• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

السبت، 10 مايو 2008

لو لم أكن مصريا .. لارتحت نفسيا

السلام عليكم ورحمة الله وبركاته
زائري المدونة الكرام
اولا انا بشكركم جدا لزياراتكم وكلماتكم اللي بتشجعني اني اكتب واكمل سرد قصتى
انا لما عملت المدونة ما كنتش متوقعة التجاوب
لكن الحمد لله لاقيت تجاوب وتفاعل وناس كتير بتعايش ظروف مشابهة
عاشقة القمر - رئيسة حزب الاحلام- shayma- حسبي الله ونعم الوكيل
وكل بنت مرت بنفس الظروف ربنا يكرمكم ان شاء الله بالافضل وربنا يمن علينا جميعا بالرضا والتصالح مع النفس والسعادة
الجميلة Soso
ما تتخيليش كلماتك اثرت فيه اد ايه .. لدرجة اني حسيت بتأنيب ضمير اني السبب فى تذكيرك بالموقف ده .. ومفيهاش اي اهانه ان الصغيرة تتجوز قبل الكبيرة .. ده مش لعيب فى الكبيرة ولكن ده قضاء الله وقدره .. عارفة احساسك وكلامك ده خلاني
افكر اعمل ياهو جروب نجمع فيه كل اللي زي حالتنا .. ونعمل فريق مسانده اوختاوية ..
لان مش بيحس بالالم الا اللي له نفس الجرح .. وميحسش بالنار إلا اللي كابشها يا أوختي .. ولا إيه ;)
او زي الشاعر ما قال
لا تشكو للناس جرح انت صاحبه .. لا يألم الجرح الا من به ألم
ربنا يسعدك يارب وتلاقي السعادة اللي بتبحثى عنها :)
أم سليم : اللي كتبت فيـَه شعر :)
بجد ربنا يكرمك ويسعدك يارب .
ثانيا: بعتذر عن تقصيري في الردود على التعليقات واوعدكم بالمتابعه والرد ان شاء الله.
ثالثا : بخصوص الاحداث الجارية من غلاء الاسعار وان البعض طلب اني اكتب عنها باسلوب ساخر , انا فعلا كتبت من واقع اني معايشة لنفس الاحداث والضغوط واثرت فيه زي ما اثرت فيكم
لكن غالبا كلامي وهزاري كان تقيل شويتين فنصحني المقربين مني اني ابعد عن السياسة وخليني ماشية جنب الحيط لاني مش وش بهدلة
ومفيش داعي الحكومة تكرملي قفايا بصوابعها الشريفة .. وانا قفايا يدوبك 2 سم الحكومة مش هتعرف تاخد راحتها عليها .. وانا هفقد الذاكرة من اول تكريم .. فعلى ايه .. ده احنا شعارنا الجبن سيد الاخلاق.
فوقعت بين ضغط نفسي الصراحة بين احساس بالظلم المادي الواقع علينا كشعب من الغلاء.. وازاي 9 مليون بنت فوق التلاتين هيتجوزوا بعد الحالة الاقتصادية ما تأزمت كدا .. وبين الظلم الفكري اللي اجبرنا نحط لساناه فى بوقنا وقلمنا في لبيسته .. خوفا على قفانا .. وكله الا القفا .. آه يا قفا.
ولو لم اكن مصرية .. لارتحت نفسيا .. والله يسامحك ياللي في بالي .
ملحوظة اسفة كتييييير علي التأخير ....حلوة اسفة كتير علي التأخير دي ده انا بقول درر يخربيت دماغي
البوست الجاي هيبقي بكرة يا بعده بالكتير ان شاء الله

23 التعليقات:

la3lahakhier يقول...

دا نا اول تعليق ولا ايه
انا كنت منتظرة اشوف باقى القصص بس مش مشكلة انا معنديش اى مشكلة فى الغلاء لانى بطلت اشترى اى حاجة
كل التحية

رحــــيـل يقول...

شوفى ياسوسا

حلو قوى موضوع الجروب ده بجد
وجميل انه الواحد يحس انه مش لوحده وان فى ناس كتير بتشاركه احساسه

اما بالنسبه لموضوع الغلاء فاعتقد ان ناس كتير اتكلمو فيه
وكلامنا مش اكتر من تنفيس عن وضع قائم ليس الا

فى انتظار باقى الحكايه باسلوبك الرائع
تحياتى لكى

المـــفـــــــقــــــــوعـــــة مــرارتـهــا يقول...

لو لم أكن مصرباً ... لأتجوزت واحد أجنبياً ... بيبقوا آخر جنتلة
وماعندهمش فيفي

أميمة كامل يقول...

لو لم أكن مصريا..لارتحت نفسيا

عنوان جمييييييييييييل جدا

ممكن تفكرى انك تعملى كتاب بهذا

العنوان

رئـــــيسـة حزب الأحلام يقول...

عارفة ياريت نقدر نعمل جمعية او رابطة تناقش مشكلات ا المنتظرا بكل وضوح وتحل مشاكلهم ويسمعوا مشاكل بعض

AHMED SAMIR يقول...

اول زيارة ليا وارجو ان تعتبريني صديقا للمدونة الجميلة دي
تحيااااتي

hamssah يقول...

بلوج جميل يا سوسو
متابعه باهتمام
همسه

mohamed يقول...

طب بألك ايه يا سوسا انا شاب مكافح عندو 20 سنه تيجي نتجوز؟؟؟؟على الأل مراتي يبأه دمها خفيف سدأيني هتبأه تحفه

Eldebug يقول...

بصى ياسوسا ياختى ... انتى تخشى بقى البوست الجاى بتتر كده زى بتاع رافت الهجان ... وعيال كتير عمال تجرى يمين وشمال واوعى الولعة ... على شوية فرقعة وبمب وضرب نار كده من اللى قلبك يحبهم ... وهوب تدخلى انتى بقى من اوطى مكان فى الارض وموضوع تصدير الغاز لاسرائيل ... وليكى عليه انا ادخل فى النهاية بقى بالاغنية الشهيرة "اه يا قفا اه يا قفا " بس المهم نتكلم فى الموضوع ده يا سوسا ... هاعيط والنبى ده احنا بنتسرق ومابنتكلمش

أنفاس الصباح يقول...

طيب لولم اكن مصريا ،ماذا اكون لارتاح نفسيا ،سودانيا ولا عراقيا ولا لبنانبا ولا افغانيا ولا اقولك اسرائيليا امريكيا ،صدقينى مصريا احسن الوحشين.

NilE_QueeN يقول...

لو لم اكن مواطنا مصريا لوددت ان اكون مريخيا

ف على الارض كل المواطنين سواء

يوميات فنانه مفروسه جداا يقول...

يلا يا سوسا انطلقي مستنينك علي احر من الجمر.
تحياتي

غير معرف يقول...

بقولك ايه،، انتي عجبتيني خدي بالك
حساكي قريبة اوي بأسلوبك وباحساسك والا هم من ده خفة دمك نيااهاهاهاهاها
عجبااااااااني

مدونة النسر المصرى يقول...

ادعوك لزيارة مدونتى المتواضعة
تحياتى لك

Unknown يقول...

اول مرة ازور مدونتك

ومش اخر مرة بإذن الله

مدونة رائعة تستحق المتابعة

maiosha يقول...

هاى سوسا
مش عارفة ليه أنا قلبى حاسس إنى هنضم ليكم فى الياهو جروب ده بعد 9أو10 سنين مثلا
أنا فى البوست اللى فات حسيت إنى شايفة مستقبلى
كل اللى حكيتى عنه وإنتوا صغيرين أنا عشته .. وبعدين حكاياتك عن نهى وهى فى الثانوية العامة أنا فعلا عايشاه دلوقتى .. بس مش عارفة ليه حاسة إن العيد الصغير عندنا هيجى قبل العيد الكبير برضة
على العموم لو عملته الياهو جروب ده إبقى إحجزيلى فيه مكان ربنا يخليكى ( بس يا ريت جنب الشباك)

أه أما حكاية بقى لو لم أكن مصريا.. لوددت أن أكون صينيا (علشان أصدرلكوا الفوانيس ).

عاشقة القمر يقول...

ههههههه .. اديني انضميت للجروب .. والله يا سوسا يا بنتي انا لسه ماعنديش غير همه 20 سنة وكام شهر كده بس شكل العيد الصغير عندنا هييجي برضو قبل العيد الكبير .. هنعمل ايه بقى شكلها بقت موضه في البلد دي D:
بقولك ايه صحيح ما تتأخريش في البوست الجديد عشان الواحد عنده امتحانات بقى ..

الجواز و سنينه يقول...

ضحكتينى جدا بالبوست بتاعك ده
تسلم اديكى
و على فكره الناس برضوا مسؤله عن تاخر الجواز
لان العرسان عارفه انهم اول ما يروحوا للواحده اهلها بيسلخوه طلبات
فيه قريه فى مدينه المنيا عملت الشبكه حد اقصى
و امشى جنب الحيط علشان الضرب على القفا مش شفا

و ليكى تاج عندة تعالى جديه يا سكر

Yamen Shahin "web designer" يقول...

مصيحك تودهي في داهية!
أنا مستني مزيد من الدواهي , قصدي النصائح.

الـجـدة فـصـيـحـة يقول...

السلام عليكم ورحمة الله وبركاته

مش لازم كل المدونات تكلم عن الغلاء
ومدونتك لها طابع خاص جميل جدًا وبكلامك عن ارتفاع سن الزواج يحمل بداخله جانب من الجوانب المسببة في ذلك وهو الغلاء فهو احد الأسباب وليس كلها بالطبع

تحياتي

جيهان علي يقول...

نسيت اقول حاجة

لو لم أكن مصريا .. لا رتحت نفسيا

ممكن يكون اسم معبر عن الحالة دلوقتي
لكن كل بلد فيها مشاكلها
ومصر جميلة أوي لو خدنا بالنا منها شوية وبطلنا سلبية

هوة فى أيه؟؟soso يقول...

بجد مش عارفه أقولك أيه؟؟
أنا كان نفسى أحساسى يوصلك
والحمد لله
وكلامك ليا بجد ريحنى كتير
أنا فعلا تعبانه وحاسه أنى لحد دلوقتى كتير بحس أنى بحلم وأنى حصحى بعد شويه من الحلم بس للأسف
الحلم طول أوى أوى
وباينه حقيقه
بس أنا دلوقتى سعيده جدا أنى لقيتك ولقيت رئيسه حزب الاحلام وعيرهم
علشان حسيت أنى لقيت ناس فعلا حاسين بيا بجد
وبحبكوا كلكوا
وأنتى بجد موهوبه جدا
ربنا معاكى ويكفيكى حب الناس اللى هوة دليل أكيد على حب الله سبحانه وتعالى

هوة فى أيه؟؟soso يقول...

يا ريت يا سوسا يااااااااااريت
تبقى عملتى فينا اكبر معروف
عارفه ليه؟؟
لان الواحده مننا كتير بتكون تعبانه أوى ونفسها تفضفض ونفسها تحكى كل اللى جواها لحد حيحس بيها بجد
لان ده مش موجود حتى فى أقرب الناس ليكى
ممكن تزهق منك
مش عيب فيهم بس لان نظرتهم للموقف غير نظرة اللى عاش فيه فعلا وجرب المشاعر ديه قد أيه مؤلمه
يعنى لما أتكلمتى عن كلمه عقبالك
بجد زى ما قولى بتكون مؤلمه وبتحمل وراها كلمات ونظرات ومعانى أخرى جارجه جدا ومحدش بيحس بده وبيقدر الا اللى جربها
ياااااااااااااريت يا سوسا بجد
أعملى الياهو جروب ده وانا حساعدك ومش حخليكى تتعبى فيه
أنتى بقيتى جزء كبير أوى فى حياتى لما بركز مع الجزء ده كل همومى بتهون خالص وبحس أنى برجع فريش وكلى أمل
لانى بحس أنى مش لوحدى
وأن اللى أنا فيه مش ذنبى