• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الخميس، 26 يونيو 2008

أميـن الونـش هيشيلـهااا

دماغي كانت عاملة زي براد الشاي اللي اتنسي علي النار وهو بيغلي .....حاسة ان دماغي مساحتها اصبحت اصغر من الافكار اللي فيها ...الافكار بتصوت ف دماغي ...سامعه الف صوت بيتكلم ....كل ده وانا ماشيه في الطريق وعفاريت الوسوسة ركبت دماغي وابتدت تتسلي بية وكل عفريت منهم يطلعلي بفكرة شكل
ازاي اوافق .....؟
هو انا اتجننت ف عقلي ولا ايه .... اقابل ازاي واحد انا معرفوش ...... طيب هو هيقول علية ايه ..... اكيد هيقول دي سهلة ..... اكيد هنزل من نظره .....ايه اللي خلاني وافقت .
كل الوساوس دي من عفريت واحد .... يجي اخوه العفريت التاني ف ودني التانيه ......هههههه يا سلام يا اختي بتفكري دلوقتي ايه اللي خلاكي وافقتي ..... انتي اصلا ايه اللي انتي هببتيه م الاول .... في بنت محترمة تعمل كده .....؟
عايزة تتجوزي من ع النت ..... ليه هم اللي علي ارض الواقع خلصوا ولا ايه ..... بزمتك في بنت محترمة تسجل نفسها علي موقع جواز ....... لا وايه من ورا مامتك ......بزمتك مش مكسوفه من نفسك
ميلحقكش العفريت ده يخلص كلامه الاقي واحد تالت نط ف عبي وبيشدني من قفايه .......يا بنتي ارجعي .... هو انتي تعرفيه ده منين اصلا عشان تروحي تقابليه .....افرضي طلع انسان مش كويس ..... ارجعي ارجعي
كل دول كوم واخوهم الكبير ابليس كوم تاني ..... سابهم يتكلموا براحتهم وهو استلمني ف الاخر
يا بنتي بلا عبط ما النت زيها زي الخاطبه بتاعة زمان ايه الفرق يعني وبعدين انتي اصلا مفكرتيش ف الفكرة دي الا بعد ما (اية) ما قالتلك ان صاحبتها اتجوزت عن طريق الموقع ده ..... ايه هي (اية )موضع شك ولا ايه ... دي حتي منتقبة .... وبعدين هو خلال الاسبوع اللي اتكلمتوا فيه ظهر منه أي حاجه تدل علي انه مش محترم
مجرد ان الكلمتين دول جم ف دماغي خطرلي صوته واحنا بنتكلم ف التليفون .... ياه اد ايه كلامه رقيق ... اد ايه محترم .... صوته دافي وحنين .... صوته زي البحر عميق جدا ......فيه كل حاجة ممكن تتمناها أي بنت ... شخصية محترمة دمه خفيف مثقف .............قولت لنفسي وانا بحاول اقنعني .... ان شاء الله انا نيتي خير اكيد ربنا هيكتبلي خير .

بجد مكنتش شايفة الطريق قدامي .... اتهيألي اتخبطت ف كتف عشرات الناس وانا ماشية من التوهه اللي كنت فيها .....معرفش مشاعري كانت عبارة عن فرحة باني لاقيت اللي بتمناه ... ولا خوف من مقابلة مجهول ولا احساس بالذنب ولا كل ده مع بعضه
وفجأة رن الموبايل ....حسيت اني اتكهربت انا عارفة انه هو اللي بيتصل .... صوتي اصلا مطلعش ولاقيته بيقولي ...ايه انتي فين انا واقف مستنيكي ......
وصلت قدام كوستا عباس العقاد زي ما قلي وتعمدت اني ابعد شوية ..... ولسه بحاول ارن عليه لاقيت موبايلي بيرن ...لسه هرد لاقيت صوت من ورايا ....
ايه بس هتردي علي مين ............!!!!!!!!

بعد ما استقرت بينا القاعده علي الترابيزة اللي في بتطل علي فيو شارع عباس العقاد ..وده كان اختياره عشان يتابع العربية لانه راكن قدام المطعم علي طول .... رغم انه قالي مفيش خوف عليها لما استغربت انه هيسيبها ف المكان ده ... ووصي السايس قبل ما ندخل الكافيه
وقاله ابقي خلي بالك بقي ...
كل ده وانا اصلا مش مركزة حتي ف ملامحه ... كأني بحلم كأني مش في وعيي لدرجه اني مكنتش بتكلم
هو كان بينط كل الحواجز تقريبا مبطلش كلام كان عامل زي السائل اللي بيتغلغل في حتة سفنجه
كلمني عن نفسه ووالده اللي قضي طول عمره في الامارات وازاي علمهم يعتمدوا علي نفسهم ف غيابه خصوصا ان والدته متوفية ... وحكالي عن شغله وقد ايه بيحبه وقد ايه الطيران متعه
وكلمني عن نفسي .... كأنه يعرفني من ساعة ما اتولدت .... كلامه بجد خلاني حاسة اني بعوم فوق سحابه ناعمه
كل حاجه بيعملها كانت جديدة حتي تعبيراته في الكلام ....... وقدر يضحكني لما قالي اتهيألي انا دوبت النشا اللي ممكن يكون بينا ف الاول اهو اتكلمي انتي بقي
ولاول مره اتكلم بعد ما ابتسمت علي اللي قاله ..... قلتله ....اه زي ما قولتلي لما كنا بنتكلم ف التليفون .... صحيح انا بحب الراديو بس بموت ف التليفزيون ...لما كان قصدك انه مش كفايه تسمع صوتي لازم تشوفني
وابتديت احكيله عن نفسي ... بجد كنت طايرة علي جناحه وانا حاسة باهتمامه بي وانا بتكلم
وف وسط الكلام استأذن مني يتكلم ف المحمول ... لانه كان الاصول يكون ف الشغل دلوقتي عشان يعرف الاسكيدوال بتاعه ..... جدول الطيران يعني .... وخرج بره الكافيه لان الشبكة واقعة جوة ... ورجع بسرعة وهو وشه متغير وجايب الوان ....
ييه الشحن خلص ....
انا : طب ما تتكلم من تليفوني يا طارق
طارق: ايه قولتي ايه ...... الله لو انا اعرف ان اسمي حلو كده
وشي احمر وداريت خجلي وان بديله الموبيل وببتسم
وبدا طارق يطلب الرقم وفجأه قال ابه ....ثواني وراجع يا سوسن .... باين الونش هيشيل العربية قالها وهو بيجري بره الكافيه
تابعته بنظري وهو خارج وواقف مع السايس اللي قاله خلي بالك واحنا داخلين وبيكلم امين شرطة واققف معاهم .
ما صدقت طارق خرج وابتديت انتبه للميلك شيك ستروبري اللي هو رشحهولي وابتديت ادوقه ..... ياه حتي اختياراته جميلة
وسرحت بجد ......ياه قد كده انا ربنا بيحبني ..... معقولة بالسهولة دي الاقي انسان زي ده .... الحمد لله يارب ... دي بركة دعا ماما .... قال وانا كنت خايفه ليكون لعبي ..... ده الراجل قالي من البدايه مفيش مقابلات تاني لان المرة الجايه هتبقي ف بيتنا وهو مع باباه وده بعد ما ماما ترجع من العمرة مباشرة
صحيح كل شيئ قسمة ونصيب ....... وابتسمت ابتسامة رضا وارتياح وانا بتنهد وبقول .....
الحمد لله يارب
مفوقنيش من سرحت دي الا صوت البنت اللي في المطعم ..... الشيك اهو يا فندم
انا : شيك شيك ايه
البنت : الاوردر بتاع حضرتك
انا : احنا لسه قاعدين محدش طالب الشيك
البنت : انا اسفه حضرتك ...اقعدي براحتك بس الاستاز اللي كان قاعد مع حضرتك هو اللي طلب اننا نعمل الشيك
هو طارق هيطلب الشيك ليه ده مقلش ان احنا هنمشي .... انا مش فاهمه حاجة
بصيت علي طارق بره ... مش شايفاه ... بس عربيته موجوده .... ولسه هرن عليه افتكرت ان اصلا موبايلي معاه وهو موبايله فاصل شحن كمان
اخيرا قررت اخرج .... وكنت ناوياله علي نية سودة ازاي يسيبني ده كله يعني ... ده زوق برده .... لا لازم يعرف من اولها !!!!......جوزك علي ما تأخديه ...خرجت بره باب الكافيه .... لاقيت البنت بتجري ورايا .... يا فندم يا فندم .... الشيك من فضلك ..... المهم طبعا اضطريت ادفع لان الشكل مش كويس وقررت اننا منرجعش للكافيه تاني بعد الموقف السخيف ده
خرجت بره ادور علي طارق مش لاقياه
قلت اسال السايس .... هوالاستاذ صاحب العربية دي فين
السايس : حضرتك تلاقيه ف مكتبه جوه
انا : مكتبه مكتبه ايه ياسيدي صاحب العربية اللانسر الزرقا دي
السايس وهو بيخرج الصفارة من بقه وهو بيشاور لعربية تركن : ايوه يا انسه الاستاذ رامي مدير المطعم جوه

انا : بالله عليك ياعم رك معايا انا بسأل علي الاستاذ طارق اللي كان داخل معايا الكافيه ....اللي قالك خلي بالك
السايس : طارق مين يا ست ....
انا : ياسيدي اللي قالك خلي بالك
السايس : يا انسه في ايه اللي قالي خلي بالك ده الواد ابراهيم الطيار بتاع اتيلفري (الديلفري) بتاع مطعم الساقية اللي ف اخر عباس .... وكان موصيني اول ماشوف امين الشرطة اندهه عشان رخصة الماكنه بتاعته مسحوبه
يالهوتىىىىىىىىىىىىىىىىىىىىى


سرق ال ان 73 يا امه

89 التعليقات:

كوكي يقول...

محدش بيتعلم ببلاش
الحمد لله انها جت علي قد الموبايل
أهو درس ومش هتنسيه أبدا

kochia يقول...

امممممممم
موقف بايخ اوي فعلا
بس علي العموم اي حد مكانك كان هيتعمل فيه نفس الموقف
مش هقوللك ابقي خلي بالك المرة الجاية
لكن اي حاجة ممكن تحصل في الدنيا دي
والانسان الكويس ده العملة الاقل وجودا في الحياة

تحياتي

أختكم في الله دينا يقول...

هيييييه
أول تعليق
:)
ههههههههههههه
طيب ممكن أعرف انتي بتصوتي ليه دلوقتي
ما الواد فعلا مش كداب وطيار بجد وطير منك الموبايل
هههههههههههههههههه
ربنا يعوض عليكي يا حبيبتي ويكرمك من فضله واحتسبي ويمكن ده يكون انذار من ربنا أن حتى لو حبينا نستعمل الخاطبة الالكترونية اللي هي مواقع الزواج تكون برده بالطريقة التقليدية اللي بيكون فيها كله في السليم من أول الضمير لغاية الموبايل :)

بالنسبة للاخ سامر مش هيكون ليه دور قريب معانا هنا ولا ايه النظام؟

أختكم في الله دينا يقول...

ايه ده
مش ممكن
هو سباق
المدة اللي خلصت فيها التعليق يتنشر 2 قبلي ده تسيب :)

المـــفـــــــقــــــــوعـــــة مــرارتـهــا يقول...

تعيشي وماتاخديش غيرها

ســمـــر احمد يقول...

اه والله يا سوسا على راى المفقوعة مرارتها تعيشى وما تاخديش غيرها ..يارب
بس جالى احباط بجد .. هو ده اللى كنتى قاعدة سرحانة فى صوته ...

لالا بجد جالى احباط

بطوط حبوب يقول...

ههههههههههههههههههههههه
هههههههههههههههه
ههههههههههه
ههههههه
ههه
ه
انا هفطس من الضحك

خيرها فى غيرها

مدحت محمد يقول...

على فكرة انا اعرف بنت على النت حكتلى نفس الموقف بس مقالتش موضوع الونش دهههههههههه

واتسرق منها موبايلها بنفس الطريقة
ياللا

محدش بيتعلم ببلاش

مدحت محمد يقول...

اه صح نسيت اقلك

والنبى ابقى سلميلى على الاستاذ / طارق كتييير

maiosha يقول...

ههههههههههههههههههههه
كده يا سوسة يحصل فيكى كده إنتى العاقلة الرصينة
ههههههههههههههه

يالا خيرها فى غيرها

اسلام الحضرى يقول...

هى دى بجد قصه حقيقه لان صديقه برده حصل معاها قصه تقريبا مشابهه

عارفين ايه احساس واحده و هي ماشية في الشارع و تحس ان حد معجب
بيها..مش معاكسه يعني و كده ..لأ بيبقى فيه كده مواقف غريبة ..و على فكرة فيه
جوازات كتير بتبدأ كده ...واحد يشوف واحده في الشارع..يمشي وراها ..يعرف ساكنة
فين و يسأل عليها و يخطبها ..ابن عمي عمل كده مع واحدة بس لسعته حتت قلم على وشه ..علم
على صداغه 3 أيام ..هو اتكيف قوي و قال "البت دي واضح انها مؤدبة و متربية "
وراح خطبها ..آه والله..هي صحيح بعد كده اتضح ان ايديها بتطول في كل
المواقف مش في الموقف ده بس ..بس و الله الراجل مبسوط و بيحلف باليوم اللي
شافها فيه..و بيلعن ...!! ولا بلاش
المهم أنا يوم نازله من البيت رايحه الشغل..حسيت ان فيه عين هتخرم قفايا ..بصيت
ورايا بسرعه كده في الخباثة لقيتلكم راجل انما ايه ..طول بعرض بارتفاع.ماسك في
ايده شنطة سودا ولابس بدله و كرافته و نضارة شمس....عامل كده زي العيال اللي
بيطلعوا في الإعلانات..المهم الواد كان حليوة و انا قلبي هفهفله أول
ما لمحته ..استنيت شوية ع المحطه و بعدين جه الميكروباص..ركبت راح راكب
ورايا..قلت الشياكه دي كلها هتركب مكروباص ليه يعني؟؟..أكيد في الأمر إن ..و
جِه كمان قعد جنبي ....يا حلولي يا حلولي..بس كنت خايفه ليعاكس و ساعتها أنا
ماعرفش أبويا ...باللي ف رجلي و لايهمني لا شباب إعلانات ولاحتى جمال مبارك
ولا حاجه أبدا..بس لاقيته في نص المسافه كده ..بيميل عليا و بيقول باسلوب رزين
كده :

- ...لو سمحتي ممكن أسأل حضرتك على حاجه ..

* وانتوا ماتعرفونيش... باتسطل لما حد يقولي حضرتك ..بس برضه مش سهله يعني..

صدرت الوش الخشب و قلتله ..خير بمناسبة ايه ؟...

- يعني كنت عايز أسأل بس ..هو حضرتك مرتبطه ..واضح انك مش مخطوبة ولا
متجوزة ما فيش دبلة في ايديكي ..بس الإرتباط بأه لازم أتأكد منه من حضرتك..

* (حضرتك تاني يا حلولي).. قلتله والله الكلام ده ما يتقالش في مواصلات و بعدين انا
ماعرفكش و مش متعوده أكلم حد ماعرفوش ..

- طب يعني أنا لو معجب بحضرتك و عندي نيه أتقدم رسمي ..أعمل ايه ..
أصلي بصراحه متابعك من مده بس دي أول مرة أتشجع و أحاول أكلمك ..
* ياحلاوة ياحلاوة متابعني من زمان ...ده واقع بأه..بس برضه على
مين ..لازم أثبت .. قلتله و الله لو حضرتك متابعني زي مابتقول تبقى عارف بيتي و عارف
بابايا ..هو الوحيد اللي ينفع يتكلم في المواضيع دي ..لو سمحت ماتحرجنيش اكتر
من كده ..جامده جامده يعني ...

- الحقيقة انت كده أثبتيلي اني أحسنت الإختيار....

* ياسلام ياسلام..الله الله ..هو ده الكلام ...لحد كده الأمور كلها صح و مية مية ..

صديته آه بس كمان قلتله كلم بابا..سيبتله سكه مفتوحه يعني .
الواد بأه التباع راح شاخط فيا في اللحظه دي ..الأجرة يا أبله والا هتركبوا
ببلاش...يابن اللذينا ..دانا عماله أترسم من ساعتها تبعتر كرامتي كده ؟...جيت
أمد ايدي جوه الشنطه لقيتلكوا الأخ بأه راح بسرعه مطلع فلوس و محاسبلي ..لأ
مايصحش ..لأ بأه اسمحيلي ..أنا لا يمكن أقبل واحده هاتقدملها تدفع و انا موجود
...وجون وجون وجون ..هيتقدملي خلاص أيوة كده هو انا صحيح ماعرفش هو بيشتغل ايه
و الا عايش فين والا بيقلد فنانين والا ايه نظامه بس الجواب بيبان من عنوانه.



وانا نازلة من المكروباص لقيته نزل معايا في نفس المحطه و بصلي و قاللي:

- أنا حبيت أنقذك يعني في المكروباص ..واضح قوي انك ماعاكيش فلوس...

* الدم ضرب في نافوخي.. انت هتتمنظر عليا والا ايه ؟..

- واضح ان شنطتك فاضية آخر الشهر بأه يالا وفرتلك أجرة المكروباص تنفعك..

* بصتله بذهول كده و قلت له ..مين اللي قالك الكلام الفارغ ده ..

انا عمري مامشي بشنطتي فيها أقل من 300 جنيه..

- قالي باستهزاء كده ..لااااا ماصدقش..

* الدم كان خلاص قرب يطلع من نافوخي زي النافورة..رحت مطلعه كل
اللي في المحفظه مورياهولوا ..أهه حتى شوف 50-100-200-220
لقيته مد ايده اخد الفلوس..وبصلها كده وعدها وقاللي آه صحيح انتي معاكي فلوس
أهه

و في لحظه راح مطبقهم و حاطتهم في جيبه ..و قاللي انا هاخليهم معايا بأه
سلف لحد لما آجيلكم البيت ..

ما ستوعبتش و قبل ما آخد فرصة أقول كلمه واحده

كان راكب ورا واحد على موتوسيكل شكله كده كان ماشي ورا المكروباص و هوا ..فص ملح و داب

كراكيب يقول...

نياااهاااهاااا
ادي جزاء اللي يعمل حاجة من ورا ماما
ونتعلم ايه يا ولاد من الدرس دااه؟؟
اننا قبل ما نعدي الشارع نبص يمين وشمال
هاهاهاهاااااع

الطائر الحزين يقول...

مش امين الونش
ده حنفى الونش هيبقى ستار ويخلى العالم تحتار

(حرص ولا تخون )

المهم ماما عاملة ايه دلوقتى

المهم نعتبر

blue-wave يقول...

انتى بتهرجى ولا بتتكلمى بجد؟
يا نهار ابيض معقوله دى تحصل؟
بس انتى عارفه اسمه وبيشتغل فين ماروحتيش ليه ومعاكى حد يربيه ويجيبلك موبايلك؟

ReEm يقول...

انا اول ما شوفت تعليقك عندي جريت افتح مدونتك ادور على البوست الجديد

بس انتي بتتكلمي بجد

مش معقولة سوسة العاقلة تعمل كدة ومن ورا ماما كمان
ياستس تنذكر وما تنعاد
اه و نصيحة اخت صغيرة بلاش تعرضي خدمات لحد عنه ما اتكلم مشكلته انتي كمان ماعندكيش شحن
بوست يفطس ضحك

mohamed يقول...

ياختي كميله ياختي انتي خدتي من اللي تحت الحوض؟؟؟؟؟؟؟؟؟؟؟؟؟؟:D

Unknown يقول...

كان لازم تسمعى كلام العفريت الاولانى خالص و كان لازم تعرفى ان دى هتبقا اخرتها...



تحياتى...و الغى الاكونت بتاعك من على موقع الجواز نصيحه

سوسا ومودى يقول...

ههههههههههه
بجد مش عارفه أقولك أيه؟؟؟
هوة النصب وصل للدرجادى
يا لهوى
ده مخطط وتكتك
لا وأيه أنسان صااادق
طياااااااااااااااااار
طيااااااااار دليفرى

أيه المصيبه ديه
وقدر يخدعك يا سوسا
مش مصدقه أن ممكن الواحد يتخدع فى حد كده
مش مستوعبه
بس ولا يهمك يا سوسا
فداكى ال أن 70
وال أن 72 و73
المهم أنك دوقتى الملك تشاد أستروبرى
وده بالدنيا يا بنتى
ههههههههههه

رئـــــيسـة حزب الأحلام يقول...

انا اتصدمت يااختى
يعنى لا جواز صالونات نافع ولاجواز عن طريق المخروب دة نافع نعمل ايه بقى الواحد هيطق من جنابه يااااااااااااااااااااارب افرج عن بنات المسلمين ياااااااااااااارب افرج عن بنات المسلمين
اغثنا يارب
تحياتى لكى

mohra يقول...

رغم ان دمك شربات الا انى حزينه و زعلانه من الدنيا لانها بتعامل الطيبين كده

سبهللة يقول...

ربنا يعوض عليكى

فاتيما يقول...

طب و حياة يوسف اول ما قولتى خد الموبايل إتكلم و خدها عرفت إنها نصباية ....
الموقف دا من وحى الخيال و لا بجد ؟؟
لو بجد قوليلى أدعيلك عليه من قلب أم
حسبى الله و نعم الوكيل فيه
بس برضو إنتى مكنتيش تعرفيه و مش جايلك من طرف حد موثوق فيه و دا المطلوب فى الحالات دى
الحمدلله إنها جت على أد الموبايل
ربنا يعوضك
البوست دا حلو قوى قوى

Unknown يقول...

الاول بجد بجد
دا حصل ولا قصة من تأليفك
ياخبر ابيض دا ندل بجد مش عارفة اوقل اية بصراحة بس انا بضحك عارفة ليه على خيبتناا اصلنا فعلا خيبين اوى يا سوسو وطيبين جداا
فى عالم كله نفاق وحقد وكدب
ياريتنى اعرف احكي لك على اللى بسمعة وبشوفة من قصص
كنت لطمتى معى هههههههه

دايما متميزة بجد بالتوفيق يا رب
وابقى خلينى نشوفك

Unknown يقول...

ههههههههههههههههه

البلوج جامده جدا


قريت منها كتير بس قلت اقولك بجد تحفة


الي الامام يا سوووووسه :]

ياسميـن

نوته و قلم

شهرزاد يقول...

الحمد لله انها جت علي قد الموبايل
تعيشي وتاكلي غيرها

تحياتي

غير معرف يقول...

ههههههههههههههههههههه
ومارحتيش ليه مطعم الساقيه تدوري علي وعلي موبيلك علشان تجبيه لانك محظوظه انك عرفتى مكان شغله وخدى واحد عضلات من اصدقاء مدونتك دى وروحى اكبسي عليه او اطلبي طلب دليفري يجى يوصله تمسكى بتلابيه وتدوخىه وتاخدى موبيلك ..زالمفروض كنتى عملتى كده ده راي واتمنى لك التوفيق في معرفتك القادمه واعتبريها تجربه والانسان خبرته في تجاربه .......

onyx

ٍSOU يقول...

لية يا سوسا ماخدتيش راينا قبل ماتعملى حاجة دى ..هو احنا اهل المدونات مش اهلك بردوا؟؟
ربنا يحفظك يابنتى من شياطين الانس و الجن دول .. و بجد ربنا يوفقك .. انتى تستاهلى كل خير

rovy يقول...

كان لازم تكونى حذره اكثر من كده على كل حال ما يقع الا الشاطر بس لازم تتعلمى الدرس كويس ..
ربنا يعوضك خير يااارب و ان شاء الله قريب نبارك لك على العريس المضبوط و اللى يسعدك بجد ..
تقديرى و تحياتى

rovy

غير معرف يقول...

سوسة
كل ده يحصل معاكى
2 بوست حتة واحدة ويطلع فى الاخر
طارق دليفرى
واحد وانت بتسمعى له نجاة وفيروز
والتانى بتقابليه فى عباس العقاد
كل ده ووالدتك فى العمرة
انا لو منك كنت طلعت العمرة
على الاقل لماهى تدعى لكى انت تامنى
وبرضه هناك كوستا بس بدون نصبة
منذر

mado80 يقول...

ههههههههههه
إنتي بتتكلمي جد ولا بتهزري يعني الموقف ده حصل فعلا ولا مجرد خيال كاتب

طب خللي بالك بقي بعد كده

صحيح .. بما إنك رئيسه جمعيه لا للعنوسه فتسمحيلي أنضم للجمعيه عضو عامل
مش عارف بتقبلوا رجاله ولا لأ أصل يعني الواحد فاضله تكه علي التلاتين فلازم يأمن نفسه من دلوقتي
:):):)

نسيت أقلك اسلوبك الساخر جميل جدآ ومدونتك هايله أوي

تحياتي وتقديري لشخصك الكريم

Ahmad Abdulatif يقول...

تدوينة جامدة طحن يا سوسا!
فعلا استمتعت بيها .
وكلامك يأكد إن مش كل كلام العفاريت شر!!!!!
نورتي مدونتي النهاردة .
وكل تحياتي لاسلوب سردك الجذاب

maya يقول...

اختي سوسا الله يكون معك ويرجعلك موبايلك ههههه
اول مرة بعلق هنا بصراحه مدونه حلوة كتير وواقعيه هاد اجمل شي فيها
انت صاحبة قلم متميز ارجو ان يديم الله عليك هذه النعمه
اتشرف بزيارتك لمدونتي المتواضعه

إيمان يقول...

يادى النت وبلاويه
فى الاول كان وسيلة للتسلية والنصب على مشاعر البنات
وأخر التطورات النصب على الموبايلات كمان
مبنعرفش نستغل اى شىء صح ابدااااااا
ودايما الذكاء والعبقرية فى الشر
بدل ما نحل مشاكلنا بنزودها أزماااااااااات

تحياتى لقلمك الجميل

غير معرف يقول...

ااااااااااااااه
هههههههههههههههههههه
يا خرابى
لا بجد
معقوله
بس حركه بنت لذينه اوى
انا لو منك اخدلى تلاته اربعه حجم عائلى واروح اعمله كفته
واخد موبيلى وموبايله كمان
من حباب عنيه
امااااااااااال
بس اهو درس
غالى شويه بس

:)))))))))))

نـــــور يقول...

ياخبر
مستحيل انا مش مصدقه ان ده ممكن يحصل
ويام شكله مكنش باين عليه فرق طيار من بتاع ديليفرى؟؟
بس قدر اله وما شاء فعل
واهو الراجل قالك على مكان شغله يعنى تقدرى تاخدى حقك منه
دمت فى رعاية الله

أمل فتحى عزت يقول...

السلام عليكم
بكل الحب والاحترام
ادعوك لمتابعة الحلقة الرابعة من حكاية عمى رمزى وعم عمارة فى الحارة
تعالوا نسمع ونشوف العفاريت بتقول ايه عن الحارة

مع خالص تحياتى

مجرد خواطر يقول...

انا مش عرفة انتى بتتكلمى جد ولا بتهزرى.انا بيتهيألى كنتى بتتكلمى جد وبعد كدة قلبتى على هزار ولا فى ايه يا بنتى دا انا سرحت معاكى سرحة كبيرة اوى وكنت هاجى ابارك لك واعاتبك كنت هقولك عفاريتك كلها صح انتى غلطانه بس الحمد لله ربنا سترها معاكى لقيتك صدمتينى يا سوسة حرام عليكى دليفرى وكان مثقف؟!

قولى الحق بأة دة جد ولا هزار؟

غير معرف يقول...

يختيييييييييييييييييييييييييييي

يادي النيلة عايزة اضحك واصوت في نفس الوقت
بجد مش عارفة اقول ايه ولو ان من ساعة ما اخد الموبايل بتاعك يتكلم منه وانا حسيت بحاجة غلط هتحصل

كده برضه يا سوسة اعمل فيكي ايه بأه دلوقتي

عموما يا حبيبتي الحمد لله انها جت على أد الموبايل ماحدش عارف كان ممكن يحط حاجة في الميلك تشيك ولا حاجة وياخد اللي معاكي كله

تعيشي حبيبتي وما تاخديش غيرها

مها ميهوووو

shirry يقول...

ياربنا
لاءلاء بجد الموقف صعب جدا
بس والله اي واحدة مكانك كانت اتصرفت كدة
بحسن نية طبعا

بس
انا بجد مش عارفة اقولك ايه
ربنا يعوض عليكي

الفارس الملثم يقول...

انا حسيت اول ما جت سيرة الموبيل ان الموضوع مش مريح وشكله نصاب

بس الحكمه هنا , اي حد يطلب موبيلك يبقي نصاب علي طول ههههههههههه

بهزر طبعا , بس بعض المواقف الواحد بيضحك علي نفسه وعلي سذاجته بدال ما يعيط ,

تحياتي

الـجـدة فـصـيـحـة يقول...

السلام عليكم ورحمة الله وبركاته

توقعت من أول ما طلب موبايلك أنه في حاجة غلط وأنه مش الشخص اللي بيحاول يوهمك انه هو
وبصراحة الغلط مش عليه لوحده في موقف زي ده يعني طالما التعرف من خلال الموقع بتاع الزواج ده حصل توافق من اي نوع يبقى مينفعش يحصل ووتقابلوا برا
يفضل في بيتكوم ووسط أهلك ولو حصل القبول كان بها ولو محصلش خلاص مع السلامة لكن توكني وسط أهلك معززة مكرمة
وميحصلش انك تتعرضي لموقف زي ده أو أسوء

وأنتِ طرحتى الموضوع بشكل جميل خاصة مشاعر البنت وهي في الطريق


دمتِ في رعاية الله

عاشقة القمر يقول...

المشكلة ان النصب دلوقتي بقى بالمشاعر وعلى المشاعر .. معلش يا سوسا هو صحيح ان 73 بس ربنا يعوضك خير ان شاء الله .. ما تضايقيش نفسك وماتكرريهاش تاني اهو الواحد بيتعلم من الاقلام - ماعرفش ان كانت كده صح ولا لا بس اقد بيها اللي بتتاخد على الوش دي - اللي بياخدها بس سعات بتبقى بتوجع ..

شهد الكلمات يقول...

هههههههههههههههههههههههههههههه
و الله من ساعة ما طلب منك الموبايل و انا حاسة ان ده اللي هايحصل
معلش فداكي الحمد لله ان جات لحد كدة
بس طالما انك عرفتي مكان شغله كنتي اختي امين الشرطة اسم الله و رحتي هناك و اخدتي موبايلك

تحياتي و ربنا يعوض عليكي

همس الاحباب يقول...

هههههههههههه
بجد مش عارف اقول ايه
انا تخيلت موقف كوميدى من الذاكرة
او اضغاث احلام
طلع الحقيقة وان73 تسرق يا سوسه
يا لهوتى عليكى
ما كانش العشم انه يطلع طارق دليفرى
يل فداكى خد الشر وراح
تحياتى

حنين القلب يقول...

السلام عليكم
والله ما عارفه اقولك ايه؟؟
بس مش تزعلى منى انتى اللى غلطانه
اولا ازاى تقابلى واحد مش تعرفيه
ثانيا ازاى تديله الموبايل بتاعك
يا حبيبتى لازم تخلى بالك الدنيا مش كلها ملايكه فيها شياطين برضه
وبعدين انتى لوزعلانه على الاحاسيس الحلوة اللى حسيتها معاه فى اقل من ساعه ربنا هيعوضك احسن بمنها بسنين مع حد محترم يحبك بجد ويحافظ عليكى
ولو زعلانه على الموبايل السايس عارفه وعارف اسمه ومكان شغله كمان بلغى عنه وخدى منه الموبايل وكمان فلوس الشيك اللى انتى دفعتيه
بالله عليكى ما تزعلى والله ما فيه حاجه تستاهل زعلك
سلام يا حبيبتى

حنين القلب يقول...

ملحوظه صغننه
انا مش بفضل الحب ولا الزواج عبر النت مع احترامى الشديد لكل اللى بيتجوزه من عليه بس انا مش بقتنع الا باللى بشوفه واعرفه بنفسى واحكم عليه ادام عنيه مش عبر النت
سلاموزة يا موزة

حبيبـــــــة القمـــــر يقول...

لا حول ولا قوة الا بالله
معلش يا سوسه ياحبيبتي ربنا يعوض عليكي بإن احسن من ال إن اللي راحت
وحيث انك شطوره فأكيد اكيد اتعلمتي
الدنيا مفهاش امااااااااان نوهااائي

شفـقــة و إحســــان يقول...

والله على اد ما الموقف منيل بس موتينى من الضحك.....معقول تعملى كده شكلك ما قريتيش البوست بتاعى " جواز دوت كوم"
وعلى العموم الواحد ما بيتعلمش ببلاش

مجنونة وبكيفي يقول...

هههههههههههههههههههههههههه

مش قادرة بجد هموت علي نفس من الضوحك
اول بوست اقراه ليكي يطلع المقلب دا
معلش يا حبيبتي فداكي ميت موبايل
بس خدي بالك بعد كدا متثقيش في اي حد متعرفهوش وحوارات النت دي كلها فاشلة وناس بتتسلي والله اول مرة اشوف شيطان عاقل اللي نصحك متروحيش ههههههههههههه
مدونتك تحفة جدا

Desert cat يقول...

اصدقائى الأعزاء المدونين والمدونات
تمت اليوم إذاعة آخر الإجابات التى وردت على سؤال تبريد البروسيسور فى برنامجنا الإذاعى
أنت تسأل والكمبيوتر يجيب
والذى يذاع يومياً الساعه 9.10 صباحاً ما عدا يوم الجمعه
وتضمنت الحلقة إجابات
إنجى البوهى
عبده الرايق
Miss Saso
يمكنكم الآن سماع الحلقة من الـ box
على يمين المدونة
http://netonradio.blogspot.com/
او من خلال الموقع
http://dear.to/cairo

تمنياتنا بدوام التواصل

المـــفـــــــقــــــــوعـــــة مــرارتـهــا يقول...

أذيك ياأحلي سوسة في الدنيا
أخبارك أيه من غير الموبايل ؟

ماتزعليش من الموقف إللي أتحطيتي فيه
أنا عارفة أنه مش ذنبك إنك ماتعرفيش شروط نشر البوستات في المدونة
ومن حقك علينا كلنا الأعتذار
وأنا جيت أهوه لحد بيتك وبأعتذرلك وباأبوس راسك
خلاص سماح وماتخافيش أحنا عرضنا كل اللي انتي كتبتيه ولغتيه عندنا في المدونة للمسؤلين عن المدونة

المـــفـــــــقــــــــوعـــــة مــرارتـهــا يقول...

أذيك ياأحلي سوسة في الدنيا
أخبارك أيه من غير الموبايل ؟

ماتزعليش من الموقف إللي أتحطيتي فيه
أنا عارفة أنه مش ذنبك إنك ماتعرفيش شروط نشر البوستات في المدونة
ومن حقك علينا كلنا الأعتذار
وأنا جيت أهوه لحد بيتك وبأعتذرلك وباأبوس راسك
خلاص سماح وماتخافيش أحنا عرضنا كل اللي انتي كتبتيه ولغتيه عندنا في المدونة للمسؤلين عن المدونة

زفته وقطران يقول...

مش عارفه ايه قصه الن 73 والسرقه
بس متزعليش

Empress appy يقول...

حبيبتى انا كمان اسفه لاني انا اللى بعت البوست بتاعك ومكنتش اعرف انك انتي علشان كنت بحبك جدا ولسه كنت فى سيرتك وزعلت انك اختفيتى مره تانيه
فكان عيره على الهمل مش اكتر وكان بخسن نيه لانك عارفه اني كنت متابعاك على طول سوري بجد
بس مش كنتي تقولى يا قمر ارجوكي اتقبلي اعتذاري وكمان كنتي رديتى عليا لانى ملحقتش اشوف تعليقك

عبده الرايق يقول...

الاخت الكريمه
مس سوسه
انا اسف جدا جدا
وطبعا الاسف مش هفيد
لكن انا اعتذرت ليكى اعتذار رسمى فى المدونه
وباقدم الاعتذار هنا كمان
للاسف وقعنا كلنا فى الخطأ

فرنسا هانم يقول...

اختى العزيزه ميس سوسه
طبعا دلوقتى انتى بتقولى انتم خليتو فيها اخت ولا غيره
عموما معلشى
انا اسفه
انا قدمت ليكى اعتذارى فى مدونه الضاحكون
لكن
فى حاجه لو فكرتى فيها هتعرفى انا عملت كده ليه
انتى طبعا بعد ما اتأكدنا كائن مائى
طيب
ايه علاقه سوسه بكائن مائى ؟؟؟
مفيش اى علاقه
احنا كنا بنظن كده
لاننا كما قلت لكى كلنا باسماء مستعاره
فما فعلته فعلته بنيه حفظ حق كائن مائى
واظن انكى لو مكانى ممكن كنتى تتصرفى برضه كده
ارجوا قبول اعتذارى
وادعوكى الى تشريفنا فى المدونه
طبعا ملناش عين نطلب اى بوست ليكى
احسن تقولى علينا بجحه
ولكن ياريت يكون صافى يالبن
وتشرفينا كأخت ومعلقه
وان ارسلتى بوست
سنكون فى غايه السعاده
حتى نشعر انكى خلاص مش زعلانه
فكرى براحتك
وانا منتظره

Miss. Sosa يقول...

مفقوعة مرارتها

ربنا يكرمك يارب

وانا خلاص مش زعلانه .. سوء تفاهم وعدى على خير

وماتقلقيش على موبايلاتي انا معايا اتنين مش واحد

Miss. Sosa يقول...

آآبي

ماانكرش اني زعلانة منك

وتعليقك انا رديت عليه بس هم اللي مسحوا البوست بتعليقاته ملحقتيش تقريه

وعاتبه عليكي انك قريتي البوست في الدرافت فكنتي تستفسري مني بايميل وهو فى الدرافت قبل ما يتنشر حتى علشان شكلكم مايبقاش وحش ادام اللي بيقرولكم

عموما حصل خير وانا عارفة انك عملتي ديه بحسن نية وخوف علي كتاباتي فمااقدرش غير اني اسامحك وليكي مني كل الحب والتقدير

Miss. Sosa يقول...

عبده الرايق

منور المدونة لانها اول زيارة ليك عندنا واكرام الضيف واجب

مفيش داعي للايف .. حصل خير

بس رجاء الله يكرمك تحطوا شروط لنشر البوستات شمال التدوينات
3 سطور كدا ووراهم الايميل اللي الناس تبتعتلكم عليه علشان مايحصلش اي لبس تاني

Miss. Sosa يقول...

الاخت الكريمة فرنسا هانم

خطوة عزيزة

انتم شيلتوني ذنوب كتير باعتذاراتكم ديه .. حصل خير

بس بصراحة انا لو مكانك ماكنتش هعمل كدا .. كنت هروح اسأل سوسة علاقتك ايه بكائن مائي بس كنت هستر عليهم ومش هذيع علاقتهم في السي ان ان

التروي ثم التروي ثم التروي

اينعم احنا فى عالم افتراضي لكن فى كائنات حية عندها مشاعر بتتجرح وتتألم بسبب تصرفات متسرعه

يلا الحمد لله على كل حال

بس بصراحة انا حرمت وهعتصم بجدران مدونتي وحرمت حرمت حرمت اخرج براها

من خرج من داره يستاهل اللي يجراله


انا عندي حساسية مفرطة بتعالج منها من وانا عندي 5 سنين مفيش فايدة ههههههه

ده انا لما بركب مترو الانفاق برجع البيت اعيط هههههه

بس خلاص صافي يا لبن بجد

واشكرلي اخوية الكبير الطائر الحزين ومفروسة جامد جدااااا

وانا خلاص اعلنت الاجازة فى المدونة علشان ورايا سيفينار

دعووووووووواتكم

Empress appy يقول...

حبيبتى والله ما قريته فى الدرافت انا الفترة اللى فاتت كنت مسافرة فمكنتش متابعه كتير لما دخلت شوفته
وبعدين خلى قلبك ابيض بقى ايه الرخامه دى خلاص بقى وفعلا سورى لانى مقرتش الدرافت يا قمر

Unknown يقول...
أزال المؤلف هذا التعليق.
إيثار يقول...

موقف محرج جدا
فعلا زعلتيني على ال ان 73
يا رب محدش يتعرض لمواقف زي دي

تحياتي

أسامة الشاذلي يقول...

ههههههههههههههه
حلوة قوى بجد

إنتظارات شاهقة يقول...

سوسة
جميــــــــــــــــــــــــل البوست

يعنى اغيب ارجع الاقيكى عاملة كدة فى نفسك
يا مفتريةn73
عامة حصل خير
المهم كلن فية رصيد ولا كنتى لقد نفذ رصيدكم
تحياتى

tarek alghnam يقول...

النصب بسم الجواز اصبح بالهبل
الضمير اصبح غائب
والرجال لم يتورعوا عن التربح من وراء النساء
كنا نرى ذلك عيبا
لا اعرف ماذا حدث للشباب
فالبعض يبحث عن الزواج من غنيه بصرف النظر عن اى شئ اخر
مدونتك رائعة
واسلوبك شيق احسدك عليه
تقبلى تحياتى
ودمتى بود

شفـقــة و إحســــان يقول...

انتى وحشة ليه.....بتوحشينا جدا ليه مش بتيجى تسالى علينا؟؟
البوست اكتر من رائع
احسان اللوذعى

مواطن مصرى نايم يقول...

طب عرفتى تجيبى التليفون و الا لا
لو مش عارفة اديكى السكه اللى تمشى فيها
دا موقف بايخ جدااااا
بس انتى غلطانة
مينفعش تثقى فى حد لمجرد انه فى كلام انه حيتقدم لك
انا لو واحده مثلا عملت معايا الموقف ده
فى نفس اليوم والله
ما انام الا لما اجيبها من قفاها
خلى بالك بعد كده
تحياتى
اخوكى
eslam

ربع ضارب يقول...

ازيك يا قمراية الصراحة الراجل ده طلع كداب كدب الابل صحيح يعنى يسجل فى موقع جواز ويتكلف مكالمات علشان فى الاخر يسرق موبايلك
عموما تعيشى وتاخدى غيرها وربنا يكرمك بالي صونك ويحفظك سواء بقى كان جواز تقليدى او عن طريق مواقع الزواج
وعلى فكرة هى مش عيب العيب فى الناس عديمة الضمير زى صاحبنا ده وبعدين احنا مجتمع لحد ما مقفول وفرص التعارف بين البنت والولد محدودة نوعا مايبقى ايه اللى يمنع بدام النية الطيبة موجودة
تحياتى

الجواز و سنينه يقول...

يا هوهوىىىىىىىىايه اللى بيحصل فى الدنيا ده
بس ايه طلع بتاع دلفرى سعنى كسيب
و كمان بيعرف الملك شك و بالفراوله كمان
فعلا الواد طيار

Dr. Ibrahim يقول...

ههههههههههههههههههههه

بالهنا والشفا

--------------------

لا بس المفروض أولاد الأصول

ان الواحد يروح يكلم أهلها ومش يكلمها قبل الجواز

ولا أى حب ولا كلام هجص من ده

---------------

بس عل فكره انتى معاكى معلوماته وبياناته وكل حجاة عنه أهو

روحى عشان تاخدى الإن 73

د/هيما

Ahmad Abdulatif يقول...

سوسا
سايبلك أمانة في مدونتي
ابقي عدي شوفيها

مواطن مصرى نايم يقول...

ميس سوسة خدى دى
ــــــــــــــــــ
يدعى أنه صحفى للنصب على المواهب الشابة
كتب – كمال سلطان

فكر هذا الشاب فى أفضل طريقة لاستغلال التكنولوجيا الحديثة لكسب المال , وتفتق ذهنه عن فكرة النصب على السباب الموهوبين والذين يضعون معلومات عن انفسهم على بعض المواقع الالكترونية مثل موقع "الفيس بوك" وموقع "ايجى فيلم" وغيرهما 0
وكان يقوم بالاتصال بهم والادعاء بأنه صحفى فى جريدة "عين" وعلى علاقة قوية بالمنتجين والمخرجين وشركات الانتاج وبعد مقابلتهم يغافلهم ويقوم بسرقة موبايلاتهم 0

المطرب والملحن أحمد محرم أحد ضحايا النصاب يتحدث ل "تفانين" عن تجربته فيقول : لدى جروب على "الفيس بوك" وبه رقم موبايلى وفوجئت يوما بإتصال من احد الاشخاص ادعى انه صحفى من جريدة "عين" وأن اسمه "يوسف" فقلت له اننى مشغولل وسأعاود الإتصال به فيما بعد ثم اتصلت بأصدقاء لى فى الوسط الصحفى وتأكدت منهم من وجود صحفى اسمه يوسف فى جريدة عين , فاتصلت به وحددت معه موعد للقاء وكان بأحد الكافيهات الفاخرة بالمهندسين وقد حضر متأخرا عن موعده واعتذر بأنه لم يكن يجد مكانا لركن سيارته وان هذا هو سبب تأخره ثو أخرج جهاز التسجيل وظل يتحدث معى لمدة ساعتين وأثناء إجراءه لمكلمة تليفونية ادعى ان تليفونه "فصل شحن" وظل يبحث عن شاحن ولم يجد فطلب منى تليفونى ليضع فيه شريحته , وأوهمنى أنه يتحدث إلى أحد الشعراء ثم تحرك إلى الباب لكى يقابله وفجأة فوجئت به يجرى فى الشارع ولم استطع اللحاق به , وقد قام بعمل نفس الموقف بنفس التفاصيل مع شخص آخر فى اليوم التالى مباشرة وهذا ماعلمته عندما كتبت عنه فى موقعى على الفيس بوك لأحذر الناس منه , وقد حصلت على صورته من الفيس بوك وتحريت عنه وعلمت أنه طالب فى كلية الهندسة جامعة القاهرة واسمه محمد شكرى عبد النبى وقد قمت بتحرير محضر ضده بقسم الدقى برقم 4126 0
وهذا الشخص قام بالنصب على شباب كثيرين وفى اكثر من محافظة وتم تحرير اكثر من محضر ضده ولكن لم يتم القبض عليه حتى الآن رغم نشر الموضوع فى أكثر من صحيفة كان آخرها أخبار الحوادث 0

وقد قررت ان أحكى حكايتى حتى لايقع غيرى فيما وقعت فيه رغم اننى لست هاويا بل اننى اغنى وألحن منذ ثمانية أعوام كما اننى عضو بنقابة الموسيقيين فما البال بالشباب الجدد الذين يحلمون بفرصة واحدة لكى يظهروا مواهبهم

كيكى عوووووو يقول...

عووووووووووووووووو انا جيت اتخديتى
.................................
ههههههههههههههههههههههه
هههههههههههههههههههههههههههه
..................................
معلششششششششششششششششششششششششش
خيرها فى غيرها ههههههههههههههههه
عوووووووووووووووووووووووووو

دعوة للأمل يقول...

ربنا معاكى و ميحصلكيش كدة تانى وتحياتى و اسلوبك الجميل فى الكتاية اوى

المـــفـــــــقــــــــوعـــــة مــرارتـهــا يقول...

وحشتينا جدا
ارجعي بقي
انا مستنية بوستاتك الجديدة

hamssah يقول...

سوسه اللذيذه
موقف بايخ جدا جدا انا عارفه ان الموبايل مش حيهمك قد تحطم الاحلام الورديه اللي كنتي عايشه فيها
يلا خد الشر وراح
فداكي
همسه

ابو درويش يقول...

دى اول زياره ليه
لمدونه جميله ودمها زى الشربات
ارجو لك التوفيى
السلام عليكم
تحياتى
من ابودرويش

nonni يقول...

امممممممممم مش عارفة اقولك ايه و لا ايه بس طبعا انتى غلطتى من الاول او تقدرى تقولى انكبداتى الطريق اصلا غلط لانك طبعا المفروض متثقييش فى اى حد بمجرد ما تتكلمى معاه مرة و لا اتنين ا\ا كان اللى بنعرفهم و نتعامل معاهم مبنقدرش نثق فيهم بسرعة
تعرفى انا اعرف واحدة اتجوزت عن طريق النت و و جوازها نجح جداااااا بس اهى واحدة من بين ملايييييين

احيرا احب اقولك خيرها فى غيرها

بعت\ر على الاطالة
"تحياتى:

فارس بلا جواد يقول...

ههههههههههههههههههههه
حلوه قووووووى
تحياتى

أمل فتحى عزت يقول...

حملة لرد الاعتبار
........................
حيوا معى العين الساهرة للحفاظ على المقدسات وعودة الحق لأصحابه عندما أعاد الدكتور/أسامة السعداوى صياغة التاريخ المصرى القديم لقد نصر العالم الجليل تراث الاجداد وقدمه للآحفاد لينهلوا العلم من أوسع أبوابه تعالوا يا أبناء مصر

نطرق باب النابغةالدكتور /أسامة السعداوى لنعرف منه الحقيقة


قودوا معى حملة الشرف والكرامة فى رفع الظلم عن أجدادكم وانتم أصحاب كلمة فلتكن فى موضعها فلا استقامة للمستقبل الا بتصحيح مسار تاريخنا واحياء علومنا وحضارتنا


ادخلوا الموقع الخاص بالعالم من على صفحة مدونتى الرئيسية
ولكم منى جزيل الشكر

مدحت محمد يقول...

مفيش جديد

rovy يقول...

وحشتينااااااا
انتى فين .. و فين البوست الجدبد

تحياتى

rovy

Desert cat يقول...

اصدقائى الأعزاء المدونين والمدونات
غدا الأحد 6/7 يتم اذاعه الحلقة الثانية الخاصة بشحن بطارية المحمول
فى برنامجنا الإذاعى
أنت تسأل والكمبيوتر يجيب
والذى يذاع يومياً الساعه 9.10 صباحا على إذاعة البرنامج العام ما عدا يوم الجمعة
وسيتم اذاعه اجابات كل من
سومه
نورا
استراليا
اجى بوى
ميس سوسه

يمكنكم سماع الحلقة مباشرة فى نفس موعد إذاعتها الساعه 9.10 صباحا من خلال موقع البرنامج
http://dear.to/cairo

تمنياتنا بدوام التواصل

M.a.r.y.o.o.o.m يقول...

بصي هو موقف بايخ جدا بس انا هاموت علي روحي من الضحك تعيشي وتاخدي غيرها

تجربه المحب يقول...

قصتك دى اثرت فيا خالص
وبعدين انتى فعلا صعبتى عليا لان الصدمه كانت شديده عليا وعلى كل الى قرأوها
بس معلش برضه انتى غلطانه انك تامنى انك تتعاملى مع حد ماتعرفيهوش
بس عموما مين عارف يمكن لو كنت مكانك كنت انا كمان عملت كده برضه

Queen Diamond يقول...

معلش الغلط من الاول انك وافقتي تقابلي حد متعرفيهوش...

بس اهو درس ولازم تتعلمي منه

غير معرف يقول...

انا كان عندي سؤال مالوش دعوة بالموضوع
يعني ايةميك شيك ستروبري؟؟

мαησηα يقول...

ههههههههههههههههههههه

ههههههههههههههههههههههههههههههههه

يخرب عقلك يا سوسا بجد بجد انتى عثل وخفة دمك بجد لذيذة ههههههه

بس بجد ده حصل معاكى ؟ لان انا توت وانا بقرا تعليقاتك ومعرفتش بردو فعلا حصل ؟؟