• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

الأحد، 27 يوليو 2008

سوسة في بلد البسبوسة

يادوب خرجت من محطة مصر ف الاسكندرية .... اصلي عقبال عندكو كنت راكبة القطر المكيف بقي وانهالت علي العروض من التاكسيات الصفرا ف اسود اللي عاملة زي فانلة فريق المقاولين .... تاكسي يا انسة ..... نشيل عنك .... اصل مقولكوش بقي انا كان شكلي زي اللي رايح معسكر كشافة ..... شايله علي ضهري شنطة كروس وجارَه شنطة سفر تنفع لرحلة للمريخ مش كام يوم ف اسكندرية ده غير شنطة ف ايدي
طبعا عايزين تعرفوا ايه اللي ف الشنط دي كلها ؟؟؟؟
ابدا ده هدومي وشويه روايات علي مسرحيات...... اشي يوميات نائب عذرائيل ليوسف السباعي و شمس النهار توفيق الحكيم و الست هدي لاحمد شوقي و البهلوان ليوسف إدريس .... المهم مطولش عليكو حوالي 25 رواية ومسرحية بس
والشنطة اللي ف ايدي فيها حاجات مهمة جدا لواحدة هتصيف زيي يعني مثلا الكريم بتاع حمام الشمس ده ضروري جدا .... وبأمانه مش عارفة اشتريته ليه اصلا هو انا هاخد حمام شمس يعني ... بس وماله ماهو ممكن حمام شمس فوق الهدوم..... حمام شمس شرعي ايه يعني
ده غير الصن بلوك لوشي برده وفرشتي ومعجون الاسنان وغيره .... المهم يعني شنطة صغيرة زي اللي كانوا بيحضروها بتوع المعتقل لما بيتاخدوا علي غفلة
المهم وانا معايا الهموم دي كلها لم استسلم لاغراء ذئاب الجبل اقارب المقولين العرب قصدي يعني التاكسيات اللي كنت حاسة انها بطلعلي لسانها وانا بعدي الشارع والشمس بتزغرد ف عنية .... وبقول هو انا اتجننت ده عشان يوصلني للهانووفيل هيطلب مش اقل من 50 جنيه ولا كأني راجعه من دول الخليج
ونقلت ع الصف التاني عند السنترال وانا بجرجر الهموم اللي انا شايلاها دي ووقفت استني المشروع اللي رايح الهانوفيل ..... لا وايه لازم يكون داخل الهانوفيل من جوه مش من ع الشارع
المهم جه مشرروع بعد صبر ورميت نفسي وسط الجموع الحاشدة اللي كانت بتدور علي فرصتها للدخول ....مكنتش عارفة ان الهانوفيل ليه شعبية اوي كده
وبصراحة حلمي الجميل بالهدوء اللي انا متعوده عليه ف اسكندرية ابتدا يتلاشي مع الزحمه اللي انا شيفاها
اصل انا لي مزاج غريب ......مبرحش اسكندرية الا ف الشتا لا وايه وقت النوات (النوه دي عبارة عن رياح شديدة بتجتاح المدن الساحلية) ويا سلام بقي لو صادفني الحظ وقدرت احضر نوة عوّة ..... ممتتخيلوش منظر اسكندرية بيبقي عامل ايه ساعتها ... وانا بحب امشي ع البحر ساعتها تقريبا مبيكنش في غيري مع عم حسين جوز خالتي اللي طبعا مبيسبنيش امشي لوحدي بالليل كده وببقي مقفزة ولابسه كل الهدوم الشتوي اللي جيبتها معايا لان الهوا مقولكوش ساعتها بيبقي صواريخ تحسي انها هطير مناخيرك من فوق وشك اصلا ولا حد بيديكي 30 قلم علي غفله متبقيش عارفة تخبي وشك اصلا
وعم حسين يعيني يبقي بينشف م البرد بس مستحمل عشان خاطري ويقعد يحكيلي ويوصفلي محطة الرمل كانت زمان عاملة ازاي وشياكة المحلات والخواجه ارتين اليوناني صاحب والده اللي كان عنده محل بقاله ... وياخدني ف الاخر ونروح الماكس ناكل سمك ع البحر ودي كانت متعتي بجد
اقعد اتفرج ع البحر وهو ضلمه وانا شايفه مراكب الصيد الصغيرة من بعيد والبحر عامل زي غول اسود ميعرفش الرحمه وهو بيطوح بطول دراعاته المراكب الصغيرة ويشيلها لفوق وهي عاملة زي الاطفال الصغيرة اللي وقعت ف ايد البعبع وتحس ان مزيكا التوتر بتصاحب المشهد وفجأة الريح تهدي وتبصي تلاقي نفس الكائن المتوحش ده بقي عبارة عن فنان هادي وكانه بيرقص علي موسيقي سلو والمراكب اللي كان بيعذبها من شويه وكأنه عايز يخنقها ابتدي يهدهدها بحنية وتبصي ع المنظر من بعيد والمراكب الصغيرة بتتهادي يبقي الواحد بيتهيألو ان المراكب دي عبارة عن طفل ف حضن امه محوطاه بدراعتها وبتهدهده بحنيه
منظر بجد ملوش حل ...... حاجة كده اسطورية
ومعرفش بحب المنظرين اللي ضد بعض دول ليه .... بس يمكن بحس ان البحر ف ثورته دي كائن حر ثورجي رافض أي تدخل من أي حد حتي لو كانت المراكب عشرة عمره عايز يلفظها براه او يحتويها ف قاعه
وف نفس الوقت بحس انه زي الام ف هدوءها وحنانها مع اول خيط فجر
المهم وصل المشروع للهانوفيل .... وركبت تونايه عشان تدخلني جوه ..... التوناية دي هي التوكتوك وده اخره قبل بيت خالتي بحواي 400 متر وعلي ان انا اخد المسافة دي مشي بقي والاجمل من كده المكان ده مش مرصوف يعني رمل وعليه اني اجر الشنطه المسافه دي زي .............. ولا بلاش
المهم وصلت لحد باب الشاليه ..... حلم الهدوء بقي ..... اخيرا وصلت يا رجالة

هيييــــــــــــــــه

وزقيت باب الجنينه الصغيرة ....
وعنيكو ماتشوف الا النور !!

58 التعليقات:

غير معرف يقول...
أزال أحد مشرفي المدونة هذا التعليق.
غير معرف يقول...
أزال أحد مشرفي المدونة هذا التعليق.
kochia يقول...

نور ايه يا شيخة
كل الشنط ودي وكل المشوار ده
ولسة ؟؟؟

سيبك المهم تكون الاجازة حلوة
بس انا لو منك كنت ركبت تاكسي

مش المثل بيقول .. اخص علي القرش اللي مينزهش صاحبه ؟؟
دي رحلة يا عم

تحياتي

الـجـدة فـصـيـحـة يقول...

السلام عليكم ورحمة الله وبركاته


ياسلام عليكِ وعلى وصفك لحبيبة قلبي اسكندرية
اللى عايز يعرفها بجد لازم يشوفها في الشتاء مش في الصيف
بجد إسكندرية في الشتاء لها سحر لا يقاوم ابداااااااااااا
لك الصيف والزحمة والمصيفين وووو
لالالالالالالالا
بجد بتتبدل
بيكون الحال غير الحال
وهواء اسكندرية في الشتاء ورغم انه برد جدا لكن له مذاق خاص على الجسم والنفس

يارب يحفظ اسكندرية ويحميها

معليش بس انا مش بقدر اقاوم جمال الكلام عن اسكندرية لدرجة ان عيني لمعت وكنت هاعيط من كلامك عنها وعن الجو الشتوي بتاعها يالله

المهم
حمدا على سلامتك

وفي انتظار معرفة ما حدث بإذن الله

دمتِ في رعاية الله

سمر الشافعى يقول...

حمد الله عالسلامه ياجميل المهم تكونى اتبسطتى بعد وجع القلب دا كله

سوسا ومودى يقول...

وبعدين معاكى يا سوسا أنتى
مش حتبطلى أسلوبك ده
تشوقينا لحد ما ننفعل وبعدين الاقيكى مكملتيش
ليه يا بنتى كده؟؟
وبعدين أنتى كنتى فين الفترة ديه كلها
أنتى وحشتينى مووووووت
وكنت كل يوم أدخل أتطمن عليكى كتبتى بوست جديد ولا لا
على العموم أنا بحبك والله ومش بزعل منك خااااالص
ورحلتك جميله ونفسى أعرف تكملتها
متتأخريش
ماشى؟؟

Mafrousa يقول...

إزيك يا سوسة
اسكندرية جميله فى كل وقت
فى الشتاء فى الصيفز..في اي وقت
انا بحبها اوي
ليها سحر عجيب و آخاذ
أنا اول لما بدخل الاسكندرية..بحس براحه نفسية
مش عارفه ليه؟
يمكن ريحة اليود؟؟!!
الله أعلم

المهم انا زيك كده..فى حكاية الشنط
يومين ...أخدلهم البيت كله...يمكن كل الهدوم و كل حاجاتي
لدرجة اللى يشوفني يقول أكيد اني مش راجعة تاني

انا متشوقة اعرف لاقيتي إيه؟؟؟
اكيد حاجه مش تبشر بالهدوء و الراحه ابدا
هههههههه
تحياتي

Mahmoud البطراوى يقول...

ياااااااه يا بنتى انتى فين بقالك فتره طويله اوى
انا حاسس انك مش موجوده بقالك يجى الف عام
المهم وصلت يا بطل على باب الشاليه لقيتيه اتأجر مفروش
صح؟؟
:)
يااااارب تكون كانت رحله سعيده ومتحرمناش منك لوقت طويل

mohra يقول...

حمد لله على سلامتك بس يالا احكى ايه اللى حصل
بسرعه

Miss. Sosa يقول...

السلام عليكم

ايه الاستقبال الحافل ده :))

اول تعليقين فيروسات ماشاء الله واضح اني محبوبة عالميا وشرق اوسطيا :D

Miss. Sosa يقول...

كوتشيا

منوراني بجد ليكي وحشة
اضم صوتي لصوتك واخس اخس علي الجنيه اللي ماينزهش صاحبه بس هنعمل ايه بحب الونس وركوب المواصلات العامة مغامرة لابد منها.

-----
الجدة الفضيحة

الله يسلمك يارب ويحفظلنا اسكندرية جميعا هادية وجميلة ونظيفة

تحياتي كتير لكل السكندرية وعشاق اسكندرية :)

----

سمر الشافعي

ربنا يكرمك يارب , الحمد لله سعيدة ومبسوطة طول ماانتم معايا الكترونيا :)

Miss. Sosa يقول...

سوسا ومودي

والله انتي اللي وحشاني جدا وانا اسفة جدا اني اتأخرت في اني احطلك سكريبت اضافة الاغنية بس انا دخلت عندك لاقيتيك عملتيه ماشاء الله عليكي

اوعي تزعلي مني بجد لحسن هزعل من نفسي اوي

----

واحدة مفروسة

منوراني بجد ووحشاني جداا جداا
بس الظاهر ان موضوع الشنط الكتير ديه وراثة في الشعب المصري :D
والشخصيات الهادية بتحب اسكندرية في الشتا بس هي جميلة في كل وقت في الصيف لها جمالها وفي الشتا لها جمالها

تحيــاتى كتير يا قمراية :)

Miss. Sosa يقول...

بطوط حبوب

منور ياابو البطابيط بس ايه ده الف سنة ليه هو انا من سلالة اهل الكهف
بس علي فكرة انا كمان حسة اني بدون بقالي الف سنة رغم اني بقالي 3 شهور بس
سبحان الله

وبعدين ايه التوقعات المرئية الجامدة ديه :))

ربنا يسعدك يارب وتبقى دكتور شنان اد الدنيا ويبعدنى عنكم يارب :D

-----
mohra

الله يسلمك يارب .. حاضر اهو اخد نفسي من السلم واحكي علي طووووووووول :)

ســـــلام

sara يقول...
أزال المؤلف هذا التعليق.
nor يقول...

اسفه من فتره مش متابعه بلوج الجميل
بس لما دخلت قلت مين ..ايه ..فين دي بتحكي كحايتي الاسبوع اللي عدي بالضبط
و الله كنت في النخيل و كنت بحلم بهدوووووووء لاقيت ايه عينك ما تشوف الا النار
بس برضه هي اسكندريه احلي مصيف في الدنيا
و انا كمان زيك بمووت فيها في الشتا بس لحمد لله مش بتمشي في النوه ههههههههههه
مستنيه تقولي لي عملتي ايه زيي يعني
صحيح هو اسم الصن بلوك بتاعك ايه ؟؟هههههههههه

Unknown يقول...

اسكندرية
والرملة الحلوة
والناس الاحلى والمية اللى تجنن
رحلة سعيدة يا قلبى يا رب

بسمه عبدالباسط يقول...

فعلا أسكندرية رائعة جدا
يالا أستمتعى بوقتك كويس

تحياتى

السماء الداميه يقول...

ممكن اعرف منك حاجة فى اول زيارتى ايه هو النور اللى انت شوفته لما فتحت باب الجنينة الصغيرة؟ القصة جميلة اوى اوى والنهاية المفتوحة امتع ما فيها ممكن اعرف رايك فيما اكتب ونتبادل الروابط

semsem يقول...

ابوس ايدك لتقولى
ايه اللى حصل
؟

koko يقول...

حد يصيف فى الهانوفيل يا سوسة .. يا بنتى دى بقت و لا الصين .. على اى حال المهم مش المكان المهم اللمه الحلوه ..

تصحيح "التونايه هى العربيه السوزوكى 7 راكب مش التوك توك"

فى انتظار باقى الاحداث

بنوته مصرية يقول...

اتمناه تكون رحلة حلوة وتكوني مبسوطة

اسكندرية بلد جميلة بس انا زيك مش بحبها في الصيف بتكون زحمة اووي


ويلا بقي قولينا ايه اللي حصل بعد ما فتحتي الباب

منتظرين

غير معرف يقول...

انتى فين يا بنتى كل ده
وكمان بتردى عالتعليقات
لاااااااااااا
اتغيرتى يا سوسه .. اسكندريه غيرتك

ههههههههههههههه

بجد ليكى وحشه انتى واسكندريه فى نفس الوقت

مستنيه اعرف اجازتك كملت ازاى
سلامى يا قمر
:)))

شهد الكلمات يقول...

الله فكرتيني بالمصيف شكلي كدة مش هاروحه السنة دي
و انا ها موت و اشم هوا اسكندرية:(

blue-wave يقول...

فعلا اسكندريه تحفه باليل
المهم مستنين البقيه
يارب تكونى اتبسطتى
سلام

أميرة الاحزان يقول...

سرد راااااااااائع بجد و وصف جميييييل اوووى لأسكندرية هى فعلا كل الناس بيقولوا انها فى الشتا بتبقه احله انا نفسى اووووى ارحها فى الشتا بس فى الصيف بتبقه زحمة اووووووووى ...
و كمان وصفك للبحر أكثر من رااااااااااااائع ....

تسلم ايدك و منتظرين البقيه ...

Empress appy يقول...

ايه كل الحاجات دى حرام عليكى
يا شيخه والله بيعجبنى الاجانب فى تنقلاتهم مش بيجروا الدولاب معاهم

دكتور بهــدوء يقول...

اكيد احساس البحر وقت النوه
بيبقي جامد اخر حاجه
نفسي اجربها
للاسف ماجربتهاش ولا مره
بس انتي شجعتيني بجد
هحاول السنادي اعملها

mohamed يقول...

شكلك لأيت ناس بردو:D:D:D:

rovy يقول...

اهلا بيكى يا قمر فى الاسكندريه
وانا باقول ان اسكندريه منوره اكثر من المعتاد اليومين اللى فاتوا ..
المهم تكونى قضيتى يومين حلوينوهادين و لو ان الهدؤ اليومين دول اصبح حلم فى اسكندريتى ..
و بعدين دايما تقطعى فى المهم ايه اللىحصل بعد ما زقتى باب الجنينه يا جميل .. ؟؟
باعتذر عن تاخيرى اليومين اللى فاتوا كنت تعبانه شويه و كنت فى حالة لغبطه ..
تقديرى و تحياتى

غير معرف يقول...

سوسو ما تبقيش تتأخري كده ثاني لو سمحتي واجازة سعيدة بإذن الله

صحيح مفيش أخبار عن سامر ؟؟؟

hager يقول...

فكرتيني بالذي مضي
بس عاايزين الباقي بقي
:D

تجربه المحب يقول...

اتمسى بالخير
احب اقولك يا هانم ان كلامك ده حرك مشاعرى الدفينه لانى اساسا بتحاشى الكلام من قريب او من بعيد عن اسكندريه او اى منطقه ساحليه حاليا بالزات لانى زهقانه وحرانه وطهقانه ومكتئبه ومريضه ومجروحه وكل حاجه وحشه ممكن يحس بيها بشر ونفسى اوى اهج واطفش وان سألتينى عن المكان الى احب اطفش ليه حيكون تحديدا اسكندريه
لانى بحب البلد دى اوى
اوعى تعتقدى انى ممكن احسدك او احقد عليكى لان اكيد ده كلام من الماضى اساطير الاولين يعنى مش بس كده لا انا والحمد لله مبعرفش احسد حد غير نفسى بس اوعى تقولى مادام بتحسد نفسها مابالك بقى بالغريب لالالالالالا انتى مش غريبه احنا خلاص حنبقى اهل وعموما انا من خلال الى ما قرأت عنك ماتوقعش ان السفريه دى حيكون فيها حاجه تتحسد واهى باينه من اولها نوه وكلام فارغ
اقولك من خرج من داره اتقل مقداره
مش كده ولا ايه؟؟؟؟؟؟؟؟؟؟

ماء تشرين يقول...

يااهلا بيكي ياقمرايه بس بجد انا كنت بقول المصيفين دول مش بيفهموا سورى لانو اسكندريه احلى مليووووون الف مره في الشته بس انمت طلعتى جامده وعرفتى احلى وقت لااسكندريه بس اوعى تقولى لحد ليجي المشتيين في الشتا تبقه ليله
تحياتى واسكندريه نورت

كراكيب يقول...

ميس سوسااااا
ايه دااااااه
ده ليه جزء تاني ده
صح؟ صح؟؟
قولي اه قولي آه

على فكرة وصفك للبحر وهو هايج ووهو هادي تحفة جدااا

وماليش دعوة بقى وانا مااالييييي
قوليلي انه ليه جزء تاني

miro el niro kwaniro

عروسة ننوسة يقول...

ماشى يا عم براحتك روحتى تصيفى وسيبتى اختك عروسة ننوسة وانا عماله اقول البت سوسة اتخطفت ولا ايه
بس حمدالله على السلامة

قررت أكون عانس يقول...

احلى حاجة فى السفر اكيد الشنط ...احم احم و العكس صحيح ..اكتر حاجة بتكرهنى فى حياتى شنطة السفر و الجرجرة و البهدلة لدرجة انى قربت انقلب على شنط الايد و بفكر اعمل جيوب احط فيها حاجتى زى الرجالة

وزقيت باب الجنينه الصغيرة .... وعنيكو ماتشوف الا النور !!

ها اللى حصل؟؟؟؟

قشتمر يقول...

عندك حق انا من اسكندرية وعمرك ما حتشوفيها حلوة الا في الشتا وخصوصا لما تمشي علي الكورنيش وتقابلي واحد كل كيلو

di el2mr يقول...

بصى سيبك من كل ده انتى بجد مدونتك اكتر حاجه بحب اقرا فيها لما اكون مضايقه لانها زى العسل
وده طبعا لان صاحبتها برضو زى العسل
وحمدالله هلى سلامتك فى اسنكدريه

momken يقول...

عجبنى وصفك اوى لاسكندريه

المهم تكونى استمتعى
وصفك جميل

وحمدالله على السلامه
بس ايه الشنط دى
انتى السى كل الهدوم على عض
وتحتهم المايوهات
وحطى كل الكريم
وروحى ايد ورا وايد قدام

تحياتى

مجلة علّي صوتك يقول...

اسكندرية للأسف بتفقد كل جمالها مع الزحمة

شفـقــة و إحســــان يقول...

انتى فين يا قمر كل ده فى المصيف يلا بقى ارجعى وحشتينى

Unknown يقول...

انتى نسيتينا ولا اية ؟؟؟
ايوة يا عم اسكندرية بقى

shirry يقول...

ايه الوصف الجميل دا
الاتنين عكس بعض بس كل واحد له سحره
انتي خلتيني هموت واشوف اسكندرية في الشتاء

وبعدين ايه اللي حصل
اوعي تكوني وقعتي من طولك
اكيد دا اللي حصل

يلا اجازة سعيدة وابقي احكيلنا عملتي ايه

tarek alghnam يقول...

بجد اسلوبك رائع
وفيه خفه دم
بوست رائع كعادتك استمتعت جدا بيه
تقبلى تحياتى
ودمتى بحفظ الله

أسماء علي يقول...

اسلوبك تحفة ف الوصف

بس انا عايزة اعرف اللي حصل بقى

Unknown يقول...

اجازة سعيدة ان شاء الله
على فكرة انا زيك بحب جدا البحر بس فى الشتاء بحس انة بيكون بتاعى لوحدى اكلمة براحتى
متشوقة علشان اعرف الاجازة الهادية حصل فيها اية

شفـقــة و إحســــان يقول...

وبعدين يا سوسة امتى هقرا عن بلد الكنافة وحشتينى ووحشنى جديدك

radwa يقول...

ايه يابنتى انتى فين

وحشنا قلمك وكتابتك

عروسة ننوسة يقول...

وحشتينى اوى اوى جدا خالص ايه انتى مختفية فين

jehan يقول...

سوسن انتى مختفية فين يارب يكون اختفاءك دة خير وتفرحينا كلنا

ابقى ردى علينا طمنينا بس ولو حتى بتعليق واحد

غير معرف يقول...

وحشتيني بأه انتي فين؟

مها ميهوووو

Unknown يقول...

مرور للتهنئة بقدوم شهر رمضان وتمنياتى بان ننال منه الكثير ...لا تدع الفرصة تفوتك باغتنام هذا الشهر الذى فضله الله على باقى الشهور
ودعواتى لكم جميعا بقبول اعمالكم وعباداتكم وان نكون مع الرسول ان شاء الله ..سعيد بزيارتى ومرورى والى لقاء قريب لك كل التحية والتقدير

فارس بلا جواد يقول...

كل عام وانتم بخير
رمضان كريم
تحياتى

ojg يقول...

اااااااااه
اليكس
تلك الاثيرة للقلب
تعرفي اني عمري ما زورت اسكندرية الا في الشتا
واسلوبك حسسني اني روحت وقاعده ع البحر كمان بالليل زي ما بحب اقعد
:)
هو الشتا مش عايز ييجي ليه بس
:(

zeinab nour يقول...

دمك خيف يا سوسا
ومدونتك تنم عن ثقافتك ووعيك
استمرى فى تنوير الآخرين حتىلو امتعض الممتعضون
عبرى عن رايك مهما كان
بشجعك وبحييكى حتى لو اختلفت معاكى
د.زينب نور

mr.r يقول...

انتي اكثر من رائعة كاسلوب وسرد رائع للاحداث واسلوبك جميل جدا
دايما يارب في تقدم

غير معرف يقول...

بجد بجد انا اول مره اخش الموقع دا بصراحه اسلوبك جميل جدا وروحك حلوه في الكتابه ودمك خفيف اوي..يا رب في تقدم مستمر

Nohahawary يقول...

I LOVED THE PART OF THE SEA AT NIGHT

أنا كمان عاشقة للبحر في ليله

و النظر ليه و شكل المحهول و المحتمل و المعقول و اللا معقول ... على طول على طول على طول :)