• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

السبت، 1 نوفمبر 2008

يا تري مين المخطيء


يا تري مين المخطيء ؟!


1- الفتاة بلبسها الغير محتشم (عايز تحس انها انثى وحرة يا رجعيين يا متخلفين .. يا عالم تالت .. ما تروحوا تشوفوا الغرب بيلبسوا من غير هدوم خالص ولا حد بيبصلهم) (غالبا قرفوا من اشكالهم يا ضنايا .. السلعة لما بترطرط بترخص وماحدش بيبصلها فعلا )


2- الطفل بقلة أدبه (مجرم بالسليقة .. طالع من بطن امه يقول هي فين المزز اللي ع الكوكب ده .. آه يا سافل يا سافل)

3- اهل الطفل علشان ماعرفوش يربوه ويعلموه يغض بصره ويفهموه ان العين تزنى وزناها النظر.


4- اهل الفتاة علشان ماعرفوش يربوها ويعلموها تلبس حجاب شرعي او تحتشم في لبسها اضعف الايمان .. وان الاب اللي مابيغيرش علي أهل بيته ولا يمنعهمش عن فعل المنكر يبقي ديوث والديوث لا يدخل الجنة (ياتري في كام ديوث فيكي يا مصر).


5- المجتمع وظروفه الاقتصادية الصعبة علشان طحن الاب والام وخرج الاتنين للعمل فمابقاش في وقت يربوا عيالهم.. وبطالة الشباب .. وتأخر سن الزواج وصعوبته عمل كبت والكبت يولد التهرش .


6- الاعلام بث كليبات عري واباحية بقنواته فاعتادت عينينا العري واثارت الغرائز ( شحن شحن من غير تفريغ .. فبديهي هيفرغوا في اي انثى في الشارع).


7- قلة الوازع الديني فصلنا الدين عن الحياة وفرغناه من محتواه وبقى مجرد صلاة بحركات ديناميكية من غير تدبر ده لو بنصلي .. ومابقاش منهج حياة وطريقة تعامل ما بينا .. اسلام ديانة في البطاقة فقط لا غير .. لكن نلبس حجاب ولا نغض بصر تؤ تؤ تؤ رجعية تزمت تشدد .


8- جميع ماسبق
---------

وللحديث بقية بعد التعليقات (إن شاء الله)...

ملحوظة : ركزوا اوي في ان ده طفل مش راجل .. اصل لو راجل كنتم طلعتوا عليه بالشباشب والدبابيس والواد هيبقي كفيف مدي الحياة (الملحوظة لنون النسوة)

42 التعليقات:

شفـقــة و إحســــان يقول...

ايه يا سوسة ده؟؟
احقا ما ارى؟؟
حتى العيال مفيش فايدة فيهم
بس تعرفى ده برضوا بيرجع للتربية علشان لو الام شافت ابنها بيبص كده او بيعمل حاجة غلط وعلمته الصح ومقالتش ده طفل هيطلع متربى وابن ناس مش زى اللى فى الصورة
ههههههههه
كالعادة بوست تحفة
ويارب يخلليكى للستات

م/ الحسيني لزومي يقول...

شارك ف الحملة الشعبية للقيد بالجداول الانتخابية وادعو غيرك
ضع بنر الحملة علي مدونك والبنر موجود علي مدونتي

دنيتى الجميله يقول...

ايه ده هو كل الولاد بقوا كده ولا ايه
بقى المألوف دلوقتى انك تشوفى عيال صغنونه بتعاكس وبتبص على البنات بطريقه مش حلوة خالص
ايه السبب ؟
حاجه تحير

Mony يقول...

للاسف الاهل هم اللي عليهم كل العبء ده



لان الاهل هم اللي لازم كانوا زرعوا في البنت مبدأ الاحتشام بحيث يصبح من عاداتها

و الاهل هم اللي المفروض يربوا طفلهم علي الادب و احترام الاخرين

و الاهل هم اللي المفروض يوجهوا ابنهم يتفرج علي ايه و مايتفرجش علي ايه


و الاهل لانهم لازم يزرعوا في ولادهم الوازع الديني و انهم بيعملوا الحاجة الصح ابتغاء مرضات الله و ان الله شاهد علي و الله مطلع علي

hager يقول...

لالا بجد مش مصدقه عنيا
حتي الاطفال!!!
ابسط تعليق علي الصوره دي
نو كومنت واموشن في قمه الحزن

صاحب المضيفة يقول...

كل ما سبق


في انتظار ما ستكون الاجابة

غير معرف يقول...

الثقافه العامه ومبدأ احترام الغير
من الاخر يعنى

غير معرف يقول...

حتي الاطفال لاحول ولا قوه الا بالله
انا من رائي كل اللي حضرتك قولتي عليه
سبب في كده

Unknown يقول...

ههههههههههه
الولد طالع ناصح من صغره عارف يبص فين مش عبيط يبص في اي حته و خلاص
انا اعتقد ان سبب التحرشات مش واحد بس هو كذا حاجه اضربوا في الخلاط سوا
عدم طربيه و قلة وازع ديني و عدم احترام لنفسه و فهم خاطئ للرجوله

تحياتي

Unknown يقول...

مش عارفه

بس انا شايفه ان بردو مفيش مبرر

يعني ماينفعش اننا نعلق ده علي اي شماعه

الكحيان يقول...

برافو... بوست في الصميم

والله آلمتني بشدة مقالات كثيرة كالغثاء، ومدونات وهيئات ومنظمات وفضائيات لا حصر لها تثير قضية العري والتحرش والأخلاق بمنطق معكوس يجور على الفطرة والعقل والمنطق والواقع، تثيرها بمنطق الهوى والتبعية العمياء؛ والحقيقة أن المسألة معقدة وفقه الدياثة والتخنث والعهر الذي يروجونه هذه الأيام لا يجدي ولا ينفع ولا يبشر سوى بالخراب، فهؤلاء يتهمون مجتمعهم بالهمجية والتخلف في هذه المسألة ظلما وزورا أو جهلا وعبطا لأنهم يقارنون مجتمعاتنا بالمجتمعات الأوربية وينسون أن استجابة هؤلاء الحيوانية تختلف بالطبع عن استجابتنا في نواح عدة تشكلها الجغرافيا والدين والاقتصاد أيضا، وذلك أن ممارسة الجنس هناك سائبة مطلقة بلا قيود فهؤلاء شبعوا وزهقوا من ممارسة الجنس بكافة صوره وألوانه،حتى دفعهم الشبع إلى البحث عن تجديد اللذة والتفنن فيها مما أوقعهم في الشذوذ والمثلية... ولو أن خصياننااطلعوا بموضوعية على إحصاءاتهم لوجدوا أن التحرش بالنساء والأطفال واغتصابهم قد بلغ هناك مبلغا عظيما، بل وصل التفحش في الجنس هناك إلى الكنائس المقدسة مع الراهبات وقد اعترفت البابوية بهذه المشكلة الخطيرة بصراحة مذهلة وشجاعة تحسدعليها والأوربيون المتحضرون يدفعون بالطبع ثمن تلك الحرية غاليا من صحتهم ( أمراض الإيدز والزهري والسيلان إلخ الأمراض الجنسية المعروفة) ويدفعونه أيضا على حساب صحتهم النفسية،ويدفعونه بالأمراض الاجتماعية : مثل التفكك الأسري الرهيب وانعدام الولاء، والعزوف عن تكوين أسر مستقرة،مما أدى إلى خشية هذه المجتمعات من الانقراض خاصة تلك المجتمعات التي يقوم الهرم السكاني فيها على قاعدة عريضة من الكهول مما دفعها إلى استيراد الفحول وفتح أبواب الهجرة أمام الشعوب الكحيانة وتقديم إغراءات كثيرة لهم، وقد كثر عند هؤلاءأبناء الزنا - مالا يقل عن نصف الشعب الأمريكي مثلا من أبناء الزنا- هذا هو أول خطأ منطقي وقع فيه هؤلاء الديوثون المخصيون المتحضرون عندنا، مقارنة مجتمعاتنا المتخلفة بمجتمعاتهم المتحضرة. الخطأ الآخر الذي وقعوا فيه بجهلهم أنهم يتناسون أمر الفطرة، فأمر الاستثارة الجنسية شيء فطري ( يتبع قاعدة المثير والاستجابة) وهو بدائي وسيظل بدائيا كما هو لا يهذبه ولا يسيطر عليه،سوى الأخلاق والتربية والدين، فكيف يطلب هؤلاء الذين لخصوا قيم التحضر كلها في تعري المرأة، كيف يطلبون من المواطن الكحيان الجائع العاري الذي يأس من الزواج واعتبره من رفاهة الرفاهيات.. أن يكون متحضرا ولا يحاول التحرش بامرأة عارية أمامه، قد يحدث ذلك إذا كان هذا المواطن مريضا نفسيا أو جنسيا أو مخصيا مثلهم،أو فاجرا مثلهم... وقد كنت أود أن أطرح على أحدهم سؤالا أواجه به منطقه المعكوس ماذا لو تركنا الحرية للرجل كي يعري سوأته في الطريق العام أمامك أنت وزوجتك هل تقول هذه حريته فليفعل ما يشاء؟ هل ستترك زوجتك تنظر إليه لأنها متحضرة ولن يضيرها ذلك؟ أم هل تأمرها بغض البصر ؟ أم هل تتعدى على حريته وتتهمه بالبدائية والتخلف أم تصفه بالتحضر والرقي كما تصف تلك العاريات المتحضرات ؟ ليت هؤلاء يجيبون في موضوعية... أما مسألة أن الأخلاق تنبع من ذات المرء فهذا صحيح بدرجة ما، وذلك لأن الإنسان يولد على الفطرة سليم العقيدة سليم الأخلاق لكن تطرأ بعد ذلك عوامل كثيرة تشوه هذه الفطرة فيحتاج معها إلى تقويم وتعديل وهنا يأتي دور التربية والدين والقانون، ولا أدل على ذلك من أن الأوربيين على تفحشهم في العري - وهم مع العلم يضعون قواعد وقوانين لممارسة الجنس ومشاهدة أفلامه - فإن المرأة هناك مهما تعرت وتكشفت فإنهالا تزال حريصة على تغطية أماكن معينة، فقد تتعرى تماما ولكنها تحرص على تغطية حلمتيها وفرجها - آسف جدا لهذا الإيضاح - فهذا يدل على أن هناك بقايا فطرة لم يتخلص منها ذلك الإنسان المشوه بعد. ومع ذلك أنا لا أدعو إلى التضييق على المرأة ولا إلى اعتبارها عورة ينبغي أن تغلق دونها الأبواب ، لا ... أنا أدعو أن تكون المرأة وقورة محتشمة لا ترتدي الثياب الضيقة المبهرجة المثيرة ولا تعري مالا ينبغي تعريته وكشفه، ولترتدي ما تشاء من مسميات، وأعتقد أن المرأة قد ظلمت كثيرا على يد هؤلاء الذين يتاجرون في قضيتها ويثيرون ضجيجا فارغا حولها هدانا الله وإياهم . آسف جدا جدا للإطالة وشكرا لك على عرضك الجميل الطيب .

maiosha يقول...

والله ياسوسة كان نفسى أرد وأقول كل ما سبق

بس كل ما أجى أكتب أحس إنى منحازة أكتر إنى أختار أى إجابة عن البنت دى وأهلها

معلشى يعنى لو كانت واحده مثلا محجبة حجاب صح أو على الأقل لابسة لبس محترم وكانت فى نفس الصورة .. ياترى الطفل ده كان هيبص نفس البصة

يا ترى الأب اللى يرضى ينزل بنته من البيت وهى بالمنظر ده .. راجل دمه حامى .. أو عنده دم أصلا

مش عارفة بصراحة

ومستنية باقى الحلقات

الطائر الحزين يقول...

مش أمينة احسن بزمتك

مش أحسن اوى يعنى!!!

Mafrousa يقول...

بصي يا حجة سوسة
المشكلة كبيرة اوي
و متشعبة اوي اوي
و ربنا يستلر علينا اوي اوي اوي
سلام

بس انتى لقطى الصورة ديه ازاي ياعفريتة؟؟

فشكووول يقول...

سوسه ازيك .. آه كدا انا اتبسطت خالص عشان لقيتك بتعلقى عندى .. وطبعا انا قلت لك قبل كدا انا بحب تعليقات اللى دمهم خفيف .. وبعدين الواد ابن الهرمه اللى انت مصوراه فى البوست بتاع ال7 اسباب للتحرش .. لا هما 8 اسباب الواد ابن الهرمه ده ياريتنى كنت بداله .. اشكرك على الزياره .. وتحياتى

بس خلاص ... يقول...

السلام عليكم مس سوسة
شدتنى قوى مدونتك وعجبنى شعارك اللى انتى لافعاه لصالح العنوسة ... لان كلمة ياريت عمرها ماتعمر بيت ..
وكمان اسلوبك الساخر الجميل ده بيشدنى جدا جدا
وفعلا الاجابة مين الغلطان هى كل ماسبق
لان ايد لوحدها ماتصقفش ...ز
وللاسف بنضيع وتضيع هويتنا ومبادئنا بسبب الحاجات اللى انتى ذكرتيها
اسعدنى جدا مرورى على مدونتك

اقصوصه يقول...

في رايي

جميع ما سبق!!

kochia يقول...

صحيح سؤال وجيه
مين المخطئ ؟
خايفة الخطأ يوصل لحد عندنا واحنا مش حاسين
الدايرة كبيرة اوي والكل فيها غلطان
كل واحد حسب نصيبه من الخطأ

بنت مصريه يقول...

اكيد الحديث لنون النسوه
امال للرجاله يا سوسه
خلاص يا حبيبتى دول خلصوا من زمان
اخر راجل مات ف حرب 73 الجيل ده فيه اشباه رجال وليسوا رجال ههههههههههه

حلوه قوى شحن شحن شحن
ومفيش تفريغ
هههههههههههههههه
عجبتنى قوى

احييكى يا سوسه

nona يقول...

تعرفى ان الاتنين مخطئين
البنت بلبسها وخروجها كدة فى الشارع
والولد الاى اهلة ماعرفوش يعرفوة العيب و الحرام
فى الاول و الاخير العيب على البيت لانة هو الاى بيخرج البنت و الولد منة

الازهرى يقول...

صديقتى العزيزة

بالفعل اول مرة مدونة تناقش الاسباب من اوجه مختلفة لان الخطأ لا يقع على جانب واحد

اؤيد رقم 8 من الاسباب الى اقصى حد
تحياتى دوما

fawest يقول...

يا ترى هى بتفرجوا على أيه

هنا المحك
أصلها لو بتفرجوا على فيلم كرتون
هو عايز يشوف فيلم أكشن

ولو بتفرجوا على فيلم أكشن
فهوا شايف بلاش نأفلم على بعض

بهزر
بس الجد بقى
هى ثقافة الفرجه

rovy يقول...

السلام عليكم
لو كنا وصلنا لكده فاكيد حاقولك ان السبب كل اللى ذكرتيه يعنى اختار رقم 8 فى الاختيارات .. و ربنا يستر مش عارفين ايه اللى فاضل ..

دمتى بخير

تحياتى

Unknown يقول...

تصدقى كل ما سبق سبب فى ان الاطفال والكبار اصبحوا متحرشين جنسيا
وان الفتاة اصبحت توفر فى القماش
وتشعر بالحرية الى ان يتحرش بها

دريم كبير يقول...

السلام علكيم ورحمة الله

انا اول مره اشوف البلوج ده لكن بصراحه عجبني جدا خصوصه اسلوبه الساخر



بالنسبه للبوست ده فرأيي ان كوننا نحط الـ (البنزبن جنب النار ) (الرجل,المرأه ) ونقوله متولعش يبقى احنا بننشد المستحيل فعلا لان الانسان مخلوق فيه حاجه اسمها غريزه دي + ودي -

والي يحاول يقنع نفسه ان مفيش فرق بينهم يبقى معلش ناخده على قد عقله او نقوله انت سبيشيال كيس

احييكي على الموضوع ده

ن يقول...

السلام عليكم ورحمة من الله وبركاته
تحياتى إلى كل المدونين الجادين وأتمنى أن يشاركونا الرأى والأجتهادات للخروج من تخبط الأراء التى كثرت عن الدين ودرء الشبهات التى تلصق الى الأسلام بتصيد بعض الأخطاء التى الصقت ببعض المفاهيم ..وعبر هذه المدونة علينا أن نبحث فى مصداقية الروايات السابقة وتخير الأجتهادات الحالية بما يخدم الأسلام وقضاياه .
مع خالص تحياتى
أمل فتحى عزت

حاسوباتيه يقول...

ههههههههههههههههه كل الي قولتي عليهم

د/ رامي شهاب الدين يقول...

بسم الله الرحمن الرحيم

الإسم رامى احمد شهاب الدين ، 23 سنة

الإجابة هى رقم 8 جميع ماسبق

وشكرا

إيمان قنديل يقول...

تسلم اليد التي كتبت ،ويسلم العقل الناضج الواعي الذي حرك القلم

تحياتي وتقديري

==============

أنا بس في كلمه محشوره في زوري عايزه اقولها


لن يأتي الطريق الى الكوشه وإنت حاطه صورة البت اللي تعكنن دي زي خالتي ستوته في البروفيل


ودمتي ياعزيزتي

fanty يقول...

مع اني شايف البوست ده من أول ما نزل و مكنتش ناوي أعلق علي الموضوع ده لسببين أولهما ان الصورة دي أنا شفتها في ايميل من يجي 3 سنين و ثاني الاسباب ان الموضوع مش محتاج كل الفيلم اللي مكتوب ده و بالذات ان ممكن يكون الولد عينه جت علي جسمها في لحظة التقاط الصورة و مكنش مركز معاها قوي زي ما الناس فاكرة، الي جانب ان في المرحلة دي من الطفولة الولد و البنت بيكون عندهم فضول في اكتشاف ما عند الغير و ليس عندهم و ليس لمجرد السفالة يعني، لكن اللي أثارني اني أكتب و مع احترامي لكل الناس هو التعليقات الساذجة اللي كتبوها، اللي تقول البنت هي اللي غلطانة عشان طالعة من بيتهم كده و غلطة أهلها و اللي يقول غلطة الولد اللي أبوه و أمه مربهوش، يعني خلاص الناس مش واخده بالها من شكل البنت و جسمها اللي مفيش أصدق تعبير غيرهم علي أنها آسيوية و في الغالب صينية، يعني ناس عندهم اللبس ده عادي و مفيهوش أي مبالغة، ده الي جانب ان بنسبة كبيرة ديانتها هي البوذية كأغلب شعب الصين و آسيا، يبقي دين و حشمة ايه اللي بتتكلموا عليها بخصوص الصورة و اللي يقولك الولد مترباش من أمه و أبوه، ها ها ها، الواحد مننا بيفضل لحد ما يموت بيغلط و يتعلم و الناس جايا علي طفل يادوب بيلعب في أشبال تحت 8 سنين و يقولك أهله مربهوش، و الله بجد تعليقات تنم عن ان الناس عاوزة ترغي و خلاص...

حزينه يقول...

انا شايفه ان الاتنين غلط
هى مش المفروض تلبس كدة خالص
وهو لان المفروض ان يكون بالنسبه له ان كدة عيب
يعنى هما الاتنين غلط


حزينه

Miss. Sosa يقول...

يا استاذ اكرم
انا مش فاهمه هو حضرتك ليه مخالف لكل البشرية كدا
يعني البوست اللي كنت بتكلم فيه عن اختلال المجتمع .. حضرتك كنت بتتكلم عن التحرش
والبوست ده بتكلم فيه عن التحرش وكل الناس فهمت كدا وحضرتك الوحيد اللي مركز ع الصورة
الصورة ماتهمنيش في حاجة ومش سبق صحفي و جاية فرحانة بيه ولا ادعيت اني اتيت بالغريب المحير
ولا يهمني صينية ولا هندية كل اللي يهمني ان العري بيشد الانتباه .. انتباه الرجل والمرأة والطفل كمان .. يعني ما نلومش الراجل انه بيبص نلوم المتعري الاول .. وماقولتش ان الولد سافل وان ديه نظرة جنسية انا مدركة كويس اوي انها نظرة فضول

ومش فاهمه ايه الحكمة من انك تذكر انك شوفتها من 3 سنين .. قصدك اني قديمة يعني .. طيب يا سيدي انا لسه شيفاها من اسبوع .. وانا اولد فاشون

و الصورة كانت مدخل لتحديد اسباب التحرش .. كانت المعني القريب وده مش مهم كتير لكن الاهم هو الصورة العامة او المعني البعيد للبوست وهو التحرش واعتقد كل الناس فهموا قصدي وقالوا رأيهم في الحالة العامة مش الصورة
انت جيت ع المعني القريب ووقفت براحتك مالكش دعوة بالباقيين.

وبعدين لو سمحت بلاش تبدي رأيك في اراءهم طالما انهم مش بيعلقوا علي رأيك ولا بيتدخلوا في مناقشات جدلية
وكل واحد حر في رأيه

انا اسفة علي الاسلوب اللي بتكلم بيه بس حضرتك زودتها

الكحيان يقول...

حقا ما ذكرت ياسيدتي، لا يحق لإنسان أن يدعي لنفسه الذكاء والفهم ويتهم إخوانه زورا بالجهل وعدم الفهم حتى لا يقال عنه إنه مغرور، والحقيقة أننا جميعا فهمنا الأمر كما ذكرت فلسنا ساذجين لهذه الدرجة، ولم تذهب عقولنا المتواضعة إلى ماذهب إليه صاحب الفهم الغائر الأستاذ أكرم، نحن والله بشر ولنا عقول والله، وعموما نحن نشكره على حسن ظنه بنا .

fanty يقول...

كنت عارف ان الرد عليا حيكون بالطريقة دي بس عادي، أنا رديت علي حسب اللي شفته مكتوب و مخترعتش حاجه من راسي، و علي فكرة أنا يا سوسة لما كتبت اني شفت الصورة من 3 سنين مكنش قصدي ارمي كلام عليكي والله... معلش بقي اسمحيلي أحكيلك قصة كدة في كام سطر و أقسم بالله ان كل حرف فيها حصل قدام عيني، كنت من 3 أسابيع في دبي باخد الغداء في مطعم ايراني, و بعد ما خلصت أكل و دخلت أغسل ايدي، لقيت في الحمام الرجالي بنت عندها يجي 8 سنين، قولتلها روحي حمام البنات يا حبيبتي، هزتلي راسها بمعني لا، قولت يمكن هندية و مش فاهمة عربي، كررت نفس كلامي بالانجليزي و لقيتها متنحالي برضه، كبرت دماغي و وقفت أغسل ايدي و هي واقفه بتتفرج عليا، بعد لما خلصت قولتلها تاني يا حبيبتي روحي حمام البنات، لقيتها بترد عليا و بتقولي **ايراني ايراني** فهمت انها ايرانية و مش فاهمة عربي و لا انجليزي، حاولت تغسل ايدها بس يا عيني مش طايلة، روحت قولتلها تعالي و غسلتلها ايدها و طبعا كانت مبسوطة قوي الهانم، المهم بعد ما اديتها منديل تنشف، واحد هندي دخل الحمام و كان التواليت مشغول، راح واقف قدام البتاعة البيضة اللي انتي عارفاها دي بتاعة الرجالة و بدأ في تلبية نداء الطبيعة، لقيت البنت راحت رايحة نحيته و دافسة راسها بين الحيطة و البتاعة البيضة دي تشوفو بيعمل ايه و كانت عاوزة تمد ايدها كمان، طبعا الراجل اتخض و اتسبت و قعد يقولها نو نو نو و طبعا مش قادر يتحرك، طبعا ضحكت و طلعت من الحمام و قولت خليهم يعيشوا مع نفسهم بقي :) :) :) دقيقة كده و لقيت البنت طالعة و راحت قعدت مع عيلتها علي الطرابيزة بتاعتهم... حبيت بس أوصلك رسالة و متأكد انك فهمتيها خلاص و دمتم سالمين...

أحــوال الهـوي يقول...
أزال المؤلف هذا التعليق.
أحــوال الهـوي يقول...

نحن كلنا مخطئين
اعلام و اهل و تعليم و حكومة
تصوري كنت اشاهد قناة الحياة و كان الضيف فتاة تدعي شيماء ارادت ان تثأر لكرامتها و انوثتها المهانة في حادث التحرش و الطبيعي ان تلجأ للشرطة فوجدت من حماة الشعب كل المهانة و الاذدراء و اختها لبسوها قضية اعتداء علي ضابط شرطة
يعني لمن تلجأ و حاميها متحرشيها

انها ثقافة شعب حرم من تعلم الدين في المدارس و المساجد و ايضا في البيوت

البقاء لله
تحياتي

فشكووول يقول...

شفت تعليقك عند فركشاوى .. هما كدا فعلا شالوا الدوا .. حطوا شاهين .. المهم احنا ما نبصش لهم ونسبهل المهم احنا نقدر نعمل ايه عشان نبقى زيهم واذا عملنا زيهم حنبقى احسن منهم .. مش كدا والا ايه

mohamed يقول...

بس الواد عندو حأ الصراحه:D:D:D:D بهنزن بهنزن

غير معرف يقول...

والنبى يااختى عيالة صغيرة فى الشارع بيعاكسوونى
والله...
بقبى لابسة العباية وبتبهدل...!!!

غير معرف يقول...

احنا بنقلد الغرب..

sayed sarhan يقول...

لونظرنا لوجدنا ان المشكله من جانب البنت نفسها لاانها لو لبست محتشم مكنش حد بصلها ومشكله البنت من اهلها لانهم لم يزرعو بها القيم ومبادىء الدين ومشكله الاهل اما من ألظروف الصعبه و العيشه الى خلت الكل عايش فى غيبوبه وزى الروبوت كل يوم زى الى قبله
ورب البيت الى بيشتغل وبيضغط فى الشغل الى بتلعو الضغط ده فى البيت وده الى مخلاش جو اسرى فى البيت
وبقا كلو شغال بالروتين(الروووتين)
وطبعاا منهملش الناس والجو المحيط الى لما يشوفو محتشمه يقولو ايه الخيمه السوده الى مشيه دى
ولا المسؤلين الى بيسدو الطريق امام اى بنت محترمه وبيجرى ورى البنت الغير محتشمه الى بتتعامل فى بلدنا على انها ملكه حتى لو كانت وحشه أصل محدش بيبص للوش الكل بيركز فى المضمون
المضمون هو المهم
ومشكله هؤلاء ايضا من تربيتهم وتوزيع الوازع الدينى والأخلاقى لديهم
يا جماعه المشكله اكبر من كده بكتير
و الكل بيقول عديها__يااعم__عيزين نجوز البنت
والى زاد زغطى على كل ده لما البنت تتجوز وجوزها يسبها تلبس الهدوم الو من غير هدوم علشان يمشى ويتفاخر ويقول يا جماعه المزه دى ايوه دى الجنبى دى مراتى انا
وأسف لطول ردى
بس اقول
*أنما ما أخفى أضعاف ما أبدى*
وسلاااام

Kellerentrümpelung Wien يقول...

شكراً جزيلاً ع المجهود ... :)