• لا تكن كمن عاش شطر حياته الأول يشتهي الشطر الثاني ، وعاش شطر حياته الثاني آسفا على ضياع شطر حياته الأول

السبت، 5 يوليو 2008

تششش

يا دنيا ليه ناسك بيسودوا ايامي
ده انا ليلى وحدة
ونهارى طحنة
لا حبيب ولا صاحبه
ولا قلب فيه رحمه
والكل بلا رحمه بيهد فى كياني

-------
هو كل حاجة عليه .. مفيش غير سوسن في المركز ده .. بجد حاجة بقت تخنق .. هو انا اشتكيت لهم انى بعاني من الفراغ .. قاموا قرروا يشغلوهولى بشغلهم المتأخر .. دول شوية شوية هينزلوا قانون رسمي اللي مااتجوزتش تشتغل ضعف ساعات عمل المتجوزة .. هم بيعاقبوني علي تأخير جوازى .. مش كفاية اللي انا فيه !! .. هى الناس بقت انانية كدا ليه !! بقت استغلالية كدا ليه !! .. مفيش رحمة ليه !!

كل الكلمات ديه كانت بتخبط في دماغي بمسامير وشواكيش زي مايكون في سمكري عربيات فتح فى نافوخي .. وخلاص قربوا يعملوا خرم فى نافوخي للتهوية علشان الضغط والحرارة عليت جوه .. ماصدقت وصلت البيت ورميت نفسي في البانيو علشان اتش الافكار المولعة فى دماغي ديه .. يااه فكرة عبقرية فكرة الشاور بعد الشغل ديه .. وفرصة افكر وانا فى قلب الميه حبيبتي مفيش غيرها بيحتويني في حنان .. وابتديت استعرض الموقف اللي حصل ونرفزني كدا .. بصراحة هو مش موقف هم مواقف اكبر من موقف عبد المنعم رياض .. كل شوية واحدة من زميلاتي ترمي شغلها عليه بحجة انها متجوزة والولد طلعاله فسفوسة في لسانه واقفة نموه ولا باباه المسكين حالته تقطع القلب عنده انيميا ومابياكلش غير 8 مرات في اليوم بس (وده سبب ظهورالكرش عند الرجالة بعد الجواز) .. وارفص برجلي في الميه طيب ولما هم مش فاضيين للشغل بيشتغلوا ليه مايسيبوا الشغل خصوصا ده شغل بحثى ودول اخرهم يبحثوا في سبب قطع البتنجان من المقوار .. ولا سبب كلكلعة الباشميل .. ولا اسباب انفجار المنبار .. ولا اسباب الهبوط الحاد للكيكة الاسفنجية فى الفرن .. بس بس انا مش هحرق دمي تاني انا هسيبهالهم مخضرة .. ايوه انا هاخد اجازة بدون مرتب واقعد اتفرغ للدكتوراة علشان اطلع شغل محترم بدل حرقة الدم ديه ..

وشوية وماما بتنادي بتقول جاتنى رسالة .. جاتنى رسالة .. لا مش ماما اللي بتقول كدا ده الموبايل .. المهم خرجت وببص في الرسالة الاقيها "كلمنى شكرا" . ده مين الجلدة ده اللي طلعني من حمامي وكمان مش هاين عليه يتصل .. ابص الاقيها سمَـاوية (قصدي سمية) بنت الجيران .. قولت اتصلي بيها يا بت يمكن مش لاقيه حتة تركن فيها عربيتها من عربيتي الفور باي فور اللي سده الشارع (قصدي ال 128)
سوسن : الو ايوه يا سمية
سمية : الو ايوه سوسن .. انتى صاحية ؟
سوسن : ايوه يا بنتي ماانتى عارفة مش بنام الضهر
سمية : طيب بقولك ايه كلميني علي تليفون البيت
وتك قفلت .. دماغي جابت وودت وانا مش ناقصاها اصلا مالها ديه .. طيب لما هي في البيت مااتصلتش على تليفون البيت علي طول ليه .. ولا ماجتش ليه ده الشقة قصاد الشقة .. طيب بعته كلمنى شكرا قولت يمكن معهاش رصيد .. ايه تليفون البيت سحبوا ارقامه هو كمان .. الطرقة اللي بين الشقتين هدوها ؟! .. اللهم طولك يا روح .. اللهم اخزيك يا شوشو .. اعملى يا بت باصلك وشوفى ديه مالها عايزة ايه وشوية واتصلت بيها
سوسن : ايو يا سمية في ايه يا بنتى قلقتيني عليكي
سمية وهى بتضحك ضحكة مذعورة : قلق ايه بس ده انا حتى جاية اعزمك على حاجة حلوة
سوسن : عزومة على حاجة حلوة .. يبقى اكيد جاييلك عريس .. آه يا سوسـ و وعرفتيه منين ده
سمية وهى لازالت بتضحك بهبل : طول عمرك ذكية يا سوسن .. وتلقطيها وهي طايرة .. بس انتي كمان تعرفيه
سوسن : انا كمان اعرفه ؟! احنا هنلعب عروستي .. مين ده؟
سمية : ده جارنا الباشمهندس اسامة
سوسن: اُوساااااسة .. بتاع الاتصالات اللي عاملنا شبكة الدي اس ال في العمارة ؟!
سمية: ههههه ايوه هو
سوسن: غريبة مع انك مش مشتركة وانا المشتركة معاه .. (ماطمرش فيه ال 30 جنيه اللي بيلهفهم كل اول شهر الندل ورايح ياخد بتاعت الخدمة الاجتماعية اللي ماتعرفش الروتر من الهب .. ايييه ارزاق )

وشوية وصوت ام سمية بيصرخ خرم سماعة التليفون وبتقول لبنتها: انتى اتجننتى عمالة تحكى معاها ليـــــــــــــــــــــــــه .. هم كلمتين ورد غطاهم تعزيمها علي الفرح وخلاص جت جت ماجتش يكون احسن .. انتى مش عارفة انها من سنك و ممكن تحسدك وتجيبك الارض .

سمية : بس بس يا ماما صوتك عالي زمانها سمعتك انا خلاص هقصر معاها
سمية رجعت للتليفون : اسفة يا سوسو اصل ماما بتناديني عايزة اساعدها فى المطبخ

طبعا الكلام خرم وداني وعرفت ان الدنيا اد ايه حلووووووه وعمالة تحلووووو
سوسن بصوت محسور : ايوه (هاتي المفيد)
سمية : بصراحة انا كنت بتصل علشان اعزمك على كتب كتابي بكره
سوسن بفزعة : بتتصلي !! ( ده انتى لفيتي طريق رأس الرجاء الصالح وخلتيني انا اللي اتصل) .. وكتب كتاب !! .. وبكرة !! هو انتو قريتوا فاتحة واتخطبتي فى رسالة مشفرة .. صحيح ماهو بتاع اتصالات وعمل انكريبشن للخبر.. وبكرة بكرة .. ايه ده هو بيشتغل في المخابرات (السرية والكتمان شعارنا)
ده ولا خبر ضرب البرجين بتوع امريكا مااتعرفش الا وقت الضرب.
سمية: لا والله بس بس اصل اصل الموضوع جه بسرعه و الخطوبة كانت عائلي
سوسن من تحت الضرس :لا بس ولا اصل ..لا عائلي ولا فاميلي سايز ربنا يتمملك بخير و(من النجمة) لاكون عندك .. اومال ده الجيران لبعدها .

قفلت السكة وجريت على ماما الم هدومي وانا مقررة انى (من النجمة) لاكون عند خالتى في اسكندرية علشان اتش دماغي في مية البحر لان مية البانيو مش هتكفي تطفي حريقة دماغي بتاعت المرة ديه.. وقال ايه تخليني انا اللي اتصل بيها !!

صحيح عزومات اخر زمن !!

73 التعليقات:

kochia يقول...

ازيك يا قمر
كنتي فيين من بدري
اوعي تكوني روحتي اسكندرية صحيح
والفرح فاتك؟؟
بصي
ناس كتير عندها قصر نظر وعدم ايمان وسوء تعبير
ده مرض
اللهم اعفينا من المرض ده
ونفضل طول عمرنا حساسين وبنفهم في الزوق

تحياتي

Unknown يقول...

بصى اولا ليه الغلط فى بتوع خدمة اجتماعية ماهم زى الفل

ثانيا مجتمعنا بقى مجتمع غريب بيقتنع بحاجات غريبة وبجد الموقف ده شوفته كتير وشايف انه موقف متخلف لانه الجواز انتى اللى مش عايزة مش مسألة انك مش لاقية عريس

تقبلى تحياتى وربنا يرحمنا من تهييس المجتمع المصرى

دكتور بهــدوء يقول...

جبل والله العظيم مستحمله حاجااااات
المهم فعز التشتشه دي دمك سكر بجددد

Mafrousa يقول...

ههههههههههههههههههه
والله عندك حق...الواحد احسن حاجه يروح اسكندرية يتش دماغه فى مية البحر
هههههههههههههه
يمكن تطفى الغليان اللي بيجي للواحد من الفرسة
ههههههههههههههههه

حمدا لله على سلامتك

Unknown يقول...

السلام عليكم
ازيك ياقمر
والله ياسوسن انتى بتقولى للاسف اللى بتعرض له الاغلب من البنات والناس مش مقدرة ولا بالذات لو واحدة غيرانة منك وعايزة تفش غلها وتمسك النقطة دى
على العموما دا قضاء الله عز وجل وسيبك من القرف دا كله
الزواج رزق ونصيب اما حرقت الدم فدى تدل على العقلية الغير مكتملة النضج
والتفكير السطحى جدا فى الزواج
ودا اللى خلى اغلب الزيجات تبوء بالفشل
انسى يا سوسن وربنا يرزقنا عرسين هههههههه وبالنص

بوست يجنن كالعادة
بالتوفيق حبى

momken يقول...

اهو كده بقى نقدر نباركلك بقلب جامد
والعقبه الى قدامك اتشالت

كده اى حد هيفكر يقارا الفاتحه او حتى يقرا اى سوره هيجى يقراها عندكوا

ماهو بعد سميه مافيش غيرك فى الحته

وبعدي بتاع اتصالات وايه وبتاعه ايه
بلا سنترلات وبلا كومينوكيشن فاضيه

دانتى هجيلك مهندس تيلفزيونات اد الدنيا وظفره برقبه سميه وخطيبها

هههههههههههه
البوست دمه سكر وجميل
انا بقى هتش انا كمان وابقى اقرا الحجات القديمه

تحياتى

ســمـــر احمد يقول...

بصى يا سوسة ...

بصى بجد ..
بصيتى ...انتى عارفه ان الستات المتجوزة بتقر بجد على اللى مش متجوزين ..
و يمكن زيادة الشغل ده بدافع تطليع العقد و الكلاكيع ..
بس انا لومنك بقى كنت رحت الفرح بالعند فى سمية و مامتها

سارة علي يقول...

ولا يهمك ربنا يرزقك بحد يفهمك كويس وسيبك منكلام اى حد دمك خفيف اوى
تقبلى مرورى

فارس بلا جواد يقول...

السلام عليكم ورحمة الله وبركاته
والله انا شايف ان اهم حاجه النصيب
وسيبك من اى حد
اهم حاجه الراحه النفسيه مع شريك العمر
تحياتى

Doba يقول...

انا عادة مبيفرسنيش كلام حد
بس كلام طنط مامة سمية فرسنى
وضايقنى

وبالتأكيد ضايقك
بس أمخاخ فات عليها الزمن وولى
وأكل عليها الدهر وشرب

ربنا يعافينا يا بنتى من أمثالهم
ويرزقك بالزوج الصالح
فى وقته وميعاده

دمك خفيف قوى على فكرة وفى انتظار إضافاتك فى الضاحكون عن قريب

تحياتى
هبة

سمر الشافعى يقول...

ايه دا احنا فينا من كدا يعنى لما استلم تكليفى هيشيلونى انا نبطشيات الليل ولا اييييييه والله ولا اعرفهم ولا ليا دعوه زيى زيهم وانتى كمان متشيليش شغل حد اللى مش قادره تشتغل تقعد فى بيتها اه

بالنسبه لجارتك عادى يعنى عقد وكلاكيع وبتطلعها عليكى من غيرتها لانك برقبتها اش جابها ليكى ولو عالجواز الى مش عاجبه ان نصيبك لسه مجاش يروح يحاكم ربنا لو يقدر ويقوله ليه نصيبها متاخر وبس

تحياتى ياقمر

mohamed يقول...

may i go with u to alex sosa?:)

maiosha يقول...

ههههههههههههههههه
تش.. أنا لما قريت العنوان فى الأول قلت هيه سوسة هتحمر بطاطس يمكن تجيبلى معاها شوية ولا حاجة

بس تصدقى بالله .. أحسن حاجة عملتيها إنك سافرتى .. يا ريت أنا كان عندى خالة فى إسكندرية كنت حولت ورقى هناك ومجيتش تانى

والواحد حتى يبلبط براحته

mohra يقول...

انا كمان عندى نفس النظام فى الشغل و لو اعترضت يقولولى ما انتى فاضيه انما همه بيجروا على بيت (رجاله و ستات بالمناسبه)
طب ما يدونى فرصتى عشان اجرى انا كمان

Angel يقول...

مدونتك جميله جداااااا ياسوسن
انا بقالى كام يوم بقرا فى بوستاتك بس بجد روعه وسيبك من كلام الناس اصلهم فى معظم الاوقات مابيكونش ليهم لازمه :D
بجد انا بشكر بجد زميلتى هاجر اللى خليتنى اتعرف على مدونتك بالصدفه
وعلى فكره اسكندريه جميله جدااااا مع انى ماشوفتهاش :D
سلام

Unknown يقول...

والله بتيجى على الجرح
معانا واحدة فى الشغل بردة كل شوية انا ماخدشى شغل كتير انا عندى ولاد انتم بتعملوا اية فى البيت غير بتروحوا تلاقوا اكلكم جاهز انا بشتغل فى البيت وفى الشغل حرام عليكم
هو احنا قولنلها اشتغلى متعد فى بيتها مدام مش قد المجهود حاجة تنرفز

شهد الكلمات يقول...

هههههههههههههههههههههههه
بت غلسة اوي لا و مستخسرة المكالمة
دي شكلها بخيلة جلدة
اهي دي لو اتجوزت هاتطلع شهر العسل لوحدها

شهد الكلمات يقول...

إعلان هام

تم بحمد الله افتتاح فرعنا الجديد في المدونات مدونة حكاوي القهاوي
تعاطفك واحده مش كفاية أتبرع و لو بزيارة
تعالوا زورونا باي باي
http://hakawyelahawy.blogspot.com

فاتيما يقول...

أتاريكى يا شقاوة فلسعتى من المدونة بقالك مدة ...
أنا مبطقش النوعية دى من الناس أبدا
و حكاية الحسد دى مبعترفش بيها
النصيب ربنا كاتبه
اللى يحسد يحسد براحته
لكن اللى رايده ربنا هيكون فى الآخر
يبقى ليه نجرح الناس
قطعت سماوية و أمها
بوست مميز يا سوسا
الله ينور

دعوة للأمل يقول...

انتى مدونتك جميلة اوى و ميهمكيش كلام الناس لانة كتير و شكرا

بسمه عبدالباسط يقول...

لا ولا يهمك من الكلام اللى سمعتيه ربنا يشفيهم بجد

وعلى فكرة مدونتك ومواضيعك كلها تحفة أنا بقترح عليكى تنشريها فى كتاب بجد هتنجح جدااااااااااااااااااا

وأنا أعرف كام دار نشر ممكن ادلك عليهم لان بجد خسارة الكلام ده يفضل كده

وده ميلى للتواصل
rohbosbos@gmail.com

ٍSOU يقول...

بجد مش عارفة اقولك اية ...ربنل يصبرك ع اللى بتشوفيه ..كل واحد وليه يوم...عالم لسة عايشة فى زمن الزار و افلام الابيض و اسود و الفرخة اللى مطلقة من 3 ديوك و رجل الخفاش اللى امة اتخضت و هى حامل فيه ....

سبهللة يقول...

معلش يا حبيبتى
بس انتى عارفة عجبنى اوى الكلمتين اللى كاتبهم بالاحمر فوق البوست
من تأليفك ؟
ثانبا انا معاكى جدا انك تاخدى اجازة وتخلصى الدكتوراه
بس ان شاء الله يوم مايتحدد ميعاد المناقشة لازم تقولى عشان انا بحب احضر المناقشات دى
ربنا يوفقك يارب

سبهللة يقول...

ما تنسيش تزورنى
تحبى ابعت لك الشوفير
========فى تجمع نسائى يوم الجمعة الجاية فى نادى الزراعيين بالدقى خاص للمدونات من الجنس الناعم بس
التفاصيل فى مدونة بت خيخة واى كلام
ياريت تحاولى تيجى نفسى اتعرف عليكى

سارة علي يقول...

معلش بقى يا سوسن انا واللهى كتبت تلات سطور هو بس سطور المدونة بنص سطر
يلا يارب تكون مدونتى عجبتك وشكرا على كلماتك الرقيقة
تحياتى

حبيبـــــــة القمـــــر يقول...

وحشتني خفة دمك في عرض المواقف اللي تحرق الدم دي
كويس ياسوسو انك سافرتي اهو منها تشيتي دماغك وغيرتي جو
اهي الناس دي بقى اللي دماغها عايزة الدق
ربنا يعافينا منهم
ويكتبلك الخير دايما

حبيبـــــــة القمـــــر يقول...

صحيح نسيت اقول ان الست المتجوزه وعندها عيال ومش قادره توفق بين الاتنين
احسنلها تقعد في البيت
بدل ماتقضيها اجازات حبه مرضي وحبه عارضه وحبة فوق وحبه تحت
والله اعرف واحده مش بتروح الشغل غير عشان تمد على اجازة
او تروح تقبض المرتب
معرفش بتقبضه على ايه بالزبط
وهي مش شغاله طول الشهر

مواطن مصرى نايم يقول...

سوسن : عزومة على حاجة حلوة .. يبقى اكيد جاييلك عريس .. آه يا سوسـ و وعرفتيه منين ده

حلوة حتة سوسـ و
ههههههههه

سوسن: غريبة مع انك مش مشتركة وانا المشتركة معاه .. (ماطمرش فيه ال 30 جنيه اللي بيلهفهم كل اول شهر الندل ورايح ياخد بتاعت الخدمة الاجتماعية اللي ماتعرفش الروتر من الهب .. ايييه ارزاق )

هههههههههههههههههه
بجد مشكلة الحتة دى

قفلت السكة وجريت على ماما الم هدومي وانا مقررة انى (من النجمة) لاكون عند خالتى في اسكندرية علشان اتش دماغي في مية البحر

دى بقى تخصنى انا
يعنى انتى حتكونى عندنا فى اسكندرية
تنوريهااااااااااااااااا
بجد

ــــــــــــــــــــــــــــــــ
دا بقى رأئى فى موضوع تأخر جوازك انتى بالذات

بصى هو العريس غالبا بيشوفك اعلى منه فكريا و علميا و بيخغف يترفض
لان الست لما بتكون اعلى من الراجل ماديا و علميا بيخاف بجد و الله
دا مش عيب فيكى انتى و الله
دا عيب فى فكر و ثقافة مجتمع
و بعدين انتى بتقولى دكتوراة و الكلام على كبير يعنى
ربنا حيكرمك ان شاء الله و حتتجوزى عن قريب بإذن الله
الجواز دا رزق

(بصى كمان للرجالة اللى عمرهم فوق الاربعين و متجوزوش دول حالهم اصعب بكتيييييير من البنات اللى متجوزتش
اللى يشوف بلاوى الناس تهون عليه بلوته)

بس زى ما قلت لك الجواز رزق و انتى ان شاء الله ربنا حيكرمك

يا خسارة
انا لو مش اصغر منك
بس يا ريت تعتبرينى زى اخوكى
eslam

Ahmad Abdulatif يقول...

آه
عشان كدة ما عملتيش الواجب اللي بعتهوليك!!!!!
عموما ، تدوينة جميلة كالعادة ، مع ان غيابك بيطول يا سوسن ودا ما يصحش !

blue-wave يقول...

يارب بس تكونى لما تشيتى فى الميه همومك راحت:))

ســـــــهــــــــــر يقول...

هوانا اول مره اعدى من هنا
و بصراحه ندمانه انى ما عديتش من زمان

بصى باه عملتى فيا ايه و انا بقرا
لحظه يزم عليا الضحك و اقول يخرب بيت خفة دمك و ف وسط الضحك ابقى عاوزه اعيط و ف الاخر اكتشفت ان دماغى بتغلى و عاوزه اطشها ف الميه انا كمان

بتكتبى من قلب الواقع و ده اللى يخليه ( هم يضحك و هم يبكى )

****************

فاصل باه
نفترض لو روحتى الفرح كان حصل ايه ؟؟؟

اكيد كان هيبقى بقية المسلسل البلاك كوميك

lonely يقول...

هههههههههههههههه
ماتعمليش كده فى نفسك معلش
ربنا يكرمك انتى كمان ان شاء الله

Empress appy يقول...

يا حبيبتى ده عادات مجتمع ومش بتتغير فى معتقاداتهم ولا العادات هتتغير
بس انتى خليكى فى شغلك قويه جدا

مدحت محمد يقول...

ههههههههههههههههههههههههههههه

بتعزمك على فرحها ببليز كول مى

روحى اسكندرية يابنتى روحى

بلا وجع دماغ

ولو رحتى الفرح ممكن تلاقى نفسك مع الاشتراك حق الجاتوه
والحاجة الساقعه اللى شربتيها فى الفرح

ادينى نبهتك

ياللا سلام

زفته وقطران يقول...

والله ياسوسنه محد عاوز يتش دماغه ف ميه اسكندريه غيري

ولا تزعلي روحك
دول شويه ستات فاضيه لا راحو ولا جم

hamssah يقول...

عزيزتي
دول ناس ما تستاهلش تضيعي وقتك في الكتابه عنهم مع انهم موجودين وحيفضلوا موجودين في حياتنا ومجتمعاتنا فالافضل هو التجاهل
همسه

tarek alghnam يقول...

اختى الرائعه
انا حتش دماغى هنا فى بورسعيد
مااقدرش استحمل لغايه مااروح اسكند
ريه
بوستك رائع كعادتك
تقبلى تحياتى وشكرى
ودمتى بود

Unknown يقول...

السلام عليكم ورحمة الله وبركاته
وحمدلله على السلامة
ولا يهمك هى الدنيا كده
ناس معندهاش دم=ام صحبتك
ناس بتاخد كل حاجة=صحبتك
وناس معندهاش نظر=عريس صحبتك
لكن خيرها فى غيرها ان شاء الله.
سلام

صيدلانيه طالعه نازله يقول...

ازيك يا سوسه واحشانى و الله
يا بنتى الجواز ده نصيب و مكتوب بس فيه ناس متخلفه قال ايه بتخاف من الحسد و الاعمال و التخلف ده
و دول بيعانوا من انعدام الايمان بالله و بالقسمه و النصيب
وكل واحد فى الدنيا نصيبه متشال ليه و مستخبى عشانه ورا عمود ورا شجره
المهم انه حيلاقيه فى الاخر
تحياتى يا قمر

غير معرف يقول...

الجواز قسمه ونصيب وماتهربيش من عزومات الافراح يمكن تلاقي عريس مناسب وواضح انك عمليه زياده عن اللزوم وغالبا قافله قلبك وربنا انشاء حايرزقك بابن الحلال


onyx

ReEm يقول...

خير ما عملتي في ناس كدة البعد عنها غنيمة و ياستي هما الخاسرنين ده انتي كنتي هتنوريهم و يا ما هتشوفي من عينتهم كتير

المهم الاجازة كانت سعيدة وممعتة جدا

غير معرف يقول...

نهارها مش فايت سمية دي هي ووالتدها الرائعة
انتي حدييييييييييييـد سيبك انتي ،، اسكندرية اولى بيكي وميتها تطفي الحران بدل الساونا اللي احنا فيها

مها ميهوووو

ahmed saker يقول...

السلام عليكم

ربنا يعينك و يصبرك على البلاوي اللي انت فيها دي

و ان شاء الله ربنا يرزقك بفارس الاحلام و نزفكوا انت الاتنين على الحمارة بتاعته على احسن ترعة فيكي يا مصر

بلا سمية بلا بتاع بقي

دمت بخير

Desert cat يقول...

اصدقائى الأعزاء المدونين والمدونات
غذا السبت 12/7/2008 يتم اذاعة الحلقة الاولى من اجابات السيارة الطائرة فى برنامجنا الاذاعى
انت تسال والكمبيوتر يجيب
الذى يذاع يوميا الساعه 9.10 صباحا على اذاعة البرنامج العام ما عدا يوم الجمعة
ويتم اذاعة كومنتات
سلوى سمير
وليد ابو السعود ( ميسو سوب )
جيهان على
مخمد الكومى
ميس سوسا

يمكنكم سماع الحلقة مباشرة فى نفس موعد اذاعتها الساعة 9.10 صباحا من خلال موقع البرنامج
http://dear.to/cairo
تمنياتنا بدوام التواصل

الـجـدة فـصـيـحـة يقول...

السلام عليكم ورحمة الله وبركاته

جارتك ووالدتها في منهم كتير جدا وللأسف النظرة للبنت اللى لسه مش اجوزت من صاحبتها واهلهم والمجتمع ككل محتاجة إعادة تأهيل
ربنا يصلح الأحوال
وأصلا الزواج رزق ربنا بيقدره لحكمة عنده
والواحد لو فكر ان في فأيده نعك كتير اوي مش بيشكر ربنا عليها وبيطلب نعم أو رزق لسه مش جاله
هايعرف سبب المنع

وفي جملة بحبها جدا بتقولك
" لو فتح الله لك باب الفهم في المنع لعاد المنع عين العطاء "

دمتِ في رعاية الله

كراكيب يقول...

ههههههههههههههههههههه
اولا: حلوة اتش النار اللي في دماغي دي
ثانيا:اوعي اوعي تاني كدى الاقيكي جايبة سيرة كلية خدمة اجتماعية تاني على لسانك
دي كلية زي الفل اول ما تدخليها تحسي انك في زريبة ام جوحـضـيـض اللي في كفر ابو زلومة
حاجة كدة تكنن نكننننــن وتفتح نفسك للحضور وللدراسة وتحسي انك في كلية من كليات القمة
قال خدمة اجتماعية قال..
"كليتي دي على فكرة" :) شفتي الهنا اللي انا فيه
واهي بتاعت خدمة اجتماعية اتجوزت وانتي رايحة تتشي :)
ثالثا بقى وده الاهم: انتي يا سوسااا
عاااااسااااااال

miro el niro kwaniro

semsem يقول...

على فكره اسلوبك فى الكتابه بحبه اوى
ودمه خفيف اوى كمان
ومتزعليش بقى من صحبتك دي
ياستى كبري
وانا واثقه ان ان شاء الله ربنا هيكرمك بالزوج الصالح
ويكون راجل بجد
لان معدش فيه راجل بجد
اشوفك على خير
بجد بوست حلو
:))))))))))))))))))))

موناليزا يقول...

كان بناقصها العزومة اللى تحرق الدم دى

كيكى عوووووو يقول...

عوووووووووووووووووووووووووو
انا جيت اتخديتى
............................
ياستى فكك..ومتشيلش هم
فكك
.......................
اهم حاجة انك تكونى بخيرررررررررررر
هههههههههههههههههههههه
دمك سكر بجد
عوووووووووووووووووووووو

رئيس جمهوريه نفسى يقول...

للاسف ناس كتير بتفتكر انى الناس مش حتفرح لها ايام ما كنا فى المدرسه كانت فى ناس بتخبى المجموع بتعها وفى ناس بتخبى التقدير على ايه الله اعلم
ربنا يحفظنا منهم ويكملهم بعقلهم يارب

شفـقــة و إحســــان يقول...

ههههههههههههههههههههه
معلش يا سوسو كلنا لها وعلى فكرة انا سبقتك ورحت اسكندرية بس علشان اتش احسان لحد ما غرقته

ahmed يقول...

كاتب موضوع عنك
يهمنى رايك

سوسا ومودى يقول...

سوساااااااااااااااااا
وحشتييييييييييييييييييييينى أوى أوى أوى
عامله أيه
أيه يا بنتى الاغنيه الجامده اللى أنتى حطاها
أنا بمووووووووووت فيها
وعلى العموم عاااااااااادى خالص يا بنتى
كل واحده عامله نفسها فلحوسه وقال أيه بتخبى
هوة فى حاجه بتستخبى أصلا
يلا بخاطرها
الله يسهللها
يا بنتى وبيخبوا فى كل حاجه
حتى الشغل
متعرفيش أن صحبتك اللى واكله شاربه معاكى أنها أشتغلت الا لما تستلم
بينى وبينك أنا أصلا متغاظه على الاخر
مهما لو يسلموها لله كده
والله حتعدى
لكن ليه بقى ميحرقوش فى دمنا

وحشانى ولاله أنا خلاص ربنا نتعنى من الامتحانات وخلصت
ورجعت

funckydoctor يقول...

تشششششششششش
ربنا يرزقلك بسيد سيده
وابقى قولى فانكى قال :D

سبهللة يقول...

فينك ياحاجة

rovy يقول...

عندك حق فيه ناس نفوسها بقت غريبه
كل يوم بنقابل نماذج من ناس تخنق عاوزه الخير لنفسها و بس و بيتهيألها ان الناس كلهم بيحسدوها و ده لان نفوسهم ضعيفه و لانهم هما اللى اكيد بيحسدوا الناس .. ربنا يلطف بينا و يرحمنا منهم .. ويهديهم لانفسهم ..

تحياتى

Desert cat يقول...

اصدقائى الأعزاء المدونين والمدونات
موعدنا السبت 19/7/2008 مع حلقة جديدة من برنامجنا الإذاعى
أنت تسأل والكمبيوتر يجيب
الذى يذاع يوميا الساعه 9.10 صباحا على اذاعة البرنامج العام ماعدا يوم الجمعه
والحلقة تتضمن رودو المدونين الأعزاء على سؤال من المخطأ ( الطلاق بالمحمول )
والتعليقات التى ستذاع
سومه
سلوى سمير
رافتولوجيا
عدى محمد يونس
habiby
ميسوسوب
استرالي
دعوه للأمل
أيوية
احلام اليقظه
مجرد خواطر
mohra
جيهان على
عبده الرايق
هانى ميشيل
ٍSOU
حاجات جوايا
روفى
مواطن مصرى

كما يمكنكم سماع الحلقة مباشرة فى نفس موعد اذاعتها الساعة 9.10 صباحا
من خلال موقع البرنامج
http://dear.to/cairo
تمنياتنا بدوام التواصل

حنين القلب يقول...

سوسن
لازم تعرفى ان كل شىء نصيب وانا والله معاكى فى حرقه الدم والناس اللى بقت وحشه بجد
طيب دى جارتك اومال لو كانت اختك بنت امك وابوكى هى اللى جرحتك بحاجه انتى محرومه منها واتهمتك انك ممكن تحسديها عليها
يا ستى سيبى اللى عايز يتكلم
كل واحد بياخد نصيبه ومش حد بياخد اكتر من اللى ربنا كاتبه ليه
وياااااااااااااا رب يبعت ليكى ابن الحلال اللى يعوض صبرك خير يا رب
سلام يا احلى سوسن

عروسة ننوسة يقول...

موتينى من الضحك يا سوسن وبعدين معاكى فى خفة دمك دى؟؟
بس مستنيه الجديد انا دايما متابعة

غير معرف يقول...

ههههههههههههه
مش ملاحظه انك بقيتي مستغله - اسم مفعول - بشكل بشع؟؟
كله كوم والتليفون ده كمان كوم
انا لو مكانك جردل تلج ماكانش حوأ معايا
هييييه .. معلش يابنتى
طنشي تعيشي وتنتعيشي
عشان الوزن
P:

Ruwida Ashour يقول...

سلام... انا بجد لفتني البراوفايل امتاعك وحبيت نعلقلك عليه...لاني شكلي حنطيح في نفس الازمة كل اصحابي يقولولي خشيتي طب بشري ماحدش حيفكر فيك حياتك كلها كتب... فيستر الله... شن الحل مش عارفة لو تعرفي نورينا

شفـقــة و إحســــان يقول...

وحشتينى اوى اوى ....انتى فينك وفين الجديد
شفقة

Eldebug يقول...

مس سوسا ... انا وقعت مش عارف منين وانتى استلقفتينى ... انا جايلك فى استشارة علمية ...
هوه ينفع نملة تحب دودة قز على الرغم من فرق الطول الشاسع مابينهم؟؟
هوه مش فرق كبير اوى يعنى بتاع مسطرة 30 سم بس كده ...
يعنى انتى مثلا لو وانتى ماشية فى مرة لقيتى الطريق قفل ادامك وبعد مااستوعبتى الموقف وبداتى ترفعى راسك ... لا ارفعى كمان شوية ... ايوة كده ... وشفتى ملامح بنى ادم من بعيد ... هل من الممكن يعنى تحبيه وكده ولا بتتعاملوا مع الكائنات دى ازاى؟
مش عارف اعمل اييييييييييييييييييه ؟!!!!

ملحوظة سيتم تدمير هذه الرسالة ذاتيا بعد 365 يوم و 3 ساعات

Soooo يقول...

يا سوسه انتي مش واخده بالك .. هي بتتعامل بمبدأ سكتم بكتم

وبيتهيألي السبب الاساسي في انها ما اتصلتش هي بيكي .. انها ساعتها كانت عامله الاضراب اللي اتكلمو عنه .. الاضراب عن الاتصال عشان زيادة التعريفه بتاعة المكالمات

وبعدين هو انتي كل ماتتخنقي شويه تروحي نازله في اي شوية ميه وخلاص .. انتي كائن مائي ولا ايه؟؟؟


ملحوظه
الف شكر على تعليقك عندي وبجد مش عارف اقولك غير ربنا يسعدك ويبسطك ويكرمك ويوفقك ويرضيكي دنيا وآخره يارب




سلاموووووووووز

M.a.r.y.o.o.o.m يقول...

كان نفسي تروحي عشان تحكيلي بس مكنش ينفع عشان مامتها ال ×××× اللي زعلتك مش تزعلي

سوسا ومودى يقول...

سوسا حبيبتى أنتى فين
؟؟
ليه متأخرة كده فى البوست ده
أنا عايزة أعرف أيه اللى حصل بعد كده
يلا بقى
بالمعدل بتاعك ده مش حتخلص
وحنعرف الطريق الى الكوشه بعد ما نكون تجاوزنا من العمر أرذله
أرجوكى الحقينا بنصايحك يا أوختى بسرعه

كمان عندى طلب ومن فضلك ساعدينى
عشان أنا جبت أخرى بصراحه
أزاى أضيف أغنيه للمدونه بتاعتى تشتغل أول ما حد يدخل على المدونه
زيك كده أنتى حاطه أغنيه كان ياما كان
من فضلك قوليلى بالتفصيل
مستنياكى
متتأخريش فى الرد
سلااااااااام يا قمرين

شفـقــة و إحســــان يقول...

وحشتينا عامل ادور عليكى يا سوسة
انتى فين؟؟
شفقة

Herr Esharif يقول...

اول مره اخش المدونه هادى وان شاء الله مش حتكون الاخيره ...
حبيت طريقتك الساخره فى سرد القصه هل أضحك من جملة ( أصلى انا اتصلت بيك) او أعصب من جملة الام ( اقفلى السماعه احسن ما تقطعلك الرزقه ) او اتعاطف معاك فى حكايتك مع الشغل وغيره وغيره .. مواقف كتيره فى موضوع واحد ورغم كترتها لم احس بالملل ابدا ...
ان شاء الله بعد ردى هذا رح يجيكى عريس وابقى قولى عبدالله قال ههههههه ...
بس على فكره مرات تبقى غير متزوجه احسن من متزوجه وتعيسه فما تخليش العريس اكبر همومك ..

إيثار يقول...

اهئ اهئ اهئ
و الله زعلتيني
عموما روحي ان اسكندرية
و ارتاحي خالص و سيبك من الناس دي

اه كنت هنسى
انتي ليكي عندي واجب
مستنية تشريفك لمدونتي
عشان تخديه

المـــفـــــــقــــــــوعـــــة مــرارتـهــا يقول...

حمد الله علي السلامة
جيتي من اسكندرية امتي
انا كنت هناك
مش كنتي قلتي واحنا كنا نتش دماغنا في البحر سوي
ده اللي يتش دماغه لوحده يتعب

قررت أكون عانس يقول...

اخبار دماغك ايه دلوقتى

تشتيها فى المية و لا لسه

أُكتب بالرصاص يقول...

كل سنة وانت طيبة
انا برضه اللي فقعني ...حكاية انها ماتصلتش


بس تعرفي


كل الابحاث اللي ذكرتيها لها اهمية كبيرة وانا نفسي بابحث فيها في اوقات فراغي

قطع البتنجان من المقوار
وكلكعىة الشاميل دي مصيبة مدوخاني
وانفجار المنبار ملهاش حل
لكن حليت مشكلة هبوط الكيكة ...
نبقا نسخن الفرن قبل ما ندخلها


مدونة رائعة
تحياتي

Humman being يقول...

أنا بعيش كل يوم تجربة صعبة زى دى ويا سلام بقى لو رحتى الفرح هتلاقى الآتى
واحدة هتتجنن من كتر فرحتها بالدبلة فتحطها فى وشك من باب انها حاجة مدورة
واحدة خايفة على خطيبها منك
واحدة مقعدها جوزها وراها لحسن تحسديهم
كلمة عقبالك بصعبنة
كلمة عقبالك بشماتة
كفاية كدة ولا أقولك كمان؟!!!!