زيارة مسعود بن هنية .. غطوني وصوتوا عليه

كنت راجعة من الشغل تعبانة ..... وكان حلم عمري وقتها يتلخص في اني اكل اي حاجة إنشالله اكل بعضي
المهم قبل الاكل قررت اعمل الهوم ورك بتاعي الاول وهو اني انشر الغسيل لماما لانها كانت خلصت الغسيل قبل ما اوصل البيت بدقايق ....تقولش ظابطة تايمر الغسالة عليَـه !!!
المهم ما صدقت الاكل وصل لمعدتي اللي كانت فيها حداية بتصوت مش عصافير ....علي طول شديت نفسي علي اوضتي طمعانة اناملي ساعتين قبل ما اقوم ابدأ اذاكر
ومفيش 10 دقايق ..... اصلا المخدة ملحقتش ياعيني تفرح بيه
الموبايل رن وانا بعيد عنكو اصلا نغمة موبايلي تصحي الميت
: ازيك يا ساااوسن .....هي هي هي هي
انا ف عقل بالي ... اه هو انت ...اصلا مفيش حد بيضحك زي العرسة اللي بتولد كده الا هو .....
الطرف التاني امهم .. المهم اني في السكة جايلكوا اهو ...اني ف عبود ...هركب الميترو ... واتقفل الخط ف وشي من غير مع السلامة ...اصل البعيد بيتحاسب بالثانية ....مشترك ف نظام كدمات
طبعا مفيهاش نوم كده
خرجت لماما لاقيتها قاعدة ماسكة التليفون
: ماما ....مسعور ... قصدي مسعود بن هنيه عمتي جاي
ماما وهي بتنهي مكالمة التليفون : طيب يا قلبي لا اله الا الله يا نهي
: ايوه يا سوسن ماهي عمتك اتصلت وقالت إن ابنها مسعود جاي عشان يقدم لاخوه في كلية الشرطة
مفيش 10 دقايق كمان ولاقينا مسعود بن هنية بيطل علينا بوشه السمح ... وهو لابس اللي ع الحبل كله ماهو جاي القاهرة بقي
بعد الترحيب والذي منه مسعود اتغدا ومعتقدتش إن دي كانت المرة الاولي اللي بيتغدا فيها النهاردة
ومش عارفة- ليه كنت غرقانة ف تأمل تقاطيعه وهو بيعذب الاكل ...قصدي بيتغدا ...ونط ف دماغي ذكرياتي عنه واحنا صغيرين – وانا بتفرج عليه وهو بياكل برده
كان وهو ف سن السادسة عبارة عن بطيخه وفوقها شمامة صغيرة واذكر فيما اذكر انه كان دايما يلبس جلابية مقلمة بالطول
بس كان منظره بيبقي تحفه وهو بيمارس هوايته المفضلة ف اكل قوالح الدرة النية (الذرة قبل ما تتشوي بيسموها كده ف بلدنا)
وبينما هو كان منهمك في اكل الذرة انا بصراحة كنت ببصله بتأمل وكل مرة يقطم قطمة ابقي متوقعة صرخة تخرج من حلقه اللي محشور فيه حبات الذرة لانه تقريبا كان بيدخل نص كفه ف بقه وهو بياكل فمن الطبيعي انه يعضه
وبعدين طبعا كف مسعود مش زي كف بكار ابو كف رقيق وصغير
المهم فجأه جوز عمتي عم عبد الله الله يرحمه اخد باله مني وانا مبحلقه في وش مسعود ... راح خابطه علي قفاه كفاه علي وشه
: ايه ياد مالك بتحش ف الدرة كده زي العجل الزرايبي وجع في بنطنك يابن هنية
وطبعا بعدها المنظر كان اسطوري ومسعود قايم وبيعيط وبيدور علي كوز الدرة وبقايا الدرة لسة ف بقه وهو نازل مضغ وعياط في نفس واحد
مفوقتش الا علي صوت مسعود
: مش جولتيلكي يا سااااااوسن بقي انا جاي مصر ليه
أنا : لا عمتي قالت يا مسعود عشان محسن يقدم ف الشرطة ... الا صحيح هو مجاش معاك ليه
مسعود : لا انا اجولكي بجا هو موش ايجا اعذينه لسه التجديم موش بدا اني جيت اشتري الدوسيه بس ... اّي كدي
مش عارفة طبعا إذا كنتم محتاجين ترجمة لكلامه ولا لا
وبصراحة فيه غرض تاني
ومع اخر كلماتته كانت ماما بتصبله رابع كباية عصير ....
اصلا مسعود ما شاء الله عليه سفنجة ...
عمتي هنية كانت بتقول- وهو طفل مع اني لو مكنتش شوفته بعيني مكنتش اصدق ابدا ان ده كان طفل – انه كان ممكن يشرب قسط لبن لوحده ... القسط في بلدنا هو الاسطوانة المعدنية اللي بيحطوا فيها اللبن وهو لسه جاي من الجاموسة عدل
مسعود مع اخر شفطة : فوتكي ف الكلام يا خالتي .. اني بجا جيت ليه مصر .. اني كنت جاعد مرة ع السخام ديه الاسمو ايه ..البتاع دي اللي اسمه النت ...
انا باستغراب : ايد ده يا مسعود ماشاء الله
مسعود : ايوه الله ... أي كدي ..كنت ايه بتصفح جريدة خوربيت اليومية
انا : ايه !!
مسعود : اجولكي اني... اصل العيال ف البلد عملو كي صفحة ع السخام ديه اللي اسمه النت سموها جريدة بلدنا .. وبم ان بلدنا اسمها خوربيت اني جولتلهم يغيرو الاسم ... أي كده
المهم يا ستي مش اطول عليكي لتنامي مني .... الا فين يا الحلو يا خالتي
ماما : حالا يا حبيب خالتك
أنا : هه ايوة يا مسعود كمل
مسعود : لجيت اعلان عن طلب مؤلفين اغاني بعيت لهم ردوا علية وجاي اتفاج معاهم
انا : الله الله الله ده انت فنان بقي يا مسعود
مسعود : لا هو اني شوية ولا شوية .. دي اني جاني فكر اقدر املك بيه زمام الاغنية .... قالها وهو بيعدل كرافتته بكل ثقة
الا ايه رأيك في الجرافتة دي الواد محسن اخويا الاهبل بيجولي عاملة زي سلبة البهيمة الشاردة
أنا : ... اسمو كلام دي شيك جدا دي تحفة يا مسعود ... بس هي كان اصلها ايه
مسعود : ايه !!
أنا : ما علينا قولي يا مسعود بقي ايه زمام الاغنية اللي انت امتلكته
ماما دخلت علينا وهي شايلة طبقين مهلبية ومحدش عقله يوزه ويفكر إن فيه واحد منهم لية .. ده ربط كلام بالنسبة لمسعود بس
مسعود وهو بيشفط المهلبية من فوق المعلقة والمهلبية يا عيني عاملة زي ما تكون عربية سيات فراملها سابت ف مزلقان
: اجولكي علي عنوان الاغنية لاول ... هتتهبلي اكتر ماانتي والله
الحقيقة مسعود كلامه بينقط شهد زي ما انتو شايفين
مسعود وهو بيشفط اخر نفس في طبق المهلبية اللي نفسه اتقطع من الجري والزحلقة ف مزلقان زوره
: عارفك الفضول هيجتلكي ..... اهي اهي اهي اهي
يا ستي العنوان بيجول

-------
بحب الكوسة يا بغل

-------
اسمعي يا ستي
اسكت بطل رغي ... مبحبش الخيار بحب الكوسة يا بغل
وهجولك ...

--------
انا مقاطعة : لا عظيم عظيم كويس خالص
مسعود وهو ف حالة نشوي مش جولتلكي امال لما اكمل
اصل يابنتي الغنا دلوقتي للحمار وللخضار اني جمعت الاتنين
:..... والله فكر برده يا مسعود
ماما : كل كل يا مسعود بالهنا يا حبيبي والنبي ليك واحشة
مسعود : الا جوليلي يا سااااوسن انتي لسة زي ما انتي ..... إهي إهي إهي
قالها وهو بيضحك مش عارفة علي ايه وصوت ضحكته كان عامل زي تزيقة الباب القديم وهو فيه عادة لما يضحك كرشو الصغنطوط يترجرج في حركة لولبية ... وملامح وشه تنكمش كلها زي ملاية السرير اللي لسة متكوتش
أصل أمي بتسأل عليكي علي طول وبتدعيلك يفوك بوارك
يا بنتي الحجي نفسك ده الجاموسة الي متعشرش وهي صغيرة خيرها بيجل
مسعود قالها وهو علي سجيته من غير أي تعديل ....جبهالي علي بلاطة ........ انا بقيت بايرة
متعرفوش كلمات مسعود اللي زي الرصاص اللي خرجت منه بعفوية دي عملت فيه ايه ..........