أميـن الونـش هيشيلـهااا

دماغي كانت عاملة زي براد الشاي اللي اتنسي علي النار وهو بيغلي .....حاسة ان دماغي مساحتها اصبحت اصغر من الافكار اللي فيها ...الافكار بتصوت ف دماغي ...سامعه الف صوت بيتكلم ....كل ده وانا ماشيه في الطريق وعفاريت الوسوسة ركبت دماغي وابتدت تتسلي بية وكل عفريت منهم يطلعلي بفكرة شكل
ازاي اوافق .....؟

هو انا اتجننت ف عقلي ولا ايه .... اقابل ازاي واحد انا معرفوش ...... طيب هو هيقول علية ايه ..... اكيد هيقول دي سهلة ..... اكيد هنزل من نظره .....ايه اللي خلاني وافقت .

كل الوساوس دي من عفريت واحد .... يجي اخوه العفريت التاني ف ودني التانيه ......هههههه يا سلام يا اختي بتفكري دلوقتي ايه اللي خلاكي وافقتي ..... انتي اصلا ايه اللي انتي هببتيه م الاول .... في بنت محترمة تعمل كده .....؟
عايزة تتجوزي من ع النت ..... ليه هم اللي علي ارض الواقع خلصوا ولا ايه ..... بزمتك في بنت محترمة تسجل نفسها علي موقع جواز ....... لا وايه من ورا مامتك ......بزمتك مش مكسوفه من نفسك
ميلحقكش العفريت ده يخلص كلامه الاقي واحد تالت نط ف عبي وبيشدني من قفايه .......يا بنتي ارجعي .... هو انتي تعرفيه ده منين اصلا عشان تروحي تقابليه .....افرضي طلع انسان مش كويس ..... ارجعي ارجعي
كل دول كوم واخوهم الكبير ابليس كوم تاني ..... سابهم يتكلموا براحتهم وهو استلمني ف الاخر
يا بنتي بلا عبط ما النت زيها زي الخاطبه بتاعة زمان ايه الفرق يعني وبعدين انتي اصلا مفكرتيش ف الفكرة دي الا بعد ما (اية) ما قالتلك ان صاحبتها اتجوزت عن طريق الموقع ده ..... ايه هي (اية )موضع شك ولا ايه ... دي حتي منتقبة .... وبعدين هو خلال الاسبوع اللي اتكلمتوا فيه ظهر منه أي حاجه تدل علي انه مش محترم
مجرد ان الكلمتين دول جم ف دماغي خطرلي صوته واحنا بنتكلم ف التليفون .... ياه اد ايه كلامه رقيق ... اد ايه محترم .... صوته دافي وحنين .... صوته زي البحر عميق جدا ......فيه كل حاجة ممكن تتمناها أي بنت ... شخصية محترمة دمه خفيف مثقف .............قولت لنفسي وانا بحاول اقنعني .... ان شاء الله انا نيتي خير اكيد ربنا هيكتبلي خير .

بجد مكنتش شايفة الطريق قدامي .... اتهيألي اتخبطت ف كتف عشرات الناس وانا ماشية من التوهه اللي كنت فيها .....معرفش مشاعري كانت عبارة عن فرحة باني لاقيت اللي بتمناه ... ولا خوف من مقابلة مجهول ولا احساس بالذنب ولا كل ده مع بعضه
وفجأة رن الموبايل ....حسيت اني اتكهربت انا عارفة انه هو اللي بيتصل .... صوتي اصلا مطلعش ولاقيته بيقولي ...ايه انتي فين انا واقف مستنيكي ......
وصلت قدام كوستا عباس العقاد زي ما قلي وتعمدت اني ابعد شوية ..... ولسه بحاول ارن عليه لاقيت موبايلي بيرن ...لسه هرد لاقيت صوت من ورايا ....

ايه بس هتردي علي مين ............!!!!!!!!

بعد ما استقرت بينا القاعده علي الترابيزة اللي في بتطل علي فيو شارع عباس العقاد ..وده كان اختياره عشان يتابع العربية لانه راكن قدام المطعم علي طول .... رغم انه قالي مفيش خوف عليها لما استغربت انه هيسيبها ف المكان ده ... ووصي السايس قبل ما ندخل الكافيه

وقاله ابقي خلي بالك بقي ...
كل ده وانا اصلا مش مركزة حتي ف ملامحه ... كأني بحلم كأني مش في وعيي لدرجه اني مكنتش بتكلم
هو كان بينط كل الحواجز تقريبا مبطلش كلام كان عامل زي السائل اللي بيتغلغل في حتة سفنجه
كلمني عن نفسه ووالده اللي قضي طول عمره في الامارات وازاي علمهم يعتمدوا علي نفسهم ف غيابه خصوصا ان والدته متوفية ... وحكالي عن شغله وقد ايه بيحبه وقد ايه الطيران متعه
وكلمني عن نفسي .... كأنه يعرفني من ساعة ما اتولدت .... كلامه بجد خلاني حاسة اني بعوم فوق سحابه ناعمه
كل حاجه بيعملها كانت جديدة حتي تعبيراته في الكلام ....... وقدر يضحكني لما قالي اتهيألي انا دوبت النشا اللي ممكن يكون بينا ف الاول اهو اتكلمي انتي بقي
ولاول مره اتكلم بعد ما ابتسمت علي اللي قاله ..... قلتله ....اه زي ما قولتلي لما كنا بنتكلم ف التليفون .... صحيح انا بحب الراديو بس بموت ف التليفزيون ...لما كان قصدك انه مش كفايه تسمع صوتي لازم تشوفني
وابتديت احكيله عن نفسي ... بجد كنت طايرة علي جناحه وانا حاسة باهتمامه بي وانا بتكلم
وف وسط الكلام استأذن مني يتكلم ف المحمول ... لانه كان الاصول يكون ف الشغل دلوقتي عشان يعرف الاسكيدوال بتاعه ..... جدول الطيران يعني .... وخرج بره الكافيه لان الشبكة واقعة جوة ... ورجع بسرعة وهو وشه متغير وجايب الوان ....
ييه الشحن خلص ....
انا : طب ما تتكلم من تليفوني يا طارق
طارق: ايه قولتي ايه ...... الله لو انا اعرف ان اسمي حلو كده
وشي احمر وداريت خجلي وان بديله الموبيل وببتسم
وبدا طارق يطلب الرقم وفجأه قال ابه ....ثواني وراجع يا سوسن .... باين الونش هيشيل العربية قالها وهو بيجري بره الكافيه
تابعته بنظري وهو خارج وواقف مع السايس اللي قاله خلي بالك واحنا داخلين وبيكلم امين شرطة واققف معاهم .
ما صدقت طارق خرج وابتديت انتبه للميلك شيك ستروبري اللي هو رشحهولي وابتديت ادوقه ..... ياه حتي اختياراته جميلة
وسرحت بجد ......ياه قد كده انا ربنا بيحبني ..... معقولة بالسهولة دي الاقي انسان زي ده .... الحمد لله يارب ... دي بركة دعا ماما .... قال وانا كنت خايفه ليكون لعبي ..... ده الراجل قالي من البدايه مفيش مقابلات تاني لان المرة الجايه هتبقي ف بيتنا وهو مع باباه وده بعد ما ماما ترجع من العمرة مباشرة
صحيح كل شيئ قسمة ونصيب ....... وابتسمت ابتسامة رضا وارتياح وانا بتنهد وبقول .....

الحمد لله يارب
مفوقنيش من سرحت دي الا صوت البنت اللي في المطعم ..... الشيك اهو يا فندم
انا : شيك شيك ايه
البنت : الاوردر بتاع حضرتك
انا : احنا لسه قاعدين محدش طالب الشيك
البنت : انا اسفه حضرتك ...اقعدي براحتك بس الاستاز اللي كان قاعد مع حضرتك هو اللي طلب اننا نعمل الشيك
هو طارق هيطلب الشيك ليه ده مقلش ان احنا هنمشي .... انا مش فاهمه حاجة
بصيت علي طارق بره ... مش شايفاه ... بس عربيته موجوده .... ولسه هرن عليه افتكرت ان اصلا موبايلي معاه وهو موبايله فاصل شحن كمان
اخيرا قررت اخرج .... وكنت ناوياله علي نية سودة ازاي يسيبني ده كله يعني ... ده زوق برده .... لا لازم يعرف من اولها !!!!......جوزك علي ما تأخديه ...خرجت بره باب الكافيه .... لاقيت البنت بتجري ورايا .... يا فندم يا فندم .... الشيك من فضلك ..... المهم طبعا اضطريت ادفع لان الشكل مش كويس وقررت اننا منرجعش للكافيه تاني بعد الموقف السخيف ده
خرجت بره ادور علي طارق مش لاقياه
قلت اسال السايس .... هوالاستاذ صاحب العربية دي فين
السايس : حضرتك تلاقيه ف مكتبه جوه
انا : مكتبه مكتبه ايه ياسيدي صاحب العربية اللانسر الزرقا دي
السايس وهو بيخرج الصفارة من بقه وهو بيشاور لعربية تركن : ايوه يا انسه الاستاذ رامي مدير المطعم جوه

انا : بالله عليك ياعم رك معايا انا بسأل علي الاستاذ طارق اللي كان داخل معايا الكافيه ....اللي قالك خلي بالك
السايس : طارق مين يا ست ....
انا : ياسيدي اللي قالك خلي بالك
السايس : يا انسه في ايه اللي قالي خلي بالك ده الواد ابراهيم الطيار بتاع اتيلفري (الديلفري) بتاع مطعم الساقية اللي ف اخر عباس .... وكان موصيني اول ماشوف امين الشرطة اندهه عشان رخصة الماكنه بتاعته مسحوبه

يالهوتىىىىىىىىىىىىىىىىىىىىى

سرق ال ان 73 يا امه