• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الأحد، 11 مايو 2008

العروسة للعريس والجري للمتاعيـس

كل شئ كان بيتم بسرعة لان العريس صمم علي كتب كتاب ودخلة مش خطوبة بس .. والايام كمان كانت بتجري بسرعة .. وكان ورانا 1000 حاجة نجهزها ونشتريها وكنت كل يوم ارجع من الشغل واخرج مع ماما علشان نشتريلها ادوات المطبخ لانها ماكنتش بتهتم بالحاجات ديه لحد ما جينا لشرا هدومها واصرت انها تخرج معانا علشان تنقى حاجتها بنفسها فقولت لماما تريح وانى هخرج معاها .. فكان البياعين يقولولي مبروك للامورة وبيحسبوها بنتي .. اقول فى عقلي ماهي فعلا بنتي وانا اللي مربياها .. بس مااخبيش عليكم الكلمة ديه كانت بتضايقني اوي .. بتحسسني اني خلاص انتهت دورة حياتي .. وانى زي خيل الحكومة اللي لما بتكبر بيضربوها بالنار.

ومرت الايام .. وجه يوم الفرح واليوم ده كان زحمة وتفاصيله كتيرة قوي فوق ما تتخيلوا وكنت عاملة زي اللي بيجري ف مارثون وخايف يبص وراه ....يوم كان صعب بجد .. ماما كانت فرحانه وزعلانه فى نفس الوقت .. مش عارفة تفرح علشان بنتها اللي بتتجوز ولا تزعل علي بنتها الكبيرة اللي لسه مااتجوزتش .. كانت الدموع اللي في عينيها نار بتكوي فيه لاني السبب فى نقصان فرحتها .. اما انا فكنت فرحانه جدا لبنتي واختي الصغيرة .. كانت زي القمر في الفستان .. والمايك اب بتاعها كان رقيق زيها زادها جمال على جمالها .. وعريسها ماشاء الله كان فرحان بيها اوي بجد لايقين علي بعض ..
واول ما دخلنا قاعه الفرح كانت اصعب لحظة شوفتها في حياتي ... حسيت بنبض قلبي بيعلا مع دقات الطبول .. وغصب عني لاول مرة دموعى تخوني .. وتعلن ضعفى ادام الكل .. وللاسف معرفتش اخبي دموعي ...جريت بسرعه على الحمام وانا مش شايفة ادامي علشان ماحدش يشوفني .. ليفهم دموعى غلط وانى زعلانة او حاقدة على اختى .. لكن والله ويعلم ربي انى كنت فرحانلها .. لكن غصب عني .. انا برضو بنت ونفسي افرح ويكون ليه بيت وزوج واطفال ..
ليه ياربي تحطنى في الموقف ده ؟ .. لو كان فى ذنب عملته في حياتي .. فيارب انت الغفور الرحيم .. لو كان ده حظى من الدنيا فانا راضية بيه لكن الهمنى الصبر والرضا بيه .. مسحت دموعي بسرعة وخرجت راسمة ابتسامة خشب علي وشي .. كانت نظرات المعازيم كأنها سهام بترشق في جسمي .. لدرجة إني كنت بكره حد يقولي عقبالك ... كنت بحس ان ورا كلمة عقبالك في كلام تاني مستخبي ... كانت كل كلمة بتتقالي بحس انها صبغة يود بتنزل علي جرح حي فتلهبه ....
اسئلة كتير ماكنش وقتها كانت بتنط ف دماغي زي ما تكون خبطات بشواكيش بتخلي دماغي تصدع ونفسي اصرخ واقولها كفاية حرااااام ... هو انا ناقصني ايه ؟ .. هو انا عيبي ايه ؟ .. كنت حاسة اني عاجزة .. حاسة ان كل اللي بيشوفني بيتصعب عليا... صدقوني كنت بسمع مصمصة شفايفهم من عنيهم وهم بيقولو ربنا يعدلهالك .. كل ده ومش مسموح لي بلحظة واحدة اسرح ف كل الهواجس دي لازم افضل راسمة الابتسامة الخشب علي وشي ...دي اختي اللي بتتجوز ..

ولما جه الوقت اللي الدي جي طلب العريس والعروسة يرقصو سلو مع بعض وقللوا الاضاءة وشغلوا اغنية اليسا ... اجمل إحساس في الكون .. فضلت عنية متعلقة بنهي وهي بترقص .. كانت عاملة زي الفراشة جناحتها طرحة بيضا وبترقص باليه تحت بقعة ضوء ....كانت جميلة بجد هي وعريسها .. سحبني خيالي لارض واسعه خضرا كلها زهور وانا وفارس احلامي بنرقص سلو على انغام زقزقة العصافير اللي كانت بتغنى وترقص حوالينا .. جسمي كله قشعر ..... حسيت كأن فيه تلج جمد رجلية وبيسرح لحد ما فجأه وصل لقلبي وحسيت قلبي وقف .. وفجأة عنين نهي جت ف عنية وكانها عرفت أنا بفكر ف أيه ... وأول ما عنية وقعت عليها فوقت بسرعة ورحت في محاولة فاشلة مزغراتلها .. رغم ان انا مبعرفش والزغروتة طلعت زي الصرخة وغصب عني دموعي نزلت وانا بزغرط وكأن الزغروطة أو الصرخة كانت إذن للدموع انها تنفجر تاني .... مسحت دموعي بسرعة قبل ما حد يلاحظ ... كان يوم صعب بكل المقاييس ... والحمد لله انه عدى على خير .

ورجعنا البيت .... ياه كنت حاسة إن انا اشتغلت 100 يوم من غير ما اخد اجازة ...تعبانة بجد .. وشي تنشن من الابتسامة الخشب.
ماما أول ما دخلت دخلت غيرت هدومها وقعدت معايا شوية وكان باين عليها انها خلاص كأنها فاقت م الفرح وجه دور الهم ... ايوة انا بقيت همها ... حاولت تتكلم معايا عن تفاصيل الفرح وقعدت تقولي .. والله ليلة البت نهي كانت حلوة ... البت كانت زي القمر .. ربنا يسعدها .. البيت مش هيبقاله حس... بنت الايه
وفجأة سكت الكلام كأن ماما نسيت .. أو بمعني اصح افتكرت إنها مبتعرفش تمثل ... فجأه قالتلي
سوسن يا حبيبتي أوعي تزعلي ... حبيبتي اوعي تشيلي ف نفسك
وأنا فاجأتها .. ازعل ده ايه ياماما دي نهي !!
وكأن ماما اقتنعت بإن انا مش زعلانة أو حاولت تقنع نفسها بكده .. وقامت تنام
وجه الدور علية إن انا انام
ورغم إن انا الاصول أنام مقدرتش ... خرجت في البلكونة ... كنت حاسة إن انا مخنوقة وده الوقت اللي ممكن اشيل الحجر اللي علي صدري... أنا لوحدي مفيش الا ربنا هو اللي شايفني
ورغم انها كانت ليلة صيف الا انها كانت مش حر ونسيم البلكونة كان بيهز اللبلابة اللي متعلقة ف طرف الحيط وريحة زهرة النعناع اللي انا زرعاها بتهف علية الا اني حسيت ان لسة فيه حجر علي صدري ... قعدت ع الكرسي وسندت راسي علي سور البلكونة وسيبت صوابعي تهز احبال الغسيل بلا معني وانا حاسة ان فيه حاجة غريبة جوايا مش عارفة ايه هي
فجأة انتبهت ان الدنيا ساكتة حوالية ... ايه في ايه ؟ .. الدنيا ساكتة كده ليه ؟
حسيت ان الدنيا فاضية عليا
فجأة اكتشفت ليه الدنيا فاضية ... نهي مش موجودة ... اول ليلة ليا لوحدي وعنية دمعت دمعة نزلت دافية قوي وانا بفتكر دوشتها حتي لما كانت تدخل تاخد حمامها ... وكل شوية تنادي علينا من الحمام
ماما ... يا ماما ... حضريلي التيشرت البينك
نهي .. انتي يا ست الضاكرورة (كانت لما تحب تغيظني متقوليش الا كده ).. هاتيلي البلسم نسيته ع التسريحة
دموعي نزلت زي ما تكون شلال بيصب من مكان عالي
ولاقتني بجري علي الاوضة وكأني عايزة ادخل اتأكد انها موجودة
ووطيت علي الارض شيلتيلها بيجامتها اللي كانت لابسها قبل ما تاخد الحمام بتاعها وحضنتها وبوستها
واترميت علي سريرها وبوست مخدتها وانا دموعي بتنزل ... وحشتيني يا حبيبتي .. هتوحشيني اوي ... ربنا يكتب لك السعد والهنا .

75 التعليقات:

mohamed يقول...

بجد انا ليه الشرف اني أول تعليأ بس بجد يا سوسا انتي أنسانه طيبه اوي :'(:'(:'( يا رب تكوني مبسوطه بجد و ده يكون مجرد قصه

Dr. Ibrahim يقول...

مدونتك خفيفة ظريفةوشكلها حلو
أعجبتنى الصراحة

ربنا معاكى

وألف مبروك لنهى وعقبالك
د/هيما

أميمة كامل يقول...

يارب يسعد قلبك

كلامك مؤثر جدا

وواضح انه من قلبك
حقيقة انا بكيت كتير

وانا بقرأ كلامك
ربنا يسعدك ويرضى عنك

الـجـدة فـصـيـحـة يقول...

السلام عليكم ورحمة الله وبركاته

لا أعرف ما إذا كانت هذه قصة من خيالك أو من معايشتك للواقع ام هي مذكرات فعلية
ولكن ما اعرفه حقا أنك تتمتعي بأسلوب قوي جدا ما شاء الله لدرجة تجعل القارئ يتوحد ما الكلمات ويبكي معها
ويشعر بداخله حتى بالإشتياق لنهى


دمتِ مبدعة


تحياتي

غير معرف يقول...

مدونه اكتر من رائعه
كلها مشاعر وتنبض بالصدق اهنيكي عليها
وعقبالك حبيبتي بدون اى مجامله
بس يكون الجواز اضافه مش مجرد تكمله صورة
ويكون مع اللي يستحق فعلا علشان مترجعيش تقولي ياااااااااااااااااااريت
زيي كتير ندموا

ReEm يقول...

كلامك حلو اوي و مليان احساس

و اسلوبك رائع رائع رائع

و خصوصا لما وصفتي الناس و كلمة عقبالك

بجد في الموقف ده بتبقى مش في مكانها و

يمكن بلاها احسن بتبقى زي سكين بتقطع في

الوحدة

ربنا يهني اختك ويسعدها و يبعتلك و

يبعتلي ابن الحلال اللي يستاهل و يراعي

ربنا بجد

رحــــيـل يقول...

سوسا

ربنا يهنى نهى ويسعدها

انا مع التعليق اللى قال ان لازم قرار الجواز يكون اضافه مش مجرد تكمله صوره

فعلا الكلام ده صح
اوعى تتسرعى فى قرار زى ده مهما كانت الضغوط

ربنا يكرمك يارب ويهنيكى ويرزقك بواحد يستاهلك
تحياتى واحترامى وتقديرى

la3lahakhier يقول...

ان شاء الله ربنا يكتب لها السعادة
وانتى كمان باذن الله
زاطمنى كل واحد بياخد نصيبه وفى الاخر بنكتشف انه كله خير
كل التحية

كيكى عوووووو يقول...

انا كدة هنهار حراااااام عليكى.... قلتلك عايزة البوست الجاى اضحك مش اعيط..انتى ماشية بالعكس ..المرة الجاية عايزة اعيط لما اشوف بقى البوست الجاى ايىية...وابقى تعالى انتى مش بتيجى لية انا بابقى هناك علطوللللل.......ههههه

ghoneem يقول...

اهلاً بيكي

رائع مشاعرك وأحاسيسك ويابخت نهي بيكي
بجد عندها أخت بتحبها جداً

انت عبرتي بروعة وبأسلوب يوصل قمة السعادة بنهي وانك فرحانة بزواجها جداً وقمة الدراما من المواقف اللي انت شفتيها قبل الزفاف وبعد الزفاف

انا لا أملك الا اني أحييكي وادعو لكي بالتوفيق وانك تجدي في أيامك القادمة الخير الوفير

أما بالنسبة لموضوع الزواج أو تأخيره أو تقديمه انا رأيي مش تفكري فيه نهائي
خارج اطار المدونة والخواطر الجميلة
والدعاء
ادعي كتير الخير وان ربنا يرزقك أهم من الزوج صلاح الزوج
يعني لو كويس اهلاً وسهلاً
ولو مش كويس انا كدة أحسن

انا هدعيلك وكل نساء المسلمين
لكي مني كل التحية

بالتوفيق..................

الجواز و سنينه يقول...

على فكره احساس الوحده كل اخت بتحسه لما اختها بتتجوز مش بيفرق الترتيب
انا اخويا لما اتجوزت فتح الدولاب ما لقاش هدومى قعد يعيط
و ماما كانت بتنام على سريرى
يعنى كل العيله بتتأثر
بس لما بتكون اخت اتجوزت قبل التانيه بيكون كل اللى شاغلها للناس تفهم تصرفتها غلط و ده بيتعبها فوق تعبها
كنتى قرصتيها فى ركبتها
انا كنت بهرى اصحابى قرص
هههههههههههه

عاشقة القمر يقول...

دمعتيني وزعلتيني قبل ما انام .. سوسا يا جميلة اولا مبروك لنهى وربنا يسعدها .. وثانيا والاهم صدقيني نصيبك لسه متشالك في السما وماحدش هياخده غيرك لكن الفكره كلها ان كل شيء بمعاده واول ما معاده هييجي ماحدش هيقدر يحوشه .. واكيد اكيد سوسا جميلة زيك ربنا هيبعتلها نصيبها اللي يقدر يصونها ويقدرها ويكون يستاهلها ..
تحياتي ليكي يا جميلة .. واقوم انام انا بقى :)

غير معرف يقول...

حبيبة قلبى وجعنى كلامك قوى وحسيت بيه جداااااااااااااااااااا

ان شاء الله قريب نسمع أخبار حلوة عنك ونبارك لك وترجعى تقولى ماانا كنت بعقلى ايه اللى عملته فى نفسى ده

تحياتى لكى

حاجات جوايا يقول...

مدونتك جميلة جدا يا مس سوسا
والبوست بجد جميل وأسلوبك رائع
مبروك لنهى و ان شاء الله هنفرح بيكى قريب
دى كفاية خفة دمك يا قمر

دمتى بخير
أختك سالى

كوكي يقول...

ربنا يقويكي علي احتمال المشاعر الكتيرة المتزاحمة عليكي
بين فرحتك باختك وزعلك علي فراقها
وكمان قلقك من نظرات الناس اللي مبترحمش ومش مقدرين اللي جواكي
أقولك فكري في الاشاء الجميلة بس وامس أي حاجة تضايقك
الايام الحلو لسة جاية هتشوفي وابقي قولي كوكي قالت

Eldebug يقول...

انا خايف اكتب اى تعليق افسد جمال الكلمات والمشاعر اللى انتى كاتباها ...
وخايف اقولك عقبالك لانها ممكن تجرحك ... وبرضه مش قادر ماقولهاش لانها اكتر كلمة بتعبر عن احساسى دلوقتى ... ومين عارف جايز يكون ده السبب اللى هيتولد منه اجمل قصاصة فى تاريخ مصر الحديث ...

وبعدين فين رافت الهجان

Unknown يقول...

انا عيطت
مبروك
تصدقى مش عارفة اعلق
جايز اعدى من هنا تانى واكتب لك شعورى بالضبط لما قرات البوست
وجايز ميكونيش عندى الشجاعه انى اقولك احساسى خالص


كل الود

أميرة الاحزان يقول...

اولا بجد أسلوبك حلووووووووو اووووووووى فى الكتابة و يشدك كده و متكنيش عوزة تمشى غير لمه تخلاصى ...
ثانيا .. ألف مليووووووووووووون مبرووووووووووووووووك لنهى أختك ...
ثالثا ... ربنا يرزوقك بالزوج الصالح الى يصونك و يسعدك ...

Doba يقول...

وجعتيلى قلبى قوى
حسيت بكل حاجة بتحسيها
خلتينى اشعر بدفا نقطة دمعك وهيه نازلة - حتى حسيت وانتى ماسكة نفسك عن العياط ومزبهلة ونفسك حيشاه علشان مبسوطة بيها وهيه زى الفراشة

عارفة قد ايه هتفتقديها
ربنا يسعد قلبك

وبشر الصابرين

تحياتى
هبة

هوة فى أيه؟؟soso يقول...

ميس سوسا سدقينى لو كنتى شوفتينى وأنا بقرا البوست ده كنتى قررتى وعزمتى على غلق هذه المدونه فورا
فى الاول تأثرت جدا
وطبعا عشان أنتى عارفه ظروفى كويس فكنت حاسه أنى بشوف نفسى فى كل لقطه من هذا اليوم
أكنى بشوف المستقبل بكل تفاصيله
تانى
فى الاول تأثرت
وبعدين تقطب جبينى
وبعدين عنيا رغرغت وجيت عند جمله
حسيت بنبض قلبي بيعلا مع دقات الطبول .. وغصب عني لاول مرة دموعى تخوني .. وتعلن ضعفى ادام الكل
وانهارت كلية
لدرجه أن صوتى على ولقيت ماما جت من المطبخ قالتلى مالك أنتى بتعيطى
فأستغليت أنها كانت لسه مزعقالى وقالتلى أنا قرفت من النكد بتاعك
وقلتلها أنا صعبت عليا نفسى من الكلمه ديه والحمد لله صدقت لان ده كان جزء من الحقيقه كمان
عجبك كده؟؟؟
مش ممكن حد يكون حاسس بيكى زيى أبدا
الا اللى عايش نفش الظروف
لانى أنا كمان بحب أختى أوى وهيه بسمه البيت فعلا ولو مشيت الدنيا حتفضى عليا

دكتور بهــدوء يقول...

ربنا يسعدها يارب مع جوزها
ع فكره انتي حد طيب ورائع اوي

وان شاء الله ربنا يقدرلك الخير

غير معرف يقول...

هو انا كل مرة اجى هنا هعيط ولا ايه
لا بقولك ايه عايزين حاجه فرايحى والنبى
:))))

الف الف مبروك لنهى وربنا يسعدها ويكرمك يا سوسه يا جميله يارب

حسه بيكى اوى
المشكله فى كلام ونظرات الناس الى بجد سخيف

ربنا يكرمك يا سوسه يارب
سلامى يا جميل
:))

Tamer Nabil Moussa يقول...

انا عينى دمعت بجد

يمكن عشان حسيت بكل كلمة اتقالت منك

يمكن عشان مريت بظروف زيها

مش عارف لية حسيت انى اللى كاتب الكلام بس تعرفى


اهم حاجة انك تعرفى ان كل شىء اسمة ونصيب ومش عيب الصغير بتجوز قبل الكبير

ربنا يوفقك ويكرمك

تحياتى

Unknown يقول...

بسم الله
السلام عليكم ورحمة الله وبركاته

بصراحة أسلوبك جميل جدا جدا، وعلى الرغم من إن الحكاية مؤثرة جدا، إلا إني قريت كل اللي كتبتيه،
دمك خفيف جدا، كمصرية أصيلة طبعا، وعندك قدرة حلوة على السرد والحكي،
لكن فعلا يخرب بيت الظلم،
بس هنقول إيه، حسبنا الله ونعم الوكيل...

وكان لنا واحد زميلنا أتعود على الظلم، كنا دايما نقوله "يحيا الظلم".

عموما أنا متابع، ومش هكتب كتير المرة دي "قال يعني ما كتبتش كتير"، لكن المرة الجاية، لا ممكن تنزل أبدا.
ربنا يوفقك ومنتظرين...

وصلي اللهم على سيدنا محمد وأله وصحبه وسلم

Butterfly يقول...

انا بردوا مش عارفه اذا كانت مذكراتك فعلا ولا قصه من خيالك
بس بيتهيألى انها حقيقيه
يارب يسعدك ويجعل ايامك كلها سعاده وفرحه ويرزقك بابن الحلال ههههههههه

شهد الكلمات يقول...

ياااااااااااة يا سوسو انتي حساسة اوي
ربنا يوفقك و يوفقها
عجبني جدا( كانت عاملة زي الفراشة جناحتها طرحة بيضا وبترقص باليه تحت بقعة ضوء ....كانت جميلة بجد هي وعريسها .. سحبني خيالي لارض واسعه خضرا كلها زهور وانا وفارس احلامي بنرقص سلو على انغام زقزقة العصافير اللي كانت بتغنى وترقص حوالينا .. )

استمري مستنية المزيد و اتمني مرورك في مدونتي

كاميليا بهاء الدين يقول...

الصديقة الجديدة
سعدت بزيارتك
كثيرا ما كنت اقرأ تعليقاتك فى مدونات اصحابك
ويعجبنى اسلوبك فى الحوار

هذا البوست من النوع الذى يصيب القارئ بالصمت
فالصمت خيرا من الكلام
لانه فضفه ،، تسمع وباحترام شديد فقط لاغير


ربنا يسعد قلبك ويريح بالك ويحقق كل آمالك
اللهم امين

احترامى

PrInCeSS BeRy يقول...

جميلة اوى ودمها خفيف موت ربنا يوفقك ويسعدك ي قمر

صاحب المضيفة يقول...

ربنا يسعد قلبك ويرزقك الخير حيثم كنتي


شكرا لمرورك الطيب

مدونتك جميلة ورقيقة


تحياتي ودعواتي

رئـــــيسـة حزب الأحلام يقول...

كلامك تجسيد لمشاعر بنات كتير فى هذة اللحظات واهنيكى انتى قدرتى توصلى المشاعر المتناقضة بين حبك لاختك ومشاعر اخرى قد تكون سلبية ولكنها طبيعية واخرجيها احسن عن طريق الكتابة




تحياتى لكى اختى وربنا يعدلها لك ولينا يارب امين

غير معرف يقول...

سوسه إنتى فى الكآبة علامة***أرحمى دموع الغلابة**** فرحى قلوب الحزانة****أرسملينا بس ضحكه و لا بسمة ***فرحينا*زغزغينا** مش كفاية الحكومة خادت منا العلاوة

سلوى يقول...

طيب واحده بتدمع وبتعيط علشان أختها

أنا أدمع ليه بقى ؟؟؟

ربنا يسعدك يارب ويسعدها

ويوفقك لكل خير

المـــفـــــــقــــــــوعـــــة مــرارتـهــا يقول...

بكتيني ياشيخة
ربنا يسعدك يارب

بنوته مصرية يقول...

وجعتي قلبي فعلا

الف مبروك لنهي

بجد مش عارفة اقولك ايه اسلوبك اكثر من رااائع

كل واحد بياخد اللي مكتوب له وربنا ان شاء الله هيعوضك خير وهيحقق كل احلامك

تحياتي وتقديري
رودي

Mafrousa يقول...

ميس سوسه
ربنا يسعدها يا رب..و يهدى سرها و يطيب قلب جوزها عليها
بصى يا جميل انا مش حقولك الكلام اللى هو الجواز قسمه و نصيب ..و ماعرفش ايه...والكلام العادى...لا انا حكلمك من ناحيه تانيه خالص..
فكرى فى الموضوع من ناحيه تانيه انتى واضح الكبيره...وواضح من كلامك انك عايشه انتى و مامتك و بس دلوقتى
مش يمكن ربنا عامل كده علشان تاخدى بالك من مامتك و تراعيها....واضح من كلامك انك حنينه ...و سبحان الله ربك اعلم بينا اكتر مننا.... اعكسى الوضع ..لو انتى اللى اتجوزتى و اختك قاعده مع مامتك ..تفتكرى كانت حتبقى بنفس قوتك فى تحمل المسؤليه؟؟؟؟؟؟
لو اجابتك لا ده انا اللى تقريبا باعمل كل حاجه و همه معتمدين علي
...يبقى احمدى ربك انك انتى اللى لسه مع مامتك ..ماتعرفيش بكره فيه ايه...

و بعدين ما فاتكيش كتير فى الجواز يا حبيبتى...العيال
يهب لمن يشاء اناثا و يهب لمن يشاء ذكورا و يجعل من يشاء عقيما
طيب ايه...ان اتجوزتى و ما خلفتيش...زعلك حيبقى اكبر و ساعتها حتقولى يارتنى ما اتجوزت...بلاش
ان اتجوزتى ..و الراجل طلع زى كتير من الرجاله..اللى شكلهم ما بيدلش على شخصيتهم..و عيشك فى عذاب زى كتير من الستات ....ساعتها حتقولى يا رتنى ما اتجوزت...
ولا اتجوزتى و الولد طلع لا سمح الله فيه مشكله...ولا....ولا....ولا
البنات لما يتاخر سن الجواز بيبقوا مشتاقين للحنان و العاطفه اللى بتتواجد بنسبه ضئيله فى فترة الخطوبه...على امل انها تكمل بعد الجواز...و لو كملت تبقى يادى الهنا و لو ما كملتشى يبقى...يارتنى ما اتجوزت..كنت مرتاحه
....حتقوليلى لو تفتح باب الشيطان..انا معاكى...بس استمتعى بكل يوم و بكل لحظه انتى فيها حرة نفسك...و تقدرى تخرجى وقت ما انتى عايزه مع اصحابك مش مستنيه السماح و يا سلام لو تقابل بلرفض....
انا ما انكرش ان فيه زيجات موفقه...بس ارجعى خطوه للخلف و بصى من بره على دائرة المتزوجين.مش حتلاقى و لا واحده مش بتقولك يا بختك....
سوسن استمتعى بكل لححظه خدى مامتك و اخرجى شمى الهوا ..روحى سينما زورى الاقارب...اضحكى..انتى حره
و لما ربك يريد فى الوقت اللى هوه محدده حتنضمى الى جمعية...نفسى فى يوم من ايامك يا عزوبيه

hamssah يقول...

سوسا
كل اللي عايزة اقوله ان حسيت بالصدق في كلماتك
كلماتك صادقه وخارجه من قلبك شايله حاجات كتيييير ملخبطه مشاعر حب وخوف ووحده ودخلت قلبي على طول من غير استئزان ووجعتيلي قلبي يا سوسا
مبروك لنهى ومبروك ليكي على مدونتك الجميله
همسه

غير معرف يقول...

أول مرة أزور مدونتك

بقدر ماهى قمة فى المشاعر الصادقة .. بقدر ماهى قمة فى الألم .. حالة مركبة من الافتقاد .. مع بعض اللوم على الحظ ..

سوسا
حذار أن تقولى أنا عملت ايه فى دنيتى ..وإلا هل نستطيع القول أنه فى عصر الرسول عندما وضعت له اليهودية السم فى الشاه .. أو عندما آذاه الكفار وغيرهم هل كان يعاقبه الله .. أو كان عمل حاجة فى دنيته؟

لكنها الدنيا .. شوية صبر صغيرين وربنا يسوق اليك من يستحقك ..

أقول لك حاجة تضحكك .. مرة فى مدونة كانت صاحبتها تكتب بوستات كلها مؤلمة .. ولاتبعث على أى أمل .. قرأت لاحد المعلقين التعليق الاتى:

عفوا .. انتهى رصيدكم من النكد .. نرجو اعادة الشحن

تمنياتى لك بكل الخير .. نهى برضه جنبك .. ان لم تزوريها .. لاتعطلى هم .. هى اللى هاتيجى .. ده بالتأكيد

الفارس الملثم يقول...

بداية زي ما قلتلك قبل كده اسلوبك جميل اوي , وان حمل المرة دي طابع الحزن نتيجة المشاعر الصعبه والمتناقضه اللي انتي حسيتي بيها في زواج اختك ..

اتمني لكي التوفيق والسعاده ومنتظرين التكمله

تحياتي
محمد

hager يقول...

بجد البوست ده فووووق الرااائع
يمكن دي اول مره ازور فيها مدونتك بس بجد
انا مش لاقيه كلمه مناسبه
انتي انسانه بجد رااائعه .. كفايه يكون عندك القلب الطيب ده .
اه قبل ما انسي الف الف مبرووك لنهي
سلااام

Unknown يقول...

ازيك ياجميل
وحشتيني ووحشتني تعليقاتك
بوستك ده يجننننن
وجميل اوي وفكرته عسوووووووله

مستني زيارتك تنورني

rtrcbh يقول...

السلام عليكم ورحمه الله وبركاته
ماشاء الله وربنا يكرمك يارب ويابرك فيك
جزاكم الله خيرا على الموضوع الجميل
واسال اللهه ان لايجعل لك ذنبا الا غفره وغفره ولاهما الافرجه ولاحاجه من حوائج الدنيا والاخره الا قضاه لك
اللهم امي اللهم امين
تقلبى تحياتى وخالص احترامى
أخوك
د/أحمد جمال

Unknown يقول...

السلام عليكم ورحمة الله وبركاته
Miss. Sosa
انت تصفين بأمانة وصدق ما حدث فى بيتنا العامر شهر فبراير من هذا العام
كما قلت لك فى مرة سابقة وكانك كنت معانا فى كل لحظة
لكنك اقوى والحمد لله من بنت اختى الكبرى والمتشابهة ظروفها معك .
حضرت الفرح بتاع اختها بالعافيه ورسمت الفرحة كما يقولون على وجهها لكن اى انسان يعرفها ويعرف ظروفها لازم يعرف هى بتفكر ازاى وحاسه باية؟ مش عايزة اطول عليك شفنا ايام صعبة
ولسه حنشوف وربنا يستر
تحياتى واحتراماتى للصدق المشع فى كلماتك
واقوالك.
وتقبلى تقديرى لشجاعتك فى مثل هذه المواقف.
norahaty

قوس قزح يقول...

بكتينى و انا قال ايه جاية و فاكرها مدونة فرفوشة و هضحك من قلبى من اسلوب ردك الساخر على بعض الناس

انا فى موقف زى موقفك بس العكس
انا اللى اتجوزت و خلفت و اخواتى لا
هم اصغر منى بس اصغرهم عندها 29

و بحس بضيقهم من عدم الجواز اكتر لما غصب عنى بشكى من الجواز .. بحس انهم عايزين يقولوا انتى مش حاسة بالهنا اللى انتى فيه

ربنا يرزق كل البنات بالزوج الصالح


تحياتى

Empress appy يقول...

بجد جسم قشعر قوى وانتى بتحكى بس اكيد سعادتك بيها كانت احلى عادى انا اتحطيت فى الموقف ده وحسه بيكى بس مش بعرف ازغرط ههههههههه

nanny يقول...

شكرا اوي علي مرورك للسايت عندي وابداء رايك في موضوع دبل الخطوبة.
وبصراحة السايت عندك لذيذ فعلا وانشاء الله هكون من اكتر قرائه.

rovy يقول...

ربنا يكتب لكى انتى كمان السعد والهنا الانسانه اللى زيك اكيد ربنا مش ناسيها واكيد النصيب جاى فى ميعاده ده اختبار ونجحتى ان شاء الله فيه واللى فاضل كرم ربنا وتخيلى بقى كرم الرحمن الكريم .. بس انا نفسى نبطل افكارنا ونبطل نبص للبنت اللى لسه ما اتجوزتش ان العيب فيها لأنها ممكن تكون احسن واحده فى الدنيا بس لسه نصيبها مجاش او هى مش لقياه لسه .
الف مبروك لنهى وعقبالك
دمت بخير ورزقك الله السعاده
تحياتى
rovy

hanan khorshid يقول...

سوسا انتى ممش ممكن بجد
كلامك جامد موووووووت
سرد رهيب لوقائع القصة و تمزق مشاعرك
البوست كله رهيب
احنا قلنالك عايزين نسمع الحكاية مش عايزينك تقطعينا
حرام عليكى
المهم
انتى لازم تفضلى علطول تحلمى برقصتك اللى حلمتى بها عالبست
و بعدين انا عايزة اقولك حاجة مش عايزة تكون كلام مكرر و خلاص
فعلا ده بقى شىء دارج جدا
و حاليا فى معظم الاسر لان الزواج مش بقى له مقاييس
و الظروف بتمنطق اللى عمره ما كان ممنطق
انا واثقة ان ربنا هيكرمك قوى عشان طيبتك
و فرحتك لاختك الى غطت على شعورك بالعذاب
انا نفسى ربنا يكرمك بانسان صالح بس
حتى لو بعد الشر ده محصلش فهيكون برضه كرم
لان ربنا مش بيعمل حاجة غلط و صدقينى بعد شهور او سنين اكيد هيعرفك الحكمة
لكن انتى لازم تفضلى دايما بنفس الروح المرحة
و الاحساس الحلو الى بيحول كل ازمة لنكتة
و احلمى قد ما تقدرى
بس من غير ما تتسرعى
ألف مبروك لنهى
و عقبالك يا سوسن

ميرو يقول...

انا اول مرة ادخل على المدونة بتاعتك وحقيقي عجبتني جدا ونكدت على قوي أنتي احساسك عالي قوي وكلامك جميل ورقيق بيدخل القلب على طول لكن انا عايزة اقولك اني مع واحدة مفروسة في تعليقها عليكي عيشي حياتك واستمتعي بكل لحظة فيها لأن الجواز اليومين دول مش هو الجواز اللي بنحلم بيه وبنرجع نقول ياريتنا ما تجوزنا او على الاقل ياريتنا اجلناه وعشنا حياتنا

Ahmed Gamal El-Den يقول...

قصة مؤثرة جداً و سردك منتهى الروعة

الربان يقول...

تحياتي

احييك علي صراحتك...و ايضا علي ايمانك.

ان شاء الله النصيب في الطريق...و لا احد يعلم ما أخفي لك من قرة أعين..

لي بعض الاصدقاء يلعن اليوم الذي فكرن
فيه بالزواج... و يترحمن علي ايام البالي الخالي و الراحة...

ارجوك...اترك الامر كله لله...و توكلي
عليه و هو حسبك.

تحياتي و تقديري

مجرد خواطر يقول...

كل المشاعر دى كنت بحسها قبل م اتجوز وكنت أقعد أحلم و أحلم وأحلم بفارس أحلامى اللى هيخلينى أميرة كل النساء و كنت بحبه و أحكيله و أزعل منه انه اتأخر علية و لما تقدم لى زوجى لخطبتى شعرت أنى أسعد فتاة فى الكون أخيرا هيتحقق حلمى وتزوجنا وقضينا أسعد شهرين عسل و بعدها بدأت المسؤلية الجادة. المسؤلية دى هدت كل أحلامى ورجعت أحلم من جديد ببيت أمى و جلستى مع اخوتى آخر الليل نضحك و نهزر ونتخانق حتى خناقهم كان حلو أوى بدأت أحلم أرجع تانى بنوتة مفيش مسؤليات أكبر منى تقيدنى.

مش بقولك كدة عشان أواسيكى أو أواسى بطلة قصتك ولكن بقولك كدة عشان تستمتعى بكل لحظة انتى أو هى عيشاها لأنها مش هتتعوض تانى أبد أبدا وإن آجلا أو عاجلا إن شاء الله هيكون هناك بيت وزوج وأسرة وهيوحشك بيت ماما و قعدتك فى البلكونة لوحدك من غير حد ميقع عليكى وحدتك.

صدقينى وبكرة تفتكرينى و تفتكرى كلامى بس ابقى راسلينى و قوليلى الحق

كيكى عوووووو يقول...

سوسو ياسوسو..والله وحشتينى ...قولت اجى امسى واصبح..بقولك من اولها البوست الجاى عايزة اضجك

Unknown يقول...

انتى طيبه اوى ربنا يكرمك بواحد يستهلك
انت هتخلينى اعيط

mohra يقول...

مشاعرك ناعمه و رقيقه يا سوسن..انا كنت هاعيط..ربنا يسعدنا جميعا..هاتابعك عشان اعرف الباقى

قلب صغير يقول...

انا مليش اخوات
بس حاسه احساسك اوي

كلامك كله حلو

Unknown يقول...

مبروك لاختك اولا
ثانيا انا حاسة بيكى كويس بس لو الناس تسيب بعضها فى حالها كل واحد مشكلتة مكفياة مش ناقص كمان الناس علية
تحياتى

بحور الحنين يقول...

السلام عليكم
ميس وسا بجد انتى انسانه حلوة اوى ونضيفه اوى ربنا يسعدك ويهنيك ويرزقك بابن الحلال اللى يسعدك ويهنيكى وساعتها تعزمينا كلنا على الفرح وساعتها هازرغتلك زغروته بجد لانى احيانا باعرف هههههههههه

رامى اشرف يقول...

بجد ومش كومت والله المدونه ساحرة فعلا وبجد والله متتخيليش فى كام كلمه لما قرتها حسيت انها حركت قلبى من مكانه
انتى جواكى جميل جدا
تحياتى ليكى

يوميات فنانه مفروسه جداا يقول...

الله عليكي ............والله ما ليكي حل ايه يا بنتي الابداع ده ربنا يسعدك انتي بجد والله ومش عارفه اقول حاجه غير كده .
تحياتي

رفقة عمر يقول...

انا بكيت معاكى فى الاخر
وبجد حاسه بيكى وعلى فكرة الموضوع دة بقى منتشر جدا البنت الصغيرة بتكون خايفه تاخر زى الاخت الكبيره فتوافق بسرعه على اى حد يتقدم لها
بس برضه الاخت الكبيره بيجى الاوان تتجوز
ربنا يسعدك اللهم امين
نسيت ليكى عندى تاج

مؤنس فرحان يقول...

ميس سوسا

أنا قريت مدونتك كلها قبل الرد
ماشاءالله أسلوبك أكتر من رائع بجد

ربنا يسعدك يارب

بنت مصريه يقول...

انا زعلانه منك يا سوسن
انتى قاسيه على نفسك قوى
فيه ايه يا بنتى رجاله ايه وبتاع ايه
صدقينى ربنا رايدلك اللى فيه الخير ليكى
انا عارفه والله ان الموقف صعب عليكى
بس اسمعى منى
منا متجوزه
الجواز مش امله يعنى ههههههه
اضحكى بقى وبطللى هبل

بقولك ايه نورينى وانتى هتضحكى بجد

امل يقول...

ياااااااااه بوست رهيب
انا حسيت كأني كنت معاكم
واتخيلت كل الاحاسيس اللي انت
حسيتي بيها
ربنا يكرمك يارب ويسعد قلبك

maha zein يقول...

تحياتي الحارة العنيفة
تحياتي ليكي بشدة وعنف
اوعاكي بقه ابدا تحسسي نفسك وتعيشى نفسك احساس الوحدة وانك يصعب عليكي روحك
لان عمره ما كان بالجوتاز الشخص بيزن نفسه
انا ارعف ناس فضلوا كتير ياما مستنين
وافتكروا ان خلاص لان سنهم كبر
وتيجي تلاقيها وربنا في لحظة
لقت فارس الاحلام
الصبر
والايمان بالقدر والنصيب
مع ثقة بالنفس
واوعاكي اوعاكي
تحسسي الناس ولو للحظة انك تعبانة او صعبان عليكي نفسك
لان ده هيزيد همومك
اتظاهرى بانك عادي وفري وولا همك
انا عرفة انه صعب
بس كده احسنلك
لو الناس حست انك تعبانمة ومتاثرة هيمصمصوا شفايفهم ويتشدقوا كده"مششت"
ويقولولوك يا عيني يا بنتي
عقبال عدلك
وعقبال عوضك
وغلبك
ويهيصوا بقه
وانتي احلي واجمل من كل الي بيتنيلول يتجوزوا جوازات متنيلة
انسة سوسة
يا شخص واثق من نفسه وسط العالم دي
يا قوية في كلامك واحساسك
انا فخورة بيكي وربنا
لان عندك قدرة علي مصارحة نفسك بكل قورة وثقة
تحياتي ليكي
بشدة وعنف
وعنف

كيكى عوووووو يقول...

انتىىىىىىىىىىىىىىىىىى.............فين

Unknown يقول...

ألف مبروك لنهي ياجميله

ويارب عقبال مايكون فرحك أحلي مما تتمنيه

أنا عارفه ان أي أخت في الدنيا مش بتفكر غير في سعادة أختها

وان لو الناس تريح نفسها شويه كنا كلنا استريحنا بجد

أكيد ربنا شايلك حاجه أحسن وأحلي

والحاجه الكويسه مابتجيش كده علي طول

لازم نستناها شويه

تحياتي

الدائرة يقول...

تصدقي اني مصدقك وحاسس بنفس الاحساس مع اني دكر ربنا يخفف علي الجميع

ســمـــر احمد يقول...

سوووووسة ..

تعرفى ... مجونتك من القلب للقلب
رائع كم الصدق و الاحساس و الطيبة

محبتى

elkhyana يقول...

انا مش هقدر اعبر عن كلامك واحساسك الا بكملتين (انتى انسانة)

غير معرف يقول...

بصراحة اسلوبك جميل جدا شدنى انى اقراء كل البوستات

انتى انسانة طيبة ورقيقة جدا

واختيار كلماتك رائعة

انا متابع المدونات من بعيد وبقراء بعض البوستات

واول مرة ارد على بوست علشان مش مسجل

بس بصراحة انا بدعى لكل البنات والشباب

ربنا يوفقهم ويصلح لهم الحال جميعا

واتمنى ان ندعى لبعض ونعين بعض على فعل الخير

اتمنى ليك حياة سعيدة وموفقه باذن الله

Amr يقول...

كلامك مؤثر بحق, وعندما اتذكر موضوع الابتلاء وانه أذا كان هناك احد في عائلتي مبتلي بشيء ما, فليكن انا هذا الشخص, وليثبني الله من عنده تذكر هذا فقد يخفف عنك.

ولا تسألي الله الصبر, فمن سأل الله الصبر فقد سأله البلاء, ولكن أسأليه العافيه من عنده كما قال رسول الله صلي الله عليه وسلم.

وادعي الله دائما بالخير, فسوف يأتي قريبا بإذن الله.

نعكشة يقول...

ربنا يسعدك يا رب دايما

مدونتك اكتر من رائعة

انا قعدت اعيط في البتاعة دية

ربنا يرزقك يا رب باللي فيه الخير ليكي

ويجعل نفسك راضية دايما

آمين

غير معرف يقول...

تحياتي لكِ.

يمكنني أن أقول أني أفهم كل ما تكلمتِ عنه.

عندما تكون الفتاة تتعامل مع هذه الأمور بشكل عادي، فإن تصرفات من حولها تجبرها على اتجاه آخر، و تصبح تتحسس بطحة لا وجود لها حقيقة على رأسها لكن لأن الكل يتوقع وجودها.

مبروك لنهى، أنا أيضًا أكره كلمة عقبالك خاصة عندما تزداد زيادة عن اللزوم.
لكن عقبالك كحالة خاصة متفردة لها مقاييسها الخاصة مش عشان أي أحد أو أي شيء.

Humman being يقول...

عاوزة أقولك ان اللى انتى بتحكيه ده هوه أنا.... بالظبط نفس اللى حصل مع أختى... فى ليلة فرحها
سنى من نفس سنك وظروفى هى نفس ظروفك واحساسى صديقينى هو نفس احساسك وجع جامد جدا جدا جدا
نفسلى أسأل ليه كل ما أدخل BLOG ألاقى نفس وجع البنات واحد العيب فينا ولا فى مين؟؟!!!!

Humman being يقول...

عاوزة أقولك ان اللى انتى بتحكيه ده هوه أنا.... بالظبط نفس اللى حصل مع أختى... فى ليلة فرحها
سنى من نفس سنك وظروفى هى نفس ظروفك واحساسى صديقينى هو نفس احساسك وجع جامد جدا جدا جدا
نفسلى أسأل ليه كل ما أدخل BLOG ألاقى نفس وجع البنات واحد العيب فينا ولا فى مين؟؟!!!!