• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الخميس، 9 أكتوبر، 2008

خطاب نسائي أول


تعلن اذاعة ميس سوسة العنكوبتيه

عن انضمام كل الاذاعات الحشرية الزاحفة الساعه العاشرة مساءا في اليوم العاشر من الشهر العاشر الميلادي (بمشيئة الله تعالى) بجوار بوتيك جي جي.
لننقل لكم علي الهواء مباشرة الخطاب النسائي الاول في تاريخ كل الجماعات النسائية
فانتظرونــــا ...
----
ملحوظة : وانت داخل كليك بالماوس عشر كليكات وقول عشر مرات (تحيا الستات) .
ويمنع حيازة اي اسلحة بيضاء او سوداء او نبوتات.
----
اليوم 10/10 الساعــ 10ـــة

سيداتي /أنساتي /....
تطل عليكم اليوم فخامة الانسة سوسة الفلحوسة ( قصيرة القوام .. طويلة اللسان .. قوية الحجة والبيان .. يبعدها عن الموريستان ويرزقها بعريس جنان هاي هيء) لتلقي خطابها النسائي الاول لتوضيح اهداف ومباديء الجمعية (جمعية لا للعنوسة والتي لا تضم سوى مؤسستها الموكوسة) علشان نبقى علي نور وما يتحشرش فينا نحلة ولا دبور .

لما طلعت جمعيات تحرير المرأة
(ولازلت اجهل مين اللي احتلها ومين اللي حررها وفين وازاي الكلام ده يحصل من ورايا )
سمعت انهم نادوا بشوية حاجات غريبة لا تعبر عني ولا عن الكثيرات فشوية ينادوا بعمل المرأة
(وانا مش عايزة اشتغل اصلا ومنه لله اللي نزلنا من بيوتنا ومرمطنا في المواصلات)
وشوية يقولوا المساواة بين الرجل والمرأة ولازم تحطي راسك براسه
(وانا ماليش في حرب الرووس ولا الامريكان ديه وما فيش احسن من حطة راسي علي مخدتي )
وشوية يقولك نشتغل قضاة وشوية مأذونة وشوية يقولك ينسب الابن لامه
(ازاي يعني ينادوه في المدرسة يقولوله يا سمير يا بن سميرة والعيال تشتمه بأمه ؟! يشتموه بابوه آه يشتموه بأمه لأ... مش معقولة بصراحة ... ده انا حتي بازعل لما بيقولوا للمرشح ف الانتخابات يابن الدايرة )
وشوية مطالب هطلة وهرتلة فاضية لا تعبر عني ولا عن غيري ولكنها مطالب شخصية للي بتنادي بيها (والله أعلم) .
الا ما واحدة فيهم اتكلمت عن بركة البيت (الاب اللي زي قلته في البيت) وانه مالوش اي دور تربوي مع ولاده ولا عن الست الغلبانة الهلكانه شغل بره البيت وجواه ولا حتى طالبوا بمصروف يومي للدوريتوس والشيكولاته (نظبط دماغتنا من غير الجالاكسي والكادبوري ازاي يا هوووه).

من هنا وهناك ومن أجل كل هذا وذاك قررت اعمل مدونة اخبط فيها بايديه وادبدب برجليه واعبر عن مطالبي واشتكي من مجتمع ظالم (ذكورا واناثا) واليكم مباديء وسيكولوجياتي وايدولوجياتي واستراتيجياتي:

أولا : لما قولت لا للعنوسة فكانت (لأ) ذات محورين ..... محورين لا هم محور 26 يوليو ولا الدائري ....نصحي شوية
المحور الاول لا للعنوسة مصطلح ولقب .. فأنا ارفض مصطلح عنوسة وارفض لقب عانس واذا نظرنا في معجم التعجيز وجدنا عنست المرأة تعنس بالضم عنوساً ، و عناساً و تأطرت ، و هي عانس من نسوة عنس و عوانس و عنست وهي معنس و عنسها أهلها حبسوها عن الأزواج حتى جازت فتاء السن ولما تعجز (والجدع ينزل بالترجمة ... وبالمرة يبعتهالي الهي يستره )

اما قاموس آه يا لالالي لابن اللالي فيقول ان عنست اي تأخرت في الزواج حتى جاوزت سن معين وهذا يختلف من بلد لاخر واما الرجال فمن يتأخر في الزواج فيطلق عليه عازب وليس عانس

وهنا اعترض واحتج علي عانس لغويا لانه اسم فاعل... وهي في الحقيقة مفعول به مغلوبة علي امرها وليس لها ذنب ولا جريرة في تأخر زواجها

واشجب واندد وادبدب للتفرقة العنصرية اللفظية باطلاق لقب عازب وهو لقب ممتد لكل من لم يتزوج من الرجال بغض النظر تأخر ام لا بينما اطلاق العديد من الالقاب علي البنت الاول انسة وبعد كدا عانسة وهو لقب ثقيل علي النفس والودن كمان ... ولو سيبنا روحنا لحكاية الالقاب دي بقي مش هنخلص .. علشان هنبقي محتاجين نخترع لقب لكل اللي اتأخرت في الحمل واللي اتأخرت في دراستها و اللي اتاخرت عند الكوافير ... الخ
ده بقي يا حلوين اسمه تحيز مجتمعي لغوي للرجالة و قال ايه كمان مبيعترفوش بعنوسة الرجل(ويقولك الرجل ما بيعنسش).....لا بقي ده الراجل بيعنس و بيسوس وبيحمض كمان ... لابجد مجتمع ظالم متحيز بيوأد نفسية المرأة و بيحاصرها بالالقاب البايخة ولما توصل للاربعين بيحشها ذي ماتكون عشب ضارة او زي حصان الحكومة اللي بيضروبه بالنار فى نهاية الخدمة ( ما هو اخرة خدمة الغز علقة)
وبعدين ذنبها ايه اللي اتاخر جوازها ؟!
و تأخيرها ده معناه ان مفيش راجل عدل فيكي يا بلد وانكم غير كفء لها.... ولا هو كل مصيبة لازم يبقي احنا اللي وراها وكل العيوب والنواقص ما تتلزقش الا فينا .. هي اللي خرجت ادم من الجنة .. وهي اللي سلطت قابيل يقتل هابيل .. وهي اللي قالت لاحمد عز احتكر الحديد ... الخ

وأما المحور الثاني في لا للعنوسة

عبارة عن نصايح يمكن بسببها تقدر تتجنب طابور الانتظار (البلد دي مش ناقصة طوابير يا اخوانا ) ونصايح يمكن تخرجها من بير الاكتئاب وتضييع عمرها ف الهوا في انتظار الفارس المشلول (جيتك يا عبد المعين تعني ....) اللي ممكن لو ماجاش يبقي نعمة ولو جه بطلعته البهية تبقي نايبة سودا عليها تشقي بيها طول عمرها لان ده نصيب والبطيخه يا تطلع حمرا يا تطلع ....زي ما انتوا عارفين بقي ... (والصنف كله مضروب اليومين دول) .. احنا كيان مستقل بذاته مش مستنيين ضل حيطة ولا سند (لكن نقبل بتبرع عيني او شيك معتمد ) ومابنقبلش بالفتات (الرجالة السكند هاند)
ولنعيش عيشة فل لنموت احنا الكل .. رافعين الشعار (قاعدة الخزانة ولا جوازة الندامة)
ومش معنى اننا اتأخرنا اننا هنلملم ... ولا نرمرم ..... هو وجع البطن ولا كب الطبيخ ولا ايه
لأ .. لأ .. لأ

و لكل من تسول له نفسه ويتجرأ علي سب المرأة المصرية ويفضل عليها الشيشانية ولا الشامية بنقوله اشبع بيها وهنستورد
رجالة صيني ......باتنين ونص ... وتعالي بص .. وعلي فكرة
ولا مجال للمنافسة
(ارخص وانضف و شعر ناعم زي الحرير مش الاسلاك الشائكة اللي في دماغكم وعقولكم).
وللسواد الاعظم المتنح ادام الستات السيليكون.... بنقوله البلدي يكسب مش ستات اكسبايرد (منتهية الصلاحية) عايشين ع الشد و النفخ .. وفى الصبر وطول النفس مفيش اطول منا وفى طولة اللسان برضو مفيش اطول منا
(المرأة المصرية .. ترايد مارك صدارة واحتكار .. في الصبر صبورة ولما يفيض بيها غولة)
ومش هنصوم نصوم ونفطر علي بصلة

لأ .. لأ .. لأ

لأ للرجل اللي بيلبس جذمة من غير شراب
(الراجل من غير شرابه مايسواش .. اقول لابني ايه لما يكبر و يقولي فين شراب بابا)
لأ للرجل اللي مابيقصش ضوافره
( أكل معاه علي سفرة واحدة ازاي يا ناس ده يجبلي دوسنتاريا انا والعيال .. وهيضيع مرتبي كله ع الديتول)
لأ للرجل اللي ما بيستحماش غير كل سنة مرة وجيرانه اشتكوا من ريحة رجله مليون مرة
(أمال اللي هتعيش معاه في شقة واحدة تعمل ايه)
لأ للمعزوفات التشخيرية
( ده حتي بيقولوا الليل سكن وامن يجي منين الامن مع الاصوات المرعبة ديه )

لأ .. لأ .. لأ

ولن اهتز .. ولن اُجتث .. ولن اتنحى
(تصفيق حاد )
شكرا .. شكرا ..
(مش عايزة هتاف خاص .... انا عايزة هتاف عام ...... يعيش البحر الاحمر المتوسط .... الله يرحمك يا ام حميدة ... كنتي ممشية الريس حنفي ع العجين مايلخبطوش .... وعمر ما كلمته ما فارقت الارض ابداااااااااااااااااااااااااا)

45 التعليقات:

mohamed ghalia يقول...

لازلنا فى انتظار الخطاب الأول

oRiGiNaL HeArT يقول...

هتقولو ايه
ها
هتقولو ايه
ههههههههههه

مستنين ان شاء الخطاب النسائى الاول (مع انى مش فاهمة اوى يعنى ايه)

مصري بالغربة يقول...

ايه الخطاب النسائي الاول ده

انتو عملتوا حزب العوانس ولا ايه؟
هههههههههههههههههههههه

semsem يقول...

ف انتظارك يا جميل:))

jehan يقول...

مش فاهمة يا سوسة

؟؟؟؟؟؟؟؟؟؟؟؟؟؟

عموما انا هستنى النهاردة واوشوف اية الموضوع

ابو على يقول...

خطاب ايه يا حجه

روحى اتفرجى على القناه التانيه هاتجيب فيلم اجنبى حلو النهارده

واحدة مفروسة يقول...

انا جيت قبل الميعاد ب 10 دقائق
و حمشي على طول
لحسن انا عارفاهم الستات اللى بيدوروا على عريس
ممكن يفجروا فى ام المدونة
انا يا ستى قاعدة فى مدونتى و حفوت عليكي بكرة
ان لاقيتك بخير حبقا ادورلك على عريس
و ان لاقيتك فجرتي الناس و المدونة
حجيبلك عيش و حلاوة فى سجن النيا
هههههههههههههههههه
او قرص فى مقابر الغفير
هههههههههههههههههههههه

بنت مصريه يقول...

الله اكبر
انا معاكى يا سوسه يلا
واياكش تولع
ههههههههههههههههههههههه

بوست عسل زيك احييكى

ليلا يقول...

رائع جدا جدا حزب النسائى العنوسى الجميل ده
بس فى بعض الاحيان بتكون العنوسه اكرم واحسن للوحده المتجوزه ومش سعيده فى حياتها مع ان الشخص ده كان فتى احلامها بس للاسف الحب بيخفى كل العيوب
زى ما بيقوله مراياة الحب عاميه
وتسمحيلى ان اضيفك الى قائمه المفله لبعض من المدونات
اختك ليالى

mony يقول...

(تصفييييق حااااد)



تصدقي يا سوسة
(هتصدقي انشاء الله)



و الله كلامك كله حكم


و الله مش بجاملك



بس دمك سكككككككر

nona يقول...

انا معكى انا معكى
مع انى متجوزة بس برضة معكى ههههههههههههههههههههههههه
كل كلامك صح و احنا ضدد الاى بينادى بالحرية و مساؤة المراءة انها تخرج و تشتغل
امال الرجالة بتعمل اية رجالة اخير زمن احنا نشتغل و هما ياخدوا على الجاهز
و كمان نرفض لقب عانس اية عانس دية دة حتى الالفاظ سعد يا اختى بس مش سعد الصغير
دمك و كلامك زاى العثل يا عثل

kochia يقول...

بوست جامد جامد جامد
وانا معلقتش الاول عشان مكنتش فاهمة كويس بس لما فهمت شكلي هكون من اكثر المتحمسين
وبجد انت قلتي المفيد
والكلام مظبوط تمام التمام
وهنتخبك الانتخابات الجاية بلا منافس
وعلي رايك
الله يرحمك يا ام حميدة
ويكون ده من شعارات الحملة دي

esraa يقول...

ههههههههه

ممكن نستورد من تركيا بدل الصين؟

الطائر الحزين يقول...

عرفنا المواصفات المطلوبة وجارى تقديم طلب للاستيراد من الخارج

الطائر الحزين يقول...

لم أقرأ تعليق esraa??????!!!!!!

mohamed يقول...

الرجاله مش مفتريين أوي كده يا عم الحج

jehan يقول...

انا بشجع طلب اسراء ونبدل بدل الصين ونستورد من تركيا ههههههههههههههههههه

بس بجد انا تقريبا ما شفتش واحدة متجوزة الا وتقول للانسات الى لسة مش اتجوزا خليكوا كدة افضل بلاا جواز بلا هم هههههههههههههه

شكل الرجالة بتطلع مضروبة بعد الجواز ههههههههه

kareem يقول...

نعمل ايه تاني يا ست الكل

جبنا شقق و عربيات و شبكه
و دفعنا مهر
و عملنا افراح



و في الاخر اصحي الاقي نعيمه الصغير نايمه جنبي



و في الاخر طالع دين الي خلفونا في الاقسام و محكمه الاسره و التهريج ده

الازهرى يقول...

لا مؤاخذة يا جماعه
اصلى كنت معدى بالصدفة ولقيتم قاعدين قلت اسلم وبعدين لقين الموضوع مطروح

لكن عندى سؤال
هو مش الريس جمال اطال الله عمره بعد ما قام بالثورة السنة اللى فاتت

الغى الالقاب ؟ ولا ايه نورونا


تحياتى على الموضوع الجميل واضم صوتى الى صوتك

mohamed ghalia يقول...

متفق معاكى تماما من حقكك تختارى بحرية وترفظى تدخلات المجتمع وألفاظة وإضهاده ونظرته للفئة دى كأنى ده بمزاجهم.
اللهم عف بنات المسلمين واحفظهم من كل سوء
تحياتى ومتشكرين على الإبتسامه إلى رسمتيها على وجهنا من اسلوبك الرائع الساخر
دمتى بود

الهمام يقول...

ودي آخره الي ما بسمعوش الكلام ..بالضبط زي ما بتقولي حضرتك تمام.

د/ رامي شهاب الدين يقول...

رائع يامس سوسة والله

مقال ساخر ملوش حل ..وزى ما اتفقنا من الموضوع الجميل إللى فات ساخر يعنى حاجة زى الخيال العلمى كدة

أنا ليا بس تعقيب بسيط على موقف أم حميدة إللى ماكانتشى كلمتها بتنزل الأرض أبدا .. الست حميدة دى ما إنظبطتشى إلا لما أخدت ألم على وشها .. فاكراه؟..قصدى يعنى فاكرة الألم ده.؟

دا غير إن الست إللى بستشتهدى بيها كانت نكتة من ضمن نكت الفيلم الكوميدى ، وأنا شخصيا ما اقبلشى إن أى ست عموما تبقى نكتة أو حتى متسلطة وراجل زى مدام حنفى شيخ الصيادين

وسلمى لى على النورماندى تو ..هى صحيح نورماندى ثرى مش ناوية تبان بقى؟؟

دمتى بكل خير .. تحياتى

hager يقول...

هههههههههههههههههه
ممكن اصقف جامد جدااا
الاسلوب راائع والفكره روعه بجد مفيش كلمه مناسبه

خواطر ليست عابرة يقول...

مدونتك ظريفة فعلا ودمها خفيف للغاية
قد يكون مجتمعنا فعلا مجتمع ذكوري
لكن ألا تتفقي معي في كون المرأة في مجتمعنا هي الأخري مسئولة عن تعزيز هذه الذكورية في المجتمع المصري

لا تنسي أن توجهي لي الدعوة لحضور أو قراءة أو سماع هذا الخطاب
شكرا علي خفة ظلك التي جلتني مبتسما طول قراءتي لمدونتك
ميدو خواطر /

المهاجر يقول...

طيب بالله عليكي مش حرام ...انا عايز اجوز اروح الاقي كل البنات معنسه كده ...راح اعنس واطنش انا كمان..

rovy يقول...

ايه ده كله يا قمر ..

بوست جامد بجد ..

و ادينا معاكى مستنين نشوف اخرتها



ودى و تحياتى

Geo Amr يقول...

البوست رائع جداااااااااااااا بجد عجبنى جدااااااااااااااااااااااا وشدنى قوووووووووى اسلوبك الساخر رائع جداااااااااا وفعلا انا برفض جدااااااااااااا لقب عانس لان السيدات مش بايدهم حاجة وفى سيدات كتير مش متزوجين وبجد نجاحين جدااااا موضوع المساواة بين الراجل والمراة الاسلام اول من كفل الموضوع دة بس بردة فى فروق بين الراجل والمراة يعنى مش ينفع نقول اننا المراة تقدر تشتغل اى حاجة ممكن يشتغلها الراجل لانى ربنا خلق كل واحد ليه الحاجات الى يقدر يعملها يعنى سيادت تعمل حاجات الراجل مش يقدر يعملها يعنى فى فروق بين الراجل والمراة واسف على الاطالة
وكل سنة وانتى طيبة

وجه جديد د.أحمد عثمان يقول...

بوست رائع
فوق الوصف

انا معاكي
في كلا المحورين

و مؤيد للاءاتك الاخيرة
عشان يبقى شهد شاهد من اهله


لك التحية

شهد الكلمات يقول...

ستنتنتنضموا الاذاعة المحلية الي اذاعة البي بي سي

هنا البي بي سي ان ان اااان
هنا البي بي سي ان ان اااااااااان
هنـــــــا البي بي سي
بقي للمدونين جروب ع الفيس بوك يا رجالة

شرفونا و نورونا بالزيارة و المشاركة
جروب خمسة تدوين
http://www.facebook.com/group.php?gid=31035659947

جروب لكل المدونين و محبي التدوين
هانلعب و نناقش و نعمل نشاط اجتماعي
عايزة حماس و نشاط و الاقي ناس بالميات و الالف واقفة علي باب الجروب عايزة تدخل
يالا مش ها كتر مستنياكم هناك

تحياتي

SuPeR_mAz يقول...

احيكى على خفة الدم اللذيذة اللى فى الخطاب
اكيد المستمعين نفسهم الخطابات كلها تبقى كده

و الله انا عندى حل متواضع و اطرح قبل كده....المشكلة (لو هى مشكلة) ان البنت مش لاقية عريس كويس..و حتى لو محترم و كفاءة بيكون محلتوش اللاضا...ليه...عشان مش لاقى شغل...يبقى البطالة عامل اساسى....يبقى نوفر فرص عمل (عشم ابليس فى الجنة)...خلاص...يبقى الستات يقعدوا فى بيوتهم و الرجالة يشتغلوا مكانهم....بجد....و الراجل يقبض مرتبين...مرتب لشغله و مرتب لمراته (ماهى برضه شغالة فى البيت ولا النحلة) و كده الازواج (الرجالة مش حاجة تانية) هايشتغلوا و الستات تتجوز و ترتاح متعززة فى بيوتهم
و كما اعتادت سمية زميلة البلوج ان تقول "ربنا خلق الستات,عشان يرتاحو و الرجالة يتعبوا من سكات"

حاسوباتيه يقول...

معاكي معاكي ياسوسه اني عسوله خاااااااااالص وكل كلامك صح

كباريه يقول...

يارب جوز كل البنات ===يارب وأرزقهم بشباب زي الفل وحل لهم كل مشاكلهم يارب

osama يقول...

ههههههههههه
يانهار ازرق انا حاسس انى قريت 3 كتب ورا بعض
اولا:انا موت من الضحك وانا بقرأ البوست
ثانيا: رغم السخريه الشديده الا ان البوست موضوعى جدا جدا
ثالثا: لا انصحك بالاعتماد على الرجل الصينى لانه يحترق سريعا
هههههههههههههههههههههههههه

شفقة هانم واحسان بك يقول...

ايه الخطب دى يا لهوى عليكى يا سوسة فظيعة بس برافو عليكى انضمتى للحزب بتاعى فلتحيا الستات
دانا ههتف واصقف لحد ما ايدى تورم
وربنا يخليكى للغلابة العانسات اقصد اللى لسه ملسعوش واتجوزوا
البوست تحفة كالعادة

شهد الكلمات يقول...

انا معاكي يا سوسة قاعدة الخزانة ولا جوازة الندامة

الكحيان يقول...

والله ياست سوسة أنا لا أتمالك من الضحك. حقيقي أنت مدهشة، أدميتنا وأضحتنافي آن واحد، كلامك اعتصر جروحنا بقوة. المفاهيم الآن اختلت كثيرا واضطربت لدى الرجال والنساء على السواء. المجتمع يبالغ في أمور الزواج مبالغات عجيبة وغريبة ويخترع أمورا معرقلة يتمظهر بها رغم فقره المدقع - 90 بالمئة منهم كحيانون من أرباب الطوابير- والشباب لما يرونه من مظاهر مادية خيالية في الكليبات والنت والدش ركن إلى الجمال الزائف، فاجتمع الطموح الزائف مع قلة ذات اليد وقلة الحيلة هذا فضلا عن العراقيل الاجتماعية التي تقف وراءها المرأة بقوة فكانت العنوسة لكلا الطرفين، وأطمئنك أن كلمة عانس ذات الجرس القبيح، تستعمل للرجل والمرأة على السواءقال الشاعر:
فإني على ما كنتُ تَعهَدُ بيننا
وَليدين حتى أنت أشْمَطُ عانس

وانظري تاج العروس ولسان العرب وإصلاح المنطق لابن السكيت وغير ذلك من المعاجم. شكرا لك

My Hope$ يقول...

علي رايك ياسوسة
الواحد قاعد في بيتة
معزز مكرم

يروح لية لاي جوازة
باسم ضل راجل


لا الحيطة ساعات بتقي احسن
وفعلا

ياسوسة لما الستات بقت متساوية بالراجل
الراجل
قال احد دور الست
اقعد ف البيت
وهي تصرف شوية
بقي

وحتي مش بيربي العيال
اهو قاعد غلاثة وخلاص


مدونة جميلة
الي الامام

ويانعيش عشية فل يانموت احنا الكل
ههههههههههه


سلام

fashkool يقول...

الله الله الله .. ايه ده يا مس سوسه .. والله انا لو كنت جيت متأخر 20 سنه ما كنت سايبك انت زى العسل ودمك زى السكر هما الرجاله اتعموا ولا ايه .. فيه بنت برجاحة العقل ده وبالفكر العالى ده تبقى عانس .. انا اشك يا سوسه!!وانا من الحزب بتاعك .. بس كدا احسن من اللملمه والرمرمه بصراحه الرجاله اليومين دول كلهم اونطه تايوانى ما وشكلهم يسد النفس وزى ما كل حاجه بقت صينى ايه يعنى لو نستورد رجاله صينى .. انا معاك ... بس انت بتضحكى علينا فيه واحده زيك تبقى عانس .. يا شيييييخه. وساهتف معك .. يعيش البحر المتوسط .. يعيش السمك فى الماء .. وايضا عاش الزعيم سعد زغلول.

fashkool يقول...

على فكره انا نسيت اعلق على الخطاب
اولا : ما معنى ان ينادى المرء بامه : هل حدث هذا فى بلاد الغرب .. اشمعنى يعنى احنا اللى قاعدين نخترع ونفتكس
ثانيا : هل الراجل واخد حقه .. لا طبعا الراجل زى المرأه واخد على دماغه بالجزمه .. ما حدش واخد حقه اليومين دول .. وبعدين هما عاملين ليه مشكله بين الراجل والمرأه .. كنا زمان نقسم المجتمع الى طبقه متوسطه .. طبقه عاليه .. طبقه زى الزفت .. ح نقسم المجتمع الآن الى رجل وامرأه ونعلنها حرب شعواء بين الرجل والمرأه .. اشم رائحه محاولة تفكيك صلابة المجتمع المصرى .. ولو انه متفكك ومتنيل على عينه ومش ناقص.. وعلى فكره الستات اللى بيستضيفوهم فى الفضائيات عشان يتكلموا عن حقوق المرأه .. احسن يتكلموا عن حقوق المجتمع المصرى .. مرأه ورجل .. مع الاحاطه بأن المرأه على عينى وراسى المبطوحه من ضرب مراتى فى.. هو انا اقدر اتكلم.

Akram يقول...
أزال المؤلف هذا التعليق.
Akram يقول...

أنا عملت كومينت هنا طويلة عريضة و بعد ما كنت شفتها بعيني اختفت، هو انتي بتحطي اللي علي مزاجك و اللي مش علي مزاجك باي باي ولا ايه؟؟؟

Miss. Sosa يقول...

استاذي الفاضل akram

نعم حذفت تعليق حضرتك الطويل العريض وده اول حذف اقوم به منذ انشأت المدونة لانه غير موضوعي ونقد لشخص كاتبة البوست وليس للبوست .. وهذا ليس من حقك ولا من حق اي زائر فاضل .. لانكم جميعا لا تعلمون شيء عني ولا عن حياتي الشخصية .. وانا لا امثل لكم سوى علامة استفهام في عالم افتراضي .

ثانيا اين بروفايل حضرتك او لينك مدونتك ؟ طالما اعطيت لنفسك الحق في نقدي اعتقد انا كمان لي الحق في نقد ما تسطره يدك وطالما هو غير متاح لي فتعليقك ايضا غير متاح عندي .

ثالثا : انا اتعجب من تكرار الزيارة بعدما اتهمتني بالرغي والتفاهة بصراحة انا لو مكانك لن اضيع وقتي وجهدي في كتابة تعليق صفحتين لانسانه تافهة .

رابعا واخيرا : صاحبة السبيل (الكولدير) كما وصفتني تدير كودليرها باقتدار وتقصي من سيلوث الكولدير بامراضه واوبئته

تحياتي

Akram يقول...

سوسة، انتي بتقولي مسحتي الكومينت بتاعي عشان غير موضوعي ونقد لشخص كاتبة البوست وليس للبوست، يا شيخة بالذمة برضة غير موضوعي، ده أول سطرين بس هما اللي ليكي و اخر سطرين، و كل الكلام الطويل العريض اللي ف النص تقريبا هو هو الموضوع الجديد بتاعك بتاع الهدنة، تفتكري صدفة؟؟؟ يمكن...
قولتيلي كمان اين بروفايل حضرتك او لينك مدونتك ؟ طالما اعطيت لنفسك الحق في نقدي اعتقد انا كمان لي الحق في نقد ما تسطره يدك وطالما هو غير متاح لي فتعليقك ايضا غير متاح عندي ... علي فكرة يا سوسة البلوجز مش موضة زي الفيديو جيمز و محلات النت و كل حاجة شعبنا بيمشي وراها لحد ما يطلع حاجة غيرها، مش لازم عشان طلعت هوجه أي حد يعمل مدونة يبقي تفترضي ان كل الناس ماشية بتدون علي نفسها.. و بالنسبة لموضوع انك مش عاوزة تسمعي نقد حد ما دام مش قادرة تنقدية انتي كمان، بصراحة مبدأ من كتر ماهو غريب مش لاقيلوا رد...
قولتيلي كمان انا اتعجب من تكرار الزيارة بعدما اتهمتني بالرغي والتفاهة بصراحة انا لو مكانك لن اضيع وقتي وجهدي في كتابة تعليق صفحتين لانسانه تافهة، علي فكرة أنا قلت رغاية بس مقولتش تافهه، كده تاني حاجه تقولي اني كتبتها و محصلش، و بالنسبة لتضييع الوقت في الكتابة مع واحدة تافهة، متقلقيش انا مش بدخل عند أي حد الا لما بيكون العملية هادية في الشغل أو بكون ف البيت، يعني بتسلي لما أكون فاضي و عارف امتي أدخل و امتي في الاهم، و برضة مش علي واحدة تافهه عشان أنا مقلتش تافهه...
قولتي كمان صاحبة السبيل (الكولدير) كما وصفتني تدير كودليرها باقتدار وتقصي من سيلوث الكولدير بامراضه واوبئته!!! علي فكرة يا سوسة كده كده الميه ملوثة من و هي لسه في المواسير و غير صالحة للشرب بشهادة ظابط مهندس أعرفه كان حلل عينة من مياه الحنفية في معامل الجيش، و حنروح بعيد ليه، املي ازازة ميه و اركينيها 3 أيام و بعد كده اتفرجي علي اللي حتشوفيه في القعر... نصيحة بدل الكولدير ابقي وزعي مياة نستله (والتاء سايلنت طبعا)، أنا بشرب منها لما بكون في مصر، و علي فكرة مش لازم تنشري الرد و أنا بعتذر علي أي حال بوصفك بالرغاية...

Miss. Sosa يقول...

استاذي الفاضل akram

اولا انا بشكرك لتكرار الزيارة

ثانيا اذا كان الهدف من تعليق حضرتك الاول هو النصح وابداء وجهة نظر معارضة .. فاحب ابلغ حضرتك اني رغم اني قومت بحذف الكومنت للغته الحادة واللي حسيت فيها بنوع من التهكم والاستهانة بالكاتب الا اني حفظته عندي ع الورد باسم nice comment

ثالثا انا كنت هرد عليه رد مطول وعلي كل فقرة الا ان المقربيين نصحوني اني ابعد عن الجدال وخصوصا ان كلامك بعيد عن واقعي فيما ذكرته باني رغاية ومن البنات اللي بتتكلم كتير ومفييش غير لسان .

رابعا : نصف التعليق الاخير هو اللي كان موضوعي من اول (ولو علي الرجالة)
والرأي اللي عجبك واستشهدت بيه من اللي سبقوك في التعليق هو رأي رجل مطلق فبديهي هو ناقم علي كل بنات حوا .. وواضح انكم اجتمعتوا علي شيء

خامسا : استيائك من عدم ردي علي الكومنتات .. لا يد لي فيه .. واذا كنت حضرتك بتدخل المدونات تسلية فانا كمان مش متفرغة لها فانا بدرس وبشتغل ولو لاحظت انا بنزل بوست كل اسبوع او كل 10 ايام ومفيش وقت ارد علي تعليقات الناس .. و 99.9% من التعليقات مؤيدة ولو في رأي مخالف بس عرض رأيه بشكل لائق غير جارح فبرد عليه

سادسا : تعليق حضرتك مالوش علاقة بالبوست الجديد .. انت بتتكلم عن افضال الرجالة علينا وكفاية اوي انكم بتنقذونا من لقب عانس ومفرحينا وسعدنا و مهنينا (مش عارفة نودي افضالكم علينا فين ) .. وفي النص التاني قولت ان الراجل كمان لازم يتق الله فيها ومايعاملهاش علي انها اقل منه
.. اعتقد انا بتكلم عن اسباب الطلاق مش علي افضال كلا الطرفين علي الاخر ..وقولت صراحة في البوست اني كتبته تأثرا بمدونات يوميات مطلق .. وعايزة اتطلق .. و مطلقة .. لكن ماحطتش لينكاتهم لعدم جرح مشاعرهم والبعض منهم متابع لمدونتي .. وعلي فكرة انا بكتب بوستاتي في اجازة الصيف علشان ببقي اجازة من الشغل مع الطلبة وبنشر بوستاتي مع قليل من التعديل باقي السنة .. وعلي فكرة في عندي 5 بوستات لسه مااتنشروش .

سابعا: اعتقد لو انسان وجه نقد لاذع ليك فيبقي من حقك علي الاقل تعرف ماهية الشخص ده .. يمكن واحد فاشل ولا سفيه ولا معتوه .. فتقدر تخاطبه علي قدر عقله .. وحضرتك غير متاح البروفايل فانا مش عارفة اخاطب حضرتك باي طريقة ولا باي اسلوب

ثامنا : ياسيدي الفاضل اذا كانت تطبيقات الانترنت سواء شات .. منتديات .. مدونات .. الخ هي موضة عند البعض فانا مش من متبعي الموضة وانا استخدم اداة هي لب تخصصي وعملي ودراستي والمدونة بالنسبة لي مساحة اعبر فيها عن رأي لاني لا اتحدث الا قوانين علمية بحته في حياتي العامة

اخيرا اشكر حضرتك علي مرورك وعلي اهتمامك بالرد والتعليق

تحياتي وتقديري

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘