• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الأحد، 9 أغسطس 2009

سياسة الاستخدام الــغير عادل



لما تضاعفت سرعة الانترنت الشهر اللي فات ثارت الشكوك فى نفسي .. فالحداية مش هتحدف كتكاكيت .. ومش هي دي مصر اللي اعرفها .. ولكن لما عرفت الشهر ده بقرار تحديد الانترنت الغير محدود فقولت في نفسي .. ظهرت الرؤيا .. وهي ديه مصر اللى اعرفها كويس اوي .

فى مصر انت مسير وإن اوهموك انك مخيير .. يعني واضح جدا للعيان ان الشركات كان بتقدم عرضين .. عرض بيقول انترنت محدود 256 وداونلوود 2 ميجا ب 45 جنيه .. وعرض غير محدود 256 ب 95 جنيه .. لكن لما يتحول الاتنين لانترنت محدود يبقي انا مخير في ايه دلوقت ؟؟ .. فين الديموقراطية ؟؟ .. فين حق المواطن في اختيار انترنته ؟؟ .. فين جماعة الرفق بالانسان ؟؟

فى مصر الشعب يسرق الشركات .. شعب سافل قليل الادب يعني .. الشركات غلبت مع العملاء الغير شرعيين .. لحد ما سلطوا عليهم رجال الدين وطلعلوهم فتوي بتقول ان الوصلات حرام .. بس شعب مستبيع وداخل النار برجليه الاتنين .. وانا عايزة اسأل سؤال بريء الشركات تعبانه في ايه لو واحد مشترك في خط 1 ميجا وموزعه علي عشرة ولا ميه ؟؟ هو خد اكتر من ال 1 ميجا بتاعته ؟؟ مد ايده علي حاجة مش بتاعته ؟؟ ولا هو طمع من الشركات وعايزة كل العملاء يشتركوا معاها .. وبعدين ( اذا كان رب البيت للشعب ناهبُ .. فشيمة اهل البيت سرقة الوصلات ) .. الشعب بيحذو حذو حكومته الرشيدة.

في مصر الشركات حولت المستخدمين لمدمنين وفجأة قطعت التموين .. يعني موضوع الوصلات ده مغلب الشركات منذ ردح من الزمن وقالوا هيعاقبوا عليه وماعملوش حاجة ليه .. سكتوا سكتوا لحد ما الشباب ادمن الانترنت ومابقاش قادر يستغني عنه .. دلوقت لو قطعوه .. الكل مجبر يروح ياخد الجرعة بتاعته .. (ومش مهم لحمة مش مهم عيش .. لكن من غير النت ازاي نعيش)

في مصر الحكومة دايما علي حق .. احب احي الحكومة متمثلة فى وزارة الاتصالات بالتعاون مع شركات ال ADSL فى انهم وصلوا للحل العبقري ده وانهم يحددوا الانترنت الغير محدود و يخنقوا علي شباب النت .. علشان دول شباب ارعن مش عارف مصلحته وتجمعه ع النت بيفتح دماغتهم علي امور عيب وماتصحش زي السياسة والترشيح والكلام العيب ده (استغفر الله العظيم) فالحكومة فعلا علي حق احنا مش وش نت ولا لنا في حرية التعبير.

في مصر الاعلام لاهث على قضية ولكن بدون ان يعي ماهية القضية .. يعني لما يطلع المذيع الاغر ويقول مشكلة تحديث الانترنت مش تحديد الانترنت .. يبقي ده يخليه في طبق الرز بلبن بتاعه وبلاش يطلع يناقش فى قضايا تمثل الشعب .. وكان افضل انه يستضيف مندوب من وزارة الاتصالات و شركات ال ADSL وممثل من المتضررين ويناقش القضية صح .. علشان لما المندوب يهمش القضية يبقي المتضرر يرد عليه بمنطقية مش بطبق المهلبية .

فى مصر نتكلم كثيرا كثيرا ونفعل قليلا قليلا .. هتافات .. منتديات .. مدونات .. ضجة اعلامية .. ومادة خصبة تجذب الاعلام اللي مش لاقي حاجة يقولها .. لكن الموضوع مادي بحت .. الشركات عايزة تزود ايراداتها بانها تزود عدد المشتركين وتحول المشتركيين الغير شرعيين لشرعيين وتقضي علي الوصلات .. لكنها اضرت بالمشتركيين الشرعيين والغير شرعيين وخنقتنا كلنا.. يبقي الحل نقاطعهم ونوقف اشتراكتنا معاهم .. وخلي الطمع ينفعهم .. نفسي اشوف الشعب ده متوحد علي حاجة بدون كلام كتير وتضارب .. قرار المقاطعة مش سهل .. لكن نتيجته مضمونة 100% .. وفرصة شهر رمضان نقضيه من غير نت ونربي شركات الانترنت.
.
امضاء : مشترك شرعي مش هتكفيه 25 جيجا علشان يحمل سوفت واير وكتب ومقالات علمية .

17 التعليقات:

صيدلانيه طالعه نازله يقول...

انا فعلا كنت قلقانه و مقبوضه من ساعه ما ضاعفوا السرعه و كنت مستنيه الضربه بس مكنتش عارفه حتيجى امتى و ازاى
بس فعلا رمضان فرصه اننا كلنا ناخد اجازه من النت و تبقى فرصه تسجيل اعتراض على سياسه قطع التموين دى
قالوا كمان اننا نتصل بنمره 155 و نسجل اعتراضنا على القرارات الجديده
ربنا يسهل و نقدر نتفق و لو مره

AHMED SAMIR يقول...

اخر حاجة تفكر فيها هي المقالات العلمية.....استرجل و ارضى بالانترنت المحدود

لاسع افندى يقول...

انا لاسع افندى
محدود الدخل..بسبب الوظيفه
محدود القدرات..بسبب التعليم العالى
محدود السكن..اوضتين وصاله
محدود اقامتى..ماحدش بيدينى تاشيره
محدود الحريه..حفاظا على قفايا
واخيرا وبعد طول انتظار
اليكم المفاجاه احدث حلقات مسلسل .المحدودون فى الارض
انا بقيت محدود الانترنت




تحياتى اللاسعه

Sweet Violet يقول...

مافيش جديد فى الموضوع
الغريبة بقى ان وزير الاتصالات لما اتكلم مع عمرو اديب قال ان الكلام ده هيكون على الاشتراك الجديد و القديم هيفضل زى ماهو
بس لما وصلوا لاخر المكالمة كان كل كلامه ان القرار على كله الجديد و القديم
لا و قال ان مافيش نقاش لانه خلاص قرار و هيتم تنفيذه
يعنى اضربوا راسكم فى اجدع حيطه فيك يامصر عاااااادى جدا
الطريف بقى فى الموضوع ان سيادة الوزير المحترم بيقول انهم بيعلموا لمصلحة الشباب و الدليل على كده انه تم زيادة السرعة و النت بقى رخيص جداااااا
بس العيب بجد مش على الحكومة العيب علي الشعب اللى دايما ساكت عن ابسط حقوقه

حـــــدوتـــــة يقول...

السلام عليكم

المهم احنا هنفضل نزعق ونندب حظنا
اكيد فى حاجة ممكن نعملها
اللى عنده اقتراح ياريت يقوله

سلالالالالالالالالالالالالالالالالالام

مصري بالغربة يقول...

بجد يا سوسه انت مخك عبقري
انا معاكي في المقاطعه ديه
ويا ريتني كنت في مصر واعمل اضراب معاكم
بس انا في السعوديه وبصراحه في الخليج النت بيعتبر مجانا

بس بصراحه فكرة المقاطعه بشهر رمضان حلوه جدا
يا ريت لو تعملي حمله تتبنى الموضوع ده بالفاس بوك اقدر اخد البوست بتاعك ده واعمل حمله بالفاس بوك ؟

Kiara يقول...

بجد حاجه تحرق الدم المشكله ان عمرو بيقوله شايف الاعتراض في النت بيقوله اه شايف الاعتراض وعادي جدا حاجه تحرق الدم

كئيبة يقول...

كنت متأكدة إنها طريقة نصب جديدة
حسبى الله ونعم الوكيل
شكرا على الموضوع يا اخت سوسة

Sameh Ezzat - (خواطر خاطر) يقول...

النت ..انا كرهتو عشانهم

Comic Guy يقول...

Good job!

moh777 يقول...

مظاهرات و اعتراضات ايه . الوزير قرر و نفذ خلاص و الحقيقة تصريح الخميس اللي فات ما كانش له لازمة. اشتكوا لرئيس الجمهورية و عمر سليمان و جمال مبارك و ان ماستجابوش لان الامر مايهمش فاحنا اقلية و يا نهاجر لبلد يحترمنا يا نسلم امرنا للي خلقنا و هو اقدر حساب كل ظالم متجبر.

moh777 يقول...
أزال المؤلف هذا التعليق.
غير معرف يقول...

كل رمضان وانتي سوسة النوسة كوانووووووسة

بوسة وفانوس وقطايف وكنافة كمان
مممممممممواااااااه

مها ميهوووو

dr/shiko يقول...

والله انتي معاكي حق يامس سوسه .. هما حرامية واحنا حرامية .. ايه المشكلة لما حرامي يسرق من حرامي ما كلو حيتحدف في النار عدل ... بلد حرامية بصحيح

dr/shiko يقول...

بس المهم ان احنا نقاطع بجد مش بهزار وطبعا زي ماانتي شايفة ان الكومنت اللي انا كاتبه واللي انتي بتقريه دلوقتي اكبر دليل ان احنا بنهزر مش بنتكلم بجد وليهم حق يزنقونا ويجبرونا عشان احنا مش بنعرف ولا نختار ولا ناخد موقف بجد

Bauschuttentsorgung Wien يقول...

الجديد .. الجديد .. الموضوعات الجديد فين ؟؟

Umzug Wien يقول...

Vielen Dank .. Und ich hoffe, Sie Mved Entwicklung und Schreiben von verschiedenen Themen :)