• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

السبت، 4 أكتوبر 2008

ادي أخرة الجواز

قالت الحكيمة أمينة (ربة الحنطور و الجردل) :
هاكنس .. وامسح .. والمع
اطبخ .. واخرَط .. واقمع
ده انا كنت في بيتنا بنام براحتنا في اي ميعاد
دلوقت بقوم من عز النوم اغير للواد
واقول اسكت ياه.. واقول اسكت يا بت
وادلع في الواد واهشك في البت
لا واكنس .. وامسح .. والمع
واطبخ .. واخرَط .. واقمع
-------
بعد ما دوشتكم بقصة حياتي قررت اقدملكم خلاصة تجاربي ومش هرحمكم برضو من حكاياتي من آن لاخر (هتروحوا مني فين).. فمن واقع حياتي الطويلة وتجاربي الكتيرة ورغم اني لسه مااتجوزتش وسامعة واحد حشري مندس بيقول طيب ماتنصحي نفسك يا فالحة بقوله
أدركت كنهها طيور الروابي فمن العار ان تظل مغفلا مخبولا ..
وروابي دي مش السمنة يا فالح ...... ميبقاش همك علي بطنك ..... مش كله علي بقك كده
عموما في ناس بتقول ان الجواز نعمه واللي يرفصها يعمي .....انا قلت أعمل باصلي واعرفكم الطريق الي ايلات ارض المتفجرات ( الجواز) ..
بس فيه حاجه لابد منها قبل ماانصحكم
وده برده للأمانة العلمية وعلشان ما أبقاش غررت بيكم وترجعوا تقولوا ضحكتي علينا ودبستينا وجوزتينا وترجعوا تقولوا انتي السبب - اه اصل انا في فرحكم ابص وارجع وفي حزنكم ليه التلات والاربع - هنوَركم وهأسبل افضالي عليكم (أفتكروها) وهقولكم مساؤي الاحتلال (الجواز) ولو فشلت الجوازة........ ماتقلقوش هتلاقوا وقتها مدونة الطريق الي الخلع مستنياكم.

عزيزتي الشابة عزيزتي الفتاة / الجواز مش املة مش املة خالص واليكم التالي :

صدق الحكيم هاني شنوده واعوانه لما قال وماتحسبوش يا بنات ان الجواز راحة ..... عمر الجواز عمره .... عمره ماكان راحة
والعبارة الاخيرة ديه خليها ردّ و بولد واندرلاين وفونت سايز 60 وخلي المشاريب علي حسابي
لكن نقول لمين احنا اللي غاويين شقا وبنجيبه لنفسنا وبندور ع الهم بمنكاش

الجواز يا عزيزتي يعني انك تبقي غسالة ايديال زانوسي 20 برنامج ومكنسة ناشيونال ياباني 2200 وات وغسالة اطباق هاير 4 برنامج وطباخة بريمو وخياطة ومرضعة ودادة ومربية ومدرسة كل ده في اوقات العمل غير الرسمية وفي المساء والسهرة بعد ما تتهدي وتتخمدي يجي المنيل علي عينه ... المخفي جوزك
نافش ريشه عامل فيها اسد وهو اصلا شبه الفرخة اللي عندها هااااتسي بتاع الطيور بعد ما قضى الامسيه الشيشية على قهوة الاشرار ودماغة مستـّفة وبيطق من عينيه الشرار واول ما يدخل باب الشقة يرزعه برجله وينادي يااااااااا بـــــت .. انتي يا ولية قومي حضريلي العشا ولو اشتكيتي او تذمرتي يقولك مش اد الجواز بتتجوزوا ليه ويفضل يسمم فيكي وهي دي كوابيس قبل النوم .. ولو اتهورتي ورديتي عليه فحتما ولابد يسيب بصمته علي جسمك الكريم للذكري الهباب وايام العذاب وهي دي الرومانسية على مذهب اللمبي.
------------

في الايام الخوالي ايام ما كان القلب مرتاح والفكر خالي كنتي عارفة ان اللي تحت ديه رجلك واللي فوق راسك .. لما تعوزي تنامي بتروحي تنامي علي سريرك الناعم الجميل وتحلمي احلام سعيدة وتعيشي في خيالك متهنية وسعيدة . بعد الجواز ووسط الزخم الهائل من الشغل والمسئوليات والضرب والاهانات مش هتعرفي فتحة بوقك من مناخيرك وهتبقي اغلب الوقت دايزي (زي الفرخة الدايخة) ودماغك بتطن ومابتناميش الا مغمن عليكي في أي حته غالبا في ارضية المطبخ او في الحمام لان دول الاماكن اللي هينحصر تواجدك فيها بعدما احتل هولاكو ابو العيال اوضة النوم وطفشك بمعزوفاته التشخيرية السابعة والتامنة والعاشرة .
---------
هيظهر لك كائن عجيب اسمه حما او حمة وده العلاقة بينك وبينه هتبقي زي العلاقة بين فلسطين واسرائيل بالظبط الاتنين مقتنعين ان القدس بتاعتهم ونازلين ضرب في بعض بس انتي مسكينه يدوبك هتحدفى بالطوب وهي هتحدفك بمدافع رشاشة والبقاء للاقوي نفس النزاع والاشكالية ديه هتقوم على حبيب الماما وهتحاربك حماتك وتنغص عيشتك بشتى الطرق علشان تطفشك وتسترد ننوس عين امه المحتل.
------------
زمان قبل النكسة (ده غير بتاعت 67) كنتي كغصن البان ..ممشوقة القوام .. زهرة يانعة مشرقة فواحة العطر زاهية الالوان .. ولما طالتك يد العدوان (جوزك) هتدبلي وتبهتي وريحتك هتبقي كراوية وحلبة وينسون وايدك هتشقق من غسل الصحون ونظرك هيروح من رائحة البامبرز والكوافيل ووزنك هيضرب بعد ما قررتي تفشي غليلك في الاكل
وهنا هيلجأ ابو العيال للدش (ده لو محترم) ويفضل متنح ادام هيفا واليسا ونانسي ويفضل فاتح بقه زي الاهبل .. ويسمم بدنك في الرايحة والجاية ويقول في حسرة جتنا نيلة في حظنا الهباب.
اما لو مش محترم فهيسرح علي حل صلعته ولو اتكلمتي كل البشرية هتدينك زي صدام وتقولك ماانتي اللي ماعملتيش الهوم ورك .
------
قبل النكسة (الماضى لا يـُنسي) كان ليكي اصحاب وشلة بتخرجوا تتفسحوا وتتغدوا وعايشين حياتكم .. بعد الاحتلال الغاشم هتتقلص كل علاقاتك وصداقاتك ومش هيبقي في حياتك غير كائن اوحد اسمه المحروس جوزك وشوية عيال مزعجة شابكين في رقبتك واللي متعلق ف ديلك وعاملين بيمصوا في دمك هم وابوهم وانسي بقي حاجة اسمها بيتزا وماك وميلك شيك وكفاية عليكي البصل اللي بتقشريه كل يوم.
------
قبل النكسة (أو الوكسة) كنتي مثقفة وبتقرأي جرايد وتتفرجي علي الجزيرة ومتابعة العالم بيروح فين ويجي منين .. بعد النكسة هتبقي كهفية الميول اثرية المعرفة وهتتوقف ثقافتك عند يوم زفافك وهتنحصر مشاهدتك للتلفزيون على توم اند جيري واونكل بارني وماذا تطبخ هذا المساء .
-----
قبل النكسة (صحيح كل سنة وانتم طيبين بنصر اكتوبر ) كنتي بتروحي شغلك في الميعاد شيك فريش نشيطة كلك حماس وتركيز بعد النكسة ممكن تلاقي نفسك ببيجامة البيت في الشغل او لابسة التي شيرت بالمقلوب ومكلفته شعرك بطرحة بعد ما كنتي بتتفنني في ربطة حجابك واول ما تلمسي مكتبك تنامي عليه وتستنطعي علي زميلاتك يعملولك شغلك وتزوغي قبل ميعاد الانصراف (ده لو انتي مدردحة) اما لو خيبة فاستلمي تهزيء وخناق كل يوم مع مديرك المباشر وغير المباشر وفراشين المصلحة والكل يقولك مش اد الشغل بتشتغلوا ليه ؟ّّ!
------
انا كدا خلاص عملت اللي عليه وقلبي ارتاح وعرفتك مصيرك واخرة سكتك ولو لسه مصرة استنيني الحلقة الجاية علشان نفتح الباب ونعلـّي الجواب ونشرب الشربات.
وكان بدري عليكي عليكي بدري ..تتجوزي وتفوتينا بدرى
كان بدري عليكي تدخلي دنيا يا صغيرة وفى عز شبابك
ما شبعتيش شيبسي وجهينه كان بدري يوم كتب كتاب
آه آه
ياللى فى جوزك اتسكّيتي
آه آه
ياللي على عيالك اتكَفيتي
آه آه

39 التعليقات:

Hope يقول...

ولسه يا ناس هافرح
مالقتليش مطرح
غير مع المواعييييييين والوقفة عل البوتاجاز

وادي اخرة الجواز


اغنية معبرة جدا جدا :-D

ojg يقول...

اومال انا قاعده جنب امي ليه؟؟

-قال يعني بمزاجي-

لا بجد

الجواز يأتي بما لا تشتهي المرأة ولا الرجل، إذا لما؟؟

عجبتني الأغنية الواقعية جدا دي
بس لسه في بلاوي تانيه في الجواز هستناها في الأغنية الجاية
بس تسلم إيديكي
:)

انا مين يقول...

بجد المدونة رائعة انا اول مرة ادخل هنا بس بجد مدونى رائعة وبجد تستحقي التقدير علي مجهودتك ده
وربنا يوافقك

Mahmoud البطراوى يقول...

كل سنه وانتى طييه انا بقالى كتير نسبيا غايب واول ما ارجع الاقيكى بتكرهى البنات فى الجواز .... لعلمك بقى مفيش ولا واحده هتاخد بنصايحك وهيعملوا زى عشره صعايده وقعوا ورا بعض فى نفس الحفره


سنه الحياه :D

mohamed ghalia يقول...

لالالالالالا متحاوليش برده البنات عايزة تتجوز طبخ وكنس ومسح وكل ده على قلبهم زى العسل . أنا بقول تخديها من قاصسرها وتغيرى موضوع المدونة ههههههههههههههههههههههه.
كل سنة وحضرتك طيبة
تقبلى تحياتى وإعجابى بأسلوب حضرتك

Mony يقول...

ههههههههه


دمك سكر يا سوسا



مش كنت قولتي بدري شوي
يجي 6 سنين كده ولا حاجة


انت عارفة

في الفرح بتاعي غنوا لي الاغنية بتاعة راية و سكينة
"الدور الدور يالي عليكي الدور"

الطائر الحزين يقول...

يا كبدى ولا حد بيسمع للكلام

بيقول انيس منصور

رجل سعيد لانه لم يتزوج
كان ممكن أن يكون أسعد لو ان اباه لم يتزوج

========
كل عام انت بخير

mostafa rayan يقول...

اولا:كل سنةوانتي طيبة
ثانيا : احب ان اسجل اعتراضي البالغ على هذه التدوينة الغاشمة فالزواج هو احلى شيئ في الدنيا والرجال هم الطف وارق مخلوقات الله في الأرض وعلى رأي المثل
اللي ابوها وامها يطردوها بيتها وحماتها يساعوها ويحضنوها

... amr يقول...

يعني ينفع تكوني رئيسة جمعية لا للعنوسة و تقولي الكلام دة ... دة كلام !!!!!


كل سنة و انتي طيبة

صغـنونـه يقول...

قبل ما تروحي الكوشه اسمعي النصيحه المهروشه ،وزورونا ك سنه مره ..تعرفوا ايه الي في الجره ..يااااايييييي

مطلق يقول...

الزواج هو مقبره الرجال حيث يتقلص دورالرجل في الحياه الي بنك و ودان بس

غير معرف يقول...

ممممممم الجواز شر بس لابد منة


وعلى راى الشاعر العريق
العريس ال فرحان ال بكرة لما يجيلوا عيال هيعيطولوة اليوم بطولة وهو يفضل بيهم رايح جاى اى اى اى اى

المصيبة انا عندى مثل غريب
الراجل زى البطيخة
لاطلعت حمرة
لا طلعت ........................

انا عايزة بطيختى حمرة ومرملة ادعولى لانى متعقدة

غير معرف يقول...

يختيييييييييييييييي
صلاة النبي أحسن
اديني اكتر اديني
وايه كمان يا حبيبتي وايه كمان

والمهم ان الكل عارف وباصم بالعشرة على صحة اللي قلتيه بس تقولي ايه؟

ومالها قاعدتنا ف بيت ابونا مسكونا حمونا بالليفة والصابون على رأي محمد صبحي :)

مها ميهوووو

شبــ اون لاين ـــاب يقول...

miss . sosa

و لا ممكن نرفع الالقاب و خلينا سوسا ع طول

زيارتك لينا اسعدتنا

و مدونتك جميله و ليها هدف معين
بس انا بجد مش عارف اقول رايي فى البوست

بس انا كل اللى حاسس بيه
ان فيه شئ من الاعتراض جوايا
وعد منى ان لما احس بيه عن طريه الكلام ح اجى ع طول و اقوله

بجد مدونه رائعه و مش حتبقى اخر مره اجى فيها

غير معرف يقول...

ههههههههه

حرام عليكى انا بردو بنعمل كل ده
دا اكيد اللى حصل معاها كده متجوزه جزار من سنه1930
بوست فوق الرائع
تحياتى ليكى

joker

شبـــ اون لاين ــاب

د/ رامي شهاب الدين يقول...

طبعا كلام مس سوسة كلمات زى العسل ..ده فى حالة تصنيفه كمقال ساخر ، حاجة كدة يعنى زى الخيال العلمى

لأن طبعا الجواز ده نعمة لاينكرها إلا جاحد ، وشئ حلال من منظور ديننا الإسلامى ، وما أظنش إن ربنا هيحلل لنا شئ فيه شقاء لنا .. ممكن يكون كلام مس سوسة صحيح ، ولكن فى حالات فردية قليلة ، وده ممكن نتفاداه بحسن الإختيار والتأنى فيه

شكرا مس سوسة على هذا المقال الفكاهى الظريف وربنا يوفقك فى محاربة العنوسة..دمتى بكل خير

تحياتى

ماء تشرين يقول...

لا لا يا سوسا
الجواز برضو ليه ميزات كتير وده لايمنع انو كلامك صح لكن كفايه انو الواحده تحقق اكبر حاجه في حياتهاانها بتكون اسره وتكون أم ومع احترامى لكل الكلام عن تحرير المرأه وعمل المرأه انا بشوف انو الانجاز الاهم في حياة المرأه وبعدين ومين ياعنى مبسوط صدقينى الانسان مش بيقنع لا المتجوز ولا المش متجوز
بس اسلوبك جامد بجد ومش معنى كلامى انى مش معاكى في القلتيه لا انت عندك حق طبعا بس شر لابد منه للعتبرات دينيه واجتماعيه
تحياتى ليكي اول زياره ومش هتكون الاخيره

الوردة البيضا يقول...

بسم الله ما شاء الله
ربنا يحبب فيكي خلقه أكتر واكتر. انتي فعلا تستاهلي يا سوسة لأن دمك زي العسل، بس انا متفقة مع الأخ عمرو اللي قال ان المقال ده لا يتفق مع كونك بتحاربي العنوسة
والا ايه؟
أحييكي على تلقائيتك ونجاحك في جذب اهتمام العديدين بمنتهى الذكاء، وكل سنة وانتي طيبة

mohamed يقول...

معتقدش انك مقتنعة بالكلام اللى انتى كاتباه ده يمكن انتى كانت تجاربك سيئة وربنا موفقكيش لغاية دالوقتى انك تلاقى عريس مناسب بس ربنا ان شاء الله هيكرمك بس قوللى يارب وبلاش الكلام ده

كراكيب يقول...

هع هع هع

اقولك على حاجة يا اوختشي
لما كنت في المصيف كنا قاعدين كدة على من اللي بيسموه كوفي شوب ده
وكان فيه تلافزيون كبييير اوي علطول مشغلينه على قناة مزيكا
لقينا كدة مرة واحدة خير اللهم اجعله خير فيديو كوليب جيه للمطربة الفحيحة النفيحة "امينة سواقة الحنطور"
وكانت بتتكلم برده على معاناة البنات في الجواز وطول الكوليب عمالة تمسح وتكنس
والكوليب كان برعاية "الهلال والنجمة" آآه والله يا اوختشي والنيعمة ما بكدب

هــع

miro el niro kwaniro

oRiGiNaL HeArT يقول...

هههههههههههه
مدونة جميلة اوى
وطريقة عرضك للمواضيع هايلة بصراحة

نيجى للجد بقى
بصى رغم انى مش مؤيدة بردو للجواز -على الاقل فى الفترة دى- بس حاسة انك متحاملة اوى على الحياة الزوجية
وواخدها الجوانب السلبية منها بس
يعنى مثلا







لجواز يا عزيزتي يعني انك تبقي غسالة ايديال زانوسي 20 برنامج ومكنسة ناشيونال ياباني 2200 وات وغسالة اطباق هاير 4 برنامج وطباخة بريمو وخياطة ومرضعة ودادة ومربية ومدرسة كل ده في اوقات العمل غير الرسمية وفي المساء والسهرة بعد ما تتهدي وتتخمدي يجي المنيل علي عينه ... المخفي جوزك





النقطة دى والنقط التانية انتى ليه واثقة ان دة بيحصل دايما
اه هو ممكن يحصل بس مش على طول الخط ومع كل الناس
وكمان لو فى بهدلة زى مانتى شايفة كدة فى شغل البيت وتربية العيال فاعتقد ان الام بتكون مبسوطة بتعبها دة لان ربنا خلق فيها كدة
ولا ايه
!!!!!

مدونتك حلوة اخر حاجة هبقى اجى هنا كتير :)

nona يقول...

يا بنتى خليهم يتجوزو اشمعنا احنا اتجوزنا
اوعى حد يصدق الكلام دة يا بنات هى بتخوفكم بس هههههههههههههههههههههه

على فكرة شكل حد هيبلغ عنك و يقولوا انك السبب فى ارتفاع نسبة العنوسة فى مصر خلى بالك من نفسك
البوست ممتاز و دمة زاى العسل
تحياتى

عمرو يقول...

الجواز حلو و كويس و لذيذ بس لو فيه حب بين الطرفين لأن الحب بيخللى المشاكل تهون و المصاعب تخف .
لكن بدون حب بتبقى أصغر مشكله كبيره جدا فى عيون الزوج أو الزوجه .
و متهيألى أهم حاجه فى الزواج و الحياه بصفة عامة هى التسامح .. التسامح بيخللى المركب تمشى , صح ؟

عمرو يقول...

نسيت أشكرك على تمنياتى لى بالشفاء . متشكر أوى أوى و ربنا يشفى كل مريض يا رب .

حنين.. يقول...

هههههههههههههههههههههه
الحمد لله
لاقيت حد رايه من رايى
بس الجواز مش بالصوره دى اوى
الله المستعان
تسلم ايديكى على البوست
حنين

الجواز و سنينه يقول...

و الله يا بنتى اكنتك بتوصفى حالى
و الله و مش بهزر ساعات بيصعب عليه حالى
الناس ممكن تضحك من البوست ده و انا هاعيط
اهئ اهئ اهئ
بس برضوا شر لابد منه
بتلاقيلك كده كل كام شهر حاجه تفرحك
او حتى تحاولى تتخيلى انها مفرحاكى
انتى قلبتى عليه المواجع
كفايه كده لحسن هاكره الناس فى الجواز

rody يقول...

very nice blog and very nice photo to that post
bs keda mesh el tre2 ll kosha dah keda el tre2 ll hroub mn el kosha :D

مواطن مصرى نايم يقول...

يا نهار فوحلوقى (لون مجهول الدرجة و النسب)
لا مش وحش اوى كده الجواز
طيب اللى مش بيشرب شيشة و لا سجاير حتى
برضوا حيدخل يرزع الباب
هههههههههههه
بس و الله البوست تحفه
دايما اسلوبك مختلف عن اى حد
ليكى بصمة فالبوست كده

بس الجواز حلو و الله من غير ما اجرب

تحياتى

اسلام

Ahmed Othman يقول...

انا لو كنت قرات البوست ده
من كام سنه فاتت

؟؟؟

ساسو
اسلوبك تلقائي رائع
و التلقائية ملكة لا يحوزها الا القليلون
مدونتك رائعة
دمت بخير

شفـقــة و إحســــان يقول...

هايلة بجد يا سوسة صيغتى الموضوع بطريقة كوميديه جدا
انا ضحكت بجد من قلبى
شفقة

Unknown يقول...

:/

ياخبر

ده انا علي كده كان عندي حق لما قلت أستقل بحياتي احسن

طب لو اخدين بعض عن حب ممكن النتجيه تختلف ولا مفيش أمل؟؟

*الطالبة عفو الله *زوزو يقول...

يااااااه كل دة
مين بقى عاوزة تتجور بعد ما تسمع الكلام دة كله ؟؟؟؟
يا لطيف
و الله حيرة و مية حيرة نتجورز مصيبة متجوزش مصيبة
الله المستعان
حيرنا و كادت حيرتنا تحير من حيرتها
ربنا يكرمك يا ابله
دمتي في حفظ الله

Nabil يقول...

موضوع هايل فى طريقة العرض

بس ده راي متشدد جدا ضد الجواز يعنى اكيد فى مميزات

او علي الاقل فى جوازات اطرافها مبسوطين
ولا ايه؟؟

ده لو الدنيا كده نبأس بقى وخلاص

مصرية يقول...

متشكرة جدا على زيارتك لمدونتى وتعليقك
اتمنى ما تكونش اخر زيارة
ومدونتك مثيرة للاهتمام وان شاء الله اكون زائرة دائمة

حياة بلا روح يقول...

أيوة كدة خلي البنات تعرف مصيرها المنتظر ، فاكرين إن الجواز مريح وطريق مفروش بالورود وفي الأخر تتندم وتقول ياريتني مااتجوزت .


حقيقي مدونة رائعة رائعة وكل مافيها مميز ربنا يوفقك .

أطيب تحيه

مصري بالغربة يقول...

لا لا لا انا مش معاكي خاااالص

البنات والشباب عايزين يتجوزوا بردوا

مهما العوازل قالت
ههههههههههههههههههههههههههههههه

وديه سنة الحياة واللي بتكنس وتمسح وتربي الاولاد

فده لبيتها وجوزها مش لحد غريب

وهو كمان الزوج بيتعب ويشتغل عشان يوفر لاسرته حياة كريمة

كل واحد وله دوره اللي لازم يأديه , مش يعني الجواز عبارة عن كنيس ومسح وطبخ

فيه حاجات كتيرة جدا في الجواز كويسة كفاية انها ليها زوج حنون ويحبها ويحافظ عليها ويحميها ومش كل الازواج زي ما انتي وصفتي كده , فيه ازواج كتيرة جدا رجالة وتحافظ على اسرتها كويس

ويخلي باله من بيته ومراته ويتقي الله فيهم

الجواز مش بالصورة السودا اللي انت وصفتيها ديه


وبعدين مدونتك اسمها الطريق الى الكوشة ولا الطريق الى العنوسة

تقبلي تحياتي

مصري بالغربة يقول...

بس يا سوسة اسلوبك بصراحة جميل جدا جدا

يا سلام بقه لو كتبتي بوست في فوايد الزواج بنفس اسلوبك ده

بصراحة عندك موهبة بالكتابة خطيرة جدا جدا

ولك تحياتي

مهندس \ محمود مرسي

mohamed يقول...

شكرا لمشاركة السيد العضو بس خللي رأيك لنفسك :P:P

صدى الصمت - عاشقة الورد - يقول...

على فكرة أنا أول مرة أدخل مدونتك بس حقيقى إسلوبك تحفة و دمك زى العسل أنا ضحكت من قلبى مع كل فقرة
أحييك ، تقبلى مرورى