• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الخميس، 17 سبتمبر 2009

نفسنة حريم


جربتي يتقدملك عريس ومعاه مامته واخته (لجنة الدراسة والفحص).. والعريس يكون فرحان ومزقطط ولسانه قرب يدلدل من بوقه بينما لجنة الفحص واكلين سد الحنك وشاربين لترين نشا مركز و بيبصولك شزرا من فوق لتحت (فشر ماري منيب مع لبني عبد العزيز في فيلم هذا هو الحب) .. وتتفشكل الجوازة وتتبعتر علشان سقطي فى اختبار لجنة الفحص وماجتيش علي مزاج الماما .. هتقولي طيب ما العريس كان موافق .. هقولك الزن ع الودان امر من السحر .. وبعدين هم حركتين من بتوع عقيلة راتب وقلبي وكبدي وعايز تخرج عن طوعي ياابني هيقوم يديكي كارت احمر ويقعد جنب مامته.

كنت بستغرب من الحالة ديه واقول هي الامهات بيعملوا كدا ليه ؟؟ الي انا جاء لي القدر بهذه القصة العجيبة
اميرة هي البنت الوحيدة لاهلها مع 3 اخوات ولاد وترتيبها هو الصغيرة فمتوقع انها دلوعة مامتها وبابها .. الغريب ان علاقتها بمامتها مش اد كدا !! .. ولو تتبعنا شجرة عائلة الام هنلاقي ان الام عندها5 اخوات بنات واخ واحد وهنا اتضحت الرؤيا .. واضح ان الام مخنوقة من حاجة اسمها بنات ولما جابت 3 ولاد كانت فرحانه وما نقصش من سعادتها الا وجود اميرة .. الاب بقي كان ع النقيض وكان بيحب اميرة جدا الا ان القدر ماسابهومش لبعض كتير وتوفى الاب واتجوز الاخوات التلاتة وبقيت اميرة مع امها اللي علاقتها معاها مش اد كدا .. اميرة علاقتها مع امها مش اد كدا .. ومالهاش اخوات بنات علشان تحبهم كدا .. وشاءت الاقدار ان جوازها يتأخر .. والام معتبره اميرة عبء نفسي عليها بتدعي كل يوم انها تتخلص منه والبنت مستشعرة ده فى كل نرفزات امها عليها وفى كل خلافتهم اليومية .. في يوم من الايام بقول لاميرة: تمني امنية ..
قالت: نفسي اتجوز واجيب 3 ولاد واروح اخطب لهم واتشرط واتامر واتنطط ع الناس زي ما كانوا بيعملوا فيه !!
-------
لو تأملنا القصة ديه هنلاقي ان الناس القساة اللي بنقابلهم في حياتنا هم كانوا ناس طيبين في الاصل .. بس الحياة قست عليهم وماقدروش ينسوا ويصفحوا فبيثأروا للماضي بتاعهم في المستقبل .. فضحايا اليوم هم طغاة الغد علي غرار فيلم جعلوني مجرما.

اميرة مظلومة بسبب ام مش بتحب البنات ولازالت مشكلة تفضيل الولد علي البنت قائمة ومستمرة .. وان كنا قدرنا نوقف عادة وأد البنات الا ان الوأد النفسي لازال مستمر .. فمفيش ابشع من انك تحس انك كائن غير مرغوب فيه خصوصا من امك.

اميرة مظلومة في تأخر زواجها بسبب مجتمع افرز عقده عليها .. واعتبروها بضاعة كل شوية يجي يفرزوا فيها ويقلبوا وبعدين يمشوا .. وحولوها لانسانة مريضة نفسيا وهتمارس مرضها النفسي علي الاخرين ام عاجلا او اجلا.

هتقولوا ان اميرة حالة مرضية واحتمال تكون عندها عقدة الكترا ومش كل البنات كدا ومش ده السبب الرئيسي في موقف ام الزوج من العروسة .. هقولكم ده صحيح .. ولكن موقف ام الزوج واحد وهي انها مش عايزة (تفرط) في ابنها .. وانها دايما بتظن ان الزوجة ديه جاية تخطف ابنها (الدمية) منها .. هي قعدت خمسة و عشرين سنة تربي(بحد ادني) وتيجي واحدة ع الجاهز تاخده ..

هو انا مش ضد الام ديه .. انا ضد صفة التملك ديه في المرأة .. حب تملكها للعروسة بتاعتها زمان وهي صغيرة نمى .. وبقى تملك لزوج تخنقه او لابن تحجر عليه وتُملي رغباتها واهوائها عليهم وهم واجب عليهم التنفيذ والطاعة .. ويا خوفي لتكون كل البنات مصابين بعقدة الكترا.. او عقدة ام الكترا (وهي ان الام تكون بتحب ابنها ومش بتحب بنتها) .. والاب عنده عقدة ابو الكترا ( بيحب ابنه ومش بيحب بنته).. وعقدة ابن الكترا وجد الكترا وعم وعمة الكترا وخال وخالة الكترا .. من الاخر المجتمع كله مش بيحب البنات !! .. الست لو جابت ولدين تسمي نفسها ام البنين ولو جابت بنتين تحط راسها في الطين .. لحد دلوقت تفكيرنا كدا ومابنتغيرش !!
انا مش ضدة اميرة .. بل بالعكس انا مشفقة عليها وواخدة علي خاطري من المجتمع اللي حولها للشكل ده .. انا معاها وهي ضحية وبقاوم تحولها لطاغية لكن يوم ماهتتحول كل اللي هقدر اعمله اني هفكرها بآلامها القديمة واقولها بلاش تسببي نفس الالام لبنت تانية .. وبلاش نصنع أميرة تانية .

فأمتي هنعرف عيوبنا يا بشر ونصلحها ونبطل (ننفسن) علي بعض .. علشان نوقف عدد الضحايا اللي هيتحولوا لطغاة المستقبل القريب ؟!!

30 التعليقات:

عاشقه وغلبانه يقول...

انا معاكي ان وئد المشاعر مازال مستمر
وان لسه المجتمع بيفضل الولد علي البنت
ومهما كانت درجه ثقافه الاب والام هتلاقي برضو نفس التفكير قل او كثر
وده بيربي مشاعر كتير غلط
انا واحده من الناس دي
ماليش اخوات ولاد في حين ليا اختين
ماشاء الله انا واختي دكاتره الا ان ماما مازلت تشعر ان ناقصها حاجه
ناقصها ولد
وهي مابتخبيش ده
وبتكرره كتير
وفي كل مشكله تحصل بينا
لدرجه اني في اوقات كتير بقولها وهو انا قولتلك ماتجبيش ولد....!!!
انا ذنبي ايه...؟؟
ده كبر جوايا
وانا دلوقتي نفسي لما اتجوز واخلف اجيب ولد
علي الاقل لو جبت بعدها بنات تكبر تلاقي ليها اخ يحبها ويخاف عليها احساس طالما افتقدته

احنا لسه في زمن الولد فيه مكسب
مش عارفه ليه خلفه البنات زااااااااادت اوي
هههههههههههههههههه

أبــــو ضـــيــاء يقول...

ههههههههههههه
نفسنة الحريم دي بجد مالهاش مثيل , تعرفي حتى لو الام والاخت هما اللي اختاروا العروسة " وده بيحصل غالبا لما العريس يزهق ويطفش ويبقى جاب اخره وتلاقيه ماشي بيكلم نفسه , يعني بعد ما طلعت عيني عشان اكون نفسي يجو هما يفشكلوهالي ".
ساعتها بيوافق العريس على اي واحده من ناحيتهم ولو كانت "شيتا" ذات نفسها, ويقول احسن من القطر ما يفوت.

بعد الجواز بقى تلاقي الام او الاخت او ايا كان اللي اختار العروسة , اشد عداوة ليها , وبرضه بيتنفسنوا عليها , ولو نزل الاكل مالح تبقى فاشلة , ولو قللت الملح وحطت الملاحة عالترابيزة يبقى مالهاش فس في الطبيخ, ولو حد فيهم قال ده ملحه مظبوط تلاقي التاني فز وقام وقلب كفه وقعد يزعق " قال مظبوط قال"

أصل الحريم دول ما يعجبهمش العجب

عمرو فهمي يقول...

السلام عليكم
أحيانا كتيره بيحتار الراجل وميعرفش يختار عروسة مناسبة ليه فى ظل التطورات الاجتماعية العظيمة التي نمر بها، فيستعين بالوالدة أو اخته لتسهل عليه هذه العملية وأحيانا لتختار له.

ونتيجة للأسرار الخطيرة التي كشف عنها هذا الموضوع أصبح موقف الرجال صعب للغاية فحائط الأمان الوحيد لديه قد انهار وازداد تعقيد عملية اختيار الزوجة المناسبة.

أعتقد انه لابأس ان يلجئ الرجل للتكنولجيا ويستعين بمواقع الزواج الالكترونية ليجمع بيانات عدد من العرائس الملائمات لظروفه ثم يرقمهم ويدخل هذه الأرقم فى موقع للاختيار العشوائي والعروسة التي يظهر رقمها على الموقع يتوكل على الله ويتزوجها.

وزواج سعيد مبارك باذن الله

اقصوصه يقول...

امممم

كلامك فيه حكمه وواقعيه

ومنكم نستفيد :)

دكـــــتور جدا يقول...

هههههههههههههههه
فعلا كلامك واقعي بشكل كبير
ربنا يجنبنا نفسنة الحريم !!!
تحياتي وعيد سعيد ان شاء الله

Mohammed Salaheldeen يقول...

طب اقولك حاجه بقا تخلي كل ام تكره بنتها وكل ست تكره ست زيها بقا

البنت لو احلى من امها الام تفضل تحقد عليها وتضايقها في حياتها وقليل لما عنستها كمان

ولو الام احلى من البنت حتحس البنت دايما ان الام احسن منها وقليل ما اتعقدت وطفشو العرسان منها لاحساسها بالنقص وعقده امها ليها

واي خدمه مع تحيات جمعيه رفع المعنويات

فشكووول يقول...

ايه بس النفسنه دى كلها

يا سوسه الكلام دا كله مش مظبوط

انا ملاحظ نبره اليومين دول ان البنات عايزين يضربوا اب وام العريس بالنار وياخدوا العريس لهم ولعائلتهم ويخاصم عائلة العريس واللى خلفوه.

حتى الناس اللى علقوا بيجاملوا فى الكلام وماشيين مع الزيطه

يا سوسه يا كونوسه الام تتمنى لابنها احسن بنت فى الدنيا عشان كدا يمكن حركات مارى منيب وملك الجمل لكن مش عشان تقلل من العروسه.

ثم ان الام والاخت ستات ويفهموا البنات اكتر ويكشفوا الغث من الثمين

على فكره جواز الحب مش عاجب اليومين دول

وجواز المزز اللى بيعرفوا بعض فى الشارع برضه مش عاجب

وجواز الصالونات مش عاجب برضه

وجواز الانترنت مش مضمون وصوره حلوه على الشاشه وخلاص

طب نعمل جواز مضمون ازاى

ومن الاخر يا بنتى ... هى بطيخه ... يا تطلع حمره ... يا تطلع قرعه ومهما حاولت تتحرى الدقه فى اختيار البطيخه ومش شرط تكون بنت كلب ولا بنت ناس بنت عيله ولا بنت خريجين سجون ... هو بطيخه وانت ونصيبك

رمضان كريم وكل عام وانتم بخير بمناسبة عيد الفطر المبارك اعاده الله عليكم باليمن والبركات.

فشكووول يقول...

على فكره عاشقه وغلبانه بتقول احنا لسه فى زمن الولد فيه مكسب.

برضه مش صح

اللى ربنا بيرزقه بالولد بيتمنى البنت واللى ربنا يرزقه بالبنت بيتمنى الولد

عايز اقول على حاجه فى علم الاجتماع بتقول ان البقاء للاقوى ... امريكا اليومين دول هى اقوى دوله فى العالم وعشان كدا بتعمل اللى هى عايزاه ... واسرائيل اليومين دول اقوى من العرب عشان كدا بتضربهم بالبرطوشه على دماغهم

وفى التاريخ القديم والحديث الاقوى يستطيع ان يطوع كل القوانين لصالحه ..... فسرى انتى بقى ... يا غلبى من الجنس الاخر مش عارف عايز ايه؟؟

اظن ح تقولى فشكول بعد غياب جه ينكد على ... احسن عشان انت مش بتزورينى

Miss. Sosa يقول...

عاشقة
نورتي المدونة بتعليقك ورأيك .. وانا معاكي ان المجتمع لازال بيفضل الولد عن البنت ويتباهي بخلفة الولاد عن البنات ولازالوا بيعتقدوا ان الولد مكسب مع انهم لما بيكبروا مش بيعبروهم :))
ربنا يهدي

----
ابو ضياء
بيني وبينك المجتمع كله منفسن ومابيعجبهوش العجب
بس انا معاك ان الستات بيتنططوا علي بعض .. ازاي الحما تعترف ان مراة ابنها اشطر منها ولا من بنتها ديه تبقي مسبة لهم فلازم يهاجموها باي شكل .. احنا جايين نهدي النفوس بس

----

باشمهندس عمرو
منور المدونة بس علي فكرة المدونة ديه بتهد كل جدران الامان لان مافيش امان اصلا ولا فى جدران احنا كلنا واقفين في العراء .. اما بخصوص الاقتراح الالمعي انا بقول اللي تعرفه احسن من اللي ماتعرفهوش انت لم بنات العائلة بتاعتك وقول حادي بادي كرنب زبادي وانت وحظك بقي

Miss. Sosa يقول...

افصوصة
منورة المدونة

---
ضكتور

ربنا ينجينا جميعا
عيد سعيد علينا جميعا

---

ms3a_miso
انت جاي تهدي النفوس مش كدا !!
علي فكرة انا مش معاك خالص
وبعدين انا ادعي علي ابني واكره اللي يقول آمين :))

Miss. Sosa يقول...

عم فشكول
اولا كل سنة وانت طيب وبكل صحة وخير وسعادة

ثانيا كل كلامك جميل بس للاسف ده من وجهة نظر ابو العريس اللي شايف ان العروسة عايزة تاخد ابنه منه ويقاطع اهله وده موجود ولا انكره

انا حكيت قصة واقعية وعاشقة حكت قصة واقعية والقصتين بيقولوا ان البنت كائن غير مرغوب فيه .. احنا مش بنفسن احنا بنحكي واقع المجتمع خلقه
يبقي الاعتراض يكون ع المجتمع مش ع الراوي

بعدين انا قولت في البوست صراحة اني مش معترضة علي ام العريس انا معترضة علي حب التملك عند المرأة وده انت اكدته بشكل غير مباشر لان الزوجة اللي عايز تستحوذ علي الزوج وتبعده عن اهله وتقربه من اهلها هي امرأة استحواذية برضو عايزة تمتلك الزوج

اما عن رأيك ان ام العريس عايزة تختار احسن بنت لابنها فسامحني ده مش صحيح و فكر الام اللي من جيل مضى غير فكر الابن .. وعادة الام بتختار عروسة لابنها من اقاربها او صحباتها اللي بتعزهم بغض النظر عن العروسة ايه .. اذن هي بتعمل خدمه لصاحبتها او قريبتها مش لابنها :))
بدليل انها تجوز ابنها من بنت خالته لكن ماتجوزهوش لبنت عمته

ثانيا بتختار بمعايير فاشلة جدا .. يعني الزوجة لازم تكون ناصعة البياض (عقدة المصريين المزمنه) .. طول بعرض بارتقاع (زي ماتكون بتختار جاموسة) .. وتكون هادية ومؤدبة وطوع وحاضر ونعم واللي تشوفه وامرك يا سيدي .. وتكون ممتازة في شغل البيت وبتعرف تطبخ وتمسح (معاييراختيار الشغالة) .. اما بقي عن التكافوء الفكري فلو ابنها دكتور ولا مهندس فهي بتختارله بنت جامعية برضو بس للاسف مش بتفرق بين بكالوريوس الطب وبكالوريوس الخدمة الاجتماعية واهي كلها بكالوريوسات.

كل سنة وانت طيب يا عم فشكوول وعيد سعيد عليك وعلي الاسرة الكريمة
وسامحني فى التقصير في التعليقات والزيارات بس هي حالة عامة مع الكل وانا بطبعي مش اجتماعية فتحملني شويتين :)

Sweet Violet يقول...

سوستى الصراحة الموضوع عجبنى جداااا
بس انا عايزة اقولك ان مش المرأة بس اللى كده
لا و الرجل كمان .. يابنتى انا شوفت واحد من المفترض انه وصل لدرجة الحكمة لكن لحد الان جرحه اللى اتجرحه من صديق ليه
اتحول بسببه لحاقد على اى صدقة و مابيهداش الا لما يفشكلها
و البنت اللى اتجرحت من حبيبها ولا صديقتها اتحولت هى كمان لحاقدة على اى علاقة ناجحة و مش بترتاح الا لما تخربها
ومش كده بس لا .. دول بيكونوا عايزين الكل يكون زيهم عن طريق النصائح و الحكم
ولو الواحد حاول يتكلم معاهم تسمعى مبررات غريبة وللأسف بيكونوا مصدقين نفسهم انهم صح و مش بيعملوا كده بدافع من عقدة بقت جواهم
بطلة القصة اللى ذكرتيها اخف بكتير من غيرها على الاقل هى معترفة انها فعلا هتعمل بدافع الانتقام من اللى شافته
اما غيرها بيضر و هو فارد الاجنحة ومصدق نفسه

و على فكرة فعلا زى ماقال Ms3a_miso فعلا بيحصل موضوع البنت وامها
و ممكن فعلا الام تضيع مستقبل بنتها علشان غيرانه منها
و البنت بردو من الممكن تولع البيت حريقة و تنفسن على حق
مش عارفة هل ده فعلا كان دايما موجود ولا العصر بتاعنا عصر الحصريات فى الامراض .؟؟؟

سيبك انتى انا اصلا جاية اقولك كل سنه و انتى طيبة
رحتى حدفتى البوست اللى قلب حاجات كتير كانت بتفقع مرارة الواحد
v_v

عجبك كده يعنى
اتفضلى بقى هاتى العيدية علشان تخفيفى عليا
:D

فشكووول يقول...

السلام عليكم ورحمة الله

مقبول كلامك يا سوسه وعلى العين والراس لكن انا جيت تانى عشان المره دى اهنئ بالعيد

صوما مقبولا وافطارا شهيا والف مبروك بحلول عيد الفطر المبارك اعاده الله عليكم بالخير واليمن والبركات وكل عام وانتم واولادكم والعائله بخير وسعاده وفى طاعة الله.

mimi يقول...

مش أول مرة أزور مدونتك

أول مرة أسيب تعليق

عقدة اليكترا وعقدة اوديب

.... وعقدة سجادة كاربت سيتي يا حليمة

اسلوبك هايل

تحياتي

فشكووول يقول...

فرحان انك فتحتى الباب وخرجتى للناس وان اكون ان السبب فى انك تطردى العزله حتى وان كانت خروجه محدوده .. الاول بتبتدى كده وبعدين ربنا بيفتحها على وسع

احمد الخولي يقول...

كل دة في قلب وساكت يارجل

fanty يقول...

الموضوع مش صعب بغض النظر عن المشاكل اللي مع ام البنت دي، من قديم الازل معروف ان زوج البنت بيتشال علي الرأس لانه مستت بنتهم، و علي النقيض عروسة الابن بتكون كل حركة و كلمة محسوبة عليها عشان هي دي اللي جت و خدت علي الجاهز الواد اللي تعبنا فيه و ربينا و علمنا لحد لما كبر و بقي راجل ملو هدومه... و انا تفسيري الوحيد لقصة الشباب ف العموم ان أغلب الازواج المصريين غالبا ما يصيبهم الفتور مع الوقت بغض النظر مع اسبابه، و بالتالي الزوج و الزوجة بيعيشوا مع بعض تحت راية اهي عيشة و السلام و بنربي العيال، و بالتالي الاحتياجات العاطفية للام تشبع عن طريق ابنها لان عادة الولد حنين علي امه و بيخاف عليها و عادة مش بيزعلها زي جوزها، و بالتالي اغلب الامهات بتعتبر ان ابنها اول ما يكبر انه خلاص بقي راجلها نتيجة فتور علاقتها مع جوزها، و بالتالي ان واحدة تيجي تاخده منها بيكون احساس صعب عليها... زي كده بالظبط لما اي اب بيغير علي بنته جدا من خطيبها لأنها بتكون حبيبة قلبه و جه الولد اللي خطف عقلها و حول اهتمامها من ابوها له هو.. اخيرا تحية لكل ام طيبة بتراعي ربنا في ابنها و بنتها علي السواء و من هنا بقول ربنا يديكي يا امي الصحة و طول العمر و ما اتحرمش منك ابدا... تحياتي

غير معرف يقول...

في الحقيقة يانانوسا انا قريت الكلام و حسي كده بالشبه و الله اعلم ان الحكاية دي حكايتي انامع بعض الاختلافات البسيطة مامتي فعلا بتحب الولاد و كان نفسها كلنا نبقي صبيان بس لماجت البنت "يغور الف ولد"
عدد الولاد اللي كان نفسي اجيبهم هو خمسة مش ثلاثة و اللي عقدني طبعا هما اهالي العرسان مش اهلي ولاعيلتي و اخيرا و ليس آخرا حاسة اني برضو لما بمشيئة الله ربنا يكرمني بالذرية كل واحد هيدخل عليا بواحده و يقولي باحبهاو ساعتها ....ربنا يهنيك ياحبيبي ياااارب و حتي لو الناس قسيوا علينا هنقدر نقسي بهزار و ضحك لكن في النهاية اللي عارف مرارة جرح
مش ممكن يدوقه لحد تاني دعواتك ياجميلة و بعد كده هاخد بالي و انا باحلم و باتمني

travelertrades يقول...

كل الى اقدر اقوله(يهب لمن يشاء انثا و يهب لمن ياشاء ذكورا و يجعل من يشاء عقيم)ربنا قدم الانثا على الذكر علشان يزكر الناس انو هو صاحب الخلق و هو صاحب الهبه لان البنون دول زينه الحياه الدنيا و علشان الانثا هى الى بتحمل الطفل و بتبئه ام و هى الى بتربى انا دورى اجيب فلوس و هى دورها تربى و تكبر بس متمتلكش لان فى الاخر البنون عطيه من الله
و برضو ما علينا
محمد فتوح

طهقان يقول...

النفسنة دي شغالة في كل المراحل
قبل الزواج بتنفسن على المتجوزات
واثناء الخطوبة بتنفسن على المخطوبات الاحسن منها
وبعد الجواز بتنفسن على العازبات


دي سيركيل الواحد مش هايقدر يطلع منها
:)

adel يقول...

تدوينه جميله

Entrümpelung يقول...

ThankS ... :)

Kellerräumung Wien يقول...

انت هتقولى لى على . النفسنة

Privatumzug Wien يقول...

ييييييييييييييي
انتى هتقولى لى

Umzugsunternehmen Wien يقول...

hahahahahahahhah

Transport Wien يقول...

الله يوفقكم..ع المجهود...:)

Lagerung يقول...

Allah is with you ... :)

Umzug in die Schweiz يقول...

موفقين .. وعايزيين نشوف الجديد !؟

Hausräumung Wien يقول...

تحياتى لكم .. فين الموضوعات الجديدة

Botendienst Wien يقول...

دوماً موفقين ... وبأنتظار الجديد ..