليها ايدي وانا بتأمل الشارع
وافتكرت صوته وهو بيكلمني ف التليفون .... قد ايه صوته دافي وحنين
................

فجأة لاقيت جرس الباب بيرن بشكل جنوني والباب مش بيخبط الباب بيرزع كأن قوة مدرعات هتهد البيت ع اللي فيه
قمت مفزوعة جريت ع الباب .... ايه ده لتكون الحكومة .....طب الحق ارمي الممنوعات م البلكونة ... ولا اعمل ايه.......... هي الحكومة بتقفش ف اللي بيسمعوا نجاة ولا ايه .؟... يقطعني والله ما كنت اعرف طب يرضيهم اسمع ايه.........!!!!!!!
المهم جريت ع الباب وفتحت وتقريبا لاقيت وشي خد كف تمام وانا بفتح كان هيطير عيني ..... طلعت ايد نهي اختي لاني فتحت علي غفلة وهي عمالة لسة بترزع ف الباب
نهي بانفعال شبه الصويت وهي بتحضني : ايه يا حبيبتي فيكي ايه
وعمالة تحسس ف ادية وجسمي كأنها بتتاكد ان انا مفييش حاجة ناقصة ...... فيكي ايه يا حبيبتي طمنيني عليكي .... كده يا سوسن تعملي فينا كده ..... كده يا حبيبتي ....... وهاتك يا عياط
انا وانا بحاول اهديها وبعيط برده مش عارفة علي ايه بس ان انا اشوفها مخضوضة كده منظر خلي قلبي يتقطع : بس ياحبيتي عشان خاطري بس في ايه يا نهي واحسس لها علي شعرها وابوسها من خدودها وانا خايفة احضنها جامد عشان بطنها ..... اصل عقبال عندكوا نهي حامل
وانهارت نهي علي الكرسي اللي جنب الباب علي طول وهي لسه بتنهنه من العياط ..... وانا برده لسه مش عارفة ايه اللي حصل
ايه اللي خضها قوي كده .... حلمت بية انا انتحرت من فوق السجادة مثلا .....نفسي اعرف في ايه
وفجأة انتبهت لاول مرة ان فيه ناس كتير ف الشقة ..... ايه ده ده جيرانا كلهم هنا .... عم حفظي الموظف بالمعاش واقف بيمصمص شفايفه وكأنه بيتفرج علي فيلم اليتمتين وحاطط ايده ف جيوب جاكتة بجامته وبيقولي لا لا ملكيش حق يا دكتورة
وابلة مايسة طالعة بكامل مكياجها وبعباية شيك جدا والدهب في كل حتي عليها يزغلل العين .... وبرده موجهة الكلام لية ......اسموا كلام كده....!!!!
كان مولد الصراحة كل واحد بكلمة .... إن حد يريحني ويقولي في ايه ؟


ابدا !!
المهم نهي فاقتت من عياطها .... وابتدت تقوم وطبعا منسيتش كالعادة تقوم بسلسلة اجتماعيات
ربنا ميحرمنا منك يا طنط مايسة
يارب ما نتخض عليك ياعم حفظي ..... وازيك ياطنط ام امل وامل عاملة ايه
المهم الجمع المحتشد ده بدأ ينصرف وهم بيباركوا لنهي بالاطمئنان عليه ..... وانا زي الاطرش ف الزفة
وقفلنا الباب ولاحظت ان فيه شخص واقف منزلش وقاعد علي كرسي الطقم وعلي وشه ابتسامة ...... الا مين الاخ ده ..؟
وطبعا سمير قاعد جنب نهي بيطمن عليها وبيقولها شفتي ياستي مش قلتلك تلاقيها نايمه و مسمعتش .... كان ايه لازمته القلق
انا وانا بضحك ...... نهي ربنا يسترك والنبي تقوليلي في ايه .....!!!!
نهي : بتضحكي ياشيخة حرام عليكي ده انتي خلتيني كنت هولد قبل معادي
انا : ايوه ليه بقي .... ايه اللي حصل
نهي : لا يا ستي بسيطة ماما اتصلت بحضرتك علي تليفون البيت وعلي الموبيل وسعادتك مبترديش
انا وكأني افتكرت .... يانهار ابيض ( اصل ماما راحت تعمل عمرة رجب ومبتنمش قبل ما تطمن علية واكيد اتصلت وانا ف البلكونة ومسمعتش )
نهي : فطبعا اتصلت بيه وانا اتصلت بيكي وبقالي ساعة وانتي برده مبترديش يبقي اكيد فيكي حاجة
قمت جرييت عليها وحضنتها وبوست راسها ......يا حبيتي
سمير جوز نهي : يالا حمد الله علي سلامتك يا دكتورة الحمد لله اننا اتطمنا عليكي .... مش يللا يا نهي الساعة بقت اتنين ورايا شغل بكرة
نهي وهي ماسكة دماغها : لا بعد الخضة دي مش قادرة اتحرك روحوا
............ روحوا .... الله ده يبقي اخينا اللي قاعد هناك ده معاهم بقي !!!!!
سمير : طيب يا حبيبتي براحتك .... يللا يا سامر
سامر !!


سامر مين ؟!

60 التعليقات:

عاشقة القمر يقول...

ايه ده انا اول تعليق ... يافرحتي يا فرحتي يا سعدي يا هنايا ..
اعتقد انه بما انه سامر يبقى اخو سمير او ابن عمه او ابن خاله .. يمكن ..
بجد الموضوع تحفه يا سوسا .. عايزة اقول اني كنت خلاص سرحت معاكي وعيشت في الجو اللي انتي عملتيه في الاول ده وفجأة حسيت بقلبان وحاجات بتتكركب فوق دماغي .. هههههه .. يعني حتى لحظة السرحان الواحد مابيعرفش يتهنى بيها .. معلش يابنتي بقى اما تقرري تسرحي تاني خدي التليفون معاكي :)
وماتنسيش والنبي المرة الجاية تقوليلنا مين سامر ;)

المـــفـــــــقــــــــوعـــــة مــرارتـهــا يقول...

نجاة تنسي الواحد أسمه مش تنسيه يرد علي التليفون
انا بأموت فيها برضه

واحدة مفروسة يقول...

هههههههههههههههه
انتي حكايه
اسلوبك جميل جدا الصراحه
انا مش عارفه اعلق اقول ايه

ربنا يرجعلك مامتك بالسلامه و خليها تدعيلك قدام الكعبه
ههههههههههه
و على فكره خديها نصيحه من اخت...انتي فى نعمه....

shayma يقول...

ايوووووووووووة
اقفش
مين سامر ده بقىىىىىىى

هههههههههههههههه
سكر كالعاده
بصى بقى يا سوسو
انتى كده لازم تفهمينا حكايه سامر دى ايه
شوفى البت الى مصدقت رشقت
ههههههههههههههه

الف مبروك لنهى وربنا يتمملها على خير انشاءالله
:))

mohra يقول...

ايوه مين سامممممممممممر؟؟؟؟؟؟؟؟؟

ايوية يقول...

سوال مهم جدا سامر مين

kochia يقول...

صحيح .. مين سامر

المهم نعيما

تحياتي

ٍSOU يقول...

يا شيخة وحيد كان خلاص نزل بالاغنية و مرة واحدة قلب على فيلم رعب :S
بس كانت حلوة ... بس سامر مين ؟ :))

كوكي يقول...

بقولك ايه يا سوسن
نجاة وردة فيروز
هو فيه ايييه فهميني
مين اللي كنتي قاعدة في البلكونة وسرحانة فيه
أرجع وأقول أسلوب مشوق وراااااااااااائع

Reem يقول...

اخص عليكي يا دكتورة كدة عايزة

البينة تولد قبل وقتها لالا مايصحش

بجد اسلوبك لذيذ اوي و عمرة مقبولة

للوالدة دي زيارتها نورتنا

بس هو سامر يطلع اخو سمير جوز نهى اصل

الاسم يؤدي لهذا الاستنتاج

هوة فى أيه؟؟soso يقول...

أحب أبدأ تعليقى بحتة من شعر الاخ اللمبى
الحب الحب
الشوق الشوق
.....

يا سوسا يا قمر خلاص فى ضوء شايفاه كده من بعيد
سا مر !!!
مين سامر ده
لالالالالا
بطلى يا سوسن غلاسه ميس سامر ده؟؟؟
وطبعا حتسيبينا نضرب أخماس فى أسداس كام يوم كمان عقبال ما تقولى مين سامر ده
سوسا بجد فيها زعله كبيرة
يلا طمنينا مين سامر؟؟
لحسن أنا زعلانه من ساعت الاخ محروس أبن طنط هنيه والقنبله المدفعيه اللى رماها عليكى البوست اللى فات
الله يسامحه مطرح مهو قاعد
بحبك مووووووووووووووووووت والله والله والله
صحيح يا حبيبتى أنتى كنتى لوحدك
يا ريتنى أعرف بيتك وأنا مش ممكن كنت أسيبك لوحدك

سنيور بدر يقول...

هههههههههههههههههه
طب ويصح ياسوسن انك تنسي نفسك قوووووووووي كده وتقلقي الناس عليكي

عموما موضوع جميل بكتابة اجمل وربنا يسعدك دايما بس خللي بالك من اللي حواليكي علشان متقلبش بغم

مستنيكي في مدونتي ياريت تشرفيني
http://seniorbadr.blogspot.com/

sosa يقول...

سوسا
تشابه أسماء
بس طبعا ده مش أسمى الحقيقى
علشان مودى أو أصحاب مودى أو أى حد يكشف شخصيتى

أول مرة أزورك
بس حبيتك موووووووووت

اااااااااااااااااااه الحب
يا سلاااااااااااام عليه
تعرفى أنى النهارده كنت بغنى الاغنيه ديه بتاعت نجاه
بجد جميله
أنتى ونجاه
ربنا يسعدك بقى عايزين نفرح بيكى
على فكرة أنا قريت كل المدونه
ومريت بحاجات كتير من اللى مريتى بيها
ربنا معايااااااااا
ومعاااااااكى ياااااااااارب
ألا صحيح يا سوسا
مين سامر ده؟؟؟؟؟؟
ههههههههه

صاحب المضيفة يقول...

ههههههههههههههه

لا بجد رايقة فعلا

انا قلت حصل حاجه فعلا


ربنا يهديكم على الخضة دي


تحياتي

mohamed يقول...

سامر مين يا سوسا ليكون ده العريس النتظر ياااااااااااااا رب

فاتيما يقول...

أنا اول مرة آجى هنا
تخضينى بالشكل دا ؟؟
طيب ياأخت سوسا
عشان خاطر نجاة و فيروز و وردة
التلاتة بموت فيهم أصلاً
و بعدين تعالى هنا
سامر دا قريبهم ؟
موش قريبهم
صاحبهم؟
موش صاحبهم
جارهم؟
موش جارهم
طب عابر سبيل معدى
موش هتقولى يعنى ؟؟
طييييييب
أستنى البوست الجاى و أمرى الى الله
اما نشوف حكايته سى سامر دا كمان
تحياتى يا سوسا

حاسوباتيه يقول...

ايه ده سامر يمكن يكون هو يا سوسه الي ليكي البخت فيه ايه ده بقى خليتي دماغنا تفكر كده ليه نزلي بسرعه البوست وقولي مين سامر ده

بطوط حبوب يقول...

هو انا اول مره اجى هنا ولا ايه؟؟
بس اتمتعب بالبوست جدااااااااااا

نعكشة يقول...

هوه صوت مين اللي كنتي بتكلمية ف يالتليفون ؟؟؟؟؟؟؟؟؟؟؟؟


....
حلوين ماشاء الله كالعادة
انا قريتهم كلهم اصلا
روعة

مستنية كل ما هو جديد

سلامون عليكي

يوميات فنانه مفروسه جداا يقول...

ههههههههه سامر طبعا قريب سمير وجاي عشان يشوف نهي ومبروك عليكي عريسك الخفه يا عروسه

ايه يا سوسه الجمال ده

لا جميله والله وانا بعنل زيك كده بس لما جرس التليفون يرن ومردش كف بابابقي هو اللي بيسلم علي وشي

دمتي مبدعه يا سوسا
سلامز

طارق الغنام يقول...

الله عليكى وعلى اسلوبك الرائع
حسيت بصوت نجاة مع كلماتك الرائعة
بصراحة بوست رائع
تقبلى تحياتى
ومتعك الله بالحب والسعادة
ودمتى بحفظ الله

رئيس جمهوريه نفسى يقول...

والله ليكى حق تنسى نفسك مش بس متسمعيش صوت التليفون على الجو والوصف الى بتوصفيه ووورده وفيروز ونجاه
بس سؤال يطرح نفسه بقوه
مين سامر ده

أحسن تـستاهـل يقول...

نعم ؟ انتي هتسيبينا كده لحد امتى ان شاء الله،، لأ انا مش بحب حد يثير فضولي ويجري لأاااااااااااااه مين سامر ده؟
يا ماماااااااااااااااااا

حسن محمد توفيق يقول...

مس سوسا

الله عليك .. والله قصة رائعة وجميلة

بس نفسى اعرف

سامر مين ؟

فى انتظار باقى القصة

الجدة فصيحة يقول...

السلام عليكم ورحمة الله وبركاته


بجد بجد
ملكيش حق يادكتورة

كدة برضوا تعملي كدة في الناس !!!
ولا أختك كدة تخضيها عليكي

ابقي خدي الموبايل معاكي في لحظات التأمل


يلا
حمد لله على السلامة


ومستنية اعرف حكاية سامر


تحياتي

الفارس الملثم يقول...

حقيقي اسلوبك جميل اوي , انا بعد الجو الرومانسي اللي في البداية ده , قلت البوست المره دي ايبقي رومانسي , بس اختك نهي بوظت الدنيا ..

هو سامر ده عريس محتمل ولا ايه

تحياتي

nahed يقول...

بجد موضوعاتك تحفه وجميله جدا واسلوبك ما شاء الله فى العرض جميل

بجد انت عسوله قوى والله
ربنا يارب يوفقك فى حياتك الشخصيه منها والعلميه

احلام اليقظة يقول...

عثل
عثل
انتى لذيذة جدا يا سوسا
بجد واسلوبك القصصى لطيف جدا
مين سامر دة
تقبلى مرورى

امل يقول...

السلام عليكم
وصفك لاحاسيسك وانت قاعدة في البلكونة جميلة قوي حسيت بنسمات الهوى معاكي بس الخبط على الباب فوقني هههههه يا ترى مين سامر ده :) تحياتي

حنين.. يقول...

هههههههههه والله انتى عسل , بصى طول من بقرأ قاعده اجيب فى اخر الصفحه عشان اعرف ايه الللى حصل. والله انا بعمل كدا فى ما ما واخواتى علطول........ نصيبهم معايا كدا بقى. المهم انى نفسى اعرف 3 حاجات. انتى دكتوره ايه. ومين سامر دا..... وانا مستنيه طبعا البوست الجى, عشان عندى فضول غير عادى, ويا خوفى يطلع. ايه مش عارفه.. والصوت اللى فى التليفون. وتحياتى ليكى يا جميل

semsem يقول...

هههههههههههههه
اسلوبك فى الكتابه شيق اوى
بجد مدونة جميله ولذيذه
واول زياره ومش اخر زياره ان شاء الله
سمسم
احييكى

mohamed يقول...

مش مكتوبه لسولاف يا سوسا :)

واحدة مفروسة يقول...

انتي دماغ عاليه قوي ..حتي تعليقاتك عند الغير بتدل على انك انسانه مخها كبير
وظريفه....انا حساكي شخصيه ظريفه
اه و الله

Wish I were a Butterfly ... يقول...

دمك خفيف أوي أوي على فكرة :). ضحكتيني جامد و أكتر حاجة ضحكتني كان و انت بتوصفي عم حفظي
:))
المهم الحمدلله إنك كويسة
في الأول سرحت مع الكلام أوي و فرحت بأة ..أغنية بموت فيها لنجاة،بعدين فيروز اللي بالنسبةلي حاجة أكتر من العشق:) و ياسلام على روقان البلكونة، وبعدين تاتاتاتااا :)، و توالت الأحداث بسرعة
أسلوبك لذيذ أوي يا سوسا
أنا برده من فترةكنت بفكر أكتب عن قعدة البلكونة!! و إمبارح لقيت بوست في بلوج تاني عن البلكونة!! هي البلكونة مالها الأيام دي؟

تحياتي كتير في أول زيارة ليكي

Geo Amr يقول...

سردك للقصة رائع جداااااااااا وربنا يديم المعروف بينك وبين اهلك وبجد دى ميزة الشعب المصرى ودة الى بيميزنا عن غيرنا خفنا على بعض والترابط الاسرى

bos bos يقول...

لا لا ماليش دعوة عايزة أعرف مين سامر ده
هههههههههههههههههههه

تحياتى

Sherif يقول...

(بصوت أجش جدا وببطء .. وبوجه مقتضب)

سامر مين ياسوسن ؟؟

زفته يقول...

ههههههههههههههههههه
ايوه اه لو تعرف

وف الاخر سامر
حقك

الا ممكن سؤال لوسمحتي

سامر مين

زفته هانم

di el2mr يقول...

ههههههههههه
عسل قوى بجد

بس ياخساره كدا ضاعت عليكى بقى القعده الجميله والاغنيه وكدا

يلا معلش خيرها فى غيرها
بس مين سامر دا؟!!!

دكتور بهــدوء يقول...

الجوووو رااائع نفسي فييه
بس بعد الامتحانات بأه
بالنسبه للأخ سامر ده مع العفش ولا مين
ونتي فتحتي وشعرك لسه مضروب كريم وسايح وملعلط ولا لبستي إيشارب
:))))))))))
هوه النصيب جه ولا إيه
المهم بجد البوست ولا أروع وأنا خاطف ثانيه وجري ع الامتحان لو اتأخرت ماتقلقيش بمتحننننن ادعيلي

الطائر الحزين يقول...

ما هو كدة يا بنتى قليل البخت
حتى الدقيقة اللى الواحد بيستمتع بيها لا تخلو من القلق بعدها

ابقى خلى ام سامر ما تتخضش

ابقى حطى التليفون جنب الموبايل علشان لما حد يتصل تعرف من الوش اللى بيعمله على الاجهزة الاخرى او الاثنين يفرقعوا ونخلص


تحياتى

الربان يقول...

تحياتي يادكتورة

ما شاء الله طريقتك في السرد جميله...و اختيارك لنجاة ذات الصوت الدافيء الجميل....و فيروز الصوت الملائكي....

حين تكون نفوسنا صافيه...و عقولنا مرتبه...فأننا نري الحياة بعيون جميله.
اما موضوع التعب بعد يوم طويل من العمل...فقد قرأت ان كل منا هو بنفسه
الذي يحدد مقياس التعب لديه..و يبرمج نفسه علي ذلك...لان كل منا بداخلة طاقة...بعضنا يخرج بعضها و يشعر بالتعب...و البعض الاخر يخرجها و لا يشعر بالتعب...مستوي الشعور بالتعب
من صنع الانسان نفسه.

تحياتي و تقديري

طائر حزين يقول...

السلام عليكم
انا مليش دعوة بكل دة انا عوزة اعرف مين اللى نساكى مامتك وخلاكى متسمعيش التليفونات وتشوفى منظر القطة وأولادها جنب بتاع البطاطا كأنك بتتفرجى على فيلم حبيب دائما

على فكرة انا اسمى نهى برده تيراريرا

maiosha يقول...

حرام عليكى

إنتى واخده عهد على نفسك إنك لازم تعلقينا كده كل مرة

أنا هموت وأعرف مين سامر ده
هو من إسمه ممكن يكون أخو سمير ..بس معقولة يعنى يكون أخو سمير وإنتى مش عارفاه؟؟

بس الجو اللى إنتى كنتى عاملاه ده جو تحفة.. بجد يعنى .. بس متنسيش المرة الجاية تبقى تاخدى التليفون بتاعك معاكى.. ربنا يرجعلك مامتك بالسلامة

شفقة هانم واحسان بك يقول...

ايه يا بنتى الاسلوب العسل ده يخرب مطنك والله تجننى انتى كوميديا فظيعة....
شفقة

habiba يقول...

ازيك يا miss.sosa
انا اول مره اعلق على مدوناتك بس كنت زرتها قبل كده ايام اختك الزقرده
مش ناسيه ابدا انك كنتى اول تعليق على اول مدونه نزلتها ..اتمنى بجد يدوم التواصل
اسلوبك لذيذ جداااا وكنت عايزة استفسر منك على حاجة

مش سامر ده اللى يبقى جار سمير جوز اختك واتخض على خضته وجرى وراه علشان يطفى الحريقة ؟؟؟؟؟؟

رئـــــيسـة حزب الأحلام يقول...

سامر مين دة ممكن يكون عريس
ياقمر وكويس انك كنتى رايقة
يلا ربنا يوفقك

HafSSa يقول...

طيب معلش عشان خاطر ما دي اول مرة اجيلك هنا و مكسلة بصراحة اقرا 47 تعليق عشان اعرف مين هو سامر؟؟
عريس جديد؟؟
و لو ايوة حصل ايه بعد كده؟؟
والف مبروك مقدما سواء سامر او صاحبه او اي حد منه

ahmed saker يقول...

سيبك انتي من الكلام ده كله

مش مشكله الوالده اخبارها ايه

مش مشكله نهي هتولد امتي

اهم حاجة مين سامر ده

هههههههههههههه

شكرا للموضوع الجميل

Eno يقول...

السلام عليكم

اسمحيلي انا مررتلك واجب ممكن تيجي تاخديه وتجوبي عليه

تحياتي ليكي :)

قلب مصرى يقول...

يبدو أن السؤال التاريخى (وين هنادى ياماى؟) سيلازمه بعد ذلك سؤال تاريخى آخر (هو مين سامر ده؟) ونحن فى إنتظار الإجابات.

ســمـــر احمد يقول...

هو ايه ده ؟ كل شوية مين سامر مين سامر

المهم بقى يا سوسا مين اللى افتكرتى صوته لما كان بيكلمك فى التليفون ؟؟؟



مدونتك السكرة بيت دافى بحب التواجد فيه

إيمان يقول...

وبعدين ويمكن كل اللى حصل

ده خير وجه بسامر


ودعواتنا لماما تيجى بألف سلامة وأمانة توصيها تدعيلنا فى العمرة ليك ولنا جميعا

سامر مين؟؟؟ يقول...

هههههههه..

كالعاده يا سوسه تجنني... وسؤالي كتبته في اسمي...ريحينا بقي وقوليلنا سامر مين؟؟ وهنفرح بيكي قريب ولا ايه؟؟؟؟

ربنا يسعد قلبك ويهنيكي يارب

بمووووووت فيكي بجد

blue-wave يقول...

يا شيخه حرام عليكى؟
كدا تخضيهم عليكى؟
بس بينى وبينك؟ نجاة تنسى الواحد اسمه

شفقة هانم واحسان بك يقول...

ايه يا سوسة انتى فين وحشتينى اوى

love River يقول...

ههههههههه
نسيتى الدنيا مع نجاة
وكنتى هتولدى البنت قبل معادهاا
بوست حلو جننتينى فيه يا سوسو

love River يقول...

صحيح الا مين الحاج سامر دا بقى؟
اكيد له حكاية
ربنا يستر

maryooom يقول...

الوحد مش عارف يقول ايه بجد

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘