• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الاثنين، 19 مايو 2008

اجاباتي النموذجية لتاجات البلوجرية

جاني تاااااااجين وبما اني جديدة علي عالم البلوجرية فهجاوب واحد واحد ورجاء الرأفة
ومش هحط صورة التاج لاني مش عارفة ايه العلاقة بين TAG والتاج ؟! واللي يعرف يقولي وله الاجر والثواب وهنيالك يا فاعل الخير.
------
التاج بعنوان : اذكر عشر حاجات عن نفسك
--------
1- مؤهلي : بكالوريوس ظراعة قسم فول نابت – ماجستير في تطرية الملوخية الناشفة .

2- المهنة : صبي مدرس (بلية)

3- هواياتي : تتبع النمل وفصل الاناث عن الذكور علشان مايتهوروش علشان بيتنا طاهر وهيفضل طول عمره طاهر

4- مجلتى المفضلة: مجلة البعكوكة للبنت اللكلوكة – ومطربي المفضل: بدرية العنتيل وانور السيد وماحدش يسألني مين دول انا شخصيا مااعرفهومش.

5- رياضاتي المفضلة : رمي البلية – والسباحة البانيوهية – والاسكيتينج المنزلي على فرشة البلاط

6- اغنيتي المفضلة الوِِلد هريدي عنده حمار – وفيلمى العاتشفي المفضل : أوعى تكلمنى ابو العيال جاي ورايا والفيلم الدرامي اللي خلصت عليه كلينكس ب اتنين جنيه ونصف بحالهم : وبكت الداموسة في الليل البهيم .

7- مشروبي المفضل : عصير البطيخ بالبذر وطبقى المفضل مكرونة هنجرسكوووو ديه اللي بالفراخ ومكرونة هنفضحكووو ديه اللي باللحمة.

8- اكتشفت مؤخرا اني Left Minded و Right Mindedفى آن واحد (يعني بفكر بفصين المخ وهم الاتنين مسيطرين بنفس القوة ) وهذا ما اثار ذهولى واذبهلالي عملت اختبار علي الفيس بؤ - الناس كلها بينور لها فص واحد انا نورلوي الفصين وهذه سابقة لم تحصل من قبل في تاريخ البشرية الحشرية.

9- بحب ماما وبابا وجدو اللي عمري ماشوفته وتيته الله يرحمها وام دندن بتاعت البليلة.

10- سوسة : وانا صغيرة كانوا بينادوني سوسة علشان كنت دؤرمة وذكائي فوق مستوي الركبة بس كنت بقاوح ومابحبش حد يناديني بالاسم ده – ولما كبرت لاقيت ميس الكيميا بتقولي يا سوووووسة ولما دخلت الكلية سكرتيرة الوكيل كانت بتقولى يا سوسو- فرضيت بالامر الواقع واقتنعت اني سوسة.
-------------
مش هحدد مين اللي همرر له التاج علشان احنا في ايام الامتحانات المفترجة
وهسيبكوا تركزوا في مذاكراتكم
فهسيبها مفتوحة المرة ديه و بمرره لكل اللي نفسه فيه وعنده وقت يجاوبه
لكن بعد كدا ..........
هتروحوا مني فين ؟!
(وش شوريرررررر)

48 التعليقات:

Dr-Ahmed يقول...

ههههههههههههههههههههه

موضوع جميل ... تسلم ايدك

غير معرف يقول...

la walahay

hager يقول...

ههههههههههه
فعلا اجابات نموزجيه
شكلك كنتي شاطره اوووي

rovy يقول...

يا بنت الايه قدرتى بذكاء وخفة دم تهربى من الاسئله كلها .
بصراحه تأخذى فى اجاباتك 10/10
وطبعا لازم نشكرك على الضحكتين الحلوين اللى بتضحكيهم لنا فى وقت غلا فيه قوى الضحك بجد الف شكر .
ربنا يخليلك ماما وبابا
دمت بخير وسعاده
تحياتى
rovy

الفارس الملثم يقول...

هههههههههههههه

بجد انتي مشكله .. اللي عمل تاج نفسه متصورش حد ايجاوبه بخفة الدم دي ..

عشره علي عشره

تحياتي
محمد

صيدلانيه طالعه نازله يقول...

ازيك

من اجابتك شكلك سوسه بجدو موضوع عصير البطيخ بالبذر ده على اساس تجميل وش العصير و لا عشان تصطاديه و تزرعيه تانى
انطلاقا من تخصصك الفلاحى اللى بخيره

Empress appy يقول...

ههههههههههههه موتنى من الضحك بجد انت هتهزرى احنا عاوزين اجابات صح يا شووووريره انتى
انتى بالاجابات دى تطلعى الاولى من فوق الركبه فى جامحه ههههههههههه

أميرة الاحزان يقول...

هههههههههههههههههههه
حلو موووووووووووووت سيا سوسه
تسلم ايدك ...

الربان يقول...

تحياتي

ما شاء الله...روح الفكاهة و الدعابة
عند حضرتك ايه وان. لا غرو مادام حضرتك بينور عندك Double mind ..تبارك الله احسن الخالقين.

تحياتي و تقديري....

الميكروباص يقول...

هروب من الاجابات بإحترافيه شديده

رئـــــيسـة حزب الأحلام يقول...

هههههههههههههه
اجابات نمذوجية جدا والمختصر المفيد

والعصافير طلعت مبسوطة وبتسلم عليكى
تحياتى لكى

غير معرف يقول...

سووووووووووووووو،، انت عاجباني بأه الله
سكر سكر حقيقي يعني

الـجـدة فـصـيـحـة يقول...

السلام عليكم ورحمة الله وبركاته

ما شاء الله دمك خفيف

جدًا
وإجابات ذكية ومرحة بجد


تحياتي

mohamed يقول...

صح و مجمه و عشره على عشره يا دكتور:D:D:D:D:D:D

زيزو الشقى يقول...

انا مدون جديد

دى اول زيارة ليا


مدونتك حلوة اوى ودمها شربات

عز الدين


سلااااااااام

maiosha يقول...

لأ فعلا يا سوسة إحابات نموذجية

بس بجد متهزريش بقى التاج ده لازم يتعاد بإجابات تانية .. بس بلاش الله يخليكى تكون نموذجية

بجد إحنا عايزين نعرف شخصيتك الحقيقية

غير معرف يقول...

ههههههههههههههههههههههههههههههههه
بجد موت من الضحك ياسوسوسه لدرجه اني
حاسه ان الكيبورد فيها زغازيغ
مع ان احنا مطلعتش بمعلومه مفيده من التاج بس هاخدها كلها لكشه واحده
والتاج اثبت انك شربات

قلب صغير يقول...

سوسه من يومك
ومع اني معرفش ايه التاج ده
بس اجاباتك خفيفه وحلوه جدا

هههههههههههههههههههههههههههههههههههه

ba7re يقول...

هههههههههههههههههه
مؤهلي : بكالوريوس ظراعة قسم فول نابت – ماجستير في تطرية الملوخية الناشفة

ده احنا على كده زمايل
:) مش دى جامعة المطبخ العربى

Mafrousa يقول...

سوسه ههههههههههه
انتى موتينى من الضحك ايه النجاج السوبرب ده
اولا واضح انك دمك خفيف موت
بس ايه حكايه فصين المخ دول
انا عملت الاختبار بتاع الفيس بؤ
بس مانورش اى حاجه
ههههههههه
قلت اللعبه بايظه
ههههههههههه

شهد الكلمات يقول...

سكر سكر بجد

Unknown يقول...

انتى بجد فظيعه اسلوبك مش معقول يا ريت تكتبى كل يوم





تحياتى

Butterfly يقول...

ههههههههههههههههههههههههههههههههههههه
أنا مش قادره امسك نفسى من كتر الضحك
بجد شكرا جدا على انك بتخلينى أضحك فى نفس الوقت اللى أنا زعلانه فيه وماليش نفس أضحك هههههههههههههههه

barbie girl يقول...

ههههههههههههههههه

دمك خفيف اوى..حاسة ان دماغك طايرة

غير معرف يقول...

هههههههههههههههه
ماشي يا سوسه
عسوله ومدونتك عسوله
ياللا على بركة الله

عايش... ولكن !!!! يقول...

ههههههههههههه
لا بجد سوسه زى ما قالوا عليكى

أم أحمد يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
أنا أول مرة أعرف ان التاجات بتتجاوب بالجمال ده

حاجات جوايا يقول...

ههههههههههههههههه
انتى بجد عسل يا سوسن ودمك شربات
جاوبتى الاجابة النموذجية
يا سوووووووووسه
هههههههههه

دمتى بخير أختى
سالى

هبة ربيع يقول...

أيه يا بنتي الإجابات اللوزعية دي
صحيح أنتي عبير سليمان والا أنا بيتهيألي
ع العموم أنتي شربتاتا خالص وانا مبسوطة أنك كنتي أول تعليق على مدونتي رغم أني معرفكيش ، وفكرتيني باسمي الكودي وهو (اللمضة ) بكسر اللام عشان كنت برد واجادل كتير وانا صغيره لما كبرت اتعلمت الخرس ، لكن ممكن أبقى اللَمضة يعني منورة :)
تحياتي

Christa يقول...

دمك خفيف جدا
عجبتنى مدونتك جدا
أحييك على حسك الرهف الذى لم يتعارض مع روح الدعابة و تعاملك مع مشاكل هذا المجتمع المريض بشكل ناضج جدا

همس الاحباب يقول...

هههههههههه
بجد خفة دم فى الاجابات منقطعة النظير
تعرفى انها من اجمل الاجابات اللى انا شوفتها على التاج ده
مع انى جاوبته بس معرفش امه تاج لذيذ غير هنا
ربنا يوفقك
تحياتى
خالد

كوارث يقول...

تحيا مصر
انا بشترك معاكي في موضوع عصير البطيخ ده
اكيد كمان بتحبي عصير البتنجان !!
يآآآآآآآآه !

tarek alghnam يقول...

اختى الكريمة
بوست رائع
خفة دمك جعلت للبوست رونق وروعة
ربنا يبارك فيكى
اتمنى ان تزورى مدونتى المتواضعة
متعك الله بالحب والصحة والعافية
ودمتى بود

زيزو الشقى يقول...

كتبت احد موضوعاتى وسوف ترى افكارى

تحياتى

عز

سلاااااااام

رئيس جمهوريه نفسى يقول...

اول مره اشوف اجابات للتاج بالطريقه دى بس بجد والله طريقه جديده قوى وعجبتنى الحته دى
هواياتي : تتبع النمل وفصل الاناث عن الذكور علشان مايتهوروش علشان بيتنا طاهر وهيفضل طول عمره طاهر

ربنا يجعله طاهر بس بيحضرنى سوال مهم طب لو نملتين متجوزين ايه الحل ؟؟؟

Lyssandra يقول...

عزيزتي سوسن .. أسعدني مرورك بمدونتي .. واسعدني تعليقك جدا .. وحبيت اجي جري أشوف مدونتك لكن للأسف ظروف النت عندي كانت بايخه أوي
النهارده جيت ازورك وجبت المدونه من أول بوست .. وحقيقي بجد مش عارفه اقولك ايه ؟؟
أقولك ان أسلوبك جد رااااااائع وعجبني أوي .. ولا أقولك اني مقدرة اللي ورا الكلام ؟ لأن الكلام اللي بيرسم بسمه علي وجوه الناس غالبا بيبقي من قلب مجروح أو بيتألم بعنف

إذن أقولك .. تحية لقلمك اللذيذ جدا .. وتحية لأسلوبك الساخر الرائع .. وأمنية طيبة لقلبك الموجوع

ربنا يوفقك ويحقق كل أمنياتك ويجعل لك ولنا نصيب من الفرح يرضينا

حقيقي سعيده بمروري عندك واتمني دايما نكون علي اتصال وأشوفك كتير في المدونة عندي وأكيد هاتلاقيني عندك علي طوووووووول

دمتي بكل الود

lyssandra

عروسة ننوسة يقول...

انتى شكلك فعلا سوسة لانك هربتى من الاجابات....احنا عايزين نعرف مين هى سوسة؟؟بس بجد دمك شربات

زيزو الشقى يقول...

شكرا لكى على متابعتك لمدونتى

بالتوفيق و النجاح

تحياتى لكى

rtrcbh يقول...

السلام عليكم ورحمه الله وبركاته
موضوع اكثر من رائع
أضحك الله سنك يارب
خلتينى اضحك وكنت حزين بعض الشىء
ربنا يوفقك يارب ويكرمك
وحقق لك كل احلامك وامانيك
جزيتم خيرا
والسلام عليكم ورحمه الله وبركاته
أخوك
د/احمد جمال

صاحب المضيفة يقول...

على انها اجابات رايقة وجميلة

الا اننا كنا عاوزين نعرف حاجات حقيقية عنك


لكن يالا ملحوقة بعد كده



تحياتي

ghoneem يقول...

اهلاً بيكي

يافندم أنا غبت عن المدونة بقالي فترة ورجعت لقيتها لسة بتموتني من الضحك

بجد بجد أسلوب كوميدي جداً ومش عارف بتجيبي سيل الكلمات ده منين

ضحكتيني من قلبي والتاج عرفني بيكي أكتر وأكتر ...

تحياتي

بالتوفيق............

hamssah يقول...

اجابات زكيه يا سوسه
همسه

كلبوزة لكن سمباتيك يقول...

اجابات نموذجية
طيب دي لازم نذاكرها بقى


و الامتحانات امتى؟

تحياتي

بنت مصريه يقول...

ولا احلى اجابات
خصوصا لسكيتينج بتاع البلاط دا
والله زى العسل
احييكى
واتمنى تنورينى

د. إيمان مكاوي يقول...

والله خليتيني أضحك من قلبي وأطلع من جو الكآبه إللي مخيم على مدونتي من مده..
تحياتي لخفة دمك ..وياريت تشرفيني بالزياره ..علشان تنقلي للمدونه جو السعاده ده

R.F.H يقول...

Sorry i cnan't type in arabic ,i just wanna say , i like your blogggg so much, and beleive as one of ur friends said, mafatkesh men eljawaz 7aja,,,, ur independed and mashaalh going to have ur PHD, i think we alll should be proud of a woman like u, u did what we can't do now, have fun in ur life, i really wish if i know u in person, i will be so proud of u , as ur mother,, beleive me she is so proud of u , she just want to see u have normal life, as any mom think, they think that normal life would be with ur husban and ur kids, they don't know it's better sometimes to wait for the good man than marry to bad man ...so keep going

غير معرف يقول...

عسل .. عرض وأسلوب

Soooo يقول...

اجابتك بتقول انك كاتبه ساخره حلوه جدا جدا جدا


ربنا يسعدك ويكرمك ويوفقك ويبسطك دنيا وآخره يارب




سلامووووووووز