.
قولت يا بت يا سوسة لا مابدهاش لازم اتناول الموضوع بالمغ والمرش (حركات تنظيفية تتم باليدين واحيانا بالرجلين لغسل الهدوم) واهبدكم بيبر(مقالة) احتمال تتنشر في الـ آي تريبل إيه (IEEE) ولا اخد فيها جايزة نوفل في التصنت ولا ذهبية الاوليميباد في رمي الودن.
اولا سوء الاختيار
يعني يا حضرة الزوج الكريم الدين قالك (فاظفر بذات الدين تربت يداك)
تخيرت ذات الدين ولا جريت ورا الكيميا والفيزيا اللي طالعين فيها اليومين دول والاغلب الاعم معادلة الكيميا اللي بتتجانسوا معاها هي
جميلة + بيضا + ممشوقة القوام + صغيرة + دلوعة = اتكب علي وشك واجري اخطبها
بكرة تمرض مين هيسهر جنبك ولا تنشغل في عملك هتقف فوق راسك تقولك قوم فز فسحني ديه مش عيشة ولا هتتحمل معاك الحياة بحلوها ومرها وتقدر مسؤلياتك وتكون من اللي ينطبق عليهم القول (وراء كل عظيم امرأة طلعت عين اهله فركز في عمله).
عموما حكمتي المتواضعة بتقول اذا كانت مقومات الزواج بالبنت
(الدين + الجمال + المال + النسب + الاخلاق)
ولان هناك عدالة في توزيع الارزاق بين البشر فانا اري ان البنت لو زادت في حاجة اوي اكيد هتنقص في حاجات تانية اوي ولكل قاعدة شواذ .
الدين قالك (تخيروا لنطفكم فان العرق دساس) امعنت نظرك في الاسرة اللي رايح تناسبها ديه ؟! (اكفي القدرة علي فومها يتكب الفول منها) راقبت حماتك شوفت دي ست طيبة ولا متحكمة ومسيطرة لان في الاغلب الاعم البنت بتبقي استنساخ من امها .. لما جيت تناسب حطيت ايدك في ايد راجل البيت ولا في جيبه قصدي في ايد ست البيت ؟! وفي المستقبل القريب لما تقع مع مراتك في مشكلة مش هتبقي عارف تكلم مين من اهلها .. ومااعتقدتش 140 الدليل هيفيدك ولا الشعب المصري كله وهتلاقي نفسك لبست في حيطة سد زي مايكونوا بلوك بيها وخلعوا هم .. بديهي يعني ان الاسر اللي الموازين فيها مقلوبة مابيطلعش منها حد سوي ولكل قاعدة شواذ.
يا حضرة العروسة الننوسة عملتي بقول رسول الله (اذا جاءكم من ترضون دينه وخلقه فزوجوه ) ؟ ولا قولتي عريس يمّـاي .. وقفشتي فيه .. و اتمسكتي بالمظاهر الفارغة .. الشبكة وقاعة الفرح وفرش الشقة علشان انتي مش اقل من فلانة .. ولا علانة احسن منك .. دققتي في مدي تدينه واخلاقه وصبره واحتماله بكرة تبقي حامل و لا مريضة وروحك في مناخيرك هيستحملك ويمرضك (بتشديد الراء .. يعالجك يعني مش يمرضك) ولا هيشيلك يرميكي عند اهلك يقولهم العجلة الورانية نامت انفخوها ورجعوها .. راقبتي علاقته بامه واخواته ؟ مابكره يعاملك نفس معاملتهم بعد مايدوب السكر وتنقشع غشاوة الحب ومايبقاش غير الدين والاخلاق والطباع .. ويصحي العقل من غفوته بعد ما شبع القلب من لذته .. يصرخ العقل ايه ده انا ازاي كدا .. انا وافقت علي ده ازاي .. ويبتدي ينغص ويقرّص وعايز يلفظ الدخيل اللي اقتحم اسوار القلعة المنيعة ويبتدي كل واحد يحن لعزوبيته وماسك فردة شوز (غالبا باتا) ويلطع بيها دماغه (ندما او رغبة في فقدان الذاكرة )
ويمشي في الشوارع يقول : كنتي فين يا لأه لما انا قولت آه
آه
آه
آه
وللحديث بقية (اذا شاء الله) ..
24 التعليقات:
رااائع يا سوسه والله
فعلاا دي الاسباب وعلي فكره كلنا تقريبا عارفينها بس للاسف ساعت الجد محدش بيعمل بيها
اسمحيلي امدح اسلوبك للمره المليون :)
كلامك صح
وصح جدا كمان
معاير الجواز عندنا غريبه جدا
بس الكارثه بجد اننا مش بنتعلم من اخطاء الغير
وان كذا لما اتجوز كده الجوازه باظت
لأن بنكرر نفس الخطأ بنفس الطريقه
تمام يا فندم
=======
للاسف بنجرى ورا الاعلام والتليفزيون ومعايرة وهو ده اللى جايبنا ورا
بصى يا سوسو المشكلة اننا بقينا بنبص للمظاهر كتير قوى حتى اهالينا كمان مش عارفة لية رغم المفروض انهم اول ناس يافتوا نظرنا عشان نحسن الاختيار
و كمان زن الناس علينا كبنات بيخلى البعض فينا بيبقا متهور فى اختيارة المهم انها تبقى عروسة و تلبس الفستان و تهرب من طابور الحث عن عتريس قصدى عريس يابوى و بعد كدة ترجع تغنى ظالموا
تعرفى ان فى بنات بتفضل لقب مطلقة عن عانسة قال اية اصل المطلقة فرصتها افضل من البنت
شوفتى الهنا الاى بقينا فية
بلاش باة تقلبى المواجع يا بنتى على حالا الى كل يوم بيبقا للاسوء بتفكير بعض الناس فينا
بس سيبك انتى اسلوبك جميل و يا اختى معكيش شكولاتة لاختك الغلبانة
اقولك خبر وحش لو تجبنا سلبياتنا فى الموضوع ده فده هيكون على اقصي تقدير بنسبه 10% لو انتى ام وجه لبنتك عريس متدين ومحترم جدا بس مش لاقي ياكل هتجوزيهاله اوعي تقولى اه
الموضوع معقد جدا ومفيش فيه نجاح الا بتوفيق ربنا مش اكتر مهما عملنا خطط وحسابات
والله دمك زي العسل يا فيفي
مش ممكن خفة الدم ديه هما العرسان ايه ما بتشوفش
والله دمك زي العسل يا فيفي
مش ممكن خفة الدم ديه هما العرسان ايه ما بتشوفش
سوسه الاموره: سعدت جدا بزيارتك لى .. ارجو الا تنقطع الزياره وتفضلى فاكره عمك فشكول على طول .. وبعدين رخلت على مدونة حضرتك وقريت دعوه للتصالح ( صعب يا بنتى ) الخناقات على ودنها فى كل البيوت خدى عندك : رخول رمضان .. يا نهار اسود .. البلحبقى بـ20 جنيه والرخيص منه بـ12 جنيه وفيه زبيب وكنافه وعرق سوس وتمر هندى دا غير البلوه المسيحه .. اللحمه..يادى النهار اللى مش فايت.. ما علينا يخلص رمضان يطلع العيد والهدوم الجديده والجزم والمصروف شوفى بقى كام واحد فى العيله واحسبى انت بقى وبعدين نخش فى العيد الكبير والعيد الكبير زى الصغيروبعدين ايام الامتحانات والبلوه الكبيره والمهببه الدروس الخصوصيه والعيال معذورون او معذورين اصلهم ما بياخدوش حاجه فى المدرسه قال ايه عشان العيال يتعلموا.. والله ما انا عارف بيتعلموا ليه .. اهو جهل واستهبال وخلاص .. امال يعنى نصرف الفلوس فى ايه .. شوفى يا سوسه .. وسواء اسمك سوسه دلع يعنى .. او اسمك سوسه .. حاجه تانيه ؟؟ انا حااعتبرك سوسه دلع وماليش دعوه بالحاجه التانيه عندنا 8 مواسم كل عام مطلوب فيهم كتير قوى .. قوى .. قوى ونهارنا متفشكل ان شاء الله .. لازم الناس تمسك فى خناقات بعضها ويفرشوا لبعض الملايات والسجاجيه والبطاطين كمان ولو طالوا يفرشوا الاقيسه حيفرشوها وعشان كدا لازم تكتر حالات الطلاق .. ويمكن ما حدش حيتجوز من الاصل .. وبعدين انا اسمى ايه؟
تحياتى ليكى
بالفعل ابدعتى
اد ايه بنغلط فى اختياراتنا لأن اسس حكمنا على الشخصيه غلط
وبالتالى بتكون النتيجه مشاكل وخناقات تؤدى للطلاق
بالفعل بوست رائع تماما ولا يحتمل اى اضافه
اللطيفة الظريفة سوسة/
السوس مع الأسف لم يترك علاقة سليمة إلا نخر فيها وأتى عليها من القواعد. والحق أن السبب الأساس في الطلاق هو جهل الناس بالغاية الكريمة منه. فإن الشاب الآن عندما يقبل على الزواج لا يسيطر عليه إلا مطلوب واحد هو المطلوب البيولوجي الذي يتوغل في تلافيف دماغه وينخشش فيها، ويملأ عليه أقطاره فيصيبه من جرائه العمى والطرش والهبل فلا يرى غيره، وإذا أضفنا إلى هذه الرغبه ما يشاهده من مناظر خرافية في الكليبات والنت والقنوات الفضائية للفتيات العاريات المنفوخات والمسلكنات - أي اللاتي يصطنعن السيلكون- فحتما ستكون معايير الزواج عنده هي المعادلة الفاسدة التي ذكرتيهاآنفا. والفتيات كذلك لا يدفعهن إلى الموافقة السريعة العجلى سوى الرغبة في الاستقلال وممارسة الأنوثةوالخوف من فوات قطار الزواج والخوف من الفوز بلقب عانس . والأهل بالطبع يرغبون في ستر بناتهن والتخلص منهن فمن هنا لا تجدين أحدا يحاول أن يتحقق من تلك المبادئ الشريفة التي ذكرتيها،ولا أحد يعتبر بتجارب الآخرين، فكل مجرب لا ينصح غيره إلا بعدم الزواج. والفتى حين يرى الفتاة يبلم وتتكهرب أوصاله ويصيبه الهبل والبله، ويرى الدنيا أمامه وردية، وأنه قد التقط حورية من الجنة، ولا يصدق نفسه أنه سيمتلك يوما هذه الكتلة اللحمية المتحركة ويتحكم فيها ويذل أنفاسها ،وهي أيضا يصيبها الخبل والعته ويتوقف عقلها إلى حين، وطبعا لأن الرغبة مزروعة في بني آدم بالفطرة فإن الأمور تبدو لهم وردية فتغشى أبصارهم ويحلو كل في نظر الآخر تماما مثل السكر الذي يغلفون به البراشيم ليحسن مذاقها ويسهل بلعها، وعندما نبلعها وتتلقفها المعدة ثم نتكرعها نشعر بمرارتها الشديدة وذلك بعد أن يتم خداع حاسة التذوق. ثم بعد ذلك يلطم الطرفان الخدود ويشقان الجيوب ويلعنان اليوم الذي التقيا فيه ويلعنان من تسبب في لقائهما فتبدأ إجراءات الطلاق أو الخلع أو الخيانة أو القتل أوالتكييس- نسبة إلى تعبئة الزوج في كيس بعد تشفيته - أوالتبطيس - نسبة إلى إذابة الزوج بعد تخديره في منقوع البطاس حتى يذوب لحمه وتذوب عظامه ثم يصرف في دورة المياه دون أن يعثر له على أثر - وقبل أن أنسى بالنسبة لمسألة الدين هناك مبالغات كثيرة تحدث في هذا الصدد؛ فإن زميلا لي من المعيدين الكحيانين - وهو للعلم طول بعرض - ذهب ليخطب إحداهن، فجلس إليه أبوها وأجرى معه تحقيقات عسيرة، وسأله كم تحفظ من القرآن فلما أجابه راح يختبره في القرآن كما يحدث عند سيدنا في كتابه وراح الولد أقصد العريس يجيب والشيخ يسأل ورغم أن الولد/ العريس أحسن في التسميع فإن أبا العروسة رفضه ورفض كحيانين آخرين كثيرين من أصدقائنا رغم حسن خلقهم وتدينهم وتسميعهم لما طلب من سور. وصديق آخر من المعيدين الكحيانين، حسن الطلعة والهندم حسن الإسلام، رفضه أبو العروسة- وهم أناس متدينون- لأن شقته سعتها 80 مترا فقط وهو على حد قوله: من أناس يحبون الفشخرة والفرش حتى يباهي أعمامها، وقد قال لي هذا الكحيان أن أبا العروسة يقطن في شقة سعتها 60 مترا فقط، وأنه قد زوج ولده منذ أشهر قليلة في شقة سعتها 60 مترا أيضا ومع ذلك لا تعجبه شقتي وتم بناء على ذلك فشكلة الأمر !!!
آسف جدا جدا على الإطالة وأنا مستمتع جدا جدا بأسلوبك الرائع الذي أطلقت عليه أسلوب ( الغزل والنقض ) وقد استنبطت التسميةمن قول الله تعالى:(( وَلَا تَكُونُوا كَالَّتِي نَقَضَتْ غَزْلَهَا مِنْ بَعْدِ قُوَّةٍ أَنْكَاثًا )) فأنت تشدين انتباهنا في أول عباراتك بأشياء نتوقعها - الغزل- ثم سرعان ماتنقضينها إلى ما لا نتوقعه - النقض- فنصير بذلك مندهشين للمفارقات التي تجري بكثرة في كلامك فشكرا لك على ما أمتعتنا به وأدهشتنا ونحن في انتظار المزيد .
فعلاااااااااااااا
كلامك في الجوووووووووووووون
واول سبب هو الاختيار فعلا
وكتير بيتجهو للشكل فقط ومش بيفكرو في شي تاني
منتظره البقيه
ايه الحلاوه والجمال ده كله
مدونه فوق الممتازه
انا كمان عندى مدونه ياريت تشوفيها وتقوليلى رايك
www.afashatko.blogspot.com
وبالتوفيق يارب دايما
انا متفقة معاكي تماما
وانا كنت في فترة قلت اعمل شاطرة واشتغل خاطبة وفتحت مواقع جواز النت وقلت اوفق راسين في الحلال
لكن الاسباب اللي قولتيها دي هي كانت السبب الرئيسي والفرعي في فشل الموضوع
وكتبت دع عندي في بوستين هم
جميلة رشيقة بيضاء
والثاني
احقاقا للحق
عزيزتي
جميل ما كتبت و مجهود محمود
كتبت موضوع من وجهة النظر الرجالي بعنوان صك الملكية ياريت تزوريني و تديني رايك
اسباب تاخر الزواج و العنوسة سواء للرجل او المراة تتخللها اسباب كثيرة و معظمها اجتماعية و اقتصادية
و اسباب الطلاق عديدة و النسبة العالية مستحدثة في مجتمعنا و ايضا معظمها اجتماعية و اقتصادية
مستعد للمناقشة او الذهاب الي تحليل الاسباب
تحياتي
نسيت
انت فعلا تملكين خفة دم و لسان لاذع
خفة الدم مطلوبة اما اللسان الناقد الحاد ارجو انه يكون علي الورق فقط لانه بيخوف العرسان
تحياتي
انا باذات مش حعلق و اكيد انت عارفه السبب
بس كل الي اقدر اقوله :
الله يخرب بيت كيوبيد
وانت عارفه ان مرايه الحب عاميه و طارشه و خارسه
اولا سوء الاختيار
وضعتى فعلا إيدك على الجرح
وتناولتيه بإسلوب رائع
ويارب نتعلم إزاى نختار ومنخدعش بالمظاهر
تقبلى تحياتى
دمتى بود
فى إنتظار باقى الأسباب
بكره نقعد على الحيطه ونسمع الظيته، مثل شعبي درس معادلة الجواز كويس
السلام عليكم يا سوسة
اولا مرسي جدااا على زيارتك
ثانيا عجبنى موت تعليقك حلو اوي
ثالثا
انتى عندك حق فى اللى انتى قولتيه
و بالمناسبة للمقوله اللى بتقول وراء كل عظيم امرأة
انا بقا بكملة
بإمرأة اعظم منه
وده بجد
الاعتدال فى كل حاجه حلو
و الروح الجلوة هيه اللى بتخلى شكل الواحد حلو
لكن تعالى لملكة جمال و روحعها مش
حلوة حتلاقيها دميمة جداااا
الموضوع حلو اوي و اسلوبك كالعادة جميل بيعجبنى
تحياتى
و ربنا بعمل الخير كله لبنات حواء
سلام
سوسة
اللى بيحصل يا عزيزتى ان كل واحد لابس قناع وبيدارى عيوبه وما بيظهرش الا الكويس اللى موجود فيه .. فطبيعى ما حدش هيعرف الكويس مين واخدالى بالك؟
تقبلى تحياتى
ليس الامور بهذا السوء بيضه وممشوقه وكلام من ده ودي لم يكون فيها المواصفات دي هتبص للرجاله علي ايه يا حسره
بالتاكيد كلنا نقيس علي الدين ولكنني اامن ايضا ان الروح مفتاح الصروح صروح عائليه ناجحه ليس الشكل هو الاساس وبالتاكيد اللورد دوريان جراي يعرف هذا ويمكنه ان يخبركم به والافعي تعرف هذا ايضا
الوشوش زي الفلوس بتروح
شكرا ليكي
يا ستى احنا مالنا
ما يولوعوا فى بعض
بهزر و الله
بس بعيد عن الهزار اسبابك كلها منطقيه و انا فى انتظار الجزء التانى
مين بينادى؟؟
سامعة حد بيجيب فى سيرتى ويقول عروسة ننوسة؟؟
عايزة ايه منها يا سوسة؟؟
ههههههههه
تعرفى يا سوسة لو اختيار شريك او شريكة الحياة كان على اسس الاخلاق والدين والالتزام كنا هنبقى حاجة حلوة اوى لكن للاسف الاختيار دلوقتى مبنى على اشياء تانى ومعايير لا اخلاقية
عموما عليكى ان تتحرى انتى الدقة فى الاختيار حتى لو فاتك القطار
أخيرااااااااااااا سوسا رجعت للعأ تاني:P:P:P
إرسال تعليق