• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الخميس، 23 أكتوبر 2008

فلنعلن الحداد ونلتحف بالسواد

تحديــــــث
يا جماعة انا مش بتكلم عن التحرششششششششششش
البوست كان بيتكلم عن اختلال المجتمع لا الرجالة بقت رجالة ولا الستات فضلت ستات وده من رأي المتواضع اننا (الستات) حاولنا نعمل جدعان ونبقي رجالة ونساعد ونشتغل
ولا يبقي لنا كــيــنـــــونة خاصة (واصرف علي شيكولاتي من جيبي زي ما الراجل بيصرف علي سجايره من جيبه برضو )
الا اننا تحولنا ( زي المتحولون ) واتقلب السحر علي الساحر ولا طولنا سما ولا ارض
قصة نهى رشدي كانت مجرد مثال علي تعدي الرجل علي المرأة (اللي المفروض يحميها) وبرضو رد فعل نهى القوي بيقول ان الستات مابقوش مكسوري جناح (واللي يفقعلنا عين هنفقعله عينيه الاتنين .. وعلي الباغي تدور الدوائر والمثلثات).
اما موقفي من قضية نهي رشدي فهو حيادي جدا و كنت متعجبة جدا من ايجابيتها الشديدة ومابالغتش ولا زودت أحداث من عندي (وكلامي اللي قولته من التلفزيون والاخبار ع النت مش من تأليفي)
والان اتضح ان جرأتها وايجابيتها مش من فراغ لان كما قالت العربية انها اتعرضت لموقف تحرش قبل كدا في فرنسا من سنة ونصف فبقي واضح جدا خبرتها في المواقف ديه
الجديد بقي
أولا : مش معني انها من عرب 48 وانها تحمل جواز سفر اسرائيلي انها اسرائيلية اللي تناولته البرامج التلفزيونية انها فلسطينيه وبتحاول الحصول علي الجنسية المصرية واللي قالته اليوم السابع نقلا عن نهى انها تحمل جواز سفر مصري بالفعل.
ثانيا : الشاب اللي اعتدي عليها (شريف) متزوج يعني ادعاءات البطالة و تأخر الزواج والشاب معذور كل ده كلام في الهوا لان الراجل طلع متجوز .. عايز ايه تاني مايسيب بنات الناس في حالهم .
وبعدين مالكم قلبتوا علي البنت ليه ؟!
هو الحق والعدالة بتتغير بتغير الديانات والجنسيات ؟؟!!
الشاب مخطيء والبنت اخدت حقها (بقرار المحكمة وحكمها)
(اذا كان قرار المحكمة ظالم فهو وزر القاضي وحده)
عامة الشعب وانا منهم لا شاهدنا الواقعة ولا حضرنا المحاكمة علشان كدا لازم نبقي حياديين (ديه قضية هتك عرض يا مسلمين)
وانا لازلت محايدة في رأي في الموضوع ده ومش هحيد عن حياديتي و ما اقدرش ادعي وافتري علي حد بدون بينة اللي حاصل لحد دلوقت واحد تحرش بواحدة يبقي يستاهل اللي يجراله
تطلع يهودية - هندية - مصرية ... من بلاد الواق واق
العدالة واحدة ودينا الاسلامي قالنا نحترم الكل ونعدل مع الكل
تحياتي وتقديري لاهتمامكم
------------

منذ بضعة ايام كانت الحاجة بخيته حسني صعيدية المنشأ والبالغة من العمر 55 عام تصارع ذئب حيواني انقض عليها وهي تحش البرسيم لتطعم غنمها فنهش عقلتين من اصابع يديها اليمني واليسري واستمر الصراع بين الحاجة بخيتة والذئب 3 ساعات وسط صراخ ودماء واستغاثات ولا حياة لمن تنادي في مجتمع خواء الى ان هداها الله للمنجل التي كانت تحش به البرسيم واخذت تسدد له الطعنات حتى تمكنت منه وذبحته ذبح الشاه .
جدير بالذكر ان الحاجة بخيته مطلقة منذ زمن بعيد ولها ولدين الاول امام مسجد والثاني لازال صغير وهي تعمل بالفلاحة لتعوله.

ومنذ ثلاثة شهوركانت نهى رشدي مخرجة الافلام الوثائقية تصارع ذئب بشري تحرش بها جنسيا .. وفي مشهد سينمائي فريد من نوعه قفزت فوق مقدمة العربة وامسكت به كي تمنعه من الفرار وبمساعدة صديقتها وبسلبية من المارة واكتفاءهم بالمشاهدة والتهريج و تثبيطها عن اقتياده الي قسم الشرطة منعا للفضيحة والبهدلة كعادة المصريين في الجرائم الشرفية بتحويل المجني عليها الي جاني يجب وأده لمحو العار .. وبنفوذ وذكاء من نهى كسائر فتيات الجامعة الامريكية وبقدرتها علي تحويل قضية شخصية الي قضية رأي عام استطاعت ان تقتنص من فم العدالة اقصى عقوبة لجريمة تحرش لاول مرة في تاريخ مصر وهي ثلاث سنوات لسائق النقل واغلب اظن انه فتي هزيل والا ما استطاعت فتاتان اقتياده الي قسم الشرطة .. فلنحمد الله ولنشكر الظروف التي يسرها الله لك يا نهي لتثأري لكرامتك وانوثتك المعتدى عليها .. وادعو الله ان يوفق بقية النساء في استرداد حقوقهن .. فكلنا لسنا بنهي ولا نملك الظروف التى ناصرت نهى .

ومنذ بضعة شهور اثناء الصيف .. ذهبت للتنزه ببعض محافظات وقري مصر .. واضطريت الي ركوب عربة بوكس (عربة غير ادمية لنقل الادميين بالقرى) .. وكعادة سائقى هذه العربات فانهم لا يتحركون الا اذا امتلأ البوكس علي تمته .. كان بجواري بعض الفلاحات الذاهبات لنقل اواني معدنية كبيرة مغطاة جيدا بالكثير من القماش لم استطع التعرف علي خباياها وما تسره بقاعها وبعض الصبية الصغار وانتظرنا كثيرا حتى منَ علينا القدر بخمسة من خيرة الشباب من حيث البنية وحسن الهندام والنظارات الشمسية والشعر المصفف بالجيل (شباب روش طحن) .. وظننتهم قاهريين الا ان اللهجة الريفية افصحت بجدارة عن المنشأ والاصل .. جلس اربعه منهم ولم يتسع المكان للخامس فاصر الشباب علي النزول الا ان خامسهم اقنعهم بانه سيقف علي سلمة خارج البوكس .. وانطلقت العربة وصفق الهواء وهاج وماج والفتى متشبث خارج العربة متأففا .. ولم يواصل تأففه كثيرا فقد قامت احدى الفلاحات واجلسته داخل العربة فلبى مسرعا ووقفت هي كالاسد متشبث بعمود حديدي خارج العربة والهواء يعصف بطرحتها وجلبابها طوال الطريق .. فكتمت حسرتي وترحمت علي الرجال الذين كانوا يتنازلون عن مقاعدهم ليجلسوا السيدات.

لاشك ان عمل المرأة اكسبها قوة وشجاعة محمودة لكن كل ما اخشاه ان ينهش في انوثتها وان نصبح رجال بلا شنبات في زمان ساد فيه اشباه الرجال ؟!
وعلى الرغم من ان خروج اغلب النساء للعمل كان لمساعدة الرجل ورغبة في مشاركته مسئوليات الحياة الا انه سلب الرجل قوامته .. وشيئا فشيئا اكتسب الرجل من صفات النساء الميوعة والمبالغة في الاهتمام بالمظهر والثرثرة .. بينما اكتسبت النساء الخشونة والسيطرة والاستقلالية من الرجل .. فلا عجب ان تستغيث المرأة فلا ينجدها الرجل .. ولا عجب ان يكون الرجل هو من يهدد امن المرأة بعد ان كان القائم علي حمايتها .. ولا عجب ان تقف المرأة في المواصلات العامة بينما يجلس الرجل .. ولا عجب ان يتملص الرجل من مسئولياته ليلقي بها علي عاتق المرأة.
فلنترحم علي زمان كان فيه كائن رقيق يقوم علي رعاية وتربية ابناءه بالبيت .. وكائن رحيم يكد ويعرق من اجل لقيمات تسد جوع زوجته وابناءه .. ويسهر ليحمي حمى كيان مسئول منه.


أيها النساء : لا تلمنَ الا انفسكن فانتن من ساهم في صنع اشباه الرجال ..
و على أرواح الرجال فلنقرأ الفاتحة و نعلن الحداد ونلتحف بالسواد.

46 التعليقات:

Unknown يقول...

موقف نهي أنا بحيها عليه وأتمني ان كل بنت في موقفها تعمل زيها

لكن الست اللي قامت عشان تقعد الولد
انتي بتتكلمي جد
/:

ياخسارة الرجاله

بس ده مايمنعش ان لسه في رجاله في مصر

fanty يقول...

أزيك يا سوسة، مع اني حاسس شوية انك متحاملة علي الرجالة بسبب تزامن كذا موضوع في وقت واحد، لكن أنا ح احاول أختصر علي قد ما أقدر، أولا بالنسبة لبخيتة الله يديها الصحة و يخليها لولادها، بس أي حد في مكانها كان حيدافع عن نفسه لأن دي طبيعة أي كائن حي، الدفاع عن نفسه، طبعا مع عدم اغفال شجاعتها و قوتها، و علي رأي اخواننا الشوام، بخيتة دي أخت رجال، يعني بالبلدي من ظهر راجل... أما بالنسبة لموضوع التحرش، دي حاجه بتحصل في كل حته في الدنيا، بس ليه بتحصل عندنا حقولك ليه بغض النظر عن تسلسل الاسباب.. 1. شباب سافلة و مش متربية، يا ريت بس جت علي المعاكسة، لا و بيمد ايده اللي عايزه قطعها.. 2. كبت جنسي.. 3. قلة رباية من أبوه و أمه، الظاهر كانوا نايمين و الواد بيكبر.. 4.الدولة اللي مش موفرة معيشة محترمة بحيث ان كل واحد يعف نفسه و يعرف يتجوز.. 5. الحشيش و اللي عامله في حياة البني ادمين، صباح الفل ده بيتشرب في الشوارع دلوقتي عيني عينك... 6. بنات بتلبس لبس يخلي الحجر ينطق، و بالتالي الواحد من دول لسان حاله بيقول ما هي ماشية بتهزهالي في نص الشارع، و مش عايزاني أحسس؟؟؟ 7. بنات محجبات (شكلا فقط) و ليس محجبات تدينا و احتشامن و خجلا، و في ولاد شافوا من العينة دي حاجات احقر من بنات كباريهات شارع الهرم، و بالتالي مبقاش الحجاب عند الولاد مقياس الحشمة للبنات و بالذات اننا كنا بنسمع عن منقبات متزوجات و بيخونوا اجوازهم و بالتالي بعد ما كان الولد ممكن يتحرش بالغير محجبة بس، بقي يتحرش بالمحجبة برضه و بالذات لو كانت لابسة حجاب عمرو خالد (علي سبيل التريقة يعني) بودي تايت جدا و جينز ناقعاه في ازازتين زيت عشان يخش فيها، و يا دوب طرحه علي شعرها، و متنسيش طبعا انها نازلة الكوفي شوب تشيش مع صاحباتها... 8. أب و أم البنت اللي سايبنها كده و مبسوطين و البنت اسمها محجبة و عادي لو لبست تايت(و عادي بقي يا محسن متدئش البنت لسه صغيره سيبها تعيش سنها، والله انتي اللي حتبوظيها يا سناء) و في الاخر البنت بتنزل تصيع و لسه محسن و سناء بيتناقشوا مين اللي غلطان... أنا شكلي طولت مع اني قلت ح أختصر، بس علي العموم يا سوسة ولا الرجالة زي الاول، و لا حتي الستات، و علي فكرة حاجة أخيرة عاوز أقولك عليها، أنا معرفش انتي منين في مصر، بس لو كنتي في القاهرة، أنا اتحداكي لو روحتي مول و مشفتيش بنت بتحاول تظبط ولد، علي فكرة مبقاش بس الولاد بتعاكس، حتي البنات في دي كمان بقوا ينافسوا الولاد.. Enjoy your weekend and wish u a pleasant day

علي فكرة حاجة أخيرة كنت عاوز أقولها، مرة كنت قاعد مع زملائي، اللي مصري و اللي فلسطيني و اللي اردني و اللي لبناني، قلتلهم احنا شعوب بنضحك علي نفسنا، كل واحد يقولك أنا مراتي أشرف من الشرف، أنا بنتي متربية أحسن تربية، أنا أختي ما تستجريش تنزل من بتنا ببنطلون ضيق، طب يا جماعة لما كله عامل فيها دكر قوي كده، اومال اللي بيقعودوا علي الكوفي شوبس كل يوم للساعة 1 و 2 الصبح و اللي قاعدين بالبيكيني علي البيتش و اللي كل واحدة عاملة اللي ميتعملش مع صاحبها، يبقي الاعداد المهولة دي مراتات و بنات و اخوات مين؟؟؟ كلة حط وشه في الطبق و سكت ما عدا واحد بس هو اللي كان عنده الشجاعة، رد عليا و قالي فعلا انت عندك حق و احنا بنضحك علي نفسنا

مصعب رجب يقول...

السلام عليكم ورحمة الله وبركاته

بالنسبة لموضوع التحرش :
في رأيي أن كل الأسباب التي ذكرها أكرم أسباب صحيحة ولكن أضيف عليها سببا آخر هو الأول :
ابتعاد الناس عن الدين ( أيا كان هذا الدين ) هو السبب فيما نحن فيه الآن لأن الوازع الديني أقوى بمراحل من الوازع الأخلاقي أو العرفي أو المجتمعي لأنه يرتبط بالقوة العظمي "الله" ولكن المشكلة أن كثيرين لم يتواجد بداخلهم هذا الوازع

أما بالنسبة لموضوع العربية واللى الراجل والست عملوه أنا مش شايف فيها أي مشكلة خالص لأن الستات في الفلاحين مش شاغلين نفسهم أصلا بكل المولد بتاع حقوق المرأة ده خالص .
الست هناك ( خصوصا غير العاملة ) بتصحى الصبح تعمل الفطار وتاخده على الأرض لحجوزها وتساعده في الفلاحة وساعة الغدا يرجعو يتغدوا سوا ويرجعو تاني على الأرض يكملوا شغل .
وبالتالي لا الراجل فارقة معاه إنها تقوم له ولا الست فارق معاها هي كمان .
تحياتي

كـــيــــــــارا يقول...

طبعا موقف نهي بجد جامد واي حد لازم يبقي مبهور بيه

اما عن الست اللي قامت للولد

يانهار ابيض


الله يرحمها بقي الرجوله

لما ست هي اللي تقومله

Mafrousa يقول...

سوسة احيكي تحية جامدة جدااااا على البوست ده
بجد انا عجبنى اسلوبك اوي جداا خالص2
مش مجاملة على فكرة
و عجبنى طرحك للنماذج التلاتة

و فعلا يا سوسة انا معاكي الست بقت انشف من الراجل
يابنتى انتى تلاقي الست شايلة ستين شنطة و شايله على دماغها و الراجل ماشي مش قادر يشيل نفسة اصلا
الله يرحم
بس اقولك على حاجه احنا اللى عملنا كدة
احنا اللى عاوزين نبين اننا جامدين
ربنا قال اقعدوا معززين مكرمين و الراجل هوه اللى يجري على خدمتكم
و احنا علشان قلبنا الرهيف
بدأنا اول ما بدأنا اننا نساعد الراجل لأن مرتبه مش كفاية فنزلنا للعمل
و مادام نزلنا للساحة عاوزين مثبت اننا قدها و نص
و بالفعل اثبتنا..لكن جت علينا احنا بخسارة
لا طايلين نبقى ستات متدلعة و مخدومة و لا طايلين نبقى رجالةوكلمتنا هيه اللى تمشي ههههههه عاوزه ابقى سي السيد ياختى مش عارفه
هههههههههههههه
تحياتي ليكي
انا بكتب التعليق و الدنيا بتمطر سيول و سامعه صوت الرعد
وانا لما بسمع صوت الرعد بقول ده اعتراض على اللى وصلتله البشرية
اروح ادعي بسرعة تحت المطر
باي

اقصوصه يقول...

بصراحه غريبه!!

يعني الست عرضت عليه انه ياخذ مكانها كنوع من الذوق والشهامه..والجدعنه!!

بس هو وافق على اي اساس؟على اساس انه الحلقه الاضعف يعني؟والا ع اساس ان الوقفه هاي لا تليق برجولته؟والا على اي اساس بالضبط؟

فعلا..الله يرحمهم..الفاتحمه ع روحهم:)

الازهرى يقول...

صديقتى العزيزة

كلنا ايدنا موقف نهى بلا استثناء

وعلى الوجه الاخر اتفق مع اقصوصة فى رأيها حول هذا الشاب الذى رضى بان يجلس فى هدوء ويترك فتاتا بين ضربات الهواء

تحياتى على الموضوع الجميل

فشكووول يقول...

ازيك يا سوسه : اشكرك على زيارتك وعلى فكره انا عرفت كليتك ايه .. بأمارة دكاترة كلية العلوم اللى بيدوكوا محاضرات فى السنوات الاولى وكمان ما فيش كلية بتعتمد على مراجع اصليه الا كليتك .. وانا مش حاقول هى ايه ... هى يا دوب احدى كليات القطاع الطبى .. انا ما قلتش حاجه أهه. بخصوص الحاجه بخيته الى ذبحت الذئب .. والله دى وليه راجل . بس راجل اصلى مش تايوانى اما بالنسبه للذئب البشرى اللى العيال بتوع الجامعه الامريكيه مسكوه وودوه القسم .. اصله مش راجل من الاصل .. هو يعنى لو كان راجل كان عمل كده دول البنات هما اللى رجاله.. اما بالنسبه لعربيات الريف فحدث ولا حرج .. وحركات العيال بتوع الريف معروفه .. اصلهم عشان يثبتوا انهم مش ريفيين يقوموا يتطرفوا قوى فى حاجات البندريين .. ما هو انا ريفى وعارف نفسى .. ومش عارف المرور سايب العربيات دى ليه .. ما هو لو المرور عارف ان فيه رجاله وفيه بنى آدميين صحيح كان ما سمحش لعلب السردين دى انها تشيل ناس .. لكن المواضيع كلها رجاله تايوانى وكمان الست اللى قامت وقعدت العيل ست تايوانى عشان لو هى ست اصلي يابانى كانت ما قامتش خالص .. وهى حاسه بنوع من الرجوله عشان كدا قامت وقعدت الست اللى كانت واقفه على الباب.. قصدى الولد.. تحياتى

kochia يقول...

عزيزتي
نحن فعلا في كثير من المواقف رجال بلا شوارب
ما ذكرتيه بعض امثلة ويوما نري من الامثلة الكثير
هل نستجيب للحياة ونتصرف احيانا في وقت لا يهتز للرجل شعرة
ام نظل محتفظين بانوثه شكلية حتي لا نتهم بقدانها
اري الان ان لفظة رجال لا تعني ذكرا بالميلاد
بل تعني تصرفا شجاعا قويا غير معتمد علي الاخرين فخورا بنفسه
وموضوعاتك اليومين دول ليها صدي عندي لان هذا الموضوع ايضا تكلمت فيه بمنظور اخر في موضوع اعتقد انك قراتيه عندي وهو
انوثتي في الميزان

حـــــدوتـــــة يقول...

السلام عليكم

بغض النظر عن التغير اللى حصل فى شخصية المرأة
فانا عايزك تعرفى ان الرجالة ماتو فى 73
كل اللى بعد كده او اغلبهم مسخ او انصاف رجال زى مانتى قولتى
الراجل دلوقتى بيمر بضغوط اجتماعية ومادية قاسية جدا من اول ما يكبر ويتحمل المسؤلية بيلاقى كل حاجة مسدودة قدامة
عشان كده النتيجة اللى قدامنا دلوقتى هى رجال على الورق وبس

سلالالالالالالالالالالالالالالالالالالالالالالالالالالالام

nona يقول...

عادى يا بنتى ماهو الرجالة ماتت فى حرب 73 انتى لسة فاكرة
الاول كنا بنقول شباب المدن هما الاى اتغيروا فى الاخلاق و التربية
لكن دلوقتى شباب و رجال الفلاحين و الصعايدة تقريبا انقرض من عندهم كل حاجة و ما تعرفهمش فى الطريق الا اللغة يمكن غلبوا اهل المدينة فى تصرفاتهم
رحمة الله على الاخلاق و الشهامة

oRiGiNaL HeArT يقول...

فلنترحم علي زمان فات ولنقرأ الفاتحة على ارواح الرجال و نعلن الحداد ونلتحف بالسواد




الله يرحمهم
من زمان وانا اعلنت الحداد
والله بتحسر من مشاهد كتير بتمر عليا فى الحياة بلاقى فيها ان الرجوله فعلا اوشكت على الانقراض

جبهة التهييس الشعبية يقول...

يعني احنا عملنا لهم ايه عشان يبقوا اشباه الرجال؟

blue-wave يقول...

بالفعل 3 مواقف فى منتهى القسوة
وهوا ما كنا نخشاة
ان يتبادل الرجل والمرأة الأدوار

r يقول...

لان دا زمن كثرت فيه الذكوره وقلت به الرجوله
فعلا البنات دلوقتى الواحده منهم ب 10 رجاله من عينه الشباب الروش طحن دا

السيدات دلوقتى فعلا بتعول نفسها واسرتها ومسئوله عنهم امنا وامانا

الامهات مش المسئولين وحدهم دا المجتمع كله وفقد القوه الحسنه هما لاقيين غير الكليبات والتقليد الاعمى
اعلام وجرايد وكل حاجه والنماذج المشرفه نعرفها بالصدفه البحته وفى كتير ما يسمع عنها

رحم الله زمن الرجال الشرفاء والشجعان بردوا
وربنا يقوينا على حياتنا معاهم

شاهدة على العصر يقول...

ان كنا سنعلن الحداد ونلبس السواد فلنفعل ذلك من اجل الانسانية وليس الرجال، فواقعة التحرش هى عمل ضد الانسانية ولا يمكن الحديث عن مبررات واسباب، وهى مرفوضة سواء كانت الضحية امرأة ام رجل، وهناك من اشار فى تعليقاته ان الرجال بدأوا يعانون ايضا وان كنت لم الحظ ذلك. والقضية ليس قضية رجل او امراة ولكن قضية انسان يجب ان يحترم، كما يجب ان يحترم الطريق والاماكن العامة.

اما بالنسبة لفكرة ان الرجال كانوا موجودون "زمان" واختفوا او راحوا فى "73" فاعتقد انها من الناحية التاريخية قد تكون غير صحيحية او غير دقيقة، فليس هناك من ادلة علمية على وجود الرجال قبل 1973. ومعروف ما شهدته فترة السبعينات والستينات بل والخمسينات من "مينى جيب" "ومكرو جيب" وانتشار الرقص الغربى بمجتلف اسماءه بين الطبقات الوسطى وليس فقط فاحشة الثراء. اضف الى ذلك ان المرأة قد اتجهت للعمل خارج المنزل فى هذه العقود بطريقة يمكن وصفها بانها كانت مبالغ فيها،"كان الامر اشبه بثورة" فلم يكن الدافع هو زيادة دخل الاسرة كما هو الحال الان ولكن كانت هناك شعارات اثبات الذات والمساواة، واعتقد ان الجيل الحالى من النساء العاملات قد وعى الدرس، وانه اصبح هناك توازن لدى كثير من النساء بين وجبات العمل والمنزل.وقد لا يصدق البعض ان المرأة فى هذا الوقت قد عملت ككمسرى مثلا ولكن هذا حدث بالفعل.

واذا رجعنا الى العقود السابقة الاربعينات والثلاثينات والعشرينات وبداية القرن الماضى سنجد ان المراة كانت تكد وتعمل حتى قبل نشر كتابى قاسم امين "تحرير المرأة" و"المرأة الجديدة" فمن يتطلع على الكتابين يكتشف - كما اكتشفت- ان كثير من النساء فى ذلك الوقت كن يعملن كخادمات لاعالة الاسرة او المساهمة فى اعالتها، ولم يكن الوضع يختلف فى الريف عما هو عليه الان، يعمل الرجل والمرأة معا فى الحقل، ولكن اصعب ما اكتشفته من هذين الكتابين ان الراحل قاسم امين رحمه الله عندما دعى لعمل المرأة قد كان دافعه حمايتها من احتراف "الاعمال المنافية للاداب"، فالمرأة التى لم تكن تصلح للعمل كخادمة عادة لكنونها ليس من الطبقة المتوسطة او فوق المتوسطة ويتوفى زوجها او تطلق او تظل بلا زواج بعد وفاه والدها بلا ميراث لم تكن تجد امامها الا هذه الاعمال، وكان ذلك امرا معروفا ومقننا ايضا، ولم يكن الاخ او العم او الخال يفكر فى اعالة مثل هذه النساء، لم يكن يعلم بالطبع ان اخته او ابنه اخيه المتوفى او زوجة اخيه المتوفى تمتهن هذه الاعمال ولكن لم يكن يسأل ايضا من اين تنفق ومن اين يأكل اولادها الصغار.

باختصار حتى فى بداية القرن الماضى لم يكن هناك ذلك المخلوق الاسطورى الذى نطلق عليه "رجل"، وان كان احد يعرف متى كان هذا الزمن الجميل الذى كان يعيش فيه "الرجل" ويحمى المرأة ويحفظها فليخبرنا.

غير معرف يقول...

مع الاحترام والتقدير فانا ارفض الفكره تماما والتدث بلهجه الجمع عن كل الرجال واذا كانت نهى رشدي محترمه وقويه فهناك الكثير من العاهرات واذا كانت السيده الصعيديه قوبه فهناك الكثير من الضعفاء واذا كنت شاهدتى رجلا بدون نخوه فهناك الكثير من اصحاب النخوه

تقبلى اعتراضي

Miss. Sosa يقول...

esraa

كلنا بنحي نهى علي ايجابيتها

واكيد في رجالة منهم بابا واخواتي الاتنين

لكن مش ملاحظة ان اشباه الرجال اكتر ؟!


----
akram

بخيته ست بالف راجل .. اي حد في مكانها هيدافع عن نفسه لكنه يخرج منتصر ديه مش مضمونة تماما

انا معاك جدا في اسباب التحرش الجنسي لكن يوصل لتحرش جماعي ويعتدوا علي كل اللي في الشارع ولا يفرقوش بين محترمة وغير ؟! لا دول حيوانات بقي مش بني ادمين

----
أبو اسامة

انا معاك ان البعد عن الدين هو السبب في الانهيار الاخلاقي اللي احنا فيه .
لكن موقف ان الست هي اللي تقف في الهوا والراجل يقعد ده طبيعي .. لا لا لا ده مش طبيعي بالنسبة لي خالص

لا دي ست ولا ده راجل دول كائنات ملعوب في جيناتهم

Miss. Sosa يقول...

كيارا

فعلا الله يرحمها بقي

----

واحدة مفروسة

الله يكرمك علي مديحك

وعندك حق طبعا احنا اللي عملنا كدا في نفسنا ولا طولنا سما ولا ارض

واساس كل اللي احنا فيه هو البعد عن الدين

الاقتصاد انهار لانه مبني علي الربا وربنا قال اجتنبوا الربا

السياسة باظت لانها مبنية علي الظلم والجشع والاستبداد وربنا هو العدل وحرم الظلم بينا

المجتمع انهار لاننا خرجنا من بيوتنا وخالفنا امر الدين في وقرن في بيوتكن
الدين قال البسوا حجاب ولا تتخذوا اخدان واحنا بنلبس لبس ملزق ومحزق ومقنعين نفسينا اننا محجبين بقطعة قماش ع الشعر وبقية الجسد كاسي عاري وثقافة البوي فريند شغالة تمام وطلعنا نشتغل ونقول نحقق ذاتنا واهملنا دورنا في تربية الاولاد واهو طلع الجيل كله مش متربي واهو القلم بيتردلنا وبيعتدوا علينا

الدين قال ايسرهن مهورا اكثرهن بركة
واحنا جرينا ورا مظاهر زايلة وتركنا الاصل وهو حسن احتيار شريك الحياة

الدين
ثم
الدين
ثم
الدين

momken يقول...

مش عارف اقول ايه

الله يرحمك يا رجوله

وعلى فكره الرجوله غير الذكوره خااااالص

بمعنى اخر عادى ان ست تكون راجل

لان الرجوله صفه وليست جنس
وممكن ذكر يتنافى عنه صفات الرجوله

الايه الكريمه بتقول
بسم الله الرحمن الرحيم
(من المؤمنين رجالا صدقوا ماعاهدوا الله فمنهم من قضى نحبه ومنهم من يتظر)
الايه تقصد كل المؤمنين ليس الذكور فقط

وربنا يهدى ذكور بلدنا ورجلتها وسوعدها

تحياتى

Geo Amr يقول...

انا قريت موقف نهى دة قبل كدة فى احدى المواقع على النت وعجبنى موقفها جدا وياريت كل شاب قبل ما يفكر يعمل اى حاجة يفكر انى اخته والدته زوجته اى حد من اقاربه ممكن ان يحدث له ذلك كما تدين تدان مهما طال الوقت كما فعلت سوف يفعل بك وياريت الناس فى الشارع مش تكون سلبيه اذات رات شئ فعليها ان تقول الحق وشكرا

د/ رامي شهاب الدين يقول...

بسم الله

فى البداية أنا ضد مقولة بعض المتفذلكات إللى بيقولوا إن الرجالة ماتوا والكلام اللى مش جايب همه ده

أى واحدة بتقول الكلام ده ياريت تتذكر إنها بتقول كده برده على أخوها وأبوها وعمها وخالها الخ

ولا دول مش تبع الرجالة من الأساس؟؟

معذرة لكلامى .. لكن الحكم السالف ذكره فيه كتير من عدم الادراك لما يقال من الاساس

وعموما أنا بس ليا نقطتين على تعليقك

فأما الأولى : إن الحاجة بخيتة حسنى مافضلتش هى والذئب 3 ساعات زى مابتقولى .. دى مبالغة ، أصلا لو كانت حصلت كان الذئب فطس ومات من نفسه، دا غير إن حقل البرسيم ماكانشى فيه حد أصلا عشان ينقذها ..أرض الله الواسعة يعنى زى مابيقولوا

أما الثانية: ففى قصة نهى رشدى فمن الواضح والمنطقى إنها لم تقفز على السيارة كما قلتى ، بلاش نحط إضافات على الموضوع قد تفقده مصداقيته ، كل مافى الموضوع إن فيه سيارة تانية هى اللى سدت مدخل الشارع فكان من المحتم إن السائق المتحرش يقف عشان يتفادى الإصطدام ، لكن مشهد الأكشن إللى حضرتك كتبتيه ده لم يحدث

مافعلته نهى رشدى بطولة ، مش محتاجه هى إضافات وتحابيش يعنى .. الحقيقة فقط لا غير تكفيها

قبل ما أنسى صحيح ..معناته إيه كلام الأستاذ فشكول؟؟صيدلة ولا أسنان بقى؟؟ هههههههه

تحياتى الغالية

ojg يقول...

والعزاء اليوم للسيدات
:(
وقفت وقعدته؟؟
في الفلاحين كمان؟؟؟
والله مش غلطتهم
الغلطة غلطتنا
ادنالهم كتفنا يتسندوا عليه
اتعودوا واستحلوها
إحنا بقينا أخشن منهم
وهما بسم الله ما شاء الله بقوا النعومه بعينها

ربنا يهدينا ويهديهم

عاشقة القمر يقول...

ماشاء الله ماشاء الله .. وقفت الفلاحة وقعد هو .. ده ايه الجمال ده .. لا واللي يحرق الدم اكتر انك بتقولي ان الكلام ده في الريف وفلاحة وبتاع .. في الريف يعني مش هنا كمان ده في الريف اللي هو كانوا الناس زمااان بيضربوا بيه المثل في التقاليد والمثل العليا والراجل والمسؤلية والشهامة والكلام ده .. الفاتحه على الرجالة ..
مع اعتذاري طبعا لكل الرجال اللي لسه رجال بجد .. لان الواحد ما يقدرش ينكر طبعا ان زي ما بقى فيه المثل المهبب ده من الرجال الا انه فيه طبعا رجال رجال بجد ..

الكحيان يقول...

الأريبة سوسة :

عساك بخير حال، في بدء كلماتك أصابتني سخونة لأني في مسألة التحرش هذه أتحفظ كثيرا، وأرى أن المتهم الأول فيها المرأة - خاصة المتحررة المتبرجة في الغالب- والمتهم الثاني الظروف الاقتصادية، ولكني عندما قرأت باقي كلامك سلمت لك إلى آخر حدود التسليم، فموضوعيتك ونظرتك الفاحصة قلما لقيتها في امرأة أو رجل هذا فضلا عن العمق والقدرة الفائقة على فلسفة الأمور فما أخطر قولك : (( وعلى الرغم من أن خروج أغلب النساء للعمل كان لمساعدة الرجل ورغبة في مشاركته مسئوليات الحياة الا انه سلب الرجل قوامته .. وشيئا فشيئا اكتسب الرجل من صفات النساء الميوعة والمبالغة في الاهتمام بالمظهر والثرثرة)) على الداء وقعت، وقلب الهدف أصبت فوالله هذا ما أراه تماما فإن الرجل لم يعد رجلا، والمرأة تشوهت كثيرا بسبب هذا الرجل المشوه، ولكني أرى أن اللوم يقع على كليهما فكلاهما أفرط وفرط . مع تحياتي

Ahmed Othman يقول...

سيدتي باختصار
و باحتضار

اصبحنا في زمن
قمصان رجالي بترتر
أول ما رأيتها
ترحمت قبلك
و تقبلت العزاء

البقاء لله

كراكيب يقول...

ميس سوسا النوسا كوانوسا

مش قادرة اقولك انا اتبسطت قد ايه من نهى دي والله
والنهارده حصل موقف قدامي بس في الناحيه التانية من الشارع ولد برده عمل حركة مش اللي هي لبنت
راحت لفت وشتمته
يختي علييييييكي هو ده اللي قدرتي عليه
واصلا الدنيا كانت زحمة وكان سهل جدا تجيبه لانه ما جريش علطول يعني من كتر الزحمة
انا نفسي كنت هروح اجيبه من قفاه بس لولا اني كنت في الناحية التانية وفي عربيات وبتاع

ححححححححح مااااااعلينا
والله يا ميس حاجة تقرف

بس انا مبسوطة اني جيتلك النهارده

miro el niro kwaniro

عروسة ننوسة يقول...

معاكى حق يا سوسة يا ميت الف خسارة على الرجالة
البوست مش محتاج كلام

Miss. Sosa يقول...

أقصوصة

اولا نورتي المدونة

اما عن اسباب الفتى فهى كتير كتير .. طبعا خايف على شعرة ونضارته والشميز بتاعه .. نفس خوفك علي جيبتك وطرحتك من البهدلة بالظبط و تصرفه هو نفس تصرفك لو كنتي واقفة في مواصلة وواحد قام لك .

=====


الازهري
وانا اتفق معكم في تأييدكم لنهي ولاستنكاركم للولد (هو مش ولد هو كبير بس انا شيفاه ولد بقى )

=====

Miss. Sosa يقول...

عمو فشكوول

والله انا اللي بشكرك علي زياراتك وتعليقاتك الثرية.. اما بخصوص كليتي العظيمة فهي كلية يتيمة لا تنتمي الا اي قطاع .. وهذه هي السمة الغالبة علي معظم خريجيها تلاقيهم كدا لا ينتمون الي اي شيء .. كائنات وحداوية مع نفسها .. اما بخصوص البوست
انا اؤيدك جدا وبشدة في كل اللي قولته .. بس الجزء الاخير بتاع ((وهى حاسه بنوع من الرجوله عشان كدا قامت وقعدت الست اللى كانت واقفه على الباب.. قصدى الولد)) عجبتني اوي وضحكتني اوي
ربنا يكرمك دايما يارب ويديم عليك نعمه.

=====

kochia

عزيزتي كوتشيا انا معاكي ان الرجولة صفة لا تقتصر علي جنس معين .. وان كان علي حد علمي انها مرحلة عمرية من مراحل الذكر فهو يولد طفل ثم فتى ثم شاب ثم رجل

ومعاكي ان بعد المواقف بتطلب من البنت الرجولة وده شيء جميل لكن ما تبقاش ذكورة

وبصراحة احنا اكتسبنا صفات ذكورية بسبب قسوة المجتمع وحدته معانا

اما بخصوص التوارد فده وارد جدا لاننا بنات مجتمع واحد واكيد مايؤرقنا ويشغل تفكيرنا واحد
تحياتي

Miss. Sosa يقول...

حدوتة

منوراني بتعليقك بس بلاش مقولة ماتوا في الحرب ديه لحسن اباءنا واخواتنا من مواليد ما بعد 73 فبلاش نخبط في الحلل :)

انا معاكي ان الظروف الاقتصادية والمالية عامل لكن في عوامل تانية منها البعد عن الدين وسوء التربية وده بقي جاي منا لان المفروض الام مدرسة .. واحنا قلبناها مدرسة خاصة علشان نجيب فلوس ورمينا العيال يربيهم الزمن فطلعو رجالة علي الورق زي ماقولتي

تحياتي


====

Nona

التلات نماذج اللي قولتهم جابوا التلاتة صعيد وفلاحين وعاصمة
والتلاتة بيقولوا ان المجتمع منهار

ربنا يهدينا ويصلح الاحوال

====

original Heart

كلنا بنتحسر

لكن لا يغير الله مابقوم حتى يغيروا ما بأنفسهم

لازم نصحي ونحط ايدينا علي الداء مش هنعالج الاعراض بس

التحرش عرض لكن ايه المسبب للمرض ده ؟

لازم نجتث المرض من جذوره

تحياتي

=====
واكمل رد علي التعليقات في وقت لاحق ان شاء الله


سلاااااام

مطلق يقول...

وليه متقوليش ان نهي ست بالف ست

مش كل الرجاله كده
بس اكيد كل الستات كده

صدى الصمت - عاشقة الورد - يقول...

أعتقد قراءة الفاتحة فقط لاتكفى ولن تؤثر فى تغيير السلوكيات الجديدة التى طرأت ، من الجائز ان قراءة سورة يس بجانب الفتاحة يؤتى ثمارة
تحياتى

DR.HAMAS يقول...

لاشك ان عمل المرأة اكسبها قوة وشجاعة محمودة لكن كل ما اخشاه ان ينهش في انوثتها وان نصبح رجال بلا شنبات في زمان ساد فيه اشباه الرجال ؟!




أنا مؤيد لهذا الرأى جدا


و أرى أن اعظم تكريم للمرأة

هو ما أراده منها الإسلام




د.حماس

مـجـنـووون يقول...

والله عندك حق في موضوع أن الست لما قالت أحنا عايزين نتساوي بالرجال وكان لهم ما أرادوا ودلوقتي بتلاقي الست في كل مكان بتشتغل وده طبعا اثر بالسلب علي االرجال وعلي موضوع القوامة عندهم



أيها النساء : لا تلمنَ الا انفسكن فانتن من ساهم في صنع اشباه الرجال ..
و على أرواح الرجال فلنقرأ الفاتحة و نعلن الحداد ونلتحف بالسواد

أنا مش معاكي في النقطة دي لأن الراجل راجل والراجل إلي يرضي علي نفسه أن مراته تبقي هي صاحبت الأمر والنهي يبقي ميبقاش راجل ويستاهل الي يحصله

وعلي فكرة لسه في رجاله كتير قوي وساعت الشدة حتلاقيهم في الصف الأمامي

تقبلي مروري سيدتي الفاضله
مجنووون
بس علي فكرة

فشكووول يقول...

كسلانه ليه يا سوسه .. يا الله ابتدى قولى حاجه جديده .. احنا مستنيين

بنت مصريه يقول...

عندك حق والله يا سوسه
ههههههههههه
رجال لامؤاخذه
بوست جميل قوى
احييكى
اتمنى تنورينى

fanty يقول...

آخر الانباء، نهي هانم طلعت اسرائيلية من عرب 48 و الظاهر ان الموضوع شكلة كده ابتزاز، شاهدي الرابط
http://www.alarabiya.net/articles/2008/10/30/59169.html

الكحيان يقول...

محامية نهي رشدي تتخلي عنها وتقرر استئناف الحكم لصالح المتهم

كتب سامي عبدالراضي ٣٠/ ١٠/ ٢٠٠٨


نهي
فجرت نجلاء الإمام، المحامية بالنقض، مفاجأة في قضية التحرش الجنسي، التي كانت تتولي فيها الدفاع عن المدعية نهي رشدي، عندما أعلنت أنها قررت استئناف الحكم لصالح المتهم.

كانت المدعية - وهي مخرجة أفلام تسجيلية - قد اتهمت الشاب شريف رجب جبريل، بالتحرش بها في يونيو الماضي، حيث ألقي القبض عليه وأحيل للنيابة، وعاقبته محكمة الجنايات بالسجن ٣ سنوات .

وقالت نجلاء لـ «المصري اليوم»، إنها توصلت لمعلومات عن المدعية، جعلتها تقرر التخلي عنها بعد ٣ أيام من صدور الحكم، هي أن «نهي» من عرب ٤٨ ومولودة في يافا شمالي تل أبيب وتحمل جواز سفر إسرائيلياً،

كما سبق أن اتهمت ضابطاً فرنسياً بالتحرش بها أثناء وجودها في فرنسا قبل عام ونصف، وحصلت منه علي تعويض. وأوضحت المحامية تفاصيل معرفتها بهذه المعلومات،

وقالت إنها كانت معها في مقابلة تليفزيونية علي قناة M.b.c وأن المذيع قال لنهي: «حالات التحرش دي مابتحصلش حتي في إسرائيل»، فردت عليه الفتاة: «إسرائيل دي دولة محترمة»،

وأنها - أي نجلاء - بحثت عن معلومات وأوراق خاصة بالفتاة، وعرفت أنها ولدت في يافا، وأضافت أنها منذ ذلك الوقت قررت استئناف الحكم لصالح المتهم والدفاع عنه .


نقلا عن المصري اليوم

الكحيان يقول...

والله ياسوسة أنا لم أقصد أن أتهمك في موضوعيتك،فأنت فوق العين والراس. ولا أن أتجنى على الفتاة لديانتها - رغم أنها تبجحت بامتداح إسرائيل- لكن أنا دائما عندما تتوالى أحداث معينة على نحو معين يلعب الفأر في عبي وأبدأ في الشك وأن هناك مؤامرة تدبر بليل لتمرير قوانين معينة- نظرية المؤامرة- وفرض إرادات شعوب أخرى على شعبنا الكحيان، وكثيرا ما كانت تصيب نظرتي، وأنا أرسلت ذلك لأنني تعرضت في حياتي لظلم شديد جدا، ولا تعرفين شعور المظلوم حينما تتكاتف عليه كل القوى : الظالم وأهله وأقربائه وناسه وقانون بلاده ويصدقون جميعا على اتهامه بلا دليل. فنحن جميعا رغم أننا لم نر شيئا سلمنا لنهى وصنعنا منها بطلة قومية، ولم نتساءل عن ذلك المسكين هل فعل حقا ما نسب إليه أم لا ؟ هل هو مذنب فعلا أم برئ ؟ لقد خشيت أن نذبحه جميعا بلا دليل ونشرب المقلب . وإن مما شككني في ذلك - وهذا رأيي- أزياء نهى التي ترتديها - انظري صورهافي النت - انتسابها للجامعة الأمريكية، تلك الجامعة التي كانت تنوي إدارتها حلها لكثرة انتشار الإدمان بها، وهي أيضا الجامعة التي يوزعون فيها الواقي الذكري في اليوم العالمي للإيدز،وأشياء أخرى لا داعي لذكرها، ومما شككني أيضا الأفعال الجبارة التي ادعتها نهى والتي لا يمكن أن تصدق وأؤكد لك أن شعبنا على ما بلغه من بلادة وأناملية، وانتكاس فإنه ما زال فيه أصحاب نخوة ورجولة، فلا يمكن أن يتفق الناس جميعا على عدم الدفع عنها نحن ما زلنا بخير، هذا والله ما دفعنا إلى الكلام خشيت أن نكون ممن شاركوا في ظلم أحد من حيث لا ندري.

رئـــــيسـة حزب الأحلام يقول...

يهودية ولا مصرية بس جدعة انها اتكلمت بجد شوارعنا مابقاش يتسكت عليها
تحياتى

الازهرى يقول...

صديقتى العزيزة

الولد هو كل من ولدته امه مهما كان سنه

وبخصوص التحديث
فالمرأة يجب ان يكون لها كيانها الخاص سواء كانت عاملة ام ربة منزل
لا ان تكون مجرد مقلدة للاخرين او محاولة لاثبات شىء وهمى


كما اتفق معك فى وجوب معاقبة المخطىء دون الاعتبار الى جنس او لون او دين

تحياتى

الجواز و سنينه يقول...

اولا الموضوع مكتوب حلو
بـــــــــــس
احب اختلف معاكى
لان المشكله فى نهى انها كانت عامله قضيه تحرش لحد تانى و اخدت حكم و تعويض يعنى من اول سابقه ليها
يمكن متعقده و حالفه لاى واحد يلمسها تسجنه تلموضع فيه علامات استفهام كبيره مش بس خاصه بالجنسيه دى خاصه بيها هيه شخصيا
و على فكره لسه فيه رجاله
زى ما فيه شارع الهرم اللى فيه ستات مش كويسه فيه ستات منقبات و محجبات و غايه فى التدين
بس دايما الوحش هو اللى بيبان

فشكووول يقول...

فيه ايه يا سوسه ..انت مكسله ليه .. قومى بقى اعملى بوست جديد وبلاش كسل .. يالله يا شيخه شدى حيلك وقولى لنا على الجديد عندك .. سلام

فشكووول يقول...

ما علهش يا سوسه انا ماقريتش التعليق انا كنت فاكر انه نفس الموضوع وبعدين وانا اقرأ التعليقات حسيت ان فيه جديد فرجعت وقريت .. بس انا مش عارف موضوع ناديه رشدى اللى من اللى كتبتيه ودا ما يدينيش فرصه للتعليق .. لكن برضه مستنيين ابداعاتك

mohamed يقول...

موضوع نهى معاكي حأ فيه .موضوع الرجاله ده معاكي حأين مش حأ واحد فيه