• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الأحد، 9 نوفمبر 2008

جوانتينامو سكولز

تعلن مدارس جوانتينامو الحكومية المصرية عن فتح باب القبول لكافة الطلاب الكحيانيين من ابناء محدودي الدخل والمعدمين .. اما اذا كنت فافي ومن بتوع دادي ومامي فمئواكم الليسيه والفيرير ونعم المصير

نحن نتميز بفصول ضيقة بشبابيك حديدية او من غير وحوائط رطبة متهالكة تنافس اعتى سجون الحبس الانفرادي

لدينا الونس والدفء .. لن تشعر بالوحدة مطلقا فكثافة الفصل خيالية ولكن ستشتاق الي ذرة اوكسجين تتنفسها او بلاطة فارغة تجلس عليها .. لا تحلم باختراع اسمه ديسك


لدينا يونيفورم صمم خصيصا في كبري بيوت الازياء بالدرب الاحمر وتصميم الخياطة الشهيرة ام رقعة ولن تراه علي غيرك من الادميين .. وينافسك في ارتداءه اطفال الشوارع من الشحاذين وباعة الكلينيكس


لدينا مراحيض غير ادمية يتقيأ لها الوليد في بطن امه .. وتبصر الكفيف و تعمي البصير .. وتزكم الانوف .. وتسبب كرشة النفس والذبحة الصدرية لمرضى الصدر واصحاب القلوب الضعيفة

لدينا انشطة ومهارات متعددة ..ونهتم بالرياضة مثل رياضة النط من فوق السور .. ونهتم بالمواهب مثل الرقص البلدي والغناء الشعبي ونقدس رموز طرب الصهيل عبد الباسط حمودة وشعبان عبد الرحيم .. ونشجع كافة الفنون القتالية بدءا من التشابك بالايدي حتى المطاوي والسنج

لدينا مقررات دراسية يخر لها ظهور الجبابرة والصناديد .. ولا يقوى على حملها عتاة الملاكمة وسائقي ترلات الحديد امثال شوارزنجر و الاسطى ابو سريع

لدينا نخبة من صفوة المدرسين الساديين خريجي كبري الاصلاحيات ومراكز التعذيب
- مهارة في الركل و النفخ والتلكيم
- اتقان لفنون السب واللعن والتقريظ
- احتراف في استخدام الفلكة و الجريد والسلاسل الحديد
- ابتكار واطلاع لكل جديد فى فنون التعذيب
- دبلوما من جوانتينامو وماجستير من ابو غريب

نحن نؤهلكم للالتحاق بصفوة كليات ابو زعبل والقناطر بمجموع وبدون .. كلية الموت العنيف .. كلية النصب الخفيف .. كلية البلطجة بنين .. كلية الشرشحة بنات .. كلية الصياعة قسم تقليب العيش وتلقيط الرزق.

كبرى وظائف القتل والسرقة والنصب محجوزة لكم .. واسرة الاصلاحيات وابراش السجون في انتظاركم

ولا أماكن للابرياء والضعفاء لدينا فمصيرهم الموت ركلا كالمسكين اسلام عمرو بدر او السيكوباتية والعقد النفسية كطلاب مدرسة الفيوم الذين اجبروا علي خلع بناطيلهم و ملابسهم الداخلية امام زملاءهم

والفاتحة علي شهداء التربية و التعليم

38 التعليقات:

Ahmed يقول...

لو سمحتم سيادتكم,كيفية الاشتراك ازاي؟

Teawater يقول...

هههههههههههههههههههههههه
بس انا كنت في مدرسه خاصه وكانت ملتزمه اوووووووي والحمد لله مكنش فيه
كانت مدرسة عثوله كتير واتعلمت فيها اهم درس في حياتي كلمة
ع ي ب
كل يوم المدير يسمعهالي
بس بجد مشكله كبيره اوي الي بيعانوا منها التلاميذ الي من الطبقه المتوسطه يعني باحس انهم مغلوبين ع امرهم وبعدين يعني لا رعايه ولا اهتمام ولا بيانو الحاجات ديه بتغير من سلوكيات الفرد وبتهذبها

تقبلي مروري

kochia يقول...

انا في التربية والتعليم
يعني شهادتي مجروحة زي ما بيقولوا

بس اللي بسمعه وبقراه لحد دلوقتي مشفتوش في الواقع

بجد

الكحيان يقول...

- الآن سكنت خواطري وهدأت نفسي وانخرست علامات الاستفهام وعرفت من أين أتانا مازينجر،وسلاحف النينجا، ورامبو وإخوان هذا الطراز..

- أصوب لك خطأ شنيعا قد وقعت فيه ياسوسة هانم،وهو أنه ليس عندنا طبقات متوسطة في مصر،إنما الطبقات في مصر ثلاث: معدومي الدخل، ومحدودي الدخل، وأصحاب الدخل وأما الطبقة الرابعة فهي طبقة محاظيظ الدخل بتوع عم فشكول- مرتبهم الشهري الرسمي يبدأ من 450ألف جنيه-..

- أرجوك ياسوسة كفي عن ذكر باعة الكلينيكس بالذات لأن هذا الموضوع يسبب لي حساسية- مين عارف يمكن تحكم علينا الأيام أن نعمل في هذه المهنة بعد الظهر-...

- حلوة يتقيأ لها الوليد في بطن أمه !!! تعرفي لقد كنت من محترفي النط من فوق الأسوار بل كنت المصمم الأول للمنافذ السرية للهروب من المدرسة حتى قيض الله لنا مديرا نشيطا أتى بالصنايعية واللحامين واستعان ببعض الطلبة الخباصين الذين دلوه على المنافذ فسدها جميعا لكني اكتشفت بعد ذلك بأيام منفذا استراتيجيا يقع أمام غرفة المدير مباشرة...!!

- كلية الشرشحة بنات مجموعها من كم ياسوسة؟ وهل فيه قسم لادعاء الاغتصاب والتحرش ؟ .

- كبرى وظائف القتل والسرقة والنصب محجوزة لكم .. وأسرة الاصلاحيات وابراش السجون في انتظاركم.. أخطر عبارة قاتلة في تدوينتك فهذا يوضح لنا من أين أتى المحاظيظ وكيف تعلموا، وماذا تعلموا إذن مشكلة مصر الحقيقية هي مشكلة تعليم في المقام الأول .برافو عليك.

- أين طفل الحضانة الذي تم كيه بالنار منذ أيام،نرجو منك ياسوسة الدعاء بظهر الغيب لإخوانك المستضعفين من تلاميذ قنا الذين انهال عليهم المدير والأستاذ بيد المقشة .

- سؤال محير ياسوسة لعلي أجد له عندك إجابة... الوزراء جميعا وأخص منهم وزير التعليم يعلمون أبناءهم في أرقى المدارس الخاصة والأجنبية في مصر..ويلحقونهم بالجامعات الأمريكية وعندما يمرض المحاظيظ وتمرض زوجاتهم حتى ولو كان وزير الصحة نفسه فإنهم يهرعون للعلاج خارج مصر، ولو أننا جردنا وزير القماش على طريقة ( أبو غريب ) من ملابسه تماما لوجدنا ملابسه الداخلية كلها مستوردة... فما تفسيرك لهذا التناقض؟ وما أفكارك عن التشجيع على المنتج المحلي ؟ وهل الموضوع والعياذ بالله له صلة بالوطنية والولاء القومي إلى آخر هذه الشعارات، وهل يدل على أن العقول أدركها نوع من التسوس والتدويد ؟

غير معرف يقول...

والنبي ضحكتينى وانا ماليش نفس
صحيح شر البليه ما يضحك

Unknown يقول...

للأسف ده بقي فعلا حالنا

Miss. Sosa يقول...

eng ahmed abo el-ella

لا الاشتراك سهل جدا روح قدم في اي مدرسة حكومية

-------
Teawater

للاسف المدارس الخاصة واللغات وخصوصا الراهبات هي اللي بتهتم بالسلوك والاخلاقيات دلوقت

----

كوتشيا

الله اعلم بماذا تريه بس انا عائلتي فيها عدد لا بأس به من التربويين واتنين منهم واحدة استقالت والتانية غيرت المهنة لانهم لم يستطيعوا التعامل مع زملائهم ومع مديريهم ومع الطلبة ومع اولياء الامور

Mony يقول...

طيب الناس اللي علي قدهم يعملوا ايه لولادهم يا ميس سوسا

مافيش غير انه يقعدوهم جنبهم

ولا ينزلوهم الورشة اللي في اخر الشارع يتعلمولهم صنعة

و لا حتي صبي مكوجي


الناس تعمل ايه بس

ربنا المعين

Miss. Sosa يقول...

عزيزي الكحيان

صاحب الكومنت البوستي اي الكونت نفسه يصلح بوست :)

- الخطأ صلحته .. رفع عن امتي الخطأ والنسيان مش مستاهلة تصويب ولا ضرب نار

- حاضر هبعد عن بتوع الكلينيكس ههههههه شكلنا كلنا هنسرح بباكتس

- اما عن نطك للسور و حفرك للاخاديد والمنافذ ده اناا واثقة منه هههههه حرام عليك شوهت سمعتنا الناس هتقول المعيدين دول متشردين و بلطجية .. الله يكرمك نوهه في مدونتك انك سبشيال كيس وان بقيت الاستاف من اللي بيمشوا جنب الحيط واللي كانوا يطلعوا يشرحوا بدل مدرسيهم وكشاكيلهم كان المدرس بينقل منها في دفتر تحضيره انا شخصيا كان بيتعمل معايا كدا

- كلية الشرشحة بدون مجموع طبعا بس تتطلب مهارات خاصة من السرسعة والتقصيع ودول بيتدعوا اي حاجة علي اي حد ههههههههه

- نعم المشكلة في المقام الاول تعليم واخلاقيات وتربية مفقودة في البيت والمدرسة والشارع ومجتمع اعتاد مشاهدة العنف والعري والان يطبقه وديه مشكلة اعلام برضو

- ربنا يرحم المستضعفين من الكبار والصغار وينصر كل مظلوم في هذه البلد
وينتقم من كل ظالم ومفتري

- سيبك من الوزراء مالناش دعوة بالكبار انت شخصيا تأمن علي ابنك او بنتك تدخله مدرسة حكومية بعد اللي بتسمعه وبتشوفه ده ؟
او تأمن توديه مستشفي حكومية علشان يصاب بعاهة ولا يتسرق كليته ولا كبده ولا يضيع منك خالص لا قدر الله
اعتقد اننا هنبيع هدومنا وعفش بيوتنا ولا ندخلش اولادنا مدارس او مستشفيات حكومية

تحياتي لقراءتك المتنية للبوست ولتعليقك الناقد البناء

Miss. Sosa يقول...

اسامة عبد العال
هو بوست يبكي نوع من الكوميديا السودا ..

----

اسراء

للاسف فعلا

---

موني

والله يا موني انا اؤمن جدا بالتعليم الفني للي مستواه العلمي مش جيد او ماعندوش رغبة يكمل والدول المتقدمة كلها كدا قلة جدا اللي بيكملوا والاغلبية تعليم متوسط

لكن تعالي لمجتمعنا اللي لا يحترم التعليم المتوسط ولا يحترم اصحاب المهن
ويحترم الشهادات الاسمية ومش بيقدم لاصحاب التعليم المتوسط اي مهارة يخرجوا يشتغلوا بيها مجرد حشو معلومات تسكب او تجتر في ورقات الاجاب ثم تذهب من حيث اتت وهو ده التعليم المصري
لا يسمن ولا يغني من جوع
حاجة زي قلتها وكمان اهانة وبهدلة وتعذيب

الكحيان يقول...

شكرا لك ياسوسة على الإفادة وعلى قفشاتك اللذيذة التي تقتلني ضحكا، على فكرة أنا ليس لدي أطفال ولا زوجة، وسوف أشترط على من أتزوج بها أن تنزع فكرة الخلفة تماما من دماغها، وسوف أشترط أيضا في عقد الزواج إزالة الرحم، وحبذا المعدة معاهم. والتأكد من أن لها كليتين لم تسرق إحداهما، ولكي تقتنع سآخذها في نزهة إلى إحدى مدارس جوانتينامو حتى تقتنع بعدم الخلفة. وحبذا لو اتفقنا في العقد على عدم الزواج من أصله!!!.

Miss. Sosa يقول...

هههههه

حرام عليك يااخي
استئصال رحم ده قتل عمد لانثى
واستصال معدة ده بخل بقي

لا انت ماتتجوزش احسن كفاية عليك العلم والتعليم اللي مشحططك ومكحينك ده :)

nona يقول...

هو المفروض بدل ما الناس تحوش للجوز الافضل ليهم يحوش للتعليم للعيال الاى لسة ماجوش مش كدة اضمن
ماهو مش معقولة يطلع عينيا فى الخلفة و تربيتهم و فى الاخير يحصلهم كدة
كنت معترضة مع اختى انها عايزة تدخل ابنها مدرسة فرنساوى و انا بقولها التجريبى افضل والفرق هيبفا احسن ليهم لكنها صممت وفعلا تلاقى فرق كبير فى المدرسة من ناحية الطلابة و المدرسين و اسلوب التعليم لدرجة الولد مش عايز يغيب من المدرسة
اما المدارس الحكومية اكيد لو خيارتى طلابها هيختاروا الخروج نهائيا منها
ولا عزاء للفقراء

الكحيان يقول...
أزال المؤلف هذا التعليق.
الكحيان يقول...

لكن ياسوسة ما تفسيرك لما يلي :
- العباقرة في الأدب والكيمياء والفيزياء والطب ...إلخ كانوا في مدارس وجامعات حكومية .

- الجامعة الأمريكية لها مايزيد عن ثمانين عاما في القاهرة ويدرس فيها أفضل الأساتذة ولها إمكانات هائلة ومنذ نشأتها لم يخرج فيها أي علم من الأعلام لا في الأدب ولا في السياسة ولا في الملوخية حتى باستثناء النبي حارسه وصاينه بتاع المستقبل .

- العيال خريجو المدارس الخاصة والأجنبية يلاحظ أن مستواهم يهبط في الجامعات مع استثناءات قليلة.

أريد أن أقول إن الضرب والتعذيب والقهر والتعرية والنفخ والفشخ ...يأتي معنا بنتائج إيجابية، والمذاكرة تحت عمود النور وعلى لمبة الجاز تأتي بالعجب العجاب، أم لك رأي آخر؟.

Miss. Sosa يقول...

عزيزتي nona

هو احنا هنعيش طول عمرنا نحوش
نحوش علشان نتجوز ونحوش علشان نعلم الاولاد وبعدين نحوش علشان نجوزهم وبعدين يرمونا في مقابر ابناء السبيل هههههههه

بصراحة انا مع رأي اختك مدارس الفرنساوي من اعرق المدارس بمصر اللي بتهتم بالاهلاقيات والسلوكيات والانشطة


----

عزيزي الكحيان

- انت بتقول كانوا ها وكان فعل ماض ناقص مش كدا ولا ايه :))
نستني عشرين سنه و نشوف طلاب المدارس الحكومية الحاليين هيطلع منهم نابغيين وافذاذ ولا لأ

- الجامعة الامريكية بها كل شيء ممتاز من دكاترة وامكانيات واهتمام لكن مع مادة خام فاسدة .. اذن لا حياة لمن تنادي .. بتوع روشنوه وكاجولوه مش هم دول اللي هيأتوا بالغريب المحير في العلم ولكن هيأتوا به في الروشنة والسرمحة

- لا مش معاك في النقطة ديه كليتي علي سبيل المثال 90% من معيديها والمدرسي المساعدين خريجي لغات وتجريبي ومدارس خاص لكن الاساتذة مدارس حكومية وبالنسبة للطلبة خريجي اللغات والخاص بينجحوا فيها بسهولة ويسر علي عكس الطلبة الحكوميين لان اللغة مشكلة معاهم

- انا معاك ان لمبة الجاز والكد والجهد والمعاناة تصنع منا المعجزات ولا يولد الرجال الا من رحم المعاناة
لكن الضرب والعنف و الاهانة والتعرية لا تأتي الا بالعقد النفسية والرواسب وتؤثر علي حياتهم مستقبليا وبيبقوا غير اسوياء ولو مسكوا منصب بيبطشوا بمرؤسيهم علي عكس الشخص السوي نفسيا

Ahmad Abdulatif يقول...

رائعة يا بنتي والله

مخبر قمل دولة يقول...

اضحك الله كل اسنان حضرتك
انا طول عمري متباعك بس من غير تعليقات
بس المرة دي بجد ما قدرتش امسك نفسي
فطستيني من الضحك بجد :D

وباعلن انضمامي للباشمهندس احمد ابو العلا في سؤاله عن كيفية الاشتراك
نقطة مهمة فاتت من حضرتك دي :D

مخبر قمل دولة يقول...

اوبس سوري
مكنتش اخد بالتي ان حضرتك رديتي على احمد ابو العلا

وتحية بجد للكحيان على تعليقه

اقصوصه يقول...

والله شر البليه ما يضحك!

أحــوال الهـوي يقول...

بارعة

و البراعه في المامك بوسائل الجذب و فنون الاعلان

دقيقة
و الدقة في افراد كل مايحتاجه الطالب من اغراء

ذات نظرة مبعدية
لتامينك مستقبل خريجي المدارس للتخصصات التي يحتاجها المجتمع

مبدعه
و الابداع لعثورك علي كل هذه المفردات و الالفاظ و تجميعها في مقال واحد

فظيعة
و الفظاعة لاقناعي بالافصاح عن نوع ملابسي الداخليه في اقرار الذمه الماليه

تحياتي

من غير عنـــوان يقول...

الحقيقة ان انت تناولتي موضوع التعليم باسلوب قوي وساخر ومؤثر...

ولو دورتي على أحد أسباب الحشر تعرفي ان ده جاي من عقدة قديمه اسمها
بلد بتاعت شهادات
وان فاتك الميري

وده أصبح من الموروثات الأزليه في هذا الشعب

ومش مهم نكتشف الطاقات أو الإبداعات في أطفالنا

تحياتي وسلاماتي وآمالي في غذ مشرق لأطفالنا

حرية يقول...

اسلوب ساخر لكن تحفة يا Miss. Sosa

بجد حرام اللي بيحصل للطلبة في المدارس اليومين دول لكن احب اقولك حاجه, كمان الطلبة اصبح الكثير منهم شئ لا يطاق وده بيرجع الى الدروس الخصوصية التي ضربت صورة وهيبة المدرس امام التلميذ

وعلى اي حال المشكلة معقدة ومتداخلة وتحتاج الى مناقشة جادة وحلول اسرع

تقبلي مروري

و تحياتي اليكي

حاسوباتيه يقول...

ههههههههههههههه ده ايه ده يا بنتي بس عارفه انا بسمع عن مدارس كده فعلا

emey يقول...

موضوعك جميل جدااااااااااااا متعرفيش اْنا اْما قراْت موضوعك ضحكت اد اية جمببببببببببببببببببببببببببببل

فشكووول يقول...

ايه يا سوسه انتى اتعديتى منى ولا ايه .. ايه يا بنتى السخريه دى .. خدى بالك .. انت بقيتى من مدرسة الفشاكيل ولا ايه .. ما لديك من الديسكات التى ليست لديك .. وعلى فكره ديسك فيها جناس مع دكه وممكن تقوليها دسكه .. والله الواحد ما عاد يآمن على نفسه من اى حاجه .. من المدرسه اللى يروحها مفقود واللى يرجع منها مولود والا من القطارات والا من المراكب والعبارات ولا من الشعبانين عبد الرحيمين وسعدين الصغيرين اللى اخترعةا لنا كلام يبوظ العيال ويودى فى داهيه ... هييييييه وبعدين الرايضه الحدينه بتقول 1+1 ممكن يساوى ثلاثه .. بقى عايزانى انا مثلا والكحيان 1+1=3 لا لو انا وواحد تانى مش حاقول اسمه أنا + هو ممكن = 4وما توجعيش دماغك .. وقولى مدد يا سيدى المحظوظ الله لا يحظك

فشكووول يقول...

خدى بالك من مشاغبات الكحيان .. وخليك صاحيه له .. وخلى الكونتاك بتاع مخك يشتغل على آخره مع الكحيان .. اصل انا عارفه

بنت أبيها يقول...

ايووه يا جدعان على ده اعلان


ما مدارس مصر على اعلى مستوى اهوه


امال مال الناس بتشتكي من التعليم ليه

ناس غاوية معارضة وخلاص

:)

أحــوال الهـوي يقول...

شكرا لرؤيتك وتقديرك
و انا لست مجاملا و لكنني اصيب كبد الحقيقة
التودين اعاد لي حياة افتقدتها لسنوات و استرجعتها مرة اخري مع اصدقاء مثلكم نتبادل الاراء و ننهل من معين الثقافات المختلفة
ادين للجميع بفرحة كانت قد تاهت عني و سعادة طالما ضلت طريقها الي


تحياتي

الكحيان يقول...

أشم رائحة شياط ياسوسة ... افتحي كبوت العربية وشغلي الكونتاك على الآخر ولو فيه حريقة شغلي الطفاية..وصوتي ولمي الناس، ولو ظلت الحريقة كما هي اطلبي العون على الفور من عمنا فشكول حبيبي.. حمد لله على السلامة ياعم فشكوووووول .

بس خلاص ... يقول...

سوسه طمنتينى على مستقبل العيال ... على كده بقا ننصح اولياء الامور بسحب اوراقهم من المدارس واستبادلها باوراق كلينكس ... على الاقل اختصار الطريق ويكونوامستقبلهم ويعتمدوا على نفسهم بدرى بدرى بدرى ... بس كده هيحصل فى ازمة فى الكلينكس وهيرتفع ثمنه ... شكلك كده عندك مصنع كلينكس وبتروجى بضاعة

الازهرى يقول...

العزيزة سوسه

سمعنا بالفعل عن بعض حالات كان فيها ضرب واهانة سواء نفسية او حسية

ولكن لم يصل الامر على قدر علمى حتى الان الى ما يمكن اعتباره ظاهرة

ولكن التعليم يوجد به بالفعل الكثير من الاخطاء الاخرى التى نرجوا جميعا ان يتم تلافيها لنرقى بالمستوى التعليمى لنا عسى ان نرقى الى ما نحب

تحياتى

my dream يقول...

سوسه
ازيك
بوصي ياستي من فتره كنت بفكر انا وسي الاستاذ بتاعي نجيب بابي قوم ايه الحمدلله ربنا فرحنا وطمنا على نفسنا وبقيت كلبوظه وعندي بنبينوا جوه والحمدلله على كل حال قبل ما يشوف الدنيا ربنا رحمه وطبعا انا بقى اقعدت اعيط واعيييييييييييييط لحد مسي الاستاذ جوزي برضه جه وقالي يابنتي احمدي ربنا على كل حال انت شايفه العيال عماله تموت في المدارس وتحت يد المدرسين والي بيموت من الغباء والجهل على الرغم من انه يحمل شهاده والله الحمدلله والي نفسي اقوله ان كتير من اولاد ناس اصحبنا دخلين مدارس خاصه مش بيستفيدوا منها اي حاجه غير جهل على جهل كل المكسب انهم مش بيحتكوا بأطفال الطبقه الكادحه في المجتمع المطحون ومش بيسمعوا كلام عيب من الي بيقلوه بعض مدرسين وطلبه المدارس الحكوميه
سوسه مدونتك قمه في الروعه
كلام جامد وكبير وبالنسبه للسرقه من المدونه لسرقه المدونه لاثراء جروب على الفيس بوك صبري نفسك انا حد اخد كل كتاباتي المتواضعه ولولا ستر ربنا كانت اتعملت كتيب بأسمه
مش عارفه امتى ممكن الواحد يحفظ حقوقه ويبقى فبه امانه من القارئ
معليش طولت عليكي
مع وافر حبي
مروه

Mony يقول...

انا معاعرفتش اعلق في البوست الاخير علشان شيلتي التعليقات


ده جد ده ولا ايه؟؟؟؟


ليه كده

ماحنا كنا ماشين كويس

طيب في حد زعلك ؟؟؟؟؟؟ولا ناوية تغيري شعار المدونة؟؟؟؟؟؟

ياريت تفكري كويس

Doba يقول...

ليه
ليه
ليه
ليه

تنسحبى وتقفليها ليه
من حقنا نعرف مبررات لاننا متابعين دائمين لسيادتك وبنحبك وبنحب قلمك

لو سمحتى نظرة رأفه وتعالى وسطينا من تانى ولو وقتك مش يسمح تعالى من آن لآخر واحنا هنستناكى

فى انتظارك يا استاذة
هبة

الفقيرة إلى الله أم البنات يقول...

إنا لله وإنا إليه راجعون

mohamed يقول...

ههههههههههه انا كنت في واحده من المدارس دي:D:D:D:D

Kellerentrümpelung Wien يقول...

شكراً جزيلاً ع المجهود ... :)