• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الجمعة، 3 أبريل 2009

بلاش تعليم يا بنات


البنت المصرية بعد ال 21 - ده لو هي فالحة ومركزة في دروسها مش مركزة مع شباب السكشن وازاي توقع واحد فيهم - بتكون اتخرجت , والتطور المنطقى للحياة بيقول انها تدور علي شغل او جواز .. تدور علي شغل تلاقي البلد حالها زي ما كلنا عارفين مافيش شغل وانا طابور البطالة من التسعينات لسه مااتحركش وعقبال مايجي عليها الدور تكون انتقلت للرفيق الاعلي او جالها ضغط وسكر وشلل رعاش واول ما تستلم الشغل تقدم اجازة اعاقة عن العمل .. تدور علي طابور العرسان تلاقيهم اختفوا في ظروف غامضة .. وحليني لما واحد كفيف يظهر و ينظر في امرها ويحن عليها ويخبط علي بابها .. خصوصا ان الشباب اليومين دول مابقوش اد مسئولية فكبروا لموضوع الجواز ده ومقضينها فرجة بس .
تلاقي نفسها محاطة بالطوابير .. طابور الشغل وطابور العريس وطابور العيش (وده احد انجازات حكومة نظيف واللي لازم يتسجله في موسوعة التفعيص للارقام القياسية)

تبص يمين تبص شمال ماتلاقيش غير التعليم .. تقول اشغل وقتي بماجستير وهي اصلا تكون بتنجح بالزق وبدرجات الرأفة .. والماجستير فى مصر يااخواني يعني الآتي :

- سنه تمهيدي مالهاش اي لازمة ولا تستفيد منها علميا بأي شيء غير ذل ولف علي الدكاترة و تنفيذ طلباتهم الغير منطقية ويرسخوا جواك مفهوم العبودية من غير تعليم (من كان لي عنده درجة .. صرت له عبدا .. وإن كان لك عند الكلب حاجة قوله يا دكتور) .. و كل ما تشوف الدكتور يسيطر عليك نفس شعور سيدة الشغالة وهي بتمسح السلم وايدك تاكلك على مسح مكتبه .

- سنه تانية تدور علي نقطة ده ان ماكنش لسه جاتلك نقطة .. والنقطة البحثية ديه لاما تهبط من السماء بوحي الهي وده نادرا ما بيحصل .. لاما بتنزل من الدكتور وده نادرا ما بيحصل برضو لان مفيش دكتور بينقط ببلاش .

- جبت النقطة اي كان مصدرها والغالب هتكون لطشتها من اي بحث قديم او من الانترنت ما هي البلد ده مش بتاعت ابداع . تقوم تتكفي ع النقطة 4 سنين تدرس فيهم ابعاد النقطة .. و تكون فقدت فيهم بصرك وسمعك واخر فقرتين من العمود الفقري وكل المشاعر البشرية السوية .. وتبقي شبه المسطرة لو اكتئابك بيقلب علي قلة الاكل او شبه المنقلة لو اكتئابك بيقلب علي طفاسة.

- خلصوا ال5 سنين ولازال العريس مختفى في ظروف غامضة وطابور البطالة لسه واقف .. تقوم تدوس في الماجستير وتناقش واللي ما شافش مناقشة ماجستير يبقي يتفرج علي احمد ذكي في مسلسل الايام ويسمع اغنية اليوم ده يومك يا طه .. يوم المناقشة ده زي يوم النحر والكبش هو سيادتك طبعا .. بتلاقي كل البشر بتشتم وتهزا في شخصك الكريم وانت في غيبوبة وحالة من اللاوعي وانت ملطشة لاي حد معدي حتى لو عيل صغير قالك يا حمار هتقابله بابتسامه لا ارادية باردة كونتها حركة التنشنة اللي في وشك والشد العضلي اللي في حاجبك ولسانك اللي اتبلع في زورك .. وفي اخر التمثيلية الهزلية هتلاقي ناس بتبوسك وتقولك مبروك ماعرفش علي ايه بالظبط بس اهي بتتقال.

والماجستير هيجر الدكتوراة و المشكلة هتتعقد .. البنت كانت فاكرة انها بتشغل وقت فراغ وانها بتحل مشكلة .. العكس صحيح هي بتعقد المشكلة .


أولا: الشغل مش هيتحل لان البلد ديه مش بتاعت شهادات .. البلد ديه بتاعت وسايط ومحسوبيات .

ثانيا: الجواز اتعقد خالص لان صنف الرجالة دول مش بتوع تعليم ومش بيحبوا البنت المتعلمة خصوصا اللي معاها ماجستير ودكتوراة .. اولا اعلي منه وعقدة الراجل الشرقي هتنأح عليه ازاي يتجوز واحدة اعلي منه .. ثانيا هتكون شخصية و هتناقر فيه وهم مش غاويين صداع .. هم عايزين واحدة فرفوشة دلوعة تعمله ريلاكساشن وتمتص متاعبه مش هيتجوز زكيبة مشاكل كل حاجة تقوله اقنعني لا هو عايز حاضر ونعم ودمتم.

ثالثا : صحتها هتضيع وشكلها هيتبهدل وهتلبس نضارة كعب كباية وهتبقي شكلها بتاع علم والعياذ بالله .

رابعا : هتقول استفادت علم .. قول تاني كدا اصل ماسمعتش كويس .

خامسا : انها نفسيا بقت لا تصلح للاستخدام الادمي .. لان التعليم في مصر بيدمر البقية الباقية من عقلها .. واخرتها حاجة من اتنين لاما مستشفي الامراض النفسية والعصبية .. لاما سجن القناطر وده بعد ما شربت من دم المشرف ع الرسالة .


فمنعا لاراقة الدماء وحفاظا علي الارواح بلاش تعليم عالي يا بنات.
خدنا ايه من التعليم غير حنية الضهر .. وخدنا ايه من الرجالة غير حرقة الدم !!

28 التعليقات:

جريدة المقطم يقول...

بجد مدونة جميلة و رائعة استمرى و لو تحبى ممكن انشر لك بعض كتاباتك فى جريدتنا الصغيرة المتواضعة

صمت المشاعر يقول...

فعلا يا بنات بلاش تعليم

تعليم ايه


فعلا صدقتي يا ميس سوسه

شكرا ليكي علي النصيحه الخطيره دي

Ahmed يقول...

ياسلااااااااام؟
وفي الآخر ييجي الراجل الغلبان وفي زمن قل فيه الزوجات يتعك في واحده كمان مش متعلمه
ياصلاة النبي
هههههههه

لا ده كده تبقى العمليه صعبه أوي

حياة بلا روح يقول...

بحييكي على البوست الرائع جدا
بارك الله فيك

انا كل يوم اقول لنفسي ايه الي خلاني اتعلم الشهادة مالهاش اي قيمة في بلدنا ويمكن ليا صديقات لما قدموا علشان يشتغلوا قدموا بالثانويه العامة واتقبلوا لكن بالمؤهل العالي رفضوهم ..

وللأسف الرجل الشرقي مابيحبش البنت المتعلمة المثقفة ..

يمكن بشوف حالات الرجل بيكون في مركز مرموق جدا وحاصل على الدكتوراه او قاضي وبيتجوز بنت ماآخدتش اي شهادات عليا وممكن تكون اصغر منه بكتير ومن الريف علشان عقدة انه يحس دايما بالفخر والزهو ان مراته مش اعلى منه ..

الله يوفقك
أطيب تحية

ريهام العربي يقول...

حرام عليكي يا ساسو ده انا كان عندي امل احضر الماجستير والدكتوراه :(

والله بصي من الاخير كده محدش بياخد اكتر من نصيبه يعني واحده قريبتي اتجوزت وحضرت الماجيستير والدكتوراه وجابت اولاد وجوزها مش معاه غير هندسه ولا ددكتوراه ولا غيرو هو نصيب من الاخر

صدى الصمت - عاشقة الورد - يقول...

هههههههههه
والله عندك حق
أخدنا ايه من التعليم غير القرف ووجع القلب وفى الآخر بنقعد فى البيت وكل المعلومات ال درسناها بتتمسح بأستيكة
تحياتى

عاشقة الورد

إيمان يقول...

عودا أحمد ومحمود ولا لو أن الاسماء هتعصبنا
انا انضم لقافلة ضحايا التعليم العالى أوى الدراسات العليا الماجستير والدكتوراة احيكى على كل ما قلتيه
ونسأل الاخوة والاخوات الدعاء بالصبر والثبات

تحياتى يا سوسن

ReEm يقول...

انا اتاخرت بوستين بس والله ليكي وحشة

ومكانة كبيرة

حمدلله على رجعتك لينا بالسلامة

غير معرف يقول...

ايه دا كله
ولية كدة بس بردة البنت لازم تكون متعلمه علشان تقدر تربي الاجيال اللي جاية معأنها مبقتش فارقة لان التعليم دلوقت مابيفرز حد كويس
عارفة في اوروبا كتير بيكتفوا بالمرحلة المتوسطة واللى هيا الزامية والغريب انهم بيلاقوا شغل بس هناك فية سياسة تعليمية مظبوطة...
تحياتي لك
medus
http://illupo77.blogspot.com

Bent Men ElZman Da !! يقول...

تصدقى معاكى حق :D
خدنا ايه من التعليم الا وجع القلب
بس انا اسمعهم بيقولوا ان شهاده البنت سلاح فى ايديها
مش عارفه بقى استخدامه ايه السلاح ده
يعنى لو واحد فكر يقل ادبه اطلعله الشهاده اهدده بيها مثلا؟؟!
بس ميزه الشهاده الوحيده
ان الواحد ممكن يشتغل بيها ولا يتكل على حد ولا يستنى حد يصرف عليه غير اهله طبعا :D
جاااااامد البوست
ياريت تقبلى مرورى :)

حاجات جوايا يقول...

كلامك حكم يا سوسه والله
أنا كنت لسه هبتدى وبقول يا هادى و بقدم فى السنة التمهيدى اتخطبت
قلت والله ما هى راجعة هخدها يعنى هخدها
وخدتها وقعدت عليها الى وقتنا هذا

وبعد ما اتجوزت
ارجع واقول يا ريتنى كنت كملت
ههههههههههههه

خالص ودى
سالى

Soma يقول...

ايز يكون عندك حق, بس هتشغل وقتها ازاي يعني؟ ماهي كل الدنيا طوابير حواليها وكل الرجاله عاهات هتعمل ايه؟؟
انا شخصيا مش ناويه علي دراسات عليا لاني معنديش دماغ الصراحه, بس اللي بيحبو الدراسه يدوسو
اهتموا بنفسكو يا بنات عيشو والبسو واخرجو, الايام دي مش هتتعوض, واحنا مش مستنين راجل عشان نبتدي نعيش حياتنا اصل الجواز ده رزق من عند ربنا عشان كده بلاش نشيل الهم وننسي نكون حلوين في نظر نفسنا قبل نظر الناس
وميرسي علي البوست الجميل يا سوسه

maiosha يقول...

يا سلاااااااام عليكى يا سوسة

انا عايزة انشر البوست ده واوزعة على كل اب وام مصريين

فعلا الواحد بيخرج من الكلية زى ما دخل زى ما خرج
ويمكن بيخرج اغبى كمان

انا بقول كفاية لحد كده واقعد بقى فى البيت وخلااااااااص

Punny_Punny يقول...

بحييكي علي البوست الجميل ده.
أنا أيام ماكنت في الكلية كنت أقول "عايزة أتجوز واحد يحلف عليا يمين ما أكمل تعليمي لكن لو جاني بعد ما أخلص تعليم مالوش لازمة" . و أديني خلصت تعليم و اشتغلت- بالواسطة - عشان سعاده الباشا ييجي ما فيش فايدة - باين علي أمه لسه ما دعتش عليه - قلت أحضر ماجيستير لحد ما ييجي و أنا لسه في التمهيدي و زي ما بتقولي بالضبط مذلولة للدكاترة بس إيدي بتاكلني علي ضرب الدكاترة حتي لو محترماهم.
لكن ما تتخيليش قد ايه ضحكني يوم المناقشةاللي بتوصفيه.

رحلتنا في الحياة يقول...

ههههههههه عندك حق فى كل كلمة بس مش هتنازل عن احلامى فى التعليم العالى حتى ولو لاخر نفس

mohra يقول...

أوجزت و أنجزت و الله يا اختى

Miss. Sosa يقول...

انا بشكركم كلكم علي اراءك المشجعة بس في نقطة عايزة اوضحها انا مش بتقول ماتتعلمش خالص بقول بلاش ماجستير ودكتوراة خصوصا لو هتاخدهم من مصر

وبعدين الدول الاوروبية وامريكا كلهم تعليم متوسط قلما مابتلاقي حد بيكمل تعليم جامعي والي بيكملوا بيبقوا شخصيات مؤهلة للتعليم الجامعي ومابعد الجامعي
لكن احنا تعليمنا فاشل
ومنظورنا كمجتمع للتعليم المتوسط غلط واحنا شعب معقد من الاخر ومابيحترمش اصحاب المهن الحرفية وكلنا شايلين شهادات وبنفتخر بيها واحنا في قرارة نفسنا عارفين انها ماتسواش

اما عن شغل وقت الفراغ للبنت فتروح تتعلم تعليم نافع : تعليم شرعي او اي مهارة تكتسبها وتعمل بيها مشروع ان شالله مشغولات يدوية

اسامة بن زيد قاد جيش وهو عنده 18 سنه واحنا بنقعد لحد 21 سنه ناخد مصروف من اهلنا ونخرج للحياة اطفال ونبتدي نتعلم يعني ايه حياة بعد ال 21 وفي بيعيش ويموت طفل

اكيد التعليم الاكاديمي مش هو الحل .. الحياه اكبر من كدا وتستحق تتعاش بشكل اصح من كدا

تحياتي ليكم جميعا

kochia يقول...

والله رغم انك عارفةانكلامك صح
انا احب اؤكد علي صحته

لا شغل بيجي مع الدراسات ولا عريس بيحب يتجوزواحدة متعلمةاكتر منه بافتراض انها هتتغر او تتكبر او كدةيعني

امامصطلح واحدةبتاعةعلم فعلا بقي سبة علي جبين صاحبته
وكتير يسعي الاهل والاصدقاء الي نفيه لو تم ذكره في اي محفل عائلي مثلا اومحفل يضم الاصدقاء

هو عالم تالت من جوانب كتير

تحياتي

قلب ارهقته الاحلام يقول...

والله ياسوسا أنا معاكي ومش معاكي :)
لان الواحدة تحاول تتعلم أو تشتغل
أحسنلها من أنها تفضل تستني ف عريس الغفله طول عمرها وهي مش عارفه اذا كان جاي ولا مش جاي بس زي مابيقولوا العلم سلاح فهو فعلا سلاح لان اي واحد بيجوز واحدة متعلمه بيعملها حساب وبيعمل حساب لعقلها وتفكيرها وبيكون عارف انها تقدر تشتغل وتستغني عن خدماته ف اي وقت ده طبعا مش ف كل الاحوال انا بقصد ف حاله ظلم الانسان ده ليها وعدم تقديم حقوقها وتحياتي ليكي ع البوست الجميل ده ياقمر دي أول مرة لي ف البلوجات وكانت بدايتها مع سوسا :)

NaiRa يقول...

بجد عجبنى اوى كلامك وفعلا كلام منطقى بس فى حاجات صعب الواحد ينفذها
تسمحلى اضيف مدونتك لو مش تضايقى ونايس بجد بلوج

Magi Mostafa يقول...

بوست ظريف بس انتى بتكلمى جد
ازاى يعنى بلاش دراسات عليا
عشان سياده العريس ميزعلش ميتفلق واحد جبان ومعندوش شخصيه خايف من تفوقى بكل بساطه ميستهلنيش وبس

يــوم جــديد يقول...

وحشتيني جدا
كل شوية أدخل أدور عليكي وألاقي البوست بتاع التقل صنعة لما تعب نفساويتي
مبسوطة جدا برجوعك

بالنسبة لموضوع التعليم فأنا رأيي كده برضه
بلا وجع دماغ :)

Lady E يقول...

عندك حق للأسف ده الواقع !!

Asmaa mahaba يقول...

من عينى بس كدا حخلص الكليه ومش حكمل ماجيستير:)

غير معرف يقول...

بعد انقطاع طويل و داخل بالصدفه عندك لقيتك عاملة بوست جديد و كالعادة بتخبطي ف الرجالة زي بنات كتير قوي ع النت عمالين يطلعوا القطط الفاطسة فالرجالة و مع اني مش ح أختلف معاكي ان كتير من الرجالة مش زي زمان خالص بس مش لاقي امارة علي الثقة اللي البنات واخداها ف نفسها كأن الرجالة بس اللي اي الكلام و البنات الله يحرصهم هما العاقلين الراسيين اللي ضفرهم ب 100 راجل و مظلومين قوي.... بصي أنا مش حدخل في جدال في الموضوع ده لأني شايف انه بقي نظرة سائدة بين البنات و الولاد، البنات عمالة تقول مفيش رجالة تستاهل و الرجالة يا اما بتقول الاهالي بتبالغ قوي ف الطلبات يا اما يقولوا البنات بقت هايفه قوي و صعب الواحد يلاقي دولقتي واحدة زي بتوع زمان.. مش حندخل قوي في تفاصيل عشان مفيش حد حيقتنع بكلام التاني بس اللي أنا أقدر أقوله في العموم ان البنات هي اللي عاملة في نفسها كده، مع انه مش زنبها قوي ان ربنا خالقها كده من يوم ما اتولدت بتحلم براجل و فستان ابيض لكن في النهاية هي اللي عاملة في نفسها كده، و طبعا ده مما لا شك فيه أقوي اثبات علي عكس ما كل البنات بتقول انا مش فارق معايا الجواز، هي كلمة بتنقال من البنت حفاظا علي كبريائها قدام الناس و كله عارف من الصغير للكبير انه كلام من وراء قلبها و انها حتموت علي اليوم اللي تكون فيه واقفه جمب راجل... علي عكس الراجل تماما اللي أهم هدف في حياته من صغره انه حيتعلم ازاي و يتخصص في ايه و انه يلاقي وظيفه كويسه تعيشه كويس بعد التخرج، كل اللي أقدر أقوله ان الرجاله عندهم مشكلتين اساسيتيين هما السبب في واحده فيهم و البنات عندهم مشكلتين اساسيتيين و هما السبب في الاتنين، أولا في كتير رجالة مش متحملة مسئوليه بالقدر الكافي و دي مشكلتهم، و مشكلة اقتصادية كبيرة ملهمش يد فيها، أما البنات بالنسبة لأهلم و المغالاة في الطلبات، يا اما البنت نفسها متعرفش هي كمان تشيل مسئولية و طبعا دي غلطتها انها متدلعة و أم سايبه بنتها براحتها و أول مره تشوف شكل المطبخ قبل جوازها بكام يوم عشان يادوب تلحق تتعلملها أكلتين من أمها بدل ما تطلع طور الله في برسيمه، أهم حاجه بس محدش يقولي انت مش جايب شغاله تتجوزها عشان البؤين دول بئو عاملين زي اللبانه في بوء البنات، قبل بس ما حد يقولي انت مش جايب شغاله يروح يشوف امه بتعمل ايه دلوقتي، كل أمهاتنا كده علي فكره كلهم دورهم يراعوا بيتهم و عيالهم و ده السبب اللي بيخلينا دلوقتي بنعشق اللحظه اللي نبوس فيها راسهم و رجليهم كمان و اللي بيخلي ابهاتنا يقولوا الست دي عملت اللي عليها و زياده و عمرها ما قصرت و نشيلها فوق دماغنا كمان، يا ريت بس قبل ما البنت تقعد تقول الراجل كذا و كذا و كذا، تتخيل و لو لحظه واحده ان امها مسافرة اسبوع و انها لازم تحل محلها و تعمل كل حاجه و يفضل البيت مفتوح و ماشي، لو فعلا لقت انها عارفه حتعمل كل حاجه ازاي و تقدر عليها يبقي اتاريئي علي الرجالة زي ما انتي عاوزة، لكن لو لقيتي ان لسه في حاجات كتير قوي انتي لسه متعلمتيهاش، يبقي يستحسن تبدأي بنفسك قبل التريأه... يا ريت بس يا جماعه كل واحد يعرف اللي ليه و اللي عليه..

غير معرف يقول...

انا بقول كده م الصبح
قالولي يا بنتي اعملي دراساعات حضري ماجستير
قلتلهم لأ انا تعبت م التعليم
كفااااااااااااية
حرااااااااااااام

سوسة.. ليكي وحشة وربنا والله
ممممممممواااااااه

مها ميهوووو

عمك ياض يقول...

هههههههههههههههههه
حلوه التدوينه دي كمان ماشاء الله :)

smithe يقول...

hello friend. you want to come race Blog Design, Read more. Can you be a friend again