• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الخميس، 4 مارس 2010

يا ولاد الحلال

الواحدة السينجل لما تتخنق (وده بيحصل كتير ان ماكنش العادي والطبيعي بتاع كل يوم) وعايزة تاخد اجازة يقولولها لازم موافقة رئيس العمل ... تروح لرئيس العمل فيتفرد ويتني ويقولها حاجة العمل لا تسمح ... تروح لشئون العاملين تقول مابدهاش اسأل علي المعاش المبكر تلاقي لسه ادامها بتاع خمستاشر , عشرين سنة علشان تجيب سن المعاش يعني تلبس تابيدة في الشغل ده عقبال مايفرجوا عنها لحسن السير والسلوك ... تكون اتعلمت تشد كولة ولا تضربلها كونجستال علشان تهييس وماتحسش بالدنيا ... قولت مابدهاش انا لازم اطقس واشوف اللي لينا واللي علينا في موضوع الاجازات ديه

لاقيت الاجازت نوعين اجازات وجوبية يعني ناخدها من عين رئيس العمل ومن غير موافقته ودول اتنين والحل لهم واحد اسمه زين واو جيم .. واحدة مرافقة عم زين ده والتانيه رعاية طفل والطفلول ده مش هيجي الا لما يجي عم زين .. واجازات مسببة وديه لازم بموافقة رئيس العمل اللي مش موافق اصلا ... وعليه مفيش غير الحل السحري (اتنين في واحد) شاب زين مغترب ... وعليه أهل عليكم انا المذكورة اعلاه .. ساكنه في العنوانه اياه .. في هذه الليلة الليلاء معلنه طلباتي ورغباتي .. ألا وهي ؟؟

مطلوب جدع زين .. شكله زين .. لبسه زين .. يجيد العربية والانجليزية بطريقة زين زين .. يعمل باحد الدول العربية او الاوروبية او الافريقية او الاسيوية انشالله زيمبابوي .. ولا ينوي الرجوع لارض الوطن علي المدي القريب او البعيد او في اي يوم من الايام .. و ترافقه زوجته الزينة في سفره .. ولا يشترط وجود شقة او شبكة او مؤخر صداق .. زين ؟

أظن عدانا العيب يعني ... حجة غلاء المهور وتكاليف الجواز باطلة اهو ... لا قولنا شقة ولا شبكة ولا مهر ولا فرح ولا حاجة خالص ... وبتشتري راجل بطوله بقصره ... بتخنه بكرشه ... بلئمه ببخله مش مهم .. كل املنا اننا نتطفش من البلد ديه او بمعني اصح من اشغالنا .. فعلي المدعو زين الحضور لباب المدونة للأهمية وبحوزته ظرف بني جلد حمير متضمنا الآتي :


1- شهادة الميلاد او مستخرج رسمي منها (ماحدش ضامن ابوه في الايام ديه)
2- شهادة نحو الامية او مايفيد بانه بيعرف يفك الخط بدون الاستعانه بصديق او طلب مساعدة الجمهور
3- استمارة 2 جند (ما اعرفش ديه بتاعه ايه بس اهو يجيبها وخلاص)
4- فيش وتشبيه ممضي من الخالة نوسة بعد الكشف عن قطره يفيد بانه بكر رشيد ... ليس له ادني علاقة باي كائن مؤنث في اخره تاء مربوطة حتي ولو كانت مسطرة .
5- شهادة حسن سير وسلوك ممضية من اتنين سواقين ميكروباظ ومختومة بختم المعلم بكر اللي بيلم منهم الاتاوة
6- شهادة الصحة النفسية والعقلية ممضية بشخبطة اتنين مجانين من عنبر العقلاء
7- ستين صورة شخصية (علشان اوزعهم علي اصحابي وقرايبي علشان يدلو بدلوهم في الزين المنتظر)


امضاء
زينة زينهم الزناتي


35 التعليقات:

رحلتنا في الحياة يقول...

هههههههه كل ده علشان اجازة يعنى هما الرجالة هيبقوا ورانا ورانا حتى فى اخد اجازة من الشغل :(
ربنا يكون فى عونك وتلاقى الشاب الزين وتاخدى الاجازة

مصرى محب لوطنه يقول...
أزال المؤلف هذا التعليق.
مصرى محب لوطنه يقول...

البوست فكرته حلوه وظريف جداً .. بس على فكره قرف الشغل احسن بكتير من العريس المنتظر .

Mafrousa يقول...

ههههههههههههههههههههههههههههههه
هههههههههههههههههههههههه
بصي يا زينة
فيه اجازة تالتة انتى مش قلتى عليها
و هيه الاجازة العارضة
اللى هو تبقى رايحة الشغل..و تتكعبلى رجلك تتلوى مش تقدري تروحي
ديه العارضة
ولا تكوني برضه رايحة للمدعو العمل..و تلاقي الاتوبيس اللى انتى راكباه راح خابط فى عمود نور...مش تقدري تروحي العمل
هههههههههههههههههههههه
و فيه اجازة مرضية
تقومي الصبح على الريق كده
تاكليلك نص رغيف حلاوة متغمس بشطة
درجة الحرارة تبقى 40 ...
هههههههههههههههههه
اما بقا موضوع الزين ده
اسمعى كلام اختك مفروسة
الموضوع ده مافيهوش اجازات...و علشان كده انا مفروسة
عاوزة اجاااااااااااااازة و مش عارفة آخدها ازاي
لا حلاوة بالشطة نافع....هههههههههههههه
ولا رجلك تتلوى نافع............
و لا تخبطى دماغك فى الحيط تخري دم ...ناااافع ......
هههههههههههههههههه
الأجازة الوحيدة اللى الواحد ممكن ناخدها من الزين
يا الطلاق و العياذ بالله
احنا ماعندناش بنات تتطلق
هههههههههههههههههه
يا اما الموت.......و ديه الاجازة اللى بتيجي من عند ربنا
هههههههههههههههههه
همة دول الحالتين اللى الواحد ممكن ياخد فيهم أجازة من الزين
ههههههههههههههههههه
و طبعا انا حفضل مفروسة لغاية لما اشوف مين فينا حياخد الاجازة الأول
ههههههههههههههههههه

Miss. Sosa يقول...

يارب يا ايوشة يااختي (اخد الاجازة) اما الاقي الزين ده من رابع المستحيلات بعدالغول و العنقاء والخل الوفي
--------
اهو كله قرف يا مصري يااخوية

-----
والله يا مفروسة يااختي انا لا ليه عارضة ولا ليه مرضي .. احنا كادر خاص مالناش اي حقوق وكله بمزاج رئيس القسم الله يهديه ليهده ويفوق من الغيبوبة اللي هو فيها ديه .. بعدين انا ماعنديش زين علشان اخد منه اجازة .. يجي بس وانا مش هحركه من عند اهله خليه في مكان .. انا عايزة شوية اوراق بس اقدمها للشغل واخد اجازة .. لاما استقيل وارتاح منهم للابد بلا وجع دماغ

simply me يقول...

طب بس ايه ضمنك ان قضاء الاجازه مع زين افندى هيكون حلو؟؟؟؟؟؟؟؟؟؟

مش يمكن الشغل ارحم

هراء لا داعى له ..... يقول...

و مما سبق نستنتج أن أهمية هذا ( الزين ) المنتظر إنه يبقى وسيلة للحصور على الأجازات من رئيس العمل المتساخف

و دا الصراحة إستخدام جديد للزواج أهنيكى على إكتشافه

الصراحة الواحد هو كمان نفسه فى أجازة من الشغل و تبقى طويلة كدا و كمان مدفوعة الأجر

بس للأسف الحكومة اللذيذة حطت رقابينا تحت مقاصل الشركات الخاصة و أصحاب الأموال التى لا ينفكون يريدون زيادتها على حساب الشباب الغلبان إللى عوده أخضر

غير معرف يقول...
أزال أحد مشرفي المدونة هذا التعليق.
غير معرف يقول...

لما انتم مش قد الشغل بس
بتزاحمونا فيه ليه
مش كفايه الشباب العاطل على القهاوي
ما تقعدوا في بيوتكم وتستنوا الزين او اللي مش زين ده
بدل ما تاخدوا فرص الشباب في العمل وتكوين اسره
وبعدين ترجعوا تعيطوا وتقولوا عايزين زين وراء وتاء وكل الحروف العربيه

مهو او انت وامثالك كنتم قعدتوا في بيوتكم كان الشباب اشتغل وقدر يحوش ويكون اسرة ويتجوزكم

جايين دلوقت تعيطوا عشان اجازة وعشان تعبتوا من الشغل
مش قد الشغل ما تشتغلوش وارحمونا
وعجبي

غير معرف يقول...
أزال أحد مشرفي المدونة هذا التعليق.
مصري بالغربة يقول...
أزال أحد مشرفي المدونة هذا التعليق.
Miss. Sosa يقول...

واضح ان البوست مستفز اوي مااعرفش ليه .. بمنتهي البساطة اللي مش عاجبه اللي بقوله ما يقرأهوش ويريح اعصابه بدل مايجهد نفسه ويقرأ وبعدين لسه هيكتب و يشتم .. ليه يعني تضيعوا وقتكم الثمين في القراية لخزعبلاتي وبعدين تكسبوا سيئات وتشتموا ليه يعني

----

بعدين الغير معرف اللي زعلانين وبيقولوا اننا بنزاحم الشباب في فرص العمل .. انا شخصيا مازاحمتش حد في حاجة انا بشتغل علشان جبت امتياز مع مرتبة شرف لو حد فيكم جابها يجي ياخد مكاني

والناس اللي بتقول اخد اجازة بدون مرتب والله شكرا انكم تعبتوا نفسكم وبتفكرولي في حل .. بس هو انا اقول تور تقولوا احلبوه .. ماقولنا لازم موافقة رئيس القسم والراجل مش موافق .. مااداميش غير الاستقالة واتسول بقي علشان اصرف علي نفسي !!

واخيرا هدوا اعصابكم الموضوع مش مستاهل كل ده واللي يلاقي نفسه هيتنرفز في علامة اكس كدا فوق علي ايديك اليمين دوس عليها وارتاح مني ومن مدونتي الدخول هنا مش اجباري علي فكرة والتعليق ده محبة مش عداوة

عليم يقول...

السلام عليكم

بجد مقال جامد أخر حاجة ...

وانتي مبدعة
شكرا

غير معرف يقول...

اللي فهمته من البوست ده من الاخر كده
ان الستات ملهاش غير بيتها
فلزمتها ايه الشغل والبهدله
وفي الاخر تروحوا تعيطوا كده وقال ايه عايزين
شاب زين ومغترب كمان
ايه الاشتراطات ديه

من الاخر كده قولوا انكم بتدوروا على عريس يا امااااااااي

غير معرف يقول...

الى رئيسة حزب العنوسه
انا اللي كنت كاتب التعليق وانت رديتي علي
احب اقولك فادك بايه الامتياز دلوقت وانت مش قادره تتجوزي
ولا فادتك بايه حتى شهادتك اصلا وانت مش قادره تجيبي اولاد ولا زوج واسره
في راي الشخصي البنت جوزها وبيتها وعيالها اهم من اي شهاده واعلى من اي تقدير حتى لو كان امتياز مع لحاف الشرف

asmaamosad يقول...

الأخ المجهول
انت زعلان ليه امتياز فى العلم أمر به الدين وحثنا عليه رسولنا الكريم
ولا أساسا أغلب زمايلى فى الكلية الشباب لاكانو بيحضروا ولاحاجة وآخرتها عاوزين ينجحوا ويجيبوا تقدير علشان يعرفوا يلاقوا شغل ... عالم غريبة ونسيتوا ان ربنا يعطى كل على قدر عمله واجتهاده وبطلوا قر على العالم

يا سوسو أنا كمان على فكرة لازم زين علشان أقدر أجيب عربية بابا قالى مفيش إلا فى حالة واحدة ياتتجوزى ياتتجوزى .. قولت له ينفع أحذف اجابتين هههههههههههههههه
أصل يابنتى أنا بشتغل وبدرس وبعمل مشاوير كتير جدا فى يوم واحد والمواصلات بتعطل كتير قوى وبتاكل الوقت وكمان أنا تعبت من المشى
معندكيش واحد كده نعمله زين لغاية ما العربية تيجى وبعدين نفسحة أو نديه الصابونه ميضرش

غير معرف يقول...

اول مره ادخل مدونتك
البوست تحفه بجد وفعلا انتى لخصتى مشكله عامه فى مساله الاجازات دى
انا كمان كنت بفكر اخد اجازه طويله بس نفس الشروط
بس يا بنتى هنقول ايه لنا الله

ردا بس على الاخ الغير معروف ده ومتنرفز اوى

يا استاذ انت لازم تفهم كويس جدا نا الجواز قسمه ونصيب
ومش عشان اتعلمنا واشتغلنا فهو ده سبب عد جوازنا

يا استاذ حضرتك مفيش علاقه بين ده وده
لان لو على كلامك يبقى كل المتجوزين مش بيشتغلوا
واحب اقول لسيادتك ان فيه رجاله كتيره معتمده على مرتب الزوجه
والزوجه بتشتغل عشان تساعد حضراتكم

ومش من المفترض ان البنت تقعد زى الطوبه فى البيت تستنى العريس الى جاى على حصان ابيض

البنت دلوقتى بتشتغل عشان تصرف على نفسها
مش هتقعد فى البيت وتشحت لغايه ما يجيلها عريس الغفله

ملحوظه كمان بالمره
شفنا كتير للاسف ميستاهلوش لفظ رجل
وعلى فكره تاخير زواج البنات مش عشان هما بيشتغلوا وواخدين فرص حضارتكم معشر الرجال
لالالالالالالا
السبب راجع للحاله الى بتمر بيها البلد والحاله دى مش سببها احنا
سببها غياب الضمير والاخلاق وناس بتجرى على مصالح خارجيه وسايبين البلد تولع واقتصادها يبقى فى الارض
بلاش نعلق مشاكلنا على الشماعه السهله
الى هى البنت الى بتشتغل وواخده مكانكم
البنت انسانه قبل ما تكون بنت
وربنا ادانا الحق اننا نشتغل ونصرف على نفسنا لان ببساطه الزمن اتغير
زمان كان فيه رجاله مسئوله وبتصرف
لكن دلوقتى للاسف بقوا قله قليله
وكمان حضرتك لازم تعرف ان البنات مش بتشتغل دلع
فى ناس مطلوب منها مسئوليات

اسفه انى طولت فى ردى
بوست جميل يا جميل

Unknown يقول...

دة انت عجيب اوى يا اخ مجهول انت
مش عاجبك اننا بنشتغل وكمان مش عاوزنا نتعلم؟؟
لا بجد هو لسة فى ناس بالرجعية دى؟؟؟
ومتعلئش فشلك على شماعة شغلنا
يعنى صحيح واحدة اتلعمت واتفحتت مذاكرة وغيرها كان مقضيها على القهاوى ومش عاجبة!!!!!
ونقطة اخيرة هى لما قالت يكون متغرب والحاجات دى كان هزار مش جد
بس واضح انك محدود الافق
ربنا يعينك على نفسك

adel يقول...

انا موظف وعارف الاشياء الممله ده

واه لو رئيس العمل بيصنف الموظفين علي مزاجه

عموما الف شكر علي التدوينه الرائعه

ظل الشمس يقول...

الاخت بتاعة رئيسة حزب العنوسة اللى بتتريق على المدونة ومش عاجبها الاكتياز والناس اللى عايزة تبقى شىء مش مجرد لا شىء بيتدارى فى شىء
شيوخ الجوامع اللى كلو دماغك بالكلام دا كفاية عليهم العقليات اللى زى حضرتك تصدقه مش لازم تطبقيه على غيرك
ومالك كدا بتتكلمى عن الجواز والخلفة كأنها السر المقدس للحياة
طب ما ياما اتجوزوا واتطلقوا
واتجوزوا وخلفوا
واتجوزوا ومخلفوش
واتجوزو وخلفو واتطلقوا

ايه اللى اتغير يعنى الدنيا جرا فيها ايه؟
بنزيد بنقل المهم ان الاحوال من نيلة لانيل
يا ترى ايه اخر العبط اللى بتحكوا فيه غير انك مرميه فى البيت زى رجل الكرسى همك مزاج البيه واكل البيه والبيه زعق ولا لاء

bastokka طهقانة يقول...

انت خطيرة مالكيش حل
سعيدة اني لقيت مدونتك المنفردة
تحياتي

غير معرف يقول...

هههههههههههه

نايس بلوج


http://dawrat-pc.blogspot.com/

E73 يقول...

ميس سوسة بجد اشفقت عليكي يا زينة

واتمنى يكون علي الحجار غنالك آدي الزين وآدي الزينة

انا من رأيي نستقيل أسهل وأريح

برمجة الحاسب للمبتدئين يقول...

مقال رائع ومنظرين منك المزيد

Übersiedlung يقول...

وحشة اووووووووى صورة البنت

Kellerräumung Wien يقول...

الخلقية غريبة اووووووووى

Umzugsunternehmen Wien يقول...

hahahahahahahhah

Umzug in die Schweiz يقول...

موفقين .. وعايزيين نشوف الجديد !؟

Räumung يقول...

Allah grant you success ... Where new themes ?!

Wohnungsräumung Wien يقول...

Allah help you .. I hope Reload topics ...

Hausräumung Wien يقول...

تحياتى لكم .. فين الموضوعات الجديدة

Botendienst Wien يقول...

دوماً موفقين ... وبأنتظار الجديد ..

Wohnungsräumung يقول...

فجئنا دوووما بالجديد ... موفق

اسعار اللاب توب فى السعودية يقول...

ههههههههههههه
مدونتك شكلها لذيذ قوى

عروض جرير يقول...

ايه الجمال ده