• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الاثنين، 8 سبتمبر 2008

القطة الطائرة


انفـــــــــــــراد



وحصــــــــــــــــريا



واكسكلوسيــــــــــــــــف




جاني الهاتف البارح الساعة 3 الفجر _ الموبايل يعني مش الهاتف اللي جه للست امينة في المنام _ قالي قومي يا بت يا سوسة اخرجي من صومعتك الرمضانية وقالي انشري الخبر ده وكوني لك السبق



قولتله وماله يا اخويا مش عيب .. خبر ايه



قالي : في قطة بتطير



قولتله بتطير !! .. انت مالك ياعم صايم وبتخرف ولا فاطر والاكل كبس علي الادراك الاستيعابي عندك



قالي : يا بت ركزي انا مش بهييس ديه قصة بجد ومعايا الدليل



قولتله دليل !! .. ناولني الدليل و 2 كوب ذنب جيل .. كلى اذان مصغية يا عبد الجليل



قال : القصة ان في قطة بتطير ظهرت في المقطم وتبتدي الحكاية ان كان في ست كبيرة قاعدة ف بيتها لقيت كائن بيطير داخل عليها افتكرته حمامة كبيرة لما قربت لقيتها قطة المهم القطه ولا الكائن الكبير ده قدرت تهرب بعد ما تأكدو من وجود اجنحة او ما يشبه الاجنحة فيها وظهرت تاني يوم في مكان قريب من المكان الاول واتأكدوا منها بعد ما وضعوها ف سبت ...... المهم هي شكلها زي القطة الشيرازي بالظبط واخدوها لوكالات الاعلام تصورها ومكتمين ع الخبر .



لكن علي مين قدرت احصل علي الصورة وجيت جري لاختي سوسة وقولت انفعها


قولتله لا اصيل يا عبد الجليل وها انا انقل اليكم الخبر بالسبت بتاعه والعقدة علي الراوي وعلي المتضرر غلق الهاتف واسيبكم انا دلوقتي وارجع لصومعتي علشان اروح اكمل غسيل المواعين ورمضان كريم عليكم جميعا .


وها هو الدليــــــــــل متلبس بالسبت

معلهش هي الصورة مش واضحة بس ماتركزش اوي علشان ماتهييسش و بكرة تشوفوها في وكالات الانباء وتقولوا سوسة قالت وشكرا للهاتف ولجميع العاملين بشركتى فوت ايفون وشركة ام نبيل شركتي التليفون المشلول بمصر .

27 التعليقات:

Mona Shereif يقول...

هههههههههههههههههههههههه
انتى بتتكلمى جد؟؟

بس بجد اسلوبك جميل اوى ماشاء الله
ربنا يبارك فيكى
كل سنة وانتى طيبه وبخير

غير معرف يقول...

الصورة فعلا غريبة

انا اتجننت منها

وجهة نظري يقول...

رمضان كريم :)

فارس بلا جواد يقول...

السلام عليكم
ازيك يا مس سوسه
بوست حلو قوى
واسلوبك جميل جدا

تحياتى

Unknown يقول...

الزيارة الاولى مش الاخيرة انشاء اللة
خبر لذيذ قوى ورويتة بطريقة ألذ
على فكرة انا مصدق لان اية حاجة فى مصر دلوقتى ممكن اصدقها يعنى لو قولتى حمار بيطير مش قطة بردة هصدق و من غير دليل!!!
تحياتى و رمضان كريم

Queen Diamond يقول...

قطه بتطير ازاي؟؟!!

ده هزار ولا ايه؟؟

hager يقول...

قطه بتطير !!!!!!!
ولسه ياما هنشوووووووف
شكراا يا سوسا علي الخبر العجيب ده

Miss. Sosa يقول...

Someimes
ربنا يبارك فيكي يارب ويكرمك
وفي الواقع اني اتحدث بجد بس للامانه العلمية انا ماشوفتش بعيني هم قالولي انهم شافوها بتطير وصورها بالموبايل .. واجتهدت في الصورة بتاع ربع ساعه علشان اشوف الاجنحة بس نظري للاسف ماعرفش يفصل في الموضوع فنقلته والعهدة ع الراوي :)

منوراني يا قمر :)

-------
bos bos
سلامتك من الجنان :)
هو انا مش قولت ماتركزوش اوي ههههههه

------
وجهة نظري

الله اكرم :)

------

فارس بلا جواد
وعليكم السلام ورحمة الله وبركاته
والحمد لله ان البوست والاسلوب عجبكم
ودمتم منورين مدونتي بمروركم العطر :)

Miss. Sosa يقول...

medus

منور المدونة وشرفتني بالزيارة وإن شاء الله نشوفك هنا كتير :)

------
queen diaond
لا مش هزار ده خبر بجد بس بصراحة مش متأكدة علشان ماشوفتوش بعيني لكن ناس بتقول شافته

منوراني :)

-----
hager

دمتي منوراني دايما :)

تحيـــاتي للجميع

إيثار يقول...

جد ده ولا هزار
يعني ممكن الاقي دلوقتي
قطة فوق راسي

tarek alghnam يقول...

هههههههههه
والله اجمل شئ بيعجبنى فى مدونتك خفه دمك
كل سنه وانتى طيبه
والى الله اقرب بدون قطط بتطير ولا شركات هواتف مضروبه
تقبلى تحياتى
ودمتى بحفظ الله

kochia يقول...

غريبة جدا
ممكن تكون ايه يا تري
استنساخ ؟
عفريت متنكر ؟
طفرة طبيعية ؟

حتي الطيور الكبيرة مش بتطير
سبحان الله

تحياتي

عروسة ننوسة يقول...

ميرسى على الخبر الحلو ده يا سوسة والاحلى منه انك رجعتلنا بقالك فترة مختفية وكنتى وحشانى موت
كل سنة وانتى طيبة

Ahmad Abdulatif يقول...

قطة اهي اللي بتطير يا سوسا !!!
وعبد الجليل مين دا اساسا !!!
أنا رأيي أن لو الهاتف جالك بالنهار يبقي الصيام . ولو بالليل ، تبقي تتغطي كويس حتي لو كان الجو حر!!!!
وسلامي للقطط اللي بتطير ، بكرة تقوليلي الأسد بيبيض!

Miss. Sosa يقول...

عاشقة الحب

هو الكلام جد مش هزار بس مش انا اللي شوفته واللي شافه بعت الصورة العجيبة ديه

وعموما كل شيء جايز في البلد ديه

-----
طارق الغنام

دوم الضحكة يارب وكل سنة وانت طيب والي الله اقرب وعلي طاعته ادوم

-----
كوشيا

والله انا مش عارفة ايه الكائن ده بس انا قريت في الاساطير عن القطط المجنحة
فمش عارفة احنا بقينا في الاساطير ولا فين بالظبط

-----
عروسة ننوسة

دمتي منوراني يارب و الف مبروك علي الكتاب وعقبال مانشوفه في المعرض ان شاء الله

----

احمد عبد اللطيف
والله هو لما الهاتف ناداني انا كنت لسه مخلصة سحور وبستعد للفجر يعني لسه مش تخاريف صيام ولا اضغاث احلام

وبعدين انت مستبعد الموضوع ليه
ما السلعوة هجين بين ابن آوى والكلب وظهرت برضو في المقطم

بس اللي محيرني القطة ديه تبقي هجين بين ديك وقطة ؟! ولا قط وفرخة ؟!

بس قصة الاسد بيبيض لا ديه صعبه اوي ده حتي يبقي عيب عليه ويافضيحته في وسط الغابة يمشي يزأر ازاي بعد كدا ؟!

لا لا مايصحش خالص
قال اسد بيبيض قال !!



منورني جميعـــــــــا

غير معرف يقول...

هلا مس سوسه جميله المدونه واجمل منها اسلوبك
دى اول زياره ليا فى المدونه وان شاء الله مش هتكون الاخيره
بس الخبر ملوش فى الاعلام اثر
والدليل زيه زى الخبر
استنى اشوف الدليل يكون واضح الاثر
مش صوره التركيز فيها على العين خطر
تحياتى ابو حنين

Bobbos يقول...

أنا قولت ما أكدبش خبر و آجى أرد الزيارة..

و مش عاوز أقول أنى تفوجوئت بالخبر..لأن الأخبار الغريبة كتير من المقطم ..

تقريبا كدة لأن نسبة التلوث فوق اقل..

فالأمخاخ مونونة حبتين..

سميرة يقول...

مس سوسة
اول مرة ع المدونة بس بجد خطيييييييرة
اما بقى بالنسبة لموضوع القطة المجنحة فأنا مصدقاكي مليون المية ليه بقى؟؟؟
لانها موجودة في مصر ودا بقى شئ عادي جدا هنا ، هو احنا هاننسى الافاضل اللي بيسرقوا المليارات ويطلعوا بيها بره البلد ، تفتكري يعني بيخرجوا من مصر ازاي؟ طبعا بالاجنحة
تحياتي
:)))))

سندس وأمل يقول...

صراحة كل المواضيع فى منتهى الروعة بس

احنا حبينا نكتبلك هنا علشان يكون

من السهل عليك قراءة تعليقنا اللى

كتبناهوللك وربنا يوفقك فى كل حاجة

تكتبيها..............

شهد الكلمات يقول...

جد ده ولا هزار !!!!!!!!!!!!

حمد الله علي سلامتك

كان واحشني قلمك جدا

كل رمضان و انتي طيبة

تحياتي

Unknown يقول...

ههههههههه
حمد لله على السلامة
وقصة مثيرة كالعادة
عودا حميدا ورمضان كريم

mohamed يقول...

يا سلام دع على أساس أن نسر أتجوز قطه؟شكل كليةزراعه أثرت عليك يا دكتور

مش لاقية اسم يقول...

السلام عليكم
على فكرة انتى كلامك عسل جدا
وتعبيراتك جميلة اوى

افاتينا مس سوسة

جزاك الله خير
كل سنة وانتى طيبة

ورمضان كريم

وارجوا تشريفك مدونتى المتواضعة

سوسا ومودى يقول...

هههههههههههههههه
يا سوسا أنتى ياح حبيبتى وحشااااااااااااااااانى جدا جدا جدا

أنتى كنتى فيييين؟؟

ليه أتأخرتى أوى أوى المرة ديه
على العموم بجد والله أنتى أول مدونه دخلت أتطمن عليها عشان وحشتينى
كل سنة وأنتى طيبة

سوسا ومودى يقول...

سوسا عندى تعليق بسيط من أختك سوسا برضوا
بصى يا أختى يا حبيبتى أنتى
حاسة كده أنتك بعدتى عن موضوع المدونة مش عارفه ليه
فين بقيت قصتك اللى شوقنتينا ليها
عايزين نعرف بقيت الحكاية
يلا بقى
كملى يا سوسا

shirry يقول...

هي دي الهندسة الوراثية
يمكن كان القطة دي بتحب حمامة؟

واو يمكن سوبر قطة

بس الصورة انها قطة قاعدة في سبت عادي

ااااااااااااااااه
القطة كانت بتحب الفرخة اللي في السبت؟

ايه دا شكلي ركزت ف هيست

ابقي تعالي بقالك كتير ها؟ خلي بالك

غير معرف يقول...

سوسا
مليون حمد لله على السلامة
اسكندريةاخدتك منا الفترة دى كلها والا ايه
وبمناسبة القطة الى بتطير
الفيل كمان بيطير
وده نكتة مشهورة جدا عن السوريين
سالوا سورى الفيل بيطير
رد وقال مجنون وله الفيل ما بيطير
سالوه من تانى بس الفيل بيطير
رد ولك وله ما بيطير
قالوا له الاسد بيقول الفيل بيطير
رد وقال اه بيطير بس ما بيعلى
لك تحياتى
منذر