• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الخميس، 27 أغسطس 2009

قف

كل سنة وانتم طيبين ورمضان كريم عليكم جميعا
يارب تكونوا انقى واطهر واكثر قربا من الله في الايام الجميلة ديه

بعيدا عن المسلسلات اللي تجيب صداع ودوار بحر من كترتها والبرامج الهبلة اللي بتزيد المشاهد سفه وعته وهطل كما لو كانت مُعَدة للمشاهد المتخلف عقليا وبصراحة انا حمدت ربنا لما لاقيت الوضع كدا وقولت ربنا يزيدهم (هبل وهطل) علشان يطفشوا المشاهد العاقل ويسدوا نفس اللي كان ناوي يتفرج عليهم كمان وكمان .. وطالما قفلنا التلفزيون وقاطعنا الانترنت وربنا بارك لنا في الوقت يبقي نروح نصلي قيام ونقرأ قرآن ونعمل حاجة لاخرتنا بقي.

لميت اطفال العائلة و لميت نفسي وروحنا نصلي العشاء والتراويح .. فاتتنا الركعة الاولي قولت مش مشكلة ولكن لحقنا صلاة الجماعة وكملنا الركعة الناقصة .. وبعدين نويت اصلي السنة وانا ساجدة للركعة الاولي لاقيت اد تلاته اربعة بني ادمين بيعدوا من فوقي اللي بيخطي واللي بينط زي ما اكون سباق حصنة فوق دماغي .. اتنرفزت جدا واتنرفزت اكتر لما لاقيتهم كبار مش صغيرين فقعدت ازعق واقولهم انتم ماتعرفوش الحديث
عن رَسُولُ اللَّهِ صلى الله عليه وسلم : لَوْ يَعْلَمُ الْمَارُّ بَيْنَ يَدَيْ الْمُصَلِّي مَاذَا عَلَيْهِ مِنْ الإِثْمِ ، لَكَانَ أَنْ يَقِفَ أَرْبَعِينَ ، خَيْراً لَهُ مِنْ أَنْ يَمُرَّ بَيْنَ يَدَيْهِ .
قَالَ أَبُو النَّضْرِ : لا أَدْرِي قَالَ : أَرْبَعِينَ يَوْماً ، أَوْ شَهْراً ، أوْ سَنَةً .
يعني لو تعلموا الاثم اللي عليكم من مروركم ادام المصلي لكنتم انتظرتوا اربعين يوم( علي اقل تقدير) عقبال ما يخلص ولا انكم تمروا من ادامه .. الناس كلها بصيت لي باندهاش زي ما اكون بقول حاجة غريبة ما وردتش في كتاب ولا سنة .. قمت جريت نزلت من الجامع علي بيتنا ودخلت ع النت ودورت ع الحديث وكتبته علي صفحة ورد بفونت ستين وطبعت منها عشرين نسخة وجريت ع الجامع وقعدت الزق الحديث علي كل الجدران علشان الكل يعرف انه حديث صحيح برواية البخاري ومسلم
وقعدت اردد الحديث بصوت عالي واقول أن يقف أربعين خيرا له من أن يمر بين يديه .. أن يقف أربعين خيرا له من أن يمر بين يديه .. فوقت لاقيتني فى التشهد لسه وعمالة اقول أن يقف أربعين خيرا له من أن يمر بين يديه مش التشهد فاستغفرت وختمت الصلاة ..
ومنهم لله اللي خرجوني من خشوعي بسبب موقفهم المستفز ده .. وحتى لو مايعرفوش الحديث ومايعرفوش الاثم الكبير من المرور ادام المصلي .. فمش من الاخلاق اننا نخطي او ننط فوق واحد ساجد .. ودينا دين اخلاق اصلا
يقول صلي الله عليه وسلم : "ما من شيء أثقل في ميزان العبد المؤمن يوم القيامة من حسن الخلق، وإن الله يبغض الفاحش البذيء "رواه الترمذي عن أبي الدرداء
ويقول صلي الله عليه وسلم : "أكمل المؤمنين إيمانا أحسنهم خلقاً".
ويقول الفضيل بن عياض :" لأن يصحبني فاجر حسن الخلق أحب إلي من أن يصحبني عابد سيء الخلق"
ياريت كل واحد فينا لو شاف حاجة غلط فى المكان اللي بيصلي فيه يصحح لغيره الخطأ بشكل لطيف .. حتى لو محرج يتكلم ممكن يجيب الحديث ويطبعه ويوزعه علي اللي في المسجد .. او يشتري استيكرز دعوية عن اخطاء الصلاة ويوزعها ..
والثواب والاجر من الله ان شاء الله.

10 التعليقات:

UPENDI يقول...

جزاك الله خيرا على التذكرة
انا كمان ما كنتش عارفه الحديث
بس عارفه انه ما ينفعش اعدى من قدام حد بيصلى
بس خدى من التصرفات اللى تنقط دى كتير ف الجامع خصوصا الامهات اللى بيجروا وراهم عيالهم وبيقلبوا المسجد حضانه عياط بقى على تنطيط على كل حاجه
ربنا يهدينا جميعا

مصري بالغربة يقول...

كل سنه وانت طيبه

والنماذج ديه بنشوفها كتير جدا بالمساجد
بس بصراحه في مصليات الحريم بتبقى زيطه خاااالص

"أحلام حقيقية" يقول...

يااااااه انا انقطعت عن الصلاة فى المسجد بسبب الستات بجد حاجة تحرق دم بجانب اللى بيعدوا قدامك الاطفال والصراخ والعياط والستات اللى بتجرى وراء اولادها حاجة غريبة بجد فعلا الصلاة فى البيت فيها خشوع اكتر

عاشقه وغلبانه يقول...

جزاكي الله كل خير
انا كمان ماكنتش اعرف الحديث بس متعوده من صغري ماعديش من قدام حد بيصلي فامابالك والناس بتنط من فوقك
قمه سوء الخلق
تحياتي

خواطر شابة يقول...

تحية طيبة ورمضان كريم
انا استوقفتني منك هده العبارة "لميت اطفال العائلة و لميت نفسي وروحنا نصلي العشاء والتراويح" انا بصراحة ضد اخد الاطفال للمسجد بيتقلب حضانة صراخ وجري ولعب وهدا بيخرج الناس عن خشوع وروحانية الصلاة وبدل ما الواحد كان رايح يأخد حسنات يقعد يعبي في دنوب وحسبنة المصلين عليه
تقبل الله صيامك وقيامك
مع تحياتي

غير معرف يقول...

جاء رجل أعرابي إلى المسجد وبال فيه وكاد الصحابة أن يفتكوا به فمنعهم النبي صلى الله عليه وسلم وترك الرجل حتى يتم بولته ثم أخبره بأدب أن هذه الأماكن لا تصلح لمثل هذه الأشياء وأمر الصحابة أن يطهروا المكان. هكذا كانت أخلاق النبوة نصح بلا نرفزة ولا تعصب ولا شدة بل لين ورفق ووداعة فإن كثيرا من نفوس الخلق لا تنزل إلى الحق بسهولة بل تأخذها أحيانا العزة بالإثم والكبر والهوى والاعتداد بالنفس ويمنعها من الانصياع للحق ومن هنا كان الرفق يصنع ما لا تصنعه الشدة.فجزاك الله خيرا على نشرك للحديث. إننا حقا في زمن ساد فيه الجهل الشديد ليس بالدين فقط بل بالدنيا كذلك. وساد فيه اتباع الهوى والأنانانية وحب النفس والكذب وخيانة الأمانة وما أشد خيانة الأمانة في هذا العصر قال رسول الله صلى الله عليه: ( إذا ضيعت الأمانة فانتظر الساعة ) .

حمدى جعوان يقول...

جزاك الله كل الخير
فعلا فى مواقف كتير فى المساجد بتحصل مننا محتاجه لوقفه بجد
كل سنه وانتى طيبه

mimi يقول...

ربنا يجعله في ميزان حسناتك

Lagerung يقول...

Allah is with you ... :)

Umzug Wien يقول...

Vielen Dank .. Und ich hoffe, Sie Mved Entwicklung und Schreiben von verschiedenen Themen :)