آه لو تعرف

آه لو تعرف يا حبيب قلبي .. وانت معايا بحس بإيه ؟

خلي شوية لبكرة يا قلبي .. الحب ده ما أقدرش عليه

-----

بص ف قلبي يا عيون قلبي .. شوف كام حاجة بتتمناك

فرحة وشوق وأماني كبيرة .. وليالي حب بتستناك

---------

ياه يوم طويل بس محستش بيه رغم ان انا عملت حاجات كتيرة في اليوم الا انه يوم جميل ..... لا مش اليوم بس هو اللي جميل كل حاجة جميلة بجد .... بعد ما انتهي اليوم باني اخدت الشاور بتاعي و لبست البونيه بعد ما عملت حمام كريم لشعري قررت اختلي بنفسي ....عملت كوباية القرفة باللبن ودخلت البلكونة بعد ما شغلت الكمبيوتر علي باقة اغاني من اختياراتي ... نجاة ..اه لو تعرف .... فيروز .. سألتك حبيبي .... وردة .. مالي.... وعليت الاسبيكر ع الاخر علشان اسمع وانا قاعدة في البلكونة
الله نسمة الهوا جميلة قوي .... ومنظر الاضاءة الصفرا وهي منعكسة ع الاسفلت رومانسي جدا .... كل حاجة بجد كانت جميلة حتي الهوا اللي حاسة بيه بيتخلل شعري محسسني بانتعاش
حطيت ايدي علي خدي وسرحت وانا مستمتعة بمنظر الشارع الفاضي الا من الراجل اللي واقف ع الناصية بيبيع البطاطا وحواليه قطة بولادها عاملين يلعبوا شكلهم تحفة ....وعربية فاخرة وقفت قدام بتاع البطاطا لقيت ايد بتتمد من جواها وبترمي حاجة ... اتلمت عليها القطط الصغيرة بعد ما بصت لامها وكأنها بتستأذنها وهي ودت رقبتها الناحية التانية كأنها بتقولهم اعملو اللي انتوا عايزين
لا بجد كل شئ ف الليلة دي جميل لدرجة اني مش حاسة بارهاق اليوم
وصوت نجاة ف اغنية اه لو تعرف حسسني كأن فيه نسمه هوا داخلة تحت جلدي بتعملي تكيف داخلي خلت جسمي فيه بدغدغة كده جميلة خلتني احضن الخدادية اللي كنت باسند عليها ايدي وانا بتأمل الشارع
وافتكرت صوته وهو بيكلمني ف التليفون .... قد ايه صوته دافي وحنين
................

فجأة لاقيت جرس الباب بيرن بشكل جنوني والباب مش بيخبط الباب بيرزع كأن قوة مدرعات هتهد البيت ع اللي فيه
قمت مفزوعة جريت ع الباب .... ايه ده لتكون الحكومة .....طب الحق ارمي الممنوعات م البلكونة ... ولا اعمل ايه.......... هي الحكومة بتقفش ف اللي بيسمعوا نجاة ولا ايه .؟... يقطعني والله ما كنت اعرف طب يرضيهم اسمع ايه.........!!!!!!!
المهم جريت ع الباب وفتحت وتقريبا لاقيت وشي خد كف تمام وانا بفتح كان هيطير عيني ..... طلعت ايد نهي اختي لاني فتحت علي غفلة وهي عمالة لسة بترزع ف الباب
نهي بانفعال شبه الصويت وهي بتحضني : ايه يا حبيبتي فيكي ايه
وعمالة تحسس ف ادية وجسمي كأنها بتتاكد ان انا مفييش حاجة ناقصة ...... فيكي ايه يا حبيبتي طمنيني عليكي .... كده يا سوسن تعملي فينا كده ..... كده يا حبيبتي ....... وهاتك يا عياط
انا وانا بحاول اهديها وبعيط برده مش عارفة علي ايه بس ان انا اشوفها مخضوضة كده منظر خلي قلبي يتقطع : بس ياحبيتي عشان خاطري بس في ايه يا نهي واحسس لها علي شعرها وابوسها من خدودها وانا خايفة احضنها جامد عشان بطنها ..... اصل عقبال عندكوا نهي حامل
وانهارت نهي علي الكرسي اللي جنب الباب علي طول وهي لسه بتنهنه من العياط ..... وانا برده لسه مش عارفة ايه اللي حصل
ايه اللي خضها قوي كده .... حلمت بية انا انتحرت من فوق السجادة مثلا .....نفسي اعرف في ايه
وفجأة انتبهت لاول مرة ان فيه ناس كتير ف الشقة ..... ايه ده ده جيرانا كلهم هنا .... عم حفظي الموظف بالمعاش واقف بيمصمص شفايفه وكأنه بيتفرج علي فيلم اليتمتين وحاطط ايده ف جيوب جاكتة بجامته وبيقولي لا لا ملكيش حق يا دكتورة
وابلة مايسة طالعة بكامل مكياجها وبعباية شيك جدا والدهب في كل حتي عليها يزغلل العين .... وبرده موجهة الكلام لية ......اسموا كلام كده....!!!!
كان مولد الصراحة كل واحد بكلمة .... إن حد يريحني ويقولي في ايه ؟

ابدا !!
المهم نهي فاقتت من عياطها .... وابتدت تقوم وطبعا منسيتش كالعادة تقوم بسلسلة اجتماعيات
ربنا ميحرمنا منك يا طنط مايسة
يارب ما نتخض عليك ياعم حفظي ..... وازيك ياطنط ام امل وامل عاملة ايه
المهم الجمع المحتشد ده بدأ ينصرف وهم بيباركوا لنهي بالاطمئنان عليه ..... وانا زي الاطرش ف الزفة
وقفلنا الباب ولاحظت ان فيه شخص واقف منزلش وقاعد علي كرسي الطقم وعلي وشه ابتسامة ...... الا مين الاخ ده ..؟
وطبعا سمير قاعد جنب نهي بيطمن عليها وبيقولها شفتي ياستي مش قلتلك تلاقيها نايمه و مسمعتش .... كان ايه لازمته القلق
انا وانا بضحك ...... نهي ربنا يسترك والنبي تقوليلي في ايه .....!!!!
نهي : بتضحكي ياشيخة حرام عليكي ده انتي خلتيني كنت هولد قبل معادي
انا : ايوه ليه بقي .... ايه اللي حصل
نهي : لا يا ستي بسيطة ماما اتصلت بحضرتك علي تليفون البيت وعلي الموبيل وسعادتك مبترديش
انا وكأني افتكرت .... يانهار ابيض ( اصل ماما راحت تعمل عمرة رجب ومبتنمش قبل ما تطمن علية واكيد اتصلت وانا ف البلكونة ومسمعتش )
نهي : فطبعا اتصلت بيه وانا اتصلت بيكي وبقالي ساعة وانتي برده مبترديش يبقي اكيد فيكي حاجة
قمت جرييت عليها وحضنتها وبوست راسها ......يا حبيتي
سمير جوز نهي : يالا حمد الله علي سلامتك يا دكتورة الحمد لله اننا اتطمنا عليكي .... مش يللا يا نهي الساعة بقت اتنين ورايا شغل بكرة
نهي وهي ماسكة دماغها : لا بعد الخضة دي مش قادرة اتحرك روحوا
............ روحوا .... الله ده يبقي اخينا اللي قاعد هناك ده معاهم بقي !!!!!
سمير : طيب يا حبيبتي براحتك .... يللا يا سامر
سامر !!

سامر مين ؟!