• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الجمعة، 1 مايو، 2009

اللهم لا قر ولا حسد



زمان وانا صغيرة كانت ابلة سامية بتاعت الدين بتشجعنا ع الصدقة واننا نعمل خير كتير .. علشان ربنا يحبنا ويبارك لنا في فلوسنا وصحتنا .. وكانت بتقولنا ان الزكاة والصدقة ديه لها فايدة كبيرة ع المجتمع وهي اننا جسم واحد فمش ينفع تبقي الايد شبعانة والرجل جعانه لازم الاعضاء كلها تساعد بعضها وتاكل بعض .


دلوقت المجتمع اتفجع وكل واحد همه نفسه بس وانه يشبع ويفرح هو بس .. والجسم اتشل لان الرجلين من الجوع ضعفت وهزلت ووقفت عن الحركة والايدين عمالة تلوش وتاكل من هنا ومن هنا و تطول وتطول وتكبر وما تاكلش الرجلين فلازم المجتمع ككل يتشل لانه مش هيعيش بايدين من غير رجلين.


يوم ورا يوم الرجلين كرهت الايدين وبقت تحقد عليها علشان الايدين افترت عليها ونازلة تلطيش فيها ومش سيبالها اي لقمة تاكلها .. لا والجديد ايد (عايزة قطعها) صرفت 10 مليون دولار يعني 55 مليون جنيه مصري في ليلة واحدة علشان فرح .. تبقي ايد سفيهة تستحق قطعها يعني .. ولو الايد ديه مش مصرية كنت قولت في داهية انا مالي .. لكن دي مصرية والمال ده مالنا واحنا مش طماعين وبنقول عايزينه كله .. احنا يدوبك عايزين حق ربنا 2.5 % يعني 4 مليون و تمن .. مبلغ تافهه جدا يعني وسط 165 مليون (فرح ومهر) .. لو وزعناه علي كام شاب من الغلابة اللي مش لاقيين شغل هيفتحوا مشروع .. ولا الغلابة اللي مش لاقيين جواز هيتجوزوا وهيسعدوا كام اسرة.


ولو كان المال ده راح لمصرية محترمة (وهم كثرُ ) كنت قولت مش خسارة بنت بلادي.. لكن ده راح لواحدة مغنية ومش بتعرف تغني كمان ( امال لو كانت بتعرف تغني كانت عملت ايه ) .. هي يدبوك قالت (يا ابن الحرام) وهو اتكب علي بوزه علي طول .. وفي كلامها مع العربية كانت في منتهي الخجل والحياء وبتشر عرق المسكينة
( اومال مين الست التيييييت اللي بتطلع تتمايع في كليباتها ديه !! )
ووصفت فرحها بانه هيكون فرح بسييت بسييت جدا يدوبك علي اد الاصدكاء والمعارف
(مش عارفة 150 طيارة خاصة دول كبسوا عليها منين غالبا كانوا عاملين لها مفاجعة) .
لا وفستان الفرح كان فستان بسيت بسيتت جابت واحد من اوروبا ما عجبهاش قامت ركنته ولبست واحد من تصميم المصمم اللوكال ايلي صعب .. ويدوبك كان متزين نصه الفوقاني بالماس (حجر كريم بنسمع عنه في الافلام) واتكلف مبلغ حقير 200 الف دولار يعني مليون و 100 الف مصري
(الله يرحم ايام الترتر).
ومهرها مبلغ تافهه 20 مليون دولار( يدوبك تشرب بيهم بيبسي كانز ) .. ومؤخرها مبلغ اتفه 40 مليون بس. . مبالغ تافهه جدا يعني .. لا والتصوير كان ممنوع علشان المحروسة هتبيع صور الحفل ( بسبس ومن ولازمن تسترزق يعني هي هتتجوز بلاش ) .. ورفع الامن حالة التاهب القصوي علشان كانوا خايفين من عمليات ارهابية لحسن معتوه تاني (غير الاولاني) يفجر نفسه في العروسة و السليكون يتطاير وما يعرفوش يلموها .. بس هم نسيوا ان الفرح اتعمل في لبنان ورجالة لبنان مابصتلهاش اصلا ..
واخيرا سافرت المحروسة والمحروس جزيرة كابري في ايطاليا (ماليش في الكباري انا ) علشان يقضوا الهني موول
( اكيد ده مول غير جنينة وسيتي ستار ) .
وعاشت رجالة مصر اللي بتعز الجمال وتقدره وبتصرف الملايين علشان تبوس الواوا .

20 التعليقات:

قلب ارهقته الاحلام يقول...

بصراحة أحنا ف زمن الايدين والرجلين وكل الاعضاء

تستاهل فيه القطع :)

وعندك حق ف كل ال كتبتيه وكأننا بقينا مالناش هم الا الفن والفانين والاغاني الهابطة والغواني

علشان تندفع لهم فلوس البلد وبقت الشعب مش لاقي ياكل

وربنا يهني كابري بالهايفة ويهني رجالة مصر بالواو :)

ومن مقعدي هذا بنشها عين قااااااااااد كدهووووووت :)

وحشتينا ياسوسا

تحياتي ليكي ,,,

MǿиY El-Shreef يقول...

هههههههههه

معلش يا ميس بقى حظوووووووووووووووووظ

ربنا يولع فيهم هما الاتنين

بجد حاجه تفقع المراره

أحمد سعيد بسيوني يقول...

الهايفة دي لها من اسمها نصيب كبيييير

ربنا ينتقم من الظلمة المفسدين

"
وعاشت رجالة مصر اللي بتعز الجمال وتقدره وبتصرف الملايين علشان تبوس الواوا
"

حرام لما تصفي هشيمة بأنه من الرجالة
فضلا على انه من رجالة مصر

ايوشة يقول...

مفيش حقد ولا قر ولا حاجة الطيور على اشكالها تقع هو عايز يشتهر يعمل يعمله فرقعة فى الدنيا انه هيتجوز جميلة الجميلات
كان فى خير لعمرو اديب بيقول اصلا الموضوع بتاع تكاليف الفرح كلام فارغ وانه بس علشان الدعاية مش اكتر وان الفرح مكنش فيه اكتر من 300 مدعو
وعلى العموم كله فى ميزان حسناتهم ان شاء الله :)

mohra يقول...

حيبى الله و نعم الوكيل
على رأى المثل "اللى معاه قرش محيره يجيب حمام و يطيره"

مسدس صغير يقول...

حقد طبقى
ههههههههه
ناس ليها حظ وناس ليها هيفا
هههههه
لنا الله
ما عند الله خير
سلامى

Miss. Sosa يقول...

علي الرغم ان عنوان البوست هو دعوة للقر والحسد الا انه مجرد عنوان ساخر
انا اكيد لا ادعو للقر والحسد
بس اللي بيحصل شيء استفزازي يدعو اي انسان انه يسخط علي كل الاوضاع

لله الحمد ده مش حاصل عندي
فانا لا تمنيت زوال نعمة اي واحد فيهم ولا استكثرت نعمة ربنا عليهم
لاني الحمد لله عندي نعمة كبيرة اوي هي غنى النفس والاستغناء عن الناس

لكن كل اللي حاولت ابرازه في البوست هو مدى السفه والبذخ في الزيجة ديه وان مال رجل الاعمال ده لو طلع زكاة المال منه (اللي هي فرض عليه) هيكون ساعد ناس كتير محتاجة

لكن اللي بيحصل ده بذخ وسفاهة باستفزاز

وربنا يهدينا ويهديهم

حاسوباتيه يقول...

ليكي حق بصراحهنقر ونحسد كمان ده ايه ده افترا والله

Bent Men ElZaman Da !! يقول...

ههههههههههههههههههههههههههههههه
شكلك متغاظه منها اكمنها عملت فرح بسيت بسيت كان نفسك تعمليه يا سوسه
تفتكرى ابو هشيمه هسيبها تفضل دايره على حل شعرها كده والا هتستمر مسيره بوس الواوا (و الواحد عارف ان الموضوع مش هيقف عند الواوا بس)

يوميات شاب منوفى يقول...

ياجدعان كفاية كلام فى الموضوع دة دول عالم مغيبة جهنم وبئس المصير هو ابو زقت دة جاب فلوسة الى بيبعزقها منين اكيد من دمنا الله يخرب بيتكوا ياشوية كلاب

واحدة مفروسة يقول...

اسكتى بقا يا ميس
فرستيني اكتر من انى مفروسة
لا و النصيبه كانت كاتبه مره فى الجرايد ان اسنبى حارصه و صاينه اتقدملها و ما كانش يعرف هيه مين
شوفتي الوكسه

هوه اكيد الشخص المزعوم انه راجل ده و اجوزها عنده واوا عاوزة تتباس
ديه حاجه تفرس بجد
بكره ياما نسمع و نشوف

Nostor Azzuro يقول...

اللى معاه مال ومحيره
يجيب حمام ويطيره

Nostor Azzuro يقول...

او يروح يتجوز هايفه
!!!!!!!!!!!!!!!!!!!!!!!!!

حياة يقول...

عندك حق فعلا في كل الي كتبتية
وعلى فكرة هيفاء مش ذكية هي اتجوزته علشان الفلوس لكن مااتعظتش من سوزان تميم وذكرى وغيرهم الي كانت نهايتهم مأساوية .. والفلوس الي بتييجي من الهوا بتروح في الهوا

أطيب تحية

فشكووول يقول...

ازيك يا سوسه النوسه كونوسه
وياريت يا سوسه الزواج ده حيستمر يعنى حتدوم العشره ويخلفوا صبيان وبنات
عارفه بتاعة الواوا دى سنها كام ييجى كدا 40 سنه وعندها بنت سنها 17 سنه والواد الاهبل اللى اتجوزها عنده يا دوب ييجى 26 سنه
بس بصراحه بقى الجسم اللى كله مليان سليكون ده برضه يستاهل يا سوسه برضه يعنى الفلوس دى والملايين دى
اصل هما مش دافعين حاجه من جيب ابوهم دى كلها متاخده من جيوبنا احنا واحنا مش واخدين بالنا
بخرب بيت العيشه
تحياتى يا سوسه

hager يقول...

هههههههههههه
نو كومنت طبعاا :|

Sonnet يقول...

تحياتى لك و لمدونتك الجميلة
ما شاء الله
ادعوك لزيارة مدونتى
http://shayunbiqalbi.blogspot.com/

Soma يقول...

الطيور علي اشكالها تقع, وفعلا لو كان خرج زكاه ماله كان ساعد ناس كتير, بس دول اصلا اهل النار و طبيعي انهم يعملو اكتر من كده
والطبيعي بردو اننا منحسدش ولا نقر عشان مفيش حد بياخد جزاءه في الدنيا يا سوسو.
فكك الموضوع اصلا فاكس ومش مستاهل الواحد يفكر فيه دي متجوزه كذا مره وبنتها اطول منها وليها افلام سيكو سيكو, يعني عادي
عااااااااااااااااادي

Container Entsorgung يقول...

حابيييييييييييييين نشوف الاخبار والمشاركات الجديدة !

Müllentsorgung يقول...

شكراً لكم ع الموضوعات المتنوعة ... موفقين :)