• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

السبت، 11 أبريل 2009

الرجال من المريخ والنساء من الزهرة




الرجال من المريخ والنساء من الزهرة كتاب من تأليف الطبيب النفسي الأمريكي جون غراي صدر في مايو 1992 وفيه يتناول المشاكل التي قد تحدث بين الرجل والمرأة نتيجة الاختلافات بينهم. وترجم إلى عدد كبير من اللغات، وبيعت منه ملايين النسخ.


تخيل أن الرجال من المريخ والنساء من الزهرة, وفي أحد الأيام منذ زمن بعيد كان أهل المريخ ينظرون من خلال مناظيرهم المقربة واكتشفوا أهل الزهرة.وبلمحة خاطفة أيقظ أهل الزهرة مشاعر لم يكن لأهل المريخ بها عهد. لقد وقعوا في الحب واخترعوا بسرعة سفن فضائية وطاروا للزهرة .فتح أهل الزهرة أذرعتهم ورحبوا بأهل المريخ . كانوا بفطرتهم يعرفون أن هذا اليوم سيأتي. وتفتحت قلوبهم على مصراعيها لحب لم يشعروا به قط من قبل .لقد كان الحب بينهم سحرياً وكانوا مسرورين للغاية لوجودهم مع بعض على الرغم من أنهم من عوالم مختلفة فقد وجدوا المتعة على الرغم من اختلافاتهم . وقضوا شهوراً يتعلمون عن بعضهم ويستكشفون حاجاتهم المختلفة وتفضيلاتهم وأنماطهم السلوكية ويقدرونها حق قدرها . ثم قرروا السفر للأرض كان كل شيء مدهشا وجميلا ولكن تأثير جو الأرض غلب عليهم واستيقظوا وكل واحد منهم يعاني من نوع معين من فقدان الذاكرة, فقدان الذاكرة الإختيارينسوا أنهم من عوالم مختلفة . ونسوا ما تعلموه عن اختلافاتهم , ومنذ ذلك اليوم كان الرجال والنساء على خلاف.


-------

الكتاب متمركز في محورين هم الراجل والمرأة (بديهي يعني) وطبيعة كل واحد منهم وبيواجه مشاكله ازاي


الراجل : كائن مريخي عملي عايش علشان يحقق اهدافه وقمة الاحباط له انه يعجز عن تحقيق اهدافه , طيب بيشتغل لمين ؟ لنفسه فهو كائن اناني (الكاتب اللي بيقول) , طيب لما يواجه مشكلة بيعمل ايه لاما بيلجأ لكهفه ياخد عزله نفسية يحاول يفكر في حل لمشكلته او يهرب من المشكلة بقراءة جرايد او مشاهدة ماتش ودي حاجات مابتستهلكش اكتر من 5% من عقله والباقي برضو بيفكر في حل مشكلته الرئيسية (وراها وراها مش هيتهد الا لما يحلها) .


المرأة : كائن زهري محب للعلاقات الانسانية وعلم النفس , عايشين يحكوا ويسمعوا بعض و يدعموا بعض نفسيا ومعنويا , كائن معطاء كثير البذل (برضو الكاتب اللي بيقول) , لما بتواجه مشكلة فبتلجأ لاصحايها الزهريات الامامير تحكي لهم مشكلتها فيساندوها ويدعموها نفسيا .


باندماج الكائنين المختلفين اللي جايين من عوالم مختلفة وباختلاف طبيعتهم وباختلاف طريقة مواجهتهم للمشاكل لازم يحصل كلاش (صدام)


هو اناني بيدور في ساقيته مش شايفها وهي عمالة تجري وراه لما نفسها اتقطع , فلازم يجي يووم وتقول انا تعبت انا زهقت انا مش هقدر اجري اكتر من كدا( واكيد الجذمة كانت ضيقة فالست تعبت).

وهي برضو غلطانه هي اتعلمت العطاء وما اتعلمتش التلقي والاخذ , فلازم توقف عطاء وتتعلم تطلب ببؤها طالما البعيد مابيفهمش ولا بيحس , لان اي علاقة غير متزنة لازم يجي يوم وتنهار.


نيجي بقي لمواجهة المشاكل , الست قابلتها مشكلة فبديهي اول ما تشوف وشه راجع من الشغل تنفجر في وشه عياط وشكوي (ومن هنا الرجالة بيقولوا علي الست نكدية وشكَاية) الراجل حاجة من اتنين لاما يتهرب منها (يروح ينام ولا يخرج مع اصحابه) , لاما يقعد يسمعها وهو بيسقط وينام منها فتقوم صرخة فيه مصحياه من النوم يقوم رامي عليها يمين الطلاق ويبقي خلصنا .
.
وجهة نظرهم في التعامل مع المشكلة مختلفة هو متعود انه في مشاكله بيتقوقع علي نفسه ولو فشل في حلها بيلجأ لشخص تاني للمساعدة او للنصح علي مضض لان ده اعلان منه بفشله في حلها وطبيعته الذكورية ترفض ده و لكن هي لما تحكي لشخص فده رسالة حب وثقة منها له و تنفيس عن ضغط عصبي ونفسي وقع عليها وهي بتكون مش محتاجة غير انها تحكي مش منتظره حلول من حد لكن البعيد بيفهم ؟ طبعا لأ .
.
فالحل انه لازم يتعلم الانصات لان هي دي طريقتها وطبيعتها في حل مشاكلها وبعدين هي مش عايزة منه حلول , هي مش عايزه اكتر من انه يسمعها يسمعها بس , ويشاركها مشاكلها ويحسسها ان سند لها فتحس انها محبوبة و معززة.

هي برضو لازم تتعلم امتي تتكلم وازاي , مش تستني ورا الباب اول ما يدخل تنفجر فيه , وتحاول تختصر وتجيب المفيد علشان طبيعة الراجل العملية مش هتخليه يستحمل الرغي الكتير .
وبرضو ما تحاولش تقحم نفسها في حياته زيادة عن اللزوم وتحاول تغيره هو مش هيتغير تقبليه زي ما هو ولو حصلت تغيرات هتبقي طفيفة فمتعمليش الواصي عليه هو مش بيحب ده ولا هيتقبله لانه اتعود يشتغل لوحده ماحدش بيملي عليه هيعمل ايه.

هو بقي لما يواجه مشكلة ويتقوقع علي نفسه ويدخل كهفه فاحترمي خلوته وماتقحميش نفسك في مشاكله وسبيه لما يتكلم لوحده ويمكن الكهف ينهار عليه ويبقي خد الشر وراح.
وكلمة واقفة في زوري " اذا كان الرجال من المريخ .. فلماذا لا يعودوا من حيث اتوا "
-----

الكتاب رائع جدا وانصحكم بانكم تقرأوه (لينك الكتاب) والجميل ان الكاتب جون جراي راجل فمش هتقولوا انه هو كمان متأمر معانا ومتحامل علي الرجالة والراجل بيتكلم بموضوعية في محاولة لتقبل الفروقات والتعامل معاها.

19 التعليقات:

عمك ياض يقول...

:D
ده حضرتك حتفرحي اوي بالموضوعين اللي كاتبهم عن البنات :P
الكتاب رائع فعلا.. وبجد فيه حاجات كتير جدا مختلفه بينا وبينكم.. فمهم فعلا اوي اننا نفهمها لان لو محصلش ساعتها حيحصل كراش زي مانتي قولتي.. وبدون ذنب من اي حد منهم الا لانه معرفش التاني كويس

تدوينه جميله :)

*البت المشمشية *حلوة بس شقية * يقول...

عجبنى الكتاب وموضوعه

Ahmed Mubarak يقول...

هو اولا احيكي جدا
انا الكتاب ده ليا معاه قصه عشق من حوالي 3 سنين .. لدرجة اني خدت كورسات فيه وبدرسه كمان
انا الكتاب ده عندي منه نسخه وحدع ليه ووحده لخطبتي لما تيجي ان شاء الله
والكتاب ليه توابع
والي انتي عارضه ده هو جزء تاني لازم يتقري بعد الرجال من المريخ والنساء من الزهره لا متقدم عنه واسمه بالعربي المريخ والزهره للأبد
تحياتي فعلا
وبجد حاولي تنشريه لانه بيحل مشاكل كتير جدا

Bent Men ElZman Da !! يقول...

انا من فتره عايزه اقراه فعلا بس مش عارفه
عاجبنى فكرته وموضوعه
يمكن على الاقل نعرف نتعامل مع بعض :D
ميرسى يا جميله

MaNoOoSh يقول...

موضوع جميل جداااااااااااااااااا
وتحليل مشوق
وانا معاكى فى الجملة اللى قلتيها
" اذا كان الرجال من المريخ .. فلماذا لا يعودوا من حيث اتوا "
ميعودوا ويريحونا من تعب القلب بقى
ههههههههههههههههه

fanty يقول...

صباح الخير، ظريف والله ان الكلام ماكنش تخبيط كالعاده، نفس الكلام كنت لسه بقوله عندك امبارح، الراجل دماغ و الست دماغ تانيه و النبذة اللي انتي اخدتيها من الكتاب صحيحة مية ف المية و انا دايما بقول نفس الكلام اللي الراجل قاله و أنا حقرا الكتاب دلوقتي انشاء الله و شكرا علي اللينك بس يا رب يفتح :)

Soma يقول...

جميل اوي موضوعك احنا فعلا مختلفين عن الرجاله في دماغنا, بس الفكره مش في الاختلاف الفكره في اننا عارفين بالختلاف ده كويس بس مش بنحاول نقرب من بعض بالعكس بنعمل نفسنا مصدومين في تصرفات الطرف الاخر واحنا اصلا متوقعنها. من الاخر يعني بنمثل, كفايه تمثيل وكفايه حروب نهايتها فشل العلاقه للطرفين, عشان النجاح بين الراجل والمرأه برضو للطرفين
وميرسي علي البوست الجميل.

Unknown يقول...

عزيزتى الست اجمل حاجة فالوجود دا ولولاها كانت الدنيا بقيت كتلة نار
فكان لازم العملية تبقى طرية شوية مش ناشفه على طول
بس فية رجالة زهرين وستات مريخاوية برضو ولا اية!!
تحياتي والى الامام
منتظر تشريفك مدونتى

واصطنعتك لنفسي يقول...

كتاب جون جراي فعلاً أكثر من رائع ومفيد.. وكثير من محاضرات التنمية البشرية اللي بتدور في فلك اختيار شريك الحياة بتعتمد على الكتاب بشكل كبير

أجمل ما في الكتاب إنه بيقدم تحليل واقعي جداً مبني على الاختلافات النفسية لكل طرف وبيقدم حلول واقعية جداً بأمثلة عملية..

وأعترف إن الكتاب أثر بشكل كبير على علاقتي بأخويا وبأي رجل بتعامل معاه سواء زميل عمل أو في أي نشاط.. وجدت إن بفهمي للاختلافات النفسية ومراعاتها العلاقات بتكون مستقرة ومزدهرة جداً

جزاكي الله خيراً على لينك تحميل الكتاب. وعلى تلك الرؤية للكتاب
:)

إيمان

kochia يقول...

تحليل واختصار وافي جدا للكتاب
انا عندي نسخة الكترونية منه منذ فترة طويلة ولحد دلوقتي مجتش الفرصة اني اقراة كاملا

وتحليل شجعني علي كدة
موضوع جميل وبوست جميل

تحياتي

♥♥♥♥♥ Jennifer™® ♥♥♥♥♥ يقول...

أحب بلوق الخاص بك

عابرة السبيل يقول...

السلام عليكم
الزيارة الاولى لمدونتك وهى للحق مدونة مفيدة ومسلية ورائعة

بخصوص المريخ والزهرة ...اذا اعترفنا بوجود الاختلاف بينا هنقدر نتعامل مع بعض وننجح

احييك على اختيار الموضوع ..زواكيد هقرا الكتاب

سلام عليكم

رحلتنا في الحياة يقول...

بتعجبنى مدونة حضرتك جدا ومن زمان اوى من قبل ما اعرف عالم التدوين كنت باجى اقرا البوستات

leeno يقول...

الف شكر على اللينك

انا بحاول الاقيه عندي مش عارفة

الموضوع فعلا حلو

بس ياترى مع كل المعلومات دي

التطبيق اخباره ايه؟؟؟!

صعب جدا جداااااا

مش كدة؟

فشكووول يقول...

سوسه النوسه كونوسه ... اهلا اهلا اهلا
يا شيييييييخه وحشتينا قوى مشاغباتك وكتابتات ... انت كنت فين؟
عجبتنى قوى كلمة انها بتتكلم مع الزهريات اللى زيها والله فعلا الستات زى من يكونوا جايين من كوكب الزهره شوفى اسمه من الزهور وهما فعلا زهور والرجاله الكعابير جايين من الكوكب الوحش السخن اللى هو المريخ ... شيئ طبيعى ان تكون الزهريات من الزهور والمريخيين من الحديد والفولاز وشتان الفرق بين الزهور والحديد
انا جيت بالصدفه بعد ما كنت يأست من وجودك وفرحت جدا انك رجعت واتاريك راجعه بقى لك اكتر من 15 يوم
اهلا بيك تانى يا سوسه النوسه كونوسه واهلا بابداعاتك وكتاباتك
وتحياتى

شاب كــ طخين ـــــا يقول...

كتاب جميل اوى يعنى واضح من البوست ده
شكرررررا

hager يقول...

الكتااب جاامد جدااا انا كنت قريت ملخص ليه من حوالي شهرين وكنت بدور علي الكتاب .. فشكراا بجد

Müllentsorgung يقول...

شكراً لكم ع الموضوعات المتنوعة ... موفقين :)

Unknown يقول...

شكرا