• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

السبت، 6 ديسمبر 2008

التـُقـل صـنعــة

في الايام الغابرة (الغبرة) وفى احدى خطوباتي السالفة (التالفة) .. ايه ده هم كانوا خطوبات ؟ ايوه يا سيدي (فهم كـُثـــرُ) على رأي ابو فراس الحمداني .. كانوا حكيمات العائلة يقولولي ( التقل صنعة) .. و (خطيبك علي ماتسستميه .. إن هنج رستريه .. وإن ما استحملش الفيستا .. رجعي الاكس بي) .. ولانه صنعة مش اي كلام ولسوء الحظ فانا لا اجيد فن الشد والجذب وللأسف اتعامل علي سجيتي ومن ثم فشلت كل الخطوبات السابقة وانا غير أسفة عليها .. فما شاء الله كان وما لم يشاء لم يكن
فمن واقع تجاربي الفاشلة قولت اقولكم حكمة اليوم وهي التقل صنعة وظبطة ملح مايزيدش شعره

ازاي ؟! اقولكم ازاي :

جواز صالونات والقدر اختارك والمأسوف علي شبابه دق علي بابك .. خليكي عاقلة وراسية وما تقفشيش في رقبته وتقولي عريس يمَاي لا اهدي كدا واعقلي وادرسيه وفى قعدة التعارف اسحبي لسانك ال عشرة متر لجوه .. واشتري ولا تبيعيش .. يعني سيبيه يرغي وانتي ردي علي الاد بكل عقل وحكمة ورزانة وفى اخر القعدة قوليلهم ادوني مهلة شهر افكر حتى لو كنتي هتموتي عليه وعريس ما تحلميش بيه

زميلك في الشغل و انتص في نظره وجاي يقولك انا معجب بيكي .. برضو اعقلي واركزي وماتدلقيش من اولها وتقوليله وانا كمان .. لا لا .. بربرشي واذبهلي واعملي نفسك مرتبكة واقوليله ايه ده انت فاجأتني حتى لو كنتي انتي المخططة لشنكلته وبقالك سنة رايحة جاية تتلزقي فيه

ربنا كرمك واتخطبتي هنا بقي تبدأ البرمجة اللغوية العصبية للمأسوف علي شبابه وده هتلاقيه بالتفصيل في كتاب (المرأة تصنع الرجال والعيال) للمفكرة العظيمة سوسة الفقي

حب البنت تكرفك اكرف البنت تحبك للحكيم تامر حسني .. بصراحة المقولة ديه تنطبق علي الجنسين يا تامر يعني حبي الولد يكرفك اكرفي الولد يحبك .. وزي ما قالوا اجدادنا القط مابيحبش الا خنَاقه .. فيأسفني ويحز في قلبي ان اعلن ان الجنس البشري جنس نمرود مابيجيش الا بالتطنيش والكرف لكن اظهار المحبة والمودة والتفاني في الحب والاخلاص بيجيب نتايج عكسية جدا .. فنصيحتي حبيه ولكن بعقل وماتمحيش شخصيتك وتقضي علي نفسك علشان واحد في الاخر مش هيعترف بكل تضحياتك ديه ولا هيحس بيها وهيجري ورا واحدة تديه بالشوز لان زي ما قولنا القط مابيحبش الا خنَاقه

البنت زي طابع البوسطة تتف عليها تلزق اكتر لكن الراجل زي (التفة) يفضل يتلزق في البنت لغاية ما ينشف .. احب اوضح الخطأ العلمي لهذه المقولة لان الطابع بيتلحس مش بيتف عليه وممكن تبلل صوباعك او سفنجة بميه الشرب وتمرره عليه
اما الشق التاني فهو صحيح جدا ولكن في حالة واحدة ان انتي تبقي كرفاه ومدياله بالشوز في الحالة ديه هيفضل يتلزق لحد ما ينول مراده بعدين هو اللي هيرميكي وزي ما البـُعدا بيقولوا (البنت زي السيجارة تنباس وتنداس) فلو مش عايزة تنداسي يبقي ايه ؟! (........) بالظبط كدا .


هوي علي الفحم من بعيد لحد ما يولع .. وهدى النار ع الرز واوعي ليشيط .. كلمات تؤكد ان التقل صنعة ولو زادت النار ع الفحم هيبقي رماد والرز هيشيط ولو قلت الفحم هيبقي بارد والرز هيبقي ني .. يبقى لازم تتقني الصنعة وتحترفي الشد والجذب ولا للدلدقة

المأسوف علي شبابه بعتلك ايميل او رسالة فى رجل حمامة كسيحة .. عرفاكي هتتسرعي وتقرأي الرسالة ماشي هعديهالك اقرأيها وبعدين خدي نفس عميق وامسكي الرسالة عديها كام سطر وردي بربع عدد الاسطر اللي في رسالته وافتكري النصيحة السابقة هوي علي الفحم من بعيد لحد ما يولع لوحده.. وما ترديش في نفس اليوم ليقول عليكي هتموتي عليه لا طنشيه اسبوع وبعدين ردي عليه

التليفون والموبايل .. اوعى تتصلي بيه ماعندناش بنات بيتصلوا بحد .. خليه هو يتصل على الموبايل علشان تخربي بيته فواتير و عيشيه في جو الرعب وانك خايفة مامتك تقفشك و بعدين قوليله ماما جت ماما جت واقفلي فى وشه علشان يحس بكم المعاناة والتضحية اللي بتقديمها علشان تردي عليه (الكلام ده مع خطيبك او مع جوزك .. خصوصا جوزك ماتخرجيش معاه الا لما تتصلي بباباكي تاخدي الاذن .. هيقدرك جدا ويعرف اد ايه انتي متربيه .. وهيبعتك لباباكي بورقة شكر مزيَـلة بعبارة بنتك طالق .. قبل كدا مافيش كلام خالص في تليفونات او موبايلات ولا خروجات) و اوعي تردي من اول رنة .. سيبيه يتصل 5 مرات .. وردي عليه بميسد كول (رنة واحدة بس) ولما يكلمك قوليله ما سمعتش الموبايل علشان كنت سرحانه بفكر فيك .. هينسي حرقة دمه طول النهار .. وكانك دلقتي جردل ميه علي نار مولعة فهيتش ويبلعها وهو ساكت

عايزة الخطوبة تقصر وصى اهلك يخنقوا عليه .. مافيش خروجات ولا تليفونات .. انتي بنت من عائلة ومالكيش في السرمحة في االشوارع ولا الرغي في التليفونات .. هي زيارة اسبوعية في البيت ويجي اخوكي يكبس علي انفاسه .. وانتي عيشي في دور البريئة وان دول اهلك وانك ما تقدريش تعصيهم ولو عليكي عايزة تعملي اي حاجة تسعده بس ما باليد حيلة وشوية دموع تماسيحية هتلاقيه مااستحملش وقالك احنا نقصر ونتجوز ..اما لو من اياهم فهيطفش وده احدفى وراه قلة وكل سنة وانتم طيبين وعيد سعيد عليكم جميعا

ملحوظة : البوست قد يبدو غريب لكن الاغرب انه حقيقي وواقعي جدا والافعال ديه مجربة من دواهي النساء و النتايج ممتازة .. وده ان دل علي شيء فيدل علي اننا في زمن غريب وافراده فقدوا التمييز والفطرة السليمة .. واصبحت العلاقة السوية الناضجة اللي يسودها التفاهم والاهتمام المتبادل علاقة مملة .. لكن العلاقة الاكشن علي غرار الافلام العربي الهابطة و حيل والاعيب المراهقين بقت هي النموذج الامثل والمرغوب فيه من الطرفين.

59 التعليقات:

Ahmed يقول...

مع كامل احترامي لفكرك العالي ودماغك الموزونه

في نوع جديد من الشباب لما بتقرص مره من التقل بقرر انه يشرب مضاد حيوي

يعني مثلا لما اتصل مره واتنين, اغيب شويه, لو اتصلت يبقى نكمل شويه لو متصلتش يبأه أرمي ورا ضهرك وعلى رأي مثل الشباب اللي بيقولوا (اللي بيتف تفه مش بيلحسها تاني) وشكرا

الطائر الحزين يقول...

هقول لك نصيحة عاوزة تأخديها خديها مش عاوزة تاخديها انت حرة وعقلك فى راسك تعرفى خلاصك

شوفى يا ستى الحاجة كلامك زين زين بس مهما كان كله نصيب حتى لو كان النصيب انتف عليه قبل كدة

Lyssandra يقول...

ههههههههههه

مس سوسا

كل سنة وانتي طيبة وعيد سعيد عليكي يارب

أنا باضحك طول البوست

وأول ما وصلت الي انه حاجات مجربة فعلا وقفت

عندك حق في الملحوظه

"" اننا في زمن غريب وافراده فقدوا التمييز والفطرة السليمة .. واصبحت العلاقة السوية الناضجة اللي يسودها التفاهم والاهتمام المتبادل علاقة مملة .. لكن العلاقة الاكشن علي غرار الافلام العربي الهابطة و حيل والاعيب المراهقين بقت هي النموذج الامثل والمرغوب فيه من الطرفين.""


----------

كل سنة وانتي طيبة وبخير يارب

:)

Lyssandra

صدى الصمت - عاشقة الورد - يقول...

والله انت عسل يا سوسة ونصايحك كلها حكم ومواعظ
كل عام وانتى بألف خير

مرجانة يقول...

اولا بحييكي على الاسلوب الجامد موووووووووووز
واحييكي مرة اخرى على النتايج وخفة الدم غير المتصنعة
بجد فعلا القط مبيحبش الا خناقه ودة شعار الرجال الشرقيون

Ahmed Mubarak يقول...

يخبر ..
ايه يا بنتي القتال الشنيع ده ..
هيا حرب
:)
اضمنلك ان نص مصر اتطلقت والنص التاني فسح الخطوبه من البوست ده ..

كل سنه وانتي طيبه يا حماتي

أحــوال الهـوي يقول...

كل سنة و انت طيبة
انا معاك في نص الكلام و الباقي نتيجته انك تعرضت لخطوبات كثيرة فاشلةو اتفشكلت و لم تستمر

و النصيحة لا ستمرار الخطوبة التوازن بين تطليع عين الزبون و التضييق عليه مع نظرة رضا و او ابتسامة دلال او حتي كوباية شاي تبل ريقة
لكن كله ضرب ضرب و مافيش شتيمة
الزبون ه يخلع

تحياتي

Beram ElMasry يقول...

اختى . Miss. Sosa

السلام عليكم ورحمة الله وبركاته اجمل التهانى بمناسبة عيد الاضحى المبارك اعاده الله عليكم وجميع الاهل بالخير والبركة ، وجعلنا واياكم من الملبين فى العام القادم
والسلام عليكم ورحمة الله

غير معرف يقول...

السلام عليكم ورحمة الله وبركاته
تقبل الله منا ومنك صالح الأعمال
كما أذكركم ونفسى بتقوى الله
والإكثار من الدعاء فى هذا اليوم الطيب المبارك
وأسأل الله
أن يتقبل منا ومنكم
وأن يرزقنا العمل الصالح
وأن ينقنا من الذنوب ويعفوا عنا ويغفر لنا
ويجعلنا من أهل الجنه
وتمنياتى بالتوفيق الدائم
والنجاح المستمر

غير معرف يقول...

السلام عليكم ورحمة الله وبركاته
تقبل الله منا ومنك صالح الأعمال
كما أذكركم ونفسى بتقوى الله
والإكثار من الدعاء فى هذا اليوم الطيب المبارك
وأسأل الله
أن يتقبل منا ومنكم
وأن يرزقنا العمل الصالح
وأن ينقنا من الذنوب ويعفوا عنا ويغفر لنا
ويجعلنا من أهل الجنه
وتمنياتى بالتوفيق الدائم
والنجاح المستمر

رئـــــيسـة حزب الأحلام يقول...

كل سنة وانتى طيبة
كلامك جامد اوى
وفعلا دة اللى ماش اليومين دول
واللى مالوش فى الكلام دة خلية فى دايرة الانتظار
لنا الله ياحبيبتى

kochia يقول...

(`'·.¸ (`'·.¸*¤* ¸.·'´) ¸.·'´)
♥*** happy feast ***♥
(¸.·'´ (¸.·'´*¤* `'·.¸) `'·.¸)

صاحب المضيفة يقول...

دي تجارب جامده جدا بجد

:):):):):):)

برضو الخبرة خبرة برضو


كل سنة وانتي طيبة وبكل خير وسعادة يارب


تحياتي

الفقيرة إلى الله أم البنات يقول...

لا لا انت ملكيش حل
كله كوم وطابع البوسته ده كوم تانى
يا بنتى انت زى العسل

فشكووول يقول...

يا سوسه : انت حتخلى الموضوع كدا صعب والجماعه اللى بيقولوا ضبطوا الملح وما يزيدش شعره .. دا كلام مش صح .. من حقك الاختيار والفرز ومن حقه الاختيار والفرز لكن الحياه لا تعطى كل امرؤ على هواك .. على رأى المثل حبك عليكى وحبه على .. والعاقل من يحاول الوسطيه فى كل شيئ .. والفوز بالمتاح وللاسف المتاح اليومين دول هو ما تعرفينه ومع ذلك هذا هو المتاح..
انا فرحان ان لقيتك .. الحمد لله على السلامه .. اصل .. لن اعود دى كان دمها تقيل شويه .. كانت حتحرمنا منك .. كل سنه وانت طيبه .. هو انت رسترتينى ولا عملتى لى دلايت .. ما شى يا سوسه يا ننوسه .. تحياتى ومره ثانيه كل عام وانت بخير

سمكه واحده يقول...

اولا كل سنه وانتي طيبه يا ساسو يا جميل
ثانيا بقي انا شوفت تعليقك كتير ومكنش في فرصه اني ادخل مدونتك الجميله وليا الشرف اني دخلتها بجد مدونه تحفه وموضيع جميله جدا وربنا يباركلك يا شيخه روحي
ثالثا البوست ده عندك كل الحق وصح جدا وهو ده اللي في الحياه والله
شكرا علي النصائح الجكيله دي
انتس شخصيه جميله وعسوله والله
تقبلي مروري
سمكه واحده

Love-Guru يقول...

أمممممممممم....
دلوقت أنا عرفت ليه في أكثر من عشرة مليون عانس و عانسة في مصر و ليه معدل الطلاق في ازدياد

و علي فكرة موضوع طابع البوسطة ده مش مثل مصري ده مثل امريكي استوردناه مع كوول و هات و اوسم و اصله
The girl is like a post stamp, the more you spit on it the more it sticks.

و برضه في نوع من طوابع البوستة
self-adhesive
بيلزق لوحده و ده النوع اللي بنصح بيه الشباب !

مسعدة يقول...

جمييييييييييييييييييييييييلة

أبو العريف يقول...

جميل البوست يا باشا بس انتي مكبره الموضوع قوي وان جيتي للحق الموضوع كبير فعلا
اصعب اختيار في الدنيا هو اختار النصف الثاني انا عن نفسي الموضوع دا صعب جداااو مش عارف اختار بنت الحلال
ما حدش عنده عروسه ليه تكون
بنت ناس
مؤدبه
ترضي بحالي
متعلمه
تعيش علي قليله
واهلها ما يطلبوش المستحيل

مسدس صغير يقول...

ههههههههههههههههه والله بوست زى العسل .دمه شربات معجب جدا بطريقتك فى الكتابه وفعلا دى تجارب صحيحه 100% اسجل اول زياراتى للمدونه الجميله دى اتمنى لكى الخير

mohra يقول...

انا موافقه على جزئين البوست
الاول و التانى و ماتسألنيش ازاى
يلا كل سنه و انتى طيبه

shaimaa rady يقول...

السلام عليكم ورحمة الله وبركاتة..
بوست فقر فقر قووووووووووووووووووووي

اناعمالة اقرا وانا مش قادرة امسك نفسي من الضحك، بس تعرفي بجد في حاجات قوليتة حصلت مع اصحابي وقت الخطوبة بالاخص ، بس بصراحة مكنتش مقصودة فعلا، بس سبحان الله جابت نتايج زي ما انتي قولتي بالظبط..

هههههههههههههههههههههههههه

تسمحيلي يا قمر اني انقل البوست ده في منتدي عندي بس هاقول اكيد انو منقول من عندك، بجد البوست لذيذ لدرجة انو ميتفوتش

شيموووووووووووووو

كراكيب يقول...

يا بنت اللذييييييينا
ايه كمية الامثال والجمل الحكيمة دي يا خالتتشي

عاااااااسااااال من يومك يا سوسا

miro el niro kwaniro

حاسوباتيه يقول...

ههههههههههههههههههه نصائح ذهبيه فعلا

فشكووول يقول...

طيب يا سوسه خدى وقتك لحد ربنا ما يعديها على خير ومعنوياتك ترتفع .. وبعد كدا احنا مستنيينك عشان ما نقدرش نتحرم من خفة الدم بتاعتك والحمد لله ان انا لقيتك واطمنت عليك
تحياتى يا سوسه النوسه كونوسه (محاوله لاخراجك من حالة الاكتئاب)

اقصوصه يقول...

تدوبنه طربفه

تعودنا منك على كل جميل

بانتظار جديدك دوما

تمنياتي بالتوفيق :)

قلم رصاص يقول...

هههههههههههههههههههه

حبيبك على ماتسستميه ههههههههه

كلام ميه ميه

بارك الله فيكي وفي عقلك الموزون والله

طريقتك جميلة جدا في الكتابة

تقبلي مروري الاول مع التحية

سوسا ومودى يقول...

هههههههههههه
بجد وحشتينى مووووووووووووووووووووووووووووووووووووووووووووووووووووت
مش قادرة اوصفلك انتى واحشانى اد ايهكلامك وتعليقاتك ونصايحك
بجد انا معااااااااااااكى
خصوصا انه مش بأيدى يابا ده مش بأيدى يا با
انا اصلا
تخيلى ان ماما وبابا عايزينى اكتب كتاب على طول
ازاى بقى اربط مصيرى بمصير واحد معرفوش خاااااالص
حتى لو شهر ولا اتنين تعارف
بجد مينفعش
وكل ما اكلم مامام فى الموضوع ده
تتعصب وتقوللى أنتى خلاص
مبقاش حد عارف يمشى كلمته عليكى
ما الناس زمان كانت بتتجوز كده وعمرنا ما سمعنا عن طلاق
لكن انتوا بقى فاكرين نفسكوا فت أوى وحتعرفوا بعض
والنتيجه أنكوا مش نافعين ومفيش جوازات بتعمرلكوا
اقولها يبقى الحل اننا نتسرع ونتجوز

وتنتهى الامر انها تخاصمنى كام يوم وبعدين تنسى اصلها طيبه جدا اصلا
بس اعمل ايه كل ما ييجى واحد وبابا يقوله نكتب الكتاب على طول الواد يطفش
فأنا على العموم اخر ما زهقت قولتلهم انا مش حكتب كتابى على طول
وده قرارى وخلينى قاعده بقى احسن

سورى يا سوسه طولت عليكى يا حبيبتى بس اصلك وحشتينى اوووووووووووووووى بجد

فـتـفـوتـة فتافيت يقول...

السلام عليكم ورحمة الله


فعلًا لم يعد مكان لأي علاقات سوية ولا لفطرة سليمة حتى في العلاقة المفترض إقامتها على التفاهم والتوافق والإستواء بين الطرفين نجدها أصبحات حلبات مصارعة بين طرفين المفترض ان يربطهم الرباط المقدس

تحياتي

شفـقــة و إحســــان يقول...

فينك يا سوسة؟؟
وحشتينا جدااااااااااااااااااااااااا
ووحشتنا بوستاتك يا قمر
متغبيش كده

فشكووول يقول...
أزال المؤلف هذا التعليق.
الحرامي يقول...

بيا ن رقم 1
بيان تأسيس العصابة
يشرفني انا الاستاذ / حرامي لص نشال

ان اعلن لكم عن تأسيس اول عصابة لسرقة المدونين

واحب اعرفكم اني خلاص بقي عندي عصابتي
واسلحتي ومفاتيحي وطفاشتي واعلن لكم جميعا عن ميثاق الشرف لتأسيس هذه العصابه

ويتضمن المواد الدستوريه التالية
1- ان لا يتم سرقة الا ما هو نفيس وغالي وعلي المدونين اللي أي كلام انهم يتطمنوا لاني مش هقرب ناحيتهم
اما المدونين المتميزين فيعرفو اني هسرقهم هسرقهم
2- اي عملية سرقة او سطو مسلح لن تتم الا بعد التهديد والوعيد يعني هبعت رساله للزبون اقوله اني نويت اسرقه
3- يتم ترك بصمات(تعليق ) علي كل مدونه تمت سرقتها عشان تعرف انها اتسرقت


4- يتم عمل نقطة بوليس (عندي في المدونه ) لتلقي البلاغات والشكاوي والتعليقات

5- لن يتم نشر اي موضوع الا اذا كان مسرووووق يعني انا مش هكتب حاجه من عندي

6- ان جيت في يوم واتقفشت فسوف اعلن توبتي وابطل سرقه واحل العصابه
وعشان تقفشني لازم تعرف اسم المدونة الاصليه بتاعتي اللي هيه مش سرقه يعني
- يتم نشر هذا البيان علي اكبر عدد ممكن من المدونات للعلم فقط
اعلانات مبوبه
اعلان لكل الجرايد الرسميه والغير رسميه
مطلوب مساعدين لحرامي.... علي ان يكونوا خبره لا تقل عن عام في السرقه والنصب والتدوين وعلي من يرغب في التقدم للوظيفه ارسال cv وصورتين او تعليقين
امضاء
الحرامي الكبير

عاشقه وغلبانه يقول...

اهي دي البنات ولا بلاش مش احنا الخايبين
قولي ياختي قولي
منك نستفيد ونتعلم
بس شكلنا باللي بتقوليه هاطلق من قبل كتب الكتاب
هههههههههههههههههههههههه

المـــفـــــــقــــــــوعـــــة مــرارتـهــا يقول...

ههههههههههههههههه
مسخرة النصايح دي تودي علي بيت العدال طوااااالي

فشكووول يقول...

وحشتينى يا سوسه النوسه كونوسه .. ايه رأيك انا حاقترح عليكى اقتراح .. انا ممكن اخطبك .. ومش مشكله حاركب شوية الاسنان اللى واقعين منى .. كمان حازرع الشعر اللى ناقص فى راسى .. وبعدين حالبس جنز .. ايه رأيك انفع .. بس عايز اعمل لك اى حاجه عشان ترجعى لنا تانى .. ايه رأيك فى عمك فشكوووووووول؟
اوعى تقولى لأ احسن ازعل واروح اقلع فى الشوية الاسنان اللى فاضلين لى وكمان انتش الشعرتين اللى فى راسى وامشى براسى بلبوص
ارجعى بقىيا سوسه النوسه كونوسه

(green eyes) يقول...

انتي بجد زي العسل

كلامك عجبني موووووووووت بس مش كله حقيقي ومنطقي يعني اعتقد ان الشباب هيحسوا انه تمثيل
يعني حته ماما جت ماما جت واقفل في وشه مش منطقية علشان هو خطيبي واللي بيحصل ان ماما جت خدها سلم عليها
في كته كمان اني علشان اخرج وانا متجوزه اقول لجوزي اخد الاذن من بابا هيقولي روحي لأبوكي وخليه بقى ينفع وساعاتها بدل جواب الشكر هيكون جواب تاني :):)

روح شرقيه يقول...

بجد كلماتك مجرمه
هههههههههههههههههههههههههههه
اتفق معك كليا فيما ذكرتى وخصوصا فى الجزئيه الخاصه بالتغيرات الحادثه علينا فاصبحت الحياه مختلفه عما تربينا عليه ولكن طريقتك ساخره بدرجه قاتله فلم اتمالك نفسى من الضحك اثناء مرورى بين سطورك
تحياتى

أميرة الجنة يقول...

السلام عليكم
مس سوسا احيكى على نصيحتك الغالية اول مرة ادخل هنا وهكررها على طول عشان اسمع نصائحك الجامدة اللى هجربها عليه بس مش قوى كده انا كده بقوله امشى مش عايزين بس بوست روووووووووووووعة
دمتى مبدعة

بنت مصريه يقول...

ههههههههههههههههههههههههههههه
دا انتى عسل والله شربات
يخرب بيت عقلك موتينى م الضحك

صدق اللى قال عليكى سوسه يا سوسه
هههههههههههه
بوست هايل احييكى يا قمر

صانعة الحرية يقول...

والله كنت مخنوقه ونفسى اضحك
اضحك الله سنك واضحككى الله كما اضحكتينى
على فكره صدقتى التقل صنعه
لو تفتكرى مسرحية انطونيوا وكليوباترا
كان انطونيوا قائد عظيم ولكن امام كليو باترا وكانه طفل صغير
كان دايما الدكتور وهو بيشرح المسرحيه دى يقلنا كدا
التقل صنعه
جزيتى خيرا

فشكووول يقول...

ما فيش فايده .. ما فيش فايده

كيكى عوووووو يقول...

ههههههههههههههه
نصاح من عينة....اف 16؟؟
فينك ياحاجة كل دة
عوووووووووووووووو

شفـقــة و إحســــان يقول...

انتى فين كل ده؟؟
وحشتينا بجد
ارجعى بقى كفاية كده

البحث عن الذات يقول...

هاي

بس بجد مش دايماً التقل بينفع
دي حرفنه وماتنفعش غير مع الي فعلاً معجب وبيحبيك مش واحد موقفه لسه ما اتحدتش ما انا اصل مش بحب التقل ...

بس بجد البوست تحفه
وخفة الدم عاليه
...

Soooo يقول...

هههههههههه

والله واحشاني مدونتك وواحشاني كتاباتك
ربنا يسعدك على شوية الضحك اللي ضحكتهم

بس انتي فين يابنتي مش باينه بقالك فتره ليه؟؟؟
لعل المانع خير يارب





سلاموووووووووووز

SaSo يقول...

للاسف
صح جدا

سمكه واحده يقول...

فينك؟
ها فينك
بقالك كتيييير اوي
يارب تكوني بخير

الجواز و سنينه يقول...

ياااااااااااه فكرتينى بالذى مضى
هههههههههههه
و الله يابنتى فعلا الحاجات دى بتجيب نتيجه
كان ليه واحده اعرفها كانت مقطعه السمكه و ديلها كانت تقعد تضحكنا على خطيبها اللى فاكيرها ملاك من السما و انها يا حرام ماتعرفش القطه بتتجوز ليه؟
طيب ما انتى ما يتخافش عليكى اهه
بس عايزه اقولك ساعه الضاء يعمى البصر
و هاقولك على كلمه سمعتها من كانت واحده سفيره مصر
قالت لو انا منعت حبى عن جوزى طيب هاديه لمين و لو ماكونتش على سجيتى معاه هاكون مع مين
انا مقطنعه جدا بكلامها و ان كان فيه شيئ من الغلط علشان زى ما قلتى محدش بيقدر
بس لو موجود اللى يقدر مش خساره و لا روحى و لا عمرى و حبى

rovy يقول...

السلام عليكم

اختى العزيزه وحشاااااانى جدا

انتى فين ؟؟

و لا هو فعلا الثقل صنعه و بتتمرنى فينا !!

تحياتى

سكوت هنصوت يقول...

ايه المدونة الجامدة دي....الواحد والله في رحلة البحث للدعاية للعريضة الي هقولك عليها حالا..قرب ينهبل من كم المدونات الرائعة الي راحت منه في غفلة من الزمن...طيب عشان ما اطولش عليكي قولي طولي...وانت في الحالة دي من نقد الذات على الخطوبات المضروبة الي كلنا في الهم سواء فيها..يا ريت والنبي تذيليلنا العريضة دي بتوقيعك

http://www.petitiononline.com/mod_perl/signed.cgi?ttwpdi

ولو شايفة انك زهقتي من التوقيع والقرايه...فطلي كده على نوارة في البوست ده

http://www.tahyyes.org/2009/02/blog-post_27.html

وهتلاقي انك هتجري عشان توقعي

تحياتي للمدونة الي تهلك من الضحك دي

غير معرف يقول...

Hello! You have a so nice blog... Houda from Morocco

don don يقول...

والله كلامك دة صح وحقيقى عندك حق فية

بس التقل برضة يبقى فى حدود بذكاء يعنى

غير معرف يقول...

انتى فين يا سوسه
البوست ده من زمان اوى
طمنينا عليكى
الجواز و سنينه

ريهام العربي يقول...

ههههههههههههههههههههههههههه

هو معاكي حق بس زي ما قلتي في البدايه التقل صنعه يعني خمس مرات يتصل والبنت تطنش كتير... قولي مرتين ماشي

رساله بعتها قولي 3 ايام بحجه انها متشافتش لكن اسبوع ههههههههههههههه

و معاكي حق في التقل بس محتاج يتوزن


وانا ولله الحمد فااااااااااااااشله بدرجه ممتاز مرتفع في التقل وان عملتها مره بفشل 50 مره
ومش جربتها مع راجل بس عموما في حياتي في امور محتاجه الواحد يصبر ويتقل ولله الحمد فاشله


ومعاكي حق كمان في الملحوظه زمن غريب واغرب ما فيه عقليات ناسو


وزي ما قلت الوسط حلو في كل حاجه

Saadya Arafat يقول...

بجد انتى شربات
وكلامك شرباتاته خالص
انا مبطلتش ضحك

اسأل مجرب برده

مبسوطه انى جيت هنا
واتعرفت عليكى ياجميل

:)

mohamed يقول...

مع كل أحترامي للكلام زكلام حضرتك أديم اوي خلاص مبآش فيه الكلام ده لان اي راجل عارف البنت بتفكر ازاي

عـاشق الاقصى يقول...

لا حول ولا قوة الا بالله
ان كيكدن عظيم
الله يرحمنا برحمته ولا يوقعنا بين ايدين حواااااء الرقيقة جداااااااا

وفقك الله ورعاك ورزقك يعريس الغفلة الي يعرف يمشيكي على العجين ومتبعجيهوش

أبــــو ضـــيــاء يقول...

البنت زي طابع البوسطة تتف عليها تلزق اكتر لكن الراجل زي (التفة) يفضل يتلزق في البنت لغاية ما ينشف

جبتها منين دي
انا لما قريتها مامسكتش نفسي من الضحك

Müllentsorgung يقول...

شكراً لكم ع الموضوعات المتنوعة ... موفقين :)