• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الثلاثاء، 23 سبتمبر 2008

الربعية تعلم أمها الرعية

وصلنا لان العمارة بقت كوم تراب ....وده لان اليوم ده يا سادة يا كرام كان 12 اكتوبر سنه 92 .... يوم الزلزال .....

المهم اصبحت حنة يتيمة وملهاش مأوي كمان ..... المهم اتنقلت وعاشت مع خالتي وجوزها عم حسين ف اسكندرية وده طبعا بعد ما بيت خالتي اللي ف القاهرة راح ف الوبا هو راخر مع الزلزال وعم حسين ملقاش غير بيت العيلة القديم اللي ف اسكندرية

واتربت حنة وكبرت .... واهو فرحها جه .........

وبرده من الحاجات اللي سرحت فيها وافتكرتها سامر اخو سمير جوز اختي نهي لانه رغم ان كان ف بيت خالتي ضيوف كتير سواء من اسوان ولا من القاهرة كلهم جايين لحنة
الا انه كان مستبعد تماما اني الاقي سامر ضمن مشجعي حنة ...... بس زالت دهشتي دي لما عرفت نشاط سامر الاجتماعي في رعاية الايتام وانه لما عرف من جوز خالتي بالصدفه قصة حنة قرر يشارك والشهادة لله كانت مشاركته اكبر المشاركات ....
بس الغريب ف الامر ان واحد زي سامر ممكن يكون مهتم او عنده وقت للنشاطات الاجتماعية دي ..... بجد بني ادم مقاتل مهندس وطبعا شغله مش ذو طبيعه سهلة خاصة بالنسبة لظروف سامر لانه عنده اعاقة ف ايده ورجله الشمال وده انا مااخدتش بالي منه الا لما شفته المرة دي
بجد بني ادم مقاتل ....... وافتكرت ملامحه الهادية الراضية وقدرته علي اضحاك الاخرين بدون ما يفتعل ده
وافتكرت قفشاته مع عم حسين ... وخاصة المرة الوحيده اللي روحنا نصطاد فيها انا وعم حسين لان الوقت كان ضيق المرة دي وكلنا مركزين علي فرح حنا
واظرف التعليقات واحنا واقفين مستنين أي حاجه توصلنا عل الدائري وعم حسين بيقوله سامر اللي جاي هناك ده اتوبيس ....
سامر ..... لا ياعم حسين دي مقطورة بتستعبط وعامله نفسها اتوبيس ..... عادي ياعم حسين المقطورات دلوقتي بتستعبط كتير ده انا وانا جاي من القاهرة الصحراوي كان واقف لمده ساعتين وف الاخرة اكتشفنا اللي معطل الطريق مقطوره نايمه علي جنبها وبترضع سته توكتوك
بجد وقعت علي روحي م الضحك
وبرده نط ف دماغي كلام حنه وهي قاعده معايا بالليل بعد كل البيت ما نام وهي راسها والف سيف تحنيلي ايدي ...... يا بنتي مينفعش انا مبحبش منظر الحنه بعد ما بتبدي تروح بتبقي عامله زي المرض الجلدي
المهم البنت قعدت تديني دروس ف الجمال وفوايد الحنا وقالتلي
: مش تزعلي مني يا ابله سوسن انتي اهتمامك بنفسك بعافيه حبتين ... مش تزعلي مني بس انتي جميلة لكن مش بتظهري جمالك ده
استغربت من كلام حنة المباشر بس مازعلتش ومش عارفة مزعلتش ليه .... حتي انا قعدت قدامها اسمع نصايحها عن العنايه بالشعر بالطرق الطبيعية وايه افضل الحاجات اللي من عند العطار للبشرة
صحيح كنت مستغربة ان بنت زي حنه ممعهاش الا الدبلوم هي اللي توجهني واتعلمني .... بس ماحستش ان ده في أي غضاضه
وهي بادب كل ما تقولي نصيحه تضحك وتقولي ..... مش بيجولو الربعية تعلم امها الرعية
علي فكرة الربعيه يعني المعزة الصغيرة وبيتقال لما حد صغير يعلم حد كبير
وانتابني فضول اني اسال حنه عن سبب رفضها للعريس المتيسر اللي اتقدملها علشان يتجوزها وياخدها معاه للخليج لانه بيشتغل هناك وتفضيلها للعريس اللي جالها من البلد
البنت ردت رد ميخرجش من أي فيلسوف بجد لدرجة ان انا عينية رغرغت من فطرتها السليمه
قالتلي شوفي يا ابله سوسن العريس اللي جاه ده كان عايز خدامه وبس تخدمه وتخدم الناس كمان هو بس كان عايزني عشان عرف ان انا يتيمه وبنت بواب وهبقي واخده علي خدمه الناس اللي ف العمارة اللي بيشتغل فيها طبعا مش عيب اني اساعده بس العيب انه ياخدني عشان مسترخصني لاني يتيمه فاني ببساطة مش شوفت انه فرصة ..... يا ابله سوسن الفرصه هي اللي تجيلك ف الوجت اللي فعلا تجدري تستغليها فيه ولو جات ف وجت مش تجدري تستغليها فيه او هي مش علي مجاسك ..... مش تبجي فرصة ...... ولو صبرتي ففي السماء رزقكم وما توعدون فرصتك هاتجيلك لحديكي ..... علينا ان احنا نعمل اللي علينا والنجاح ده من عند ربنا ومتجدر
حضنتها بعد الكلمتين دول بجد ..... اتعلمت دي الكلام ده فين .........بس نقول ايه بقي الربعية تعلم امها الرعية
بجد كان مكسبي من الرحلة المرة دي سامر وحنة ...... الاتنين خلوني اشوف حاجات انا مكنتش شايفاها ... ايه الهبل اللي انا كنت فيه ده كل همي بس هاعنس ... امتي اتجوز .... مبيجنيش عرسان ليه
ده الدنيا طلع فيها حاجات تانيه كتير اهم ......... وفضل كلام حنة بيرن ف دماغي زي الشظايا المتطايرة ..... في السما رزقكم وما توعدون ...... نعمل اللي علينا والنجاح ده من عند ربنا .

15 التعليقات:

blue-wave يقول...

هههههههههههههههههههههه
حلوة اوى الصورة

مصري بالغربة يقول...

صورة حلوة

بس عنوان البوست مش مفهوم

يا ريت توضيح لكتر

وفين بوستلتك الجديدة

ده انت من زمان ما بتكتبيش

وما بترديش على الشات بوكس حتى

maiosha يقول...

الله عليكى يا حنة

بسم الله ما شاء الله عليها.. والله يا بخته اللى هيتجوزها ده

سبحان الله فعلا يا سوسة فيه ناس عندهم ثقافة بالفطرة .. يمكن إحنا تعليمنا والتكنولوجيا اللى بقينا بنستعملها فى كل حاجة فى حياتنا هى اللى بوظتلنا فطرتنا النقية دى

بجد ربنا يوفقها

أما سامر ده بقى طلع حكاية .. بس مقولتيش يعنى ظروفه ايه؟؟ متجوز ده ولا مرتبط ولا ايه؟؟

بجد شكله حد جميل أوى ومتعاون مش زى شباب كتير بنقابلهم اليومين دول

ربنا يوفقهم كلهم

وكل سنة وانتى طيبة

سلام

hager يقول...

ايه الصوره اللي كلها امومه دي :)
علي فكره البوست جميل جداا وانا احترمت حنه جداا .. واحلي ما فيها انها بتتكلم بفطرتها

غير معرف يقول...

تحياتي سوسة

كم أنت مبدعة
أود أن أضيف

أعرض على مصطلح عنوسة
أو عانس

إن المجتمع العربي يغرس في ذهن الفتاة
أن الزواج اولا واخبرا

هذا مفهوم خاطئ
من لم تتزوج تعاني الأمرين من قهر المجنمع

ثقافة العنوسة المتخلفة

والعزلة القاتلة

والعلاج رفض كلا القهرين

لا بد من ذلك

مع التقدير والحب
آدم
http://insi.maktoobblog.com/

مـجـنـووون يقول...

بجد كلمها جامد قوي
وفكرها عالي جدا
لأزم الواحده متقللش من نفسها ، ومتوهمش نفسها بالكلام الفارغ ( ضل راجل ولا ضل حيطه - عريس لقطة - قطار الزواج حيفوتك ..... ألخ )
لأزم الوحده متبعش نفسها علشان كلام الناس أو علشان أي حاجه رخيضة

وعندها حق الرزق من عند الله ومفيش حد بياخد غير نصيبه

اسعدني تواجدي في مدونتك الجميله
مجنووون

jehan يقول...

الفرصه هي اللي تجيلك ف الوجت اللي فعلا تجدري تستغليها فيه ولو جات ف وجت مش تجدري تستغليها فيه او هي مش علي مجاسك ..... مش تبجي فرصة


مش لاقية غير ان حنة قالت معانى جامدة جدا بس تعريفها للفرصة بجد كان من اجملها

سوسة وحنة وسامر اشخاص رائعين بجد

الوردة البيضا يقول...

عزيزتي سوسا
الف شكر على زيارتك الكريمة للبلوج الجديد الخاص بي.. شرفتيني ونورتيني وأهلا بيكي دايما.
أنا قولت أردلك الزيارة وتجولت سريعا كده في مدونتك وعايزة أقولك إني سعيدة بيها جدا. أسلوبك سهل وبسيط وبتستخدمي في كتابتك نفس أسلوبنا في الكلام، والمدونة بوجه عام تتسم بخفة الدم رغم قيامها في الأصل على هم كبير بياكل في قلوب ملايين من بنات مصر. معلش فرجه قريب، وأجمل حاجة تتقال في المشكلة دي هي اللي قالتها حنه:"وفي السماء رزقكم وما توعدون"
تحياتي ليكي وتمنياتي بالتوفيق

NilE_QueeN يقول...

انا مجتش عندك من زمان

مانتى كنتى مهاجره ف بلاد الله الواسعه

عجبني كلامك عن حنه اوى

وكل عام وانتى بافضل حال

أبوعمر يقول...

ما شاء الله
إيمان و يقين عالي
ربنا يحفظ حنة ويبارك لها
والصورة جميلة جدا ومناسبة للبوست
ربنا يوفقك

سندس وأمل يقول...

البوست فى منتهى الروعة وفعلا حسيت

من كلام حنه إنها فيلسوفه وربنا يحميها

ويوفقها فى الجوازة دى والصورة حلوة

كتييييييييييييييييييير.......

وربنا يوفقك...."أمل"

الجواز و سنينه يقول...

عجبنى اوى المثل
بس ايه الموود اللى انتى فيه ده
عامتا الف مبروك ان حنه اتجوزت
و انك اتعلمتى حاجه من الربعيه
ههههههههههه
و بعدين هاقولك على حاجه
هيه بتقول انه كان عايزها تخدم عايزه اقولك انى اكتشفت اننا بنتجوز علشان نخدم 24 ساعه و من غير فلوس كمان
اهئ اهئ اهئ
اصل انا بكتبلك بعد شغل فى البيت و الله 18 ساعه و انا عيانه كمان
فصعبانه عليه نفسى شويه
اتبهدلنا و الحمد لله

kochia يقول...

كل سنة وانتي طيبة
عجبتني الصورة اوي ولفتت نظري
وعجبني كلامها اوي وعندها حق
العقل والفهم مش باتعليم والفطرة ساعات بتوصل الانسان للصح

ربنا يسعدها ويسعد الجميع ان شاء الله

تحياتي

كـــيــــــــارا يقول...

بصراحه كلامها في الجون وقالت كلام موزون فعلا

وصح الرزق من عند ربنا بس لو العبد يعي ذلك

mohamed يقول...

:)